MESŪWAT YI OKTĀN TUWEMOHEREP SAꞌAG̃ HAP

3 | Etiꞌatueropat o emikyꞌeria

KAT POTE MIꞌI HAP WAKU ETUNUG̃

Korā̃ niatpo koꞌi hap putꞌokꞌe kahato ahete miꞌi pote mītꞌīn tukupteꞌen pya poꞌog̃ taꞌatuwyriaꞌīn kai.

Mītꞌīn tukupteꞌen terānꞌi poꞌog̃ taꞌatuwyꞌokria wȳwo. Teꞌeruweran terān yn.
Seꞌaito seharyꞌi toꞌoꞌehay wo poꞌog̃ kat iꞌatuꞌe kat iꞌatuꞌe neꞌi toꞌope.
Ȳwot hawyi ny ȳt teꞌeruwanentup kahato terānꞌi poꞌog̃ taꞌatumempytꞌīn e hap koꞌi kape.

Kat hap koꞌi waku etikuap

Aiwyꞌokria sēse hap waku kahato kat pote niatpo koꞌi turān miꞌiria aipowȳro aimomperupꞌi hamo.
Iunteꞌen putꞌokꞌe niatpo hap ehete pote niatpo kuap ēte hawyi ewyriaꞌīn hoꞌopot kuap.
Emempytꞌīn teꞌeruwanentup kahato irania hoꞌopot hap koꞌi kape pote iꞌatuꞌarōt kuap.

Kat asom waku etunug̃ korā̃

Tupana Ehay ainãpin Pyno wuatꞌi eꞌāt pe ewy ekyꞌe hat no toig̃neꞌen epowȳro hamo. Karāmpe hoꞌopot piat ereig̃neꞌen turān ewyꞌok toig̃neꞌen epowȳro hamo. Pȳwo pe ti ewyriaꞌīn sēse tukupteꞌen hoꞌopot piat turān eipowȳro hamo. — Porowepiu 17:17.

Erewanentup pyno uwe epowȳro tuereto hap iꞌewȳte enãpin tuereto hap kape. Karāmpe watikuap wentup mīt tuwanentup kahato ahewowi hap miꞌi hap aipowȳro niatpo hap koꞌi akit hamo iꞌewȳte aimoesaika watiꞌywoporo hamo.

KAT HAP KOꞌI ASOM ETUNUG̃ KUAP — Mowȳro koꞌi hap

Niatpo koꞌi turān kat hap koꞌi asom epowȳro kuap etiꞌatueropat emikyꞌeria hamo

WOꞌOMENARU HARIA EIWOꞌOKYꞌE HAP EWEIMOESAIKA O

Woꞌomenaru haria eiwoꞌokyꞌe hap eweimoesaika o

Tupana Ehay ainãpin Waku poꞌog̃ typy ok ipotpap wentup ok ipotpap hap kai e. Wentup ok iꞌahū pote wentup ok ipowȳro ipotyi pote toꞌopowȳro ipotyi rakat ete e. (Ekeresiasi 4:9, 10) Woꞌomenaru haria aikotā̃ bola petek haria hap ewy. Kotā̃ e hap. Seꞌaito hawyi seharyꞌi teꞌeremahara wentup time pe yn. Teꞌerebola turān ȳt toꞌomompyꞌahak hamoꞌi kat pote wentup ewy yn tukupteꞌen. Miꞌi hap taꞌatunug̃ taꞌatusat terān poꞌog̃ waku rakat miium pote. Erehaꞌat o pyno woꞌomenaru piaria piat woꞌopowȳro hap.

Epyꞌahak esēra turān ȳt kat hamoꞌi kat ere kat ere eꞌaito sio eharyꞌi pe. Waku poꞌog̃ perupꞌi popuo ehay. Miꞌi hap eipowȳro wentup ewy yn eweikupteꞌen hamo.
Wuatꞌi semana tuereto waku ehehay ehetiat niatpo hap koꞌi etiat. En uimompyꞌahak kahato ȳt eweiꞌe teiꞌo eiwoꞌope maꞌato niatpo hap koꞌi ti waku eweiꞌakit.
Eweiꞌaira kuap tuereto eiwoꞌowȳwo ewetunug̃ eimikyꞌesat koꞌi hamo.
Waku hotꞌokꞌe eiwepīt hap koꞌi. Ewetehaꞌat kuap eiwoꞌowȳwo iaꞌag̃kap eiwoꞌomenaru hap iꞌewȳte irania wakuat koꞌi kape wy.

Woꞌomenaru haria asuwe ȳt toꞌoꞌewyꞌi iꞌatuwanentup hap. Maꞌato wentup ewy yn tukupteꞌen kuap. Seꞌaito seharyꞌi taꞌatuꞌaira kuap toꞌowȳwo iꞌewȳte toꞌopowȳro iꞌatumiꞌaira waku rakat nug̃ hamo e. — David.

EWYꞌOKRIA ETIPOWȲRO O

Ewyꞌokria etipowȳro o

Aiwyriaꞌīn piat aipowȳro hap sēse waku. Erewanentup kuap aikotā̃ me miꞌiria etiꞌatupowȳro kuap hap. Miꞌi hap watunug̃ mote watoꞌopowȳro powȳro.
Wuatꞌi eꞌāt pe ehay kuap ewyꞌokria wȳwo etiꞌatukuap aikotā̃ miꞌiria hamo hap.
Apo ere kuap ewyꞌokria pe aikotā̃ me niatpo hap koꞌi taꞌatuꞌakit aikotā̃ ētiat niatpo hap ewy wuat koꞌi hap etiat.

Karāmpe putꞌokꞌe niatpo kap koꞌi turān ewyꞌokria epowȳro kuap muap waku rakat upi eto hamo hawyi taꞌatuhenoi hamo emikuap woꞌonãpin hap koꞌi pykai raꞌyn. Aiwyꞌokria tenentup kahato ahewowi iꞌewȳte aito miꞌitā̃ kuap wy e. — Nicole.

ETIꞌATUPOWȲRO O EMEMPYTꞌĪN

Etiꞌatupowȳro o emempytꞌīn

Tupana Ehay ainãpin Waku watuwanentup kahato hawyi waku aiweꞌeg̃ ahehay ȳt nakuꞌi iũnteꞌen hap wȳwo. (Tiaku 1:19) Asuwe mempytꞌīn ȳt henoi terānꞌi aikotā̃ iꞌatukenꞌẽ hap koꞌi iꞌewȳte iꞌatuwanentup hap koꞌi maꞌato perupꞌi popuo erenentup pote epowȳro hamo taꞌatuhenoi epe hamo.

Etiꞌatupowȳro o emempytꞌīn taꞌatuhenoi taꞌatuetiat ȳt teꞌerokenꞌẽ hap wȳwoꞌi ehepiat hamo. Irania mempytꞌīn teꞌerokenꞌẽ taꞌatuhenoi taꞌatupyꞌa piat koꞌi iꞌatuwanentup hap koꞌi taꞌatuꞌȳwot taꞌatuty ewa pe hamo. Miꞌi pote taꞌatupuenti waku poꞌog̃ taꞌatuhenoi hamo irania sej̃am koꞌi tote sio ehewyry turān.
Etiꞌatukawiano o emempytꞌīn ȳt teꞌerehaꞌatꞌi wemoherep saꞌag̃ hoꞌopot hap koꞌi kape hamo.
Ehenoi o emempytꞌīn me kat pote etiꞌatukawiano terān hap.
Etiꞌatumūꞌe o emempytꞌīn kat waku taꞌatunug̃ niatpo hap koꞌi iunteꞌen putꞌokꞌe turān hap hawyi etimoherep aikotā̃ me teꞌerekawiano kuap hamo hap.

Waku watoꞌoꞌehay tuereto aimempytꞌīn wȳwo hawyi waku watuwanentup iꞌatuꞌe hap koꞌi kape. Asuwe teꞌerokenꞌẽ taꞌatuhenoi ehepe hamo sio iꞌatuwanentup kowoꞌi kowoꞌi hap sio iꞌatupyꞌahak kuap hap. Waku ehenoi ewanentup hap koꞌi etiat wy hawyi kat epowȳro miꞌi hap koꞌi akit hamo hap e. — Bethany.