KJOAʼMIYA 58
Kixi tʼintʼalai je Jeobá
Ñá xi chjotale Cristo maa ñaki kʼoatjío tokoán nga niʼyajin kʼoa nijmejin xi kʼoechjoaná nga jchaxkoán je Jeobá. Kʼoajinti tjín tokuin tsanda ji, kʼoa je Jeobá nʼio bechjí kʼianga kixi tiʼmitʼalai (tʼexkiao 1 Crónicas 28:9). Jméni xosíkao sakʼoaná nga ñʼai maniná nga kixi mangíntʼalee je Jeobá kʼoa jméni xi koasenkaoná nga tosi tonda kixi koaan.
1. Jméni xi sʼín xi ngikʼa xi sakʼoa kotʼayakaoná tsa kixi timangíntʼalee je Jeobá
Tjínkʼa chjota xi mele nga tsín tije Jeobá si̱xánilee. Tobʼelañá, tjínkʼa xi jekisikjinle naxinandále Niná xi énndiso kaníbason kʼoa kui xi mele nga tsín tikatamakjainniná. Chjota jebi jení xi yátsʼi̱n tsakinyále Niná. Kʼoati tjínkʼa chjota xi nyatítjonle religión ndiso xi énndiso kaníbason xi tʼatsʼe testigole Jeobá, kʼoa kui xi mele nga katanroajen kjoamakjainle je xi jemakjainle tsakai. Nʼio xkón tíjna tsa je kʼoékjaoʼakoaa je chjota xi kontra batiole je naxinandále Niná, tsakui kʼoéxkiaa je xo̱n xi bʼasje, tsa ya kuitjásʼeen je página xi batíotʼa ya Internet kʼoa tsakui video chótsenlee xi kʼoati ya batíotʼa. Chjota jebi kui xi mele nga sikinroajen kjoamakjainná kʼoa nga tsín tikixi kjuintʼanilee je Jeobá. Kuinga i̱ kitsoni je Jesús: “Tikatío xi kʼoakjoan. Toxkaa kjoan, kʼoa bándiaale xi xka̱. Kʼoa tsa je xi xka̱ kjoan koandiaale je xi xka̱ kjoan, tsao̱ya nga jao jña tixʼa̱” (Mateo 15:14).
2. Jósʼin bakoá nga kixi mangíntʼalee Niná tʼatsʼe jmeni xi chjoejiaan
Nga tsjoachaa je Jeobá alikui ya nojiaan yaoná je religión ndiso. Nijmejinla xi nʼia xi ya nroani religión ndiso kʼoa alikui ya nikʼójiaan yaoná, jolani nga nixá. Je Jeobá itsole je naxinandále: “Titjojinlao”, xi tsonile, nga kuitjojinlee Babilonia xi nʼioje (Apocalipsis 18:2, 4).
KATAʼYASAI JME XI TÍNCHJA̱NI
Kataʼyala jókoa̱n sʼiain nga tsín jme xi katabʼéchjoali nga kixi kʼuíntʼalai je Jeobá. Kʼoati jchaa ánni kʼoabixónsíñá nga kixi kjimai tsa tsín ya tinojin yaoli je religión ndiso.
3. Tikuindalai yaoli je chjota xi likui kʼoatjín jmeni xi bakóya
Jmé xi tjínnele sʼiaan tsakui sʼe̱jinná nga chʼaosʼin tíbʼaxki̱ je naxinandále Niná. Tʼexkiao Proverbios 14:15 kʼoa cho̱bayaño jebi:
Ánni nga nda si̱nkjínnilee tokoán jmeni xi noʼyá kʼoa nga tsín tokatamakjain ndi̱to̱nná.
Tʼexkiao 2 Juan 9-11 kʼoa cho̱bayaño jebi:
Jótjínnele si̱koaa je chjota xi yátsʼi̱n binyále Niná.
Ninga tsín je chjakoaa je chjota xi yátsʼi̱n binyále Niná. Tonga jókoa̱nnile nga chan kʼoasʼin si̱kjaʼaitsjenñá josʼin síkjaʼaitsjen je.
Jósingái ji, jósʼe̱ kon je Jeobá kʼiatsa kui si̱siaan je én xi tsín nda síkʼaxki̱.
4. Kixi tʼintʼalai je Jeobá kʼiatsa jngo ndsʼee xi jée koa̱njngí
Jmé xi tjínnele sʼiaan kʼiatsa kui sʼe̱jinná nga jngo ndsʼee kʼoa tsa jngo tichjaa xi tíjna ya jinjtín jngo jée xi nʼio ai kabajngi. Kataʼyala je kjoatéxoma xi kitsjoale Jeobá je chjota israelita. Tʼexkiao Levítico 5:1.
Tojo tso je texto xi kabʼexkiaa, tsakui sʼe̱jinná nga nʼio ai je jée xi kabajngi jngo xíngiaa kʼoakʼuínlee je xi chjotajchínga sʼin tjío. Tonga títjonkjoanla je chja̱kaonajmiá je chjota xi jée kabajngi, kʼoakʼuínlee nga katabʼéyanajmíle je xi chjotajchínga sʼin tjío jmeni xi kasʼín. Tonga tsa likui kʼoasʼin, machjén nga ñá kʼoéyanajmílee je xi chjotajchínga sʼin tjío. Tsa kʼoasʼiaan, ánni kʼoabixónsíñá nga kui tibakoá nga tsjoachaa kʼoa nga kixi timangíntʼalee...
je Jeobá.
je chjota xi jée kabajngi.
je xi tjío ya jinjtín.
Tsa jngo ndsʼee xi kjoa kakajin, tisenkoai
5. Alikui koa̱n ya kuinójiaan yaoná Babilonia xi nʼioje
Tʼexkiao Lucas 4:8 kao Apocalipsis 18:4, 5 kʼoa cho̱bayaño jebi:
A kjiole xo̱n je religión ndiso jñani kʼoatso nga ya tijnajinle.
A tsín jme jtín tijnajinle xi ya tsjonjin yaole je religión ndiso.
A yaa tsjoánganʼiole je religión ndiso je xá xi sʼian.
Jmésani xi tjínnele sʼian nga tsín ya tsjonjian yaona je religión ndiso.
Jméni xi tjínnele sʼian kʼiatsa jñanile xi tojo kʼoatisʼian jmeni xi kasíkʼaxki̱ i̱bi.
Tojmeni xi sʼiain, kui chjoéjin jmeni xi nda kʼoe tokuin kʼoa xi koako nga kixi tiʼmitʼalai je Jeobá.
Jméni xi tjínnele sʼiain kʼiatsa ʼyani xi kʼoakuitsoli nga tʼainganʼiolai jngo jtín xi ya tsjonjin yaole je religión ndiso
TJÍNKʼA XI I̱ TSO: “Tonga tsa tsín ʼbe jotso je chjota xi yátsʼi̱n binyále Niná xi tʼatsʼe testigole Jeobá, jósʼin sitoánntjaiña”.
Jósingái ji, a machjén nga jchai josʼin síkjaʼaitsjen je chjota xi yátsʼi̱n binyále Niná. Ánni.
XI KACHOTʼAYÁ
Tsa mená nga kixi kjuintʼalee je Jeobá, tjínnele nga tsín je si̱miyoaa je chjota xi k’oanachaná.
Jmé xi kamajinli
Ánni nga tsín koa̱n kuinóʼyanilee jmeni xi tso je chjota xi yátsʼi̱n binyále je Niná.
Jósʼiaan kʼia tsakui sʼe̱jinná nga ai jée kabajngi jngo ndsʼee.
Jméni xi tjínnele sʼiaan nga si̱tjosoán je kjoatéxoma xi tsjoáná je Jeobá nga nitséjin ya kuinójiaan yaoná je religión ndiso.
XI KOASENKAOSALI
Kataʼyai jókoa̱n sʼiain kʼiatsa ʼya xi énndiso kaníbason xi tʼatsʼe testigole Jeobá.
Jókoa̱nni jchai tsa ya tsjoánganʼiole Babilonia xi nʼioje jmeni xi sʼín jngo jtín.
Jméni xi sʼín kʼa je chjota xi kontra tjíole je naxinandále Niná nga síkinroajen je kjoamakjainná.
Tʼexkiai jmé xi kisʼin jngo naʼmi nga kitjojin religión ndiso ya jñani tso: “Tsakasjaiña xi tʼatsʼe Niná saʼnda nga sʼa ʼndí kjiʼe̱”.
“Je Biblia síkʼantjaiyaa chjota” (La Atalaya, 1 de julio de 2011)