KJOAʼMIYA 46
Ánni machjénsíni nga kʼoaitʼalee yaoná je Niná kʼoa nga koanngínsʼenngindá
Kʼianga ʼya xi tsjoátʼale yaole je Niná, bʼétsʼoale kʼoa kʼoatsole nga toje skoe̱xkón kʼoa nga kui títjon sikʼéjna jmeni xi sasénle je Niná (Salmo 40:8). Kʼoa kʼianga fisʼenngindá kʼoasʼin beni je xi ngikʼa nga jekitsjoatʼale yaole je Niná. Nga bʼaitʼalee yaoná je Niná kuisa xi ngisasa nʼio chjíle kʼoa basenkaoná nga nikʼantjaiyaa yaoná. Jméni xi koasenkaoli nga kʼoaitʼalai yaoli je Niná kʼoa nga kʼuínsʼenngindái.
1. Ánni nga bʼaitʼanilee yaoná je Jeobá
Kuinga tsjoachaa je Jeobá nga bʼaitʼanilee yaoná (1 Juan 4:10, 19). Je Biblia itso: “Katamatsjoachai tsokʼoa je Nainá Nináli. Katamatsjoachani ngayije ni̱ma̱li, kao ngayije kjoatsjoali, kao ngayije kjoafaʼaitsjenli, kao ngayije nganʼioli” (Marcos 12:30). Tsa tsjoachaa je Jeobá, yaa ʼyanile jmeni xi bixoán kʼoa jmeni xi nʼia. Tojo sʼín jngo xʼin kao jngo chjoón xi tsjoake xínkjín, bixankao xínkjín. Kʼoatisʼinni xi kao Jeobá, nga tsjoacha kjoaixiaa, bʼaitʼalee yaoná kʼoa mangínsʼenngindáñá.
2. Jósʼin síchikontʼain Jeobá je choʼndale xi jekafisʼenngindá
Je xi ya tjíojin naxinandále Jeobá nʼio tsjoa tjíole, kʼoa yaa tojngo koai̱n kʼianga jekʼuínsʼenngindái. Nkjín koya jchai josʼin bakó je Jeobá nga tsjoakená kʼoa ngisaa koa̱nchriantʼalai (tʼexkiai Malaquías 3:16-18). Nʼaili koa̱n je Jeobá, kʼoa yaa kuijnajinlai je ndsʼee xi tjío jngo tjíjtsa Sonʼnde xi tsjoake je Jeobá kʼoa xi kʼoati tsjoake koa̱nli tsanda ji (tʼexkiai Marcos 10:29, 30). Tjín kjoanla xi machjén nga sʼiain nga kjesa ʼmisʼenngindájin. Machjén nga jchaxkuin je Jeobá, nga tsjoacha koai̱n kʼoa nga koakui nga makjainli xi tʼatsʼe je ʼNdíle. Kʼoa xi ijngosani, machjén nga kʼoakʼuínlai Jeobá nga toje si̱xálai tokʼia saʼndani. Tsa kʼoaitʼalai yaoli je Niná kʼoa tsa kʼuínsʼenngindái, kui kjoanda so̱koli nga nda kuijnai ngantsjai nichxin. Je Biblia itso: “Je nandá kui tsoyanile nga mangínsʼenngindá, je xi kʼoati tíbʼasjentjaino ndʼaibi” (1 Pedro 3:21, TNM).
KATAʼYASAI JME XI TÍNCHJA̱NI
Kataʼyala ánni nga nʼio chjínile nga kʼoaitʼalai yaoli je Jeobá kʼoa nga kʼuínsʼenngindái.
3. Ñá xi kuixónñá ʼyáni xi si̱xálee
Nichxin kjoatse, tjínkʼa je chjota israelita xi kʼoasʼin kisikjaʼaitsjen nga koa̱n skoe̱xkón je Jeobá kʼoa kʼoakji skoe̱xkón kaoni je niná ndiso xi Baal tsakʼin. Kuinga je profeta Elías kisikasénni je Jeobá nga kisikixiyanda. Tʼexkiao 1 Reyes 18:21 kʼoa cho̱bayaño jebi:
Jméni xi tjínnele kisʼin je chjota israelita.
Joni je chjota israelita, ñá kʼoati tjínnená chjoéjiaan ʼyáni xi si̱xálee. Tʼexkiao Lucas 16:13 kʼoa cho̱bayaño jebi:
Ánni nga tsín koa̱n kʼoakji si̱xá kaonilee je Jeobá kʼoa kʼoakji kjuintʼa kaonilee xi kjaʼaí, tsa chjota kʼoa tsa tsojmi.
Jósʼin koakonilee je Jeobá nga kui jekichjoejiaan nga je si̱xálee.
4. Kuenta tʼiain jokji tsjoakeli je Jeobá
Je Jeobá nʼio nkjín koya tjínni xi tsjoáná, kʼoa ñá jméni xi koa̱n kʼoailee. Chótsenlao VIDEO.
Kataʼyala jngo jao koyaa josʼin bakóná je Jeobá nga tsjoakená. Tʼexkiao Salmo 104:14, 15 kao 1 Juan 4:9, 10 kʼoa cho̱bayaño jebi:
Nʼio nkjín koya kjoanda xi títsjoáná je Jeobá, jñánile xi ngisa chjí ʼyatokuin ji.
Jósʼe tokuin xi tʼatsʼe Jeobá kʼianga nikjaʼaitsjenjin je kjoanda xi kanikʼaxki̱.
Kʼianga kui bʼaikjoatjaoná jmeni xi nʼio tsjoachaa, bʼaiñá kjoanda. Tʼexkiao Deuteronomio 16:17 kʼoa cho̱bayaño jebi:
Kʼianga nikjaʼaitsjenjin ngayeje jmeni xi títsjoáli je Jeobá, a kʼoati meli nga tjín xi kʼoailai. Jméni xi koa̱n kʼoailai.
5. Kʼianga bʼaitʼalee yaoná je Niná tse kjoanichikontʼain sokóná
Nkjín chjota xi kʼoatso nga kui xi tsjoa báya tokoán nga skuelangʼa mangián, nga tao̱n sʼená kʼoa nga nʼio nda bijnaa, tonga alikui kʼoatjín. Chótsenlao VIDEO kʼoa cho̱bayaño jebi:
Ningalani nʼio kitsjentʼale fútbol je xi faʼa ya video, ánni nga chan kisikʼéjnani.
A nda kisʼin nga je Jeobá kitsjoatʼale yaole ʼndele nga tosi tonda fútbol siská, jósingái ji. Ánni.
Nga kjesa chjotale Cristo majin je pastro Pablo skuelangʼa kiskotʼaya. Jé kitsoyale jngo chjota xi nda tsabe je kjoatéxomale chjota judío. Tonga nga jechjotale Cristo koan, kisikʼéjnaa ngayeje. A kʼoakoannile jmeni xi kisʼin. Tʼexkiao Filipenses 3:8 kʼoa cho̱bayaño jebi:
Ánni nga tojo tjé sʼin tsabekonni je pastro Pablo jmeni xi kisʼin nga kjesa chjotale Cristo majin.
Ningalani tse jmeni xi kisikʼéjna, jmé kjoanda xi kisokole nga jekoanni.
Jósingái ji, a ngisaa nda kuijnai tsa je Jeobá si̱xálai. Ánni.
Kʼianga jechjotale Cristo koan Pablo, ngisaa tse kjoanichikontʼain kisokole tikʼoajinni xi kisʼele ngasʼa
TJÍNKʼA XI I̱ TSO: “ʼBeña nga kʼoatjín jmeni xi bixón, tonga kje tsojin tokoan nga kjuísʼe̱nngindá”.
Jósingái ji, ánni ndatjínsíni nga kʼoaitʼalai yaoli je Jeobá.
XI KACHOTʼAYÁ
Nga tsjoachaa je Jeobá kuinga bʼaitʼanilee yaoná kʼoa mangínsʼenngindáñá.
Jmé xi kamajinli
Ánni nga bakinnile je Jeobá nga tsjoacha koaan kao ngayeje ni̱ma̱ná kʼoa nga je jchaxkoán.
Jmé kjoanichikontʼain tsjoále je Jeobá je choʼndale xi jekisʼenngindá.
A meli nga kʼoaitʼalai yaoli je Jeobá.
XI KOASENKAOSALI
Kataʼyai ánni nga je Jeobá kitsjoatʼanile yaole jngo chjoón xi se kao jngo chjota xi síská.
Je xi kjonangi xti... Jósʼin sichjén kjoabijnachonna. Jme xi kisʼin ngasʼa (6:52)
Kataʼyasai ánni nga bʼaitʼanilee yaoná je Jeobá.
“Ánni machjénsíni nga kʼoaitʼalee yaoná je Jeobá” (La Atalaya, 15 de enero de 2010)
Chótsenlai jokji tsjoa tjío kon je xi Jeobá tsjoátʼale yaole.
Kataʼyai jméni xi tsakasenkao jngo chjoón nga kisikʼantjaiyani josʼin síkjaʼaitsjen jñani tso: “Nkjín nó nga kui kisikjaʼaitsjen jmé xá tiyoñá i̱ Sonʼnde”.
“Je Biblia síkʼantjaiyaa chjota” (La Atalaya, 1 de noviembre de 2012)