Tʼejngui tokuin nga ndasʼin bekonli Jeobá

1. Jósʼin síkjaʼaitsjen kʼa choʼndale Niná.

NDA sʼe tokoán nga sasénkon Jeobá je naxinandále (Sal. 149:4). Tjínkʼa xi i̱ tso: “ʼBeña nga sasénkon Jeobá je naxinandále, tonga a sasénle josʼian an”. Kʼoati nkjín choʼndale Niná xi tsakatio nichxin kjoatse xi to jao kisatio kon tsa kisasenkon Niná kʼoa tsa mai (1 Sam. 1:​6-10; Job 29:​2, 4; Sal. 51:11).

2. ʼYáni xi ndasʼin bekon Jeobá.

² Ningalani chjotajée maa, je Biblia kʼoatso nga sasénkon Jeobá jngo chjota xi bakó nga makjainle tʼatsʼe Jesús kʼoa xi fisʼenngindá (Juan 3:16). Nga kʼoanʼia kʼoasʼin bakoñá nga kʼoamaniná je jéená kʼoa nga jekʼoatsakʼinlee Jeobá nga kui kʼoasʼiaan josʼin mele (Hech. 2:38; 3:19). Tsjoa sʼe kon Jeobá nga kʼoanʼia nga̱ kui xi mená nga miyoná koa̱n, ndasʼin skoe̱konná kʼoa miyole koaan tsa si̱tjosoán josʼin mele (Sal. 25:14).

3. Jmé xi chótʼayajiaan i̱ kjoaʼmiya jebi.

³ I̱ kjoaʼmiya jebi kui chótʼayajiaan xi tʼatsʼe jebi: Ánni tjínkʼani xi kʼoasʼin síkjaʼaitsjen nga tsín sasénkon Niná. Jósʼin bakó Jeobá nga ndasʼin bekonná. Kʼoa jósʼiaan nga sʼe̱jngo tokoán nga ndasʼin bekonná.

ÁNNI TJÍNKʼANI XI KʼOASʼIN SÍKJAʼAITSJEN NGA TSÍN SASÉNKON NINÁ

4, 5. Jméni xi tsín jao kʼoé tokoán ninga sakʼoa tsín chjí ʼyatokoán yaoná.

⁴ Tjínkʼa xi tsín chjí bekon yaole saʼnda ngasʼa ʼndí kjoan (Sal. 88:15). Jngo ndsʼee xi Adrián ʼmi, itso: “Me tongantsjai nga kʼoasʼin sikjaʼaitsjen nga tsín jme chjína. Nga sʼa ʼndí kjiʼe̱ kʼoakixinle Jeobá nga ya ʼndenaxó katabatio je xíngia, tonga xi an kʼoasʼin kisikjaʼaitsjen nga tsín bakinna nga ya koatejna”. Ijngo ndsʼee xi Tony ʼmi, alikui testigole Jeobá ma je xijchále, kʼoa bʼéyanajmí josʼin koanjchá. Itso: “Alikuikʼia kʼoakitsona je xijchána tsa tsjoakena kʼoa tsa chjí bekonna, kʼoa totsín kisasenntsjaile jmeni xi kisʼian”.

⁵ Tsa sakʼoa kʼoasʼin nikjaʼaitsjeen nga tsín jme chjíná kuenta sʼiaan nga je Jeobá xi koanmele nga naxinandále tiyojiaan (Juan 6:44). Je Jeobá be jñani nda nʼia ninga sakʼoa tsín ʼyaa ñá kʼoa be jokjoanni kjoaan (1 Sam. 16:7; 2 Crón. 6:30). Tsa je Jeobá xi kʼoatsoná nga nʼio chjílee kuinga kʼoatjín kjoaixi (1 Juan 3:​19, 20).

6. Jókisʼe kon Pablo nga kui kisikjaʼaitsjen je jée xi tsakajngi.

⁶ Tsakui nichxin tojo tsín ndatjín tokoán ndʼaibi xi totʼatsʼe jée xi tsakijnyaa nga kjesa ʼyaxkonjián Énle Niná (1 Ped. 4:3). Tjínkʼa xi tojo kui kjántʼakao jmeni xi chʼaotjín símekon ninga jekjoatse nga nʼio nda tjíosíxále Jeobá. Tsa kʼoati sʼe sakʼoa tokoán, kuenta sʼiaan nga kʼoati kisatio kon je choʼndale Niná xi tsakatio nichxin kjoatse. Tobʼelañá, je Pablo alikui nda kisʼe kon nga kui kisikjaʼaitsjen jñani tsín nda kisʼin (Rom. 7:24). Ningalani kʼoakoannile jéele kʼoa jekisʼenngindá, kʼoasʼin kisikjaʼaitsjen nga je xi ngisa nangi tíjnale xikʼa pastro kʼoa nga je xi ngisasa tse jée tsakajngi (1 Cor. 15:9; 1 Tim. 1:15).

7. Jméni xi tsín jao kʼoé tokoán tsa kʼoakoa̱nniná je jéená.

⁷ Je Jeobá kʼoatso nga sichatʼaná tsa kʼoakoa̱nniná jéená (Sal. 86:5). Kuinga tsín jao kʼoéñá tokoán nga síchatʼaná je Jeobá kʼianga kʼoama kjoaixininá je jéená (Col. 2:13).

8, 9. Tsa kʼoasʼin nikjaʼaitsjeen nga tsín nda sʼe kon je Jeobá josʼin nixálee, jmé xi koasenkaoná nga tsín tikʼoasʼin si̱kjaʼaitsjenñá.

⁸ Ngatsʼiñá nga mená nda si̱xálee je Jeobá. Tonga tsakui nichxin kʼoasʼin nikjaʼaitsjeen nga tsín sasénkon Niná jokji tjen kʼoamaná kʼoanʼia. Jngo tichjaa xi Amanda ʼmi, itso: “Kʼoasʼin sikjaʼaitsjen nga tjínnele sa tse sa tse jmeni xi sʼian kʼianga nda sixále je Jeobá. Nga kʼoasʼin sikjaʼaitsjen sakʼoa tsʼato kʼoakji bʼenele yaona jokji tjen kʼoakoa̱nna. Kʼoa nga tsínni bitjosonna josʼin bʼendajian alikui nda sʼe tokoan, kʼoa kʼoasʼin sikjaʼaitsjen nga kʼoati tsín nda sʼe kon Jeobá”.

⁹ Tsa kʼoasʼin nikjaʼaitsjeen nga tsín nda sʼe kon je Jeobá josʼin nixálee, jmé xi koasenkaoná nga tsín tikʼoasʼin si̱kjaʼaitsjenñá. Kuenta sʼiaan nga majinle Jeobá josʼin tiyoaa, alikui bʼénená kʼoa alikui tsʼato kʼoakji síjéná jokji tjen kʼoakoa̱nná. Nʼio chjí bekon jokji tjen kʼoamaná nga nixálee, ni choa kʼoa ni tse. Kʼoati si̱kjaʼaitsjeen je choʼndale Niná xi nʼio nda kisixále. Tobʼelañá, je Pablo nkjín nó nga nʼio kjin kikakóyason kʼoa kitsjoanganʼio nga nkjín jtín kisatio, tonga kʼianga tsín tikʼoasʼin tsakʼejnani josʼin tíjna tsakai alikui tikʼoakoannile nga nʼio tse kitsoyason, tonga je Jeobá tosi tonda ndasʼin tsabekon. Je Pablo tojo kisixále je Jeobá jokji tjen kʼoakoanle, kʼoa je Jeobá tosi tonda kisichikontʼain (Hech. 28:​30, 31). Tikʼoasʼinni tsanda ñá, alikui tongantsjai nga kʼoasʼin si̱xálee je Jeobá jokji tjen mená tsakai, tonga xi ngisa chjí bekon kui ánni nga je nixánilee. Kataʼyala kʼa choa xi bakó nga sasénle je Jeobá jmeni xi nʼia.

JÓSʼIN BAKÓNÁ JEOBÁ NGA SASÉNKON JMENI XI NʼIA

10. Jósʼin kʼoatsoniná je Jeobá nga sasénle jmeni xi nʼia (Juan 16:27).

¹⁰ Yaa Biblia kʼoatsoná nga tsjoakená je Jeobá kʼoa nga sasénkon jmeni xi nʼia. Jao kʼa faʼaitʼa ya Biblia nga kʼoakitso je Jeobá nga tsjoake je ʼNdíle kʼoa nga sasénkon (Mat. 3:17; 17:5). Nda sʼe tokoán nga kʼoatsoná je Jeobá nga sasénkon jmeni xi nʼia, ningalani tsín ya tjen ngʼajmi kjoakaonajmíná, kui Biblia síchjén nga kʼoatsoná. Kʼianga bʼexkiaa jokitsole Jesús je chjotatjenngile nga tsakjákaonajmí joxi jéni Jeobá xi kʼoati títsoná tsanda ñá (tʼexkiai Juan 16:27).a Je Jesús kʼoakjoánti kisʼin josʼín je Nʼaile. Kʼianga bʼexkiaa ya Biblia nga kʼoakitsole je chjotatjenngile xi kixi kitʼale nga tsjoake ningalani tsín nda kisʼin sakʼoa, kʼoati kui nikjaʼaitsjeen nga kʼoatítsoná tsanda ñá je Jeobá nga tsjoakená (Juan 15:​9, 15).

11. Kʼianga kjoa bitjatojiaan ánni nga tsín kʼoasʼin si̱kjaʼaitsjenñá nga tsín tinda tiyoñá ngixko̱n Jeobá (Santiago 1:12).

¹¹ Tsjoáná jme xi machjénná. Je Jeobá basenkaoná kʼoa tsjoáná jmeni xi machjénná, tonga sakʼoa tsjoáʼnde nga kjoa bitjatojiaan tojo koan je Job (Job 1:​8-11). Kʼianga kjoa bitjatojiaan alikui kʼoasʼin si̱kjaʼaitsjeen nga tsín tinda tiyoñá ngixko̱n Niná, tosa je si̱nʼiotʼaa kʼoa koakolee nga tsjoachaa (tʼexkiai Santiago 1:12).b Tsa kʼoasʼiaan, jchañá nga tsjoakená je Jeobá kʼoa koasenkaoná nga chókjoajinná je kjoa.

12. Jmé xi bakóyaná choa̱le Dimitri.

¹² Kataʼyala jokoan jngo ndsʼee xi Dimitri ʼmi, xi Asia tsʼe. Kisichaa xále ndsʼee jebi, kʼoa nga nkjín sá nga tsínti kisokoxánile tosaa ngisasa tse kitsoyason kʼoa kʼoasʼin tsakakóni nga je Jeobá kisinʼiotʼa. Kʼoa ninga nkjín sá jaʼato alikui kisokoxále. Xijekoan, sa chʼin kiskatʼangále kʼoa to nachansa tsakájnason. Xijekoan, chaan kʼoasʼin kisikjaʼaitsjen nga tsín nda tísítjoson je xá xi kjinele nga nʼai ma kʼoa nga je tjínnele koa̱njngíʼa je chjoónle kʼoa kʼoasʼin kisikjaʼaitsjen nga tsín nda tjínkon Jeobá xi tʼatsʼe. Tonga ñandia nga jngo xo̱n kitsjoale je tsotiʼndíle xi kui tsakʼétʼa jotso Isaías 30:​15, xi tso: “Je xi koasenkaono kuinga tsín si̱kjáojion kʼoa nga katasʼeno kjoanʼiotʼa”. Xijekoan, i kitsole: “Ji pa, kʼianga ba tjín tokuin tikjaʼaitsjenjin én jebi”. Koanjinle je Dimitri nga je Jeobá tíbasenkao familiale nga tjínle xi tjíokjine, xi tjíobʼakjá kʼoa nga tjínle ndʼia. Itso: “Xi tjínnele sʼian kuinga tsín nʼio sikjáojian kʼoa nga je Jeobá sinʼiotʼa”. Tsa kʼoati kui kjoa tibitjatojin tʼejngui tokuin nga mandosinle Jeobá xi tʼatsi kʼoa jé koasenkaoli nga chókjoajinli.

13. Jósasʼin bakóná Jeobá nga ndasʼin bekonná.

¹³ Binyakaoná je ndsʼee. Sakʼoa je ndsʼee síchjén Jeobá nga fákaonajmíná kʼianga sínʼio tokoán. Kʼoakoan jngo tichjaa xi Asia tsʼe, kisichaa xále kʼoa táo chʼin kiskatʼale. Je xʼinle tsakajngijée kʼoa tsínti chjotajchínga sʼin tsakʼejnani. Nga kʼoasikji kjoa jaʼatojin je tichjaa, i kitso: “Alikui ʼbe ánni nga kʼoasikji kjoa tifaʼatojinña, kʼoasʼin kisikjaʼaitsjen nga chʼao tisʼian kʼoa nga tsínti tísasénnile Jeobá jme xi tisʼian”. Kʼoakitsole Jeobá nga katabakóle nga tojo tsjoake. Je tichjaa kʼoatso josʼin tsakasenkao Jeobá. Itso: “Je xi chjotajchínga sʼin tjío tsakjákaonajmína kʼoa kʼoakitsona nga tojo tsjoakena Jeobá”. Nga koanskanni, kʼoakitso ngindiangánile Jeobá nga katabasenkao, kʼoa kʼoatso je tichjaa josʼin tsakasenkao ijngokʼa. Itso: “Nga tikuini nichxin jngo carta kichona xi kisikasénna je ndsʼee xi tjío ya jinjtín. Kʼianga tsakʼexkia jotso xo̱n jebi kʼoasʼin tsaʼbeña nga kinrʼoéna Jeobá kʼianga tsakʼetsʼoale”. Tojosʼin tiʼyaa, jé ndsʼee síchjén sakʼoa Jeobá kʼianga kʼoatsoná nga nda tiyoaa ngixko̱n (Sal. 10:17).

14. Jósasʼin síchjén Jeobá je ndsʼee kʼianga kʼoatsoná nga sasénle jme xi nʼia.

¹⁴ Kʼianga tsjoáná kjoafaʼaitsjen je ndsʼee, kʼoatisʼin bakóniná Jeobá nga sasénle jmeni xi nʼia. Tobʼelañá, kʼianga siglo 1 jé pastro Pablo kisichjén Jeobá nga 14 carta kiskile je chjotale Cristo xi tsakatio nga kʼia, kʼoati kitsjoale kjoafaʼaitsjen kʼianga kiskile carta jebi. Ánni nga kui xi koanmenile Jeobá nga kjoafaʼaitsjen kitsjoale Pablo je chjotale Cristo. Kuinga nda chjota je Jeobá, tsjoakená kʼoa batekjáyaná “tojo sʼín jngo nʼai xi tsjoake je ʼndíle” (Prov. 3:​11, 12). Kʼianga ya Biblia bʼangini nga tsjoáná kjoafaʼaitsjen je ndsʼee alikui kʼoasʼin si̱kjaʼaitsjeen nga tsínti sasénnile je Jeobá jmeni xi nʼia, tosaa kʼoasʼin bakóniná nga tsjoakená (Heb. 12:6). Jósasʼin bakóná Jeobá nga sasénle jmeni xi nʼia.

JÓSASʼIN BAKÓNÁ JEOBÁ NGA SASÉNLE JME XI NʼIA

15. ʼYáni xi tsjoále Jeobá je nganʼiotsjele, kʼoa jméni xi kʼoéjngoaa tokoán.

¹⁵ Je Jeobá tsjoále nganʼiotsjele je xi ndatjío ngixko̱n (Mat. 12:18). Koaan si̱kjaʼaitsjenjiaan jebi: “A tísʼena je kjoanda xi tsjoá nganʼiotsjele Niná”. Tobʼelañá, a ngisaa tsejta kjima ndʼai tikʼoajinni jokjoan nga kjesa ʼbexkonjian je Énle Niná. Kʼianga jchai nga tísʼeli je kjoanda xi tsjoá je nganʼiotsjele Niná ngisaa sʼe̱jngo tokuin nga sasénle Jeobá jme xi tinʼiai (chótsenlai je recuadro “Je kjoanda xi tsjoá nganʼiotsjele Niná kui jebi”).

16. Tojo tso 1 Tesalonicenses 2:​4, ʼyáni xi síchjén Jeobá nga tsoyason Énle, kʼoa jósʼe tokuin nga ʼyai jebi.

¹⁶ Jé chjota xi ndatjío ngixko̱n Jeobá tsjoáxále nga tsoyason je Énle (tʼexkiai 1 Tesalonicenses 2:4).c Kataʼyala jokoan jngo tichjaa xi Jocelyn ʼmi. Itso: “Ñandia nga tsín sin tjín tokoan kʼianga jaʼána, likui tso tokoan nga jme xi sʼian nga kʼia. Tonga precursora sʼin tisixá kʼoa kʼiakjoán bʼakaona nga kjuíxinyasoan, kuinga tsakʼetsʼoanile je Jeobá kʼoa kitjoña”. Kʼianga kitjotsoyason tichjaa jebi jngo chjoón kiskajin xi kiskotʼaya Biblia, xi Mary ʼmi. Kʼianga jenkjín sá jaʼato, je Mary kʼoakitsole je tichjaa kʼianga nganʼio kisijéle Niná nichxin nga kichokonle. Jósʼin tsakasenkao je Jocelyn nga kʼoakoan. Itso: “Yaa tsaʼbeña nga joxi ini kitsona Jeobá, sasénna jme xi nʼiai”. Ningalani tsín tongatsʼi chjota nga kjuinrʼoéná, tsjoa sʼe kon je Jeobá nga kʼoakji ʼmiyasoán jokji tjen kʼoamaná.

17. Jméni xi bakóyaná tʼatsʼe nga tsakʼéchjíntjainá Jesús tojo tso je Vicky (Salmo 5:12).

¹⁷ Xi totʼatsʼe nga tsakʼéchjíntjainá Jesús, je Jeobá síchatʼale jéele je chjota xi sasénkon (1 Tim. 2:​5, 6). Ningalani makjainná nga tsakʼéchjíntjainá Jesús kʼoa ninga jetsangínsʼenngindá, jméni xi kuenta sʼiaan tsa tsín makjainná nga sasénle Jeobá jmeni xi nʼia. Kuenta sʼiaan nga sakʼoa bʼanachaná je ni̱ma̱ná, tonga je Jeobá alikui kʼoasʼín, koaan koa̱nkjainná ngantsjai jmeni xi tso. Kixi bekon Niná je chjota xi makjainle nga tsakʼéchjíntjainá Jesús kʼoa kʼoatso nga sichikontʼain (tʼexkiai Salmo 5:12;d Rom. 3:26). Nʼio nda tsakasenkao jngo tichjaa xi Vicky ʼmi kʼianga kui kisikjaʼaitsjenjin jósʼin tíjna nga tsakʼéchjíntjainá Jesús. Je tichjaa jebi alikui tjínjngo kon tsakai tsa tsjoake Jeobá, kʼoa itso: “Je Jeobá tsakakóna kjoatsejta. Ninga kʼoalani, joxi ini kixinle: alikui koa̱n nga tsjoacha koa̱nnái, kʼoa je kjoabʼechjíntjaile ʼNdíli alikui bichótjenngi nga koa̱nchjí je jéena”. Joni Vicky, tsa si̱kjaʼaitsjenjiaan nga tsakʼéchjíntjainá je Jesús sʼe̱jngo tokoán nga tsjoakená Jeobá kʼoa nga sasénle jme xi nʼia.

18. Tsa tsjoachaa Jeobá, jméni xi kʼoéjngoaa tokoán.

¹⁸ Ningalani kʼoasʼiaan tojosʼin jekachotʼayajiaan, tojo sakʼoajin si̱kinroajeen tokoán kʼoa kuijin si̱kjaʼaitsjeen tsa sasénle Jeobá jmeni xi tinʼia. Tsa kʼoasʼe tokuin kuenta tʼiain nga sasénkonná Jeobá tsa tsjoachaa (Sant. 1:12). Tosi tonda tichriantʼalai Jeobá kʼoa kuenta tʼiain josʼin tíbakóli nga sasénle jmeni xi nʼiai kʼoa ali nichajinjin “nga tsín tsa kjin tíjnaná nga jngójngoá” (Hech. 17:27).