Korā̃ te Tupana Ehay toig̃neꞌen — Kat pote asom.

Nimo pyi korā̃ te Tupana Ehay toig̃neꞌen pykai mītꞌīn taꞌatumomã terān hawyi taꞌatuꞌywyk terān imiwan koꞌi. Maꞌato toig̃neꞌen ne pote korā̃ eꞌyat pe hoꞌokup kuap hawyi etimowempāp kuap imiwan koꞌi. Korā̃ sese toig̃ Tupana aputsit hap koꞌi. Miꞌi pote etiꞌaira kuap aikowan Tupana Ehay etimowempāp terān hap. Hawyi etimohey kuap Tupana Ehay Tupana kaipyi tūt hap ete.a Tupana Ehay toig̃neꞌen korā̃ te hap aimoehaꞌat kahato. Maꞌato kat pote asom toig̃neꞌen korā̃ te. Maꞌato kat pote asom mesūwat popera poꞌog̃ waku rakat toig̃neꞌen.

Sese mītꞌīn teꞌeruwemūꞌe Tupana Ehay hawyi teꞌeruwanentup aikotā̃ Pauru ewy. Pauru kotā̃ e — Tupana Ehay miwan miat tuwẽtem hemītꞌīn wẽ pyi Tupana Paꞌãu ihay e. (2 Timoteu 3:16) Taꞌatumohey korā̃ te Tupana Ehay toig̃neꞌen hap ete Tupana kaipyi tūt pote iꞌewȳte taꞌatumohey wy Tupana tikawiano Tupana Ehay. Meikowat popera saꞌawyꞌi wuat wemūꞌe hap puo watehaꞌat Faizal e hap koꞌi. Miꞌi tuwemūꞌe terān Tupana Ehay ete toikuap terān Tupana Ehay Tupana kaipyi tūt sio ȳt hap. Tuwemūꞌe hap imoehaꞌat kahato. Kotā̃ e hap. Toikuap religião pȳwo piatꞌi rakaria taꞌatuhoꞌomūꞌeꞌi pywuat e hap koꞌi Tupana Ehay etiat. Hawyi iwepīt kahato topyhuꞌat tuwemūꞌe hawyi kat som Tupana tunug̃ mesūwat yi hamuat hap.

Faizal kotā̃ e — Korā̃ atipȳwo kahato Tupana Ehay wyti ahepiat mīum Tupana kaipywiat. Iꞌewȳte Tupana torānia saꞌawynug̃ hat ri. Miꞌi pote tutunug̃ wentup popera waku kahato rakat hawyi tutum ahepe iꞌewȳte toikawiano. Uwe uwe miꞌi hap ete taꞌatupȳwoꞌi pote aikotā̃ teꞌeroꞌe — Tupana hesaika kahatoꞌi iꞌatuꞌe hap ewy. Miꞌi pote uito atipȳwo kahato Tupana esaika hap ete e Faizal. — Isaia 40:8.