7 Eweimoherep O Wakuat Koꞌi

AIKOTĀ̃ MEIG̃.

Watimoherep aiwat wakuat koꞌi pote waku pe watoig̃neꞌen hamo. Kotā̃ e hap. Etunug̃ waku rakat yn pote emempyt tehaꞌat eminug̃ wakuat koꞌi kape hawyi tutunug̃ hamo eꞌawy.

Waku ȳwot ny taꞌatuhoꞌomūꞌe taꞌatumempytꞌīn kat waku rakat sio waku rakatꞌi hap. Kotā̃ e hap. Ȳwot ny iꞌatupotpap kahato hawyi teꞌeruwanentup teꞌerewowi ynꞌi pote taꞌatumempytꞌīn taꞌatuhire pyi taꞌatuhaꞌag̃ hamo taꞌatuty taꞌatuꞌȳwot minug̃ wakuat koꞌi.

TUPANA EHAY HENOI — Pyno waku etinãpin kahato o hirokat muꞌap wakuat upi mekewat muꞌap upiat hewyry waku puat hamo miꞌi pote aru toig̃neꞌen hap oktān ȳt karāmpeꞌi topiat mekewat muꞌap wakuat upi pyi e. — Porowepiu 22:6

KAT POTE MIꞌITĀ̃ WAKU.

Korā̃ waku aiwat toig̃ wakuat koꞌi. Haryporia imempyt rakat Karyn e hap het rakat toꞌe — Korā̃ urumempytꞌīn toig̃ celular iꞌatupo pe miꞌitā̃ mote teꞌerehaꞌat kuap saꞌag̃ koꞌi celular puo pyi. Asuwe miꞌiria uruꞌywytpe maꞌato uruikuapꞌi kat teꞌerehaꞌat celular pe e.

TUPANA EHAY HENOI — Tupana ehay kuap kahato rakaria tikuap kahato kat som ȳt nakuꞌi watunug̃ hap koꞌi Tupana e hap miwan miat pyi. — Epereu 5:14.

Waku hampȳk takaria watoig̃neꞌen. Waku ehoꞌomūꞌe emempytꞌīn iꞌatuehay tuereto hamo — Pyno. Waku sēse iꞌatuꞌe iraniaꞌīn me. Korā̃ wuat mītꞌīn teꞌeruwanentup teꞌeruwewowi yn teꞌeremaꞌat terān celular ete yn neꞌi maꞌato waku eweupi. Waku etimoherep woꞌokyꞌe hap mītꞌīn upi.

TUPANA EHAY HENOI — Waku ewetunug̃ iraniaꞌīn me aikotā̃ iraniaꞌīn tunug̃ wakuat ehepiat hap ewy. — Mateu 7:12.

KAT ASOM WAKU ETUNUG̃.

Waku ehay emempytꞌīn me kat waku rakat hap kat ȳt nakuꞌi rakat hap. Kotā̃ e hap. Ȳwot ny taꞌatuhoꞌomūꞌe hupi teꞌi hupi teꞌi taꞌatumempytꞌīn woꞌokyiꞌat hap wywuatꞌi sewaire hap iꞌaparap hap etiat pote ȳt niatpoꞌi taꞌatumempytꞌīn taꞌatumontypot hamo iꞌatuꞌe wemūꞌe haria.

MOWȲRO HAP. Ehoꞌomūꞌe kuap emempytꞌīn wakuat koꞌi etiat karāmpe eweihaꞌat televisão turān. Kotā̃ e hap. Taꞌatuhenoi iraniaꞌīn taꞌatumosoꞌopot mītꞌīn hun rakaria iꞌatuꞌe pote — Ȳt nakuꞌi iꞌatuminug̃ koꞌi hanti erewanentup hawe kat pote asom taꞌatunug̃ saꞌag̃ hun rakaria wȳwo ere kuap emempyt pe.

Brandon e hap het rakat toꞌe — Ipakuptiaria ȳt taꞌatukuap ite kat som waku rakat kat som ȳt nakuꞌi rakat pote niatpo kahato taꞌatuꞌaira hamo sio waku nug̃ hap sio ȳtꞌi hap e.

Waku etimūꞌe emempyt hampȳk toig̃neꞌen hamo. Emempyt hirokat turān ni raꞌyn waku etimūꞌe — Pyno sio waku sēse ere o uimempyt mītꞌīn me ere. Popera Criação de Filhos e hap henoi Waku etimūꞌe emempytꞌīn ȳt teꞌeruwanentup teꞌeruwewowi ynꞌi e. Miꞌitā̃ mote taꞌatumontypot torānia mītꞌīn hamo taꞌatuꞌyat pe sio escola pe iꞌewȳte woꞌokyꞌe haria wo tukupteꞌen hamo e.

MOWȲRO HAP. Etihywytip aiꞌyat pote uipowȳro hamo ere emempyt pe. Miꞌi hap puo pyi taꞌatukuap hamo waku taꞌatupowȳro mītꞌīn hap.

Tara e hap het rakat toꞌe — Waku aimempytꞌīn teꞌerepokuap ti raꞌyn kareꞌen pyi hap sio g̃etap hywytip hap wȳwo. Miꞌi hap koꞌi taꞌatunug̃ tuereto pote karāmpe teꞌeruweran taꞌatuꞌyat pe turān taꞌatukuap hamo raꞌyn kat koꞌi kat koꞌi teꞌereropat hap e.