Aikotā̃ rakat asom eminug̃ koꞌi emempytꞌīn taꞌatuhaꞌag̃.
Ȳwotꞌīn Nyꞌīn Kapiat
8 Ewehoꞌomūꞌe Eimempytꞌīn Eiminug̃ Koꞌi Puo Pyi
AIKOTĀ̃ MEIG̃.
Waku ȳwot ny taꞌatunug̃ aikotā̃ taꞌatuehay hap ewy. Ȳt nakuꞌi iꞌatueso. Kotā̃ e hap. Karāmpe mīt putꞌokꞌe eiꞌyat pe hawyi eweipoꞌoro eimempyt ihay hamo — Uity uiꞌȳwot tuwẽtem e pote eimempyt heso hamo eiꞌawy.
David e hap het rakat toꞌe — Hirokaria teꞌerehaꞌat kahato aiminug̃ koꞌi kape hawyi taꞌatunug̃ aiꞌewy kahato. Ȳt watunug̃ꞌi aikotā̃ aiꞌe hap ewy pote ȳt etunug̃ꞌi ere hap ewy iꞌatuꞌe hamo ahepe e.
TUPANA EHAY HENOI — Ȳt seroꞌokꞌeweiꞌe teiꞌo watoꞌe iraniaꞌīn me pote waku iꞌewȳte ȳt seroꞌokꞌe hat woꞌi watopyhuꞌat aipotminãpin hap ewy e. — Humanu 2:21.
KAT POTE MIꞌITĀ̃ WAKU.
Eimempytꞌīn tukupteꞌen kahato escola piaria wȳwo pykai maꞌato poꞌog̃ waku eiperia ewehoꞌomūꞌe eimempytꞌīn waku rakat nug̃ hamuat hap ete. Maꞌato waku ewetunug̃ aikotā̃ eiꞌe hap ewy.
Nicole e hap het rakat toꞌe — Asuwe wahoꞌomūꞌe kahato aimempytꞌīn hupi teꞌi hupi teꞌi kat koꞌi kat koꞌi etiat maꞌato watikuapꞌi sio teꞌeruwanentup sio ȳtꞌi hap. Maꞌato ȳt watunug̃ꞌi aikotā̃ aiꞌe hap ewy pote taꞌatukuap hamo raꞌyn miꞌi hawyi teꞌeroꞌe hamo — Ȳt etunug̃ꞌi aikotā̃ emienoi ewy iꞌatuꞌe.
TUPANA EHAY HENOI — Waku ȳt typy ehay rakaria wo eweikupteꞌen e. — Tiaku 3:17.
KAT ASOM WAKU ETUNUG̃.
Waku apoꞌere ewepe te. Aikotā̃ rakat filme koꞌi arehaꞌat tuereto. Atimoherep asom woꞌokyꞌe hap uiwyriaꞌīn upi sio ȳt. Uweꞌīn asom atiꞌaira uiwyꞌokria wo hamo. Arenentup kahato asom mītꞌīn kape. Atikyꞌesat asom uimempyt itag̃ hawyi tutunug̃ aikotā̃ uiminug̃ tuereto wuat koꞌi ewy.
Christine e hap het rakat toꞌe — Uito hawyi uheꞌaito ȳt urupoꞌoroꞌi urumempytꞌīn taꞌatunug̃ tuweupi uruminug̃ tuereto wuat koꞌi kai hamo e.
Etiꞌaparap pote uiwepyiꞌi ere o. Emempytꞌīn tikuap iꞌaparap hat ereig̃neꞌen miꞌi pote etiꞌaparap pote uiwepyiꞌi uimempyt ere o. Miꞌi hap puo pyi etimoherep ȳt eremowatoꞌi hap iꞌewȳte pȳwo piat ehenoi hap. Miꞌi pote emempytꞌīn taꞌatunug̃ eꞌawy hamo.
Robin e hap het rakat toꞌe — Watiꞌaparap pote waku watoꞌe Atiꞌaparap. Uiwepyiꞌi. Miꞌitā̃ mote aimempytꞌīn tiꞌaparap pote ȳt taꞌatuerewyi hamoꞌi taꞌatuminug̃ saꞌag̃ koꞌi.
Wendell e hap het rakat toꞌe — Waku watunug̃ waku rakat yn kat pote aimempytꞌīn teꞌerehaꞌat kahato ahewowi. Aiminug̃ koꞌi puo pyi wahoꞌomūꞌe kahato kuap aimempytꞌīn waku rakat nug̃ hamo e.