KJOAʼMIYA 8

Choa̱ tatiui nga takoyai

Mateo 13:34, 35

XI BAKÓYANÁ: Kʼianga ngisa nda kʼuínyai kui choa̱ xi choa ñʼai tjío tichjain, xi koa̱nndosinle je xi tjíonrʼoéli kʼoa xi kuitsoyale jmeni xi nʼio chjíle.

JÓKOA̱N SʼIAIN:

Tatiui choa̱ xi choa ñʼai tjío. Tojo kisʼin je Jesús, tochoa én tichjain kʼianga kʼuínyai xi tse tíjna kʼoa kui choa̱ xi ngotjo majinniná tichjain kʼianga kʼuínyai xi ñʼai tjín. Ali toxkia tsejin én nichjain ánni nga ngotjo koa̱njinnile je xi tjíonrʼoéli. Kʼoa kui tichjain je choa̱ xi bakinle jme xi tiʼmiyai.

Kuenta tʼiain jme xi koasenkaoli. Chótsenlai jme xi tjín jña tijnai, chótʼayai je xo̱n xi kjioná kʼoa chjénngilai xi nda bakóya. Tʼetʼaxuin je choa̱ xi síchjén xi ngikʼa xi koasenkaoli nga ngisa nda kʼuínyai kʼoa tatiotjoai.
Tikjaʼaitsjain xi tjíonrʼoéli. Kui chjoéjin je choa̱ xi be je xi tiʼmiyalai kʼoa tsakuije̱ jmeni xi mandosinle. Tonga ali nisoajinlai kʼoa ali chʼaojin bʼai kon je chjota.
Kui kʼoasi jmeni xi meli kʼuínyai. Tichjain choa̱ kʼianga kʼuínyai jme xi tínchja̱ni je kjoanokjoayali. Ali choa̱jin nichjénlai je xi tomajngokao je xi tiʼmiyai. Kui katasʼejinle je xi tjíonrʼoéli jmeni xi kʼuínyalai, ali tsa tokuijin katasʼeya jko̱ je choa̱ xi kabʼejnai.