Ánni nga machjénsíniná nga tjín xi kʼoasjentjainá

Saʼnda ngasʼa, je chjotasonʼnde kui xi mele nga to xti koa̱nkjoan ngantsjai kʼoa nga tsínkʼia kuiyá. Tonga biyañá ngatsʼiaa. Je testo xi tíjna tʼainni jetsʼato kjoan jan jmi nó tjínle nga kichji. Kʼoa je xokitso je chjota xi Job tsakʼin. Kʼoa kʼoama kjoaixi jokitso.

Je xi nʼio mená ngatsʼiaa xi chjotaa kuinga kuiyoaa ngantsjai nichxin. Je Biblia kʼoatso nga je Niná xotsakʼé je ni̱ma̱ná nga mená kuiyoaa tokʼia saʼndani kʼoa nga mená koa̱nchoyaná tʼatsʼe nichxin xi tsínkʼia fetʼa (Eclesiastés 3:11). A kixi tíjna nga jngo Niná xi tsjoakená kʼoakʼoe je ni̱ma̱ná kʼoa tsínni tsjoáná jmeni xi mele ni̱ma̱ná. Maijin. Je Énle Niná kʼoatso nga kontraná mani je kjoabiya kʼoa kʼoatso nga “kuixo̱ya” (1 Corintios 15:26).

Kʼoatjín, je kjoabiya kontraná mani. Nijngojin chjota xi nda kjoafaʼaitsjenle xi mele nga kuiyá. Tosa kjitʼanangi bisenxinlee jmeni xi xkón síkʼéjna kjoabijnachonná. Kʼoa kʼianga sokóchʼinná nixkiñá. Chjaʼaxinlee yaoná jmeni xi kjoabiya kuichokaoná.

Ninga jekjoan nkjín jmi nó tjín je kjoabiya, a chan tjóxin. Jaon. Je Jeobá, je xi kisindaná, alikui xá kisindaniná nga to jngo jao nó kuiyoaa. Ali tsa jejin xi kʼoasʼin koanmele nga kuiyá. Je Niná kʼoasʼin koanmele nga kuiyoaa ngantsjai nichxin i̱ Sonʼnde, kʼoa jmeni xi mele sítjosonní (Isaías 55:11).

Jósʼin kjoaʼaxin Niná je kjoabiya. Jokji nga tífaʼato nichxin je chjota tjíobásjaile nga tsín ʼya xi kuiyá, tonga alikui kʼoakjimale. Kʼoa tojo kʼoatjíosʼín nichxin xi tiyoaa ndʼaibi. Je chjota científico tjíobʼénda xki kao vacuna xi tjíobʼéchjoa kʼale chʼin. Tjíokotʼayason josʼin tjínnda je kjoabijnachonle cho̱ kao tsʼe chjota. Tjín ʼnde jñani ngisa tse male chjota ndʼaibi tikʼoajinni kjoan jngo siento nóján. Tonga tojo biyañá. Tojo tso Biblia, “chao koa̱n ijngokʼani ngatsʼi” (Eclesiastés 3:20).

Tonga kʼoati tsjoa sʼená kʼianga tsín je chjotasonʼnde chóyalee nga kʼoendajin kjoa jebi. Je Jeobá jetsakʼéndajin josʼin kʼoasjentjainá xi tʼatsʼe kjoabiya. Kʼoa jé Jesucristo kisichjén nga kʼoasjentjainá xi tʼatsʼe kjoabiya.