POPERA APE PIAT SEHAY | ȲT KATꞌI TUPANA EHAY MOMÃ KUAP
Tupana Ehay toig̃neꞌen ne imomã terān haria pykai
NIATPO HAP Sese religião pȳwo piatꞌi rakaria piat akag̃ koꞌi ȳt taꞌatukyꞌesatꞌi mītꞌīn piat Tupana Ehay mowempāp hap. Miꞌi pote taꞌatupyhyp Tupana Ehay apuksit terān haria hawyi uwe uwe toig̃ Tupana Ehay. Kotā̃ e hap.
167 Iesui putꞌokꞌe hap eꞌyj̃an mete. Morekuat Antíoco Epifânio e hap het rakat tikyꞌesat kahato iuteuria piat tupanaria Grécia piaria montypot hap. Miꞌi pote toipoꞌoro suraraꞌīn Tupana Ehay iaꞌag̃kap koꞌi Iesui yj̃an miat etiat hap koꞌi momã hamo. Wemūꞌe hat Heinrich Graetz e hap het rakat kotā̃ e — Morekuat emipoꞌoro haria taꞌatutek hawyi taꞌatuwuk miwan koꞌi aj̃umpe neꞌi teꞌeruwat hap tote. Iꞌewȳte taꞌatupotꞌauka torānia Tupana Ehay mowempāp haria e.
Anu 467 Iesui putꞌokꞌe hawyi. Igreja Católica piat akag̃ koꞌi iꞌatupyꞌahak kahato igreja piaria taꞌatuhoꞌomūꞌe Tupana Ehay etiat ȳt iꞌatumimoheyꞌi etiat pote. Iꞌatuepe waku mītꞌīn hoꞌotoig̃ Saumu koꞌi latim pusu puo yn. Miꞌi pote miꞌiria taꞌatumokuasa uwe uwe hoꞌotoig̃ iꞌatuꞌeTupana Ehay. Wentup eꞌāt pe akag̃ koꞌi teꞌeruwaꞌatunug̃ turān — Waku eweikatꞌi katꞌi mītꞌīn aimimokuasa haria wuatꞌi puo. Eweiꞌatupuenti hawyi eweimomã yne o iꞌatuꞌyat koꞌi iꞌatuꞌe iꞌatumipoꞌoro haria pe.
Tupana Ehay wanig̃kaptia timomã yne Tupana Ehay koꞌi pote aikotā̃ me kuapꞌi tehay putꞌokꞌe kuap ahete.
Mītꞌīn taꞌatumowempāp kuapꞌi Tupana Ehay piat iaꞌag̃kap koꞌi William Tyndale minug̃ miꞌi pote suraraꞌīn taꞌatuwuk. Miꞌi hawyi taꞌatuꞌauka Tyndale 1536 pe. Maꞌato iraniaꞌīn tominug̃ koꞌi tukupteꞌen ne korā̃.
ȲT KATꞌI TUPANA EHAY MOMÃ KUAP Morekuat Antíoco Epifânio timomã terān yne iuteuria. Maꞌato saꞌawyꞌi iuteuria teꞌerehytpok mesūwat yi tote. Wemūꞌe haria taꞌatuhenoi Iesui e tempu turān sese iuteuria ȳt tukupteꞌenꞌi poꞌog̃ Isareu eꞌyi tote iꞌatuꞌe. Iꞌewȳte Tupana Montypot Yat koꞌi pe iuteuria taꞌatuhupit Tupana Ehay miwan koꞌi. Miꞌi koꞌi wo sese mītꞌīn teꞌeremūꞌe Tupana Ehay etiat. — Pot. 15:21.
Iꞌewȳte karāmpe Igreja Católica taꞌatumosoꞌopot terān mītꞌīn turān miꞌi pykai Tupana Ehay kyꞌe haria taꞌatupohepꞌi Tupana Ehay apuksit hap ete. Anu 1450 pe mītꞌīn inug̃ saꞌawyꞌi wuat impressora miwan koꞌi iaꞌag̃kap nug̃ hamo. Maꞌato miꞌi hap eꞌyj̃an mete niatpo pykai hoꞌotoig̃ naꞌyn Tupana Ehay iaꞌag̃kap koꞌi 33 pusu koꞌi puo. Mītꞌīn taꞌatunug̃ impressora hawyi sese teꞌereꞌiaꞌag̃kap hep Tupana Ehay ete poꞌog̃ poꞌog̃ saꞌawyꞌi wuat kai.
KAN TUWEMOHEREP Sese morekuaria hawyi religião piaria akag̃ koꞌi taꞌatumomã terān naꞌyn Tupana Ehay. Miꞌi pykai wen Tupana Ehay wyti popera mītꞌīn mikuap poꞌog̃ torānia kai rakat. Tupana Ehay piat sehay koꞌi kaipyi mītꞌīn taꞌatupehik kahato woꞌonãpin hap koꞌi hawyi Tupana Ehay tipowȳro kahato raꞌyn sese mītꞌīn.