Kat Hap Koꞌi Asom Tupana Tunug̃ Naꞌyn.

Karāmpe etikuap poꞌog̃ terān mīt hawyi etikatꞌi katꞌi aikotā̃ iminug̃ koꞌi hap aikotā̃ niatpo tetiat hap toiꞌakit hap hawyi etikuap hamo iwat wakuat koꞌi. Miꞌi hap ewy etikuap terān poꞌog̃ Tupana etiat pote waku erewanentup iminug̃ koꞌi kape. Etikuap hawyi waku kahato hamo kat pote etikuap hamo raꞌyn korā̃ wuat iminug̃ koꞌi hap hawyi etikuap hamo kat poꞌog̃ tutunug̃ hamuat re meij̃uran epote aiwepīt kahato hamo hap.

TUTUNUG̃ YNE TENENTUP KAHATO AHEWOWIAT HAYPE

Tupana Ieuwa ti yne saꞌawynug̃ saꞌawy hat miꞌi pote tuwemoherep kahato raꞌyn tominug̃ koꞌi puo pyi toig̃neꞌen hap. Tupana ȳt heremoꞌi wen maꞌato tuwemoherep taꞌyn ahepe tominug̃ koꞌi. (Humanu 1:20) Tupana Ehay toꞌe Katupono ti Uito Tupana sēse atunug̃ mesūwat mytyp uhesaika wo uiweꞌeg̃ hap kaipyi. Iꞌewȳte atipy iwato hap oktān atunug̃ wy uiwanetup hap kaipyi. (Ieremia 10:12) Aimūꞌe kahato iminug̃ koꞌi hawyi hotꞌokꞌe Tupana wat wakuat koꞌi hap. Miꞌi hap koꞌi puo pyi watikuap Tupana tuwanentup kahato wentup tewoꞌi kape hap.

Erewanentup pyno Tupana Ieuwa ainug̃ aiweupi kahato miat koꞌi hũria koꞌi kai. Ainug̃ ti toiaꞌag̃kap kawiat. (Ienesi 1:27) Toiaꞌag̃kap kawiat ainug̃ pote ti wahaꞌag̃ kuap iwat wakuat koꞌi. Iꞌewȳte hotꞌokꞌe hawyi watikuap kat waku rakat hap iꞌewȳte kat ȳt nakuꞌi rakat hap kuap hamo hap. Karāmpe watunug̃ Tupana piat ainãpin hap ewy pote aiwepīt poꞌog̃ hamo iꞌewȳte aheig̃neꞌen hap poꞌog̃ waku hamo iꞌewȳte ainug̃ towyꞌok wo kuap watoig̃neꞌen hamo wy.

Karāmpe watehaꞌat mesūwat mytyp kape hawyi yne mesūwat yi totiat iminug̃ koꞌi kape hawyi watikuap tuwanentup kahato ahewowi hap. Pauru miotā̃ e — Saꞌawyꞌi te ti ȳt watikuapꞌi Tupana sēse etiat maꞌato ti mesup wakuap tutum neꞌen neꞌi ahepe ȳt kat saꞌupꞌi. Koitywy yne ywania pe yne mītꞌīn me toimoherep terān. Iꞌaman tutum yne pe. Iꞌewȳte yne pe hewo iminug̃ kaipyi wakuap e. (Iesui Potmūꞌeria 14:17) Tupana tum poꞌog̃ aimikyꞌesat koꞌi kai watukupteꞌen hamo. Aikotā̃ aikotā̃ rakat neꞌi tutunug̃ aimowepīt hamo. Miꞌi hap puo pyi toimoherep wakuat koꞌi rakat tutum terān hamuat ahepiat hap.

Mesūwat yi Ieuwa tunug̃ mītꞌīn weig̃neꞌen wuatꞌi eꞌāt piat hamo. Tupana Ehay toꞌe yi tutum mītꞌīn me iꞌatuieg̃neꞌen hamuat e. Atunug̃ hawyi ȳt atikyꞌesatꞌi mytyp toig̃neꞌen ȳt uweꞌi itote hap e. Pȳwo atunug̃ mytyp hawyi atikyꞌesat tukupteꞌen mītꞌīn itote e. (Saumu 115:16; Isaia 45:18) Maꞌato aikotā̃ rakaria aru tukupteꞌen mesūwat yi tote iꞌewȳte karānia eꞌāt kape apuru. Tupana Ehay toꞌe Pȳwo wakuaria pe tutum yne mesūwat yi iꞌatuwatnuat. Miꞌi pe wyti teꞌeropyhuat wuatꞌi eꞌāt pe e. — Saumu 37:29.

Tomikyꞌesat nug̃ hap ewy tutunug̃ hamo saꞌawyꞌite Ieuwa tunug̃ ihaig̃nia Atãu ti hawyi haryporia Ewa miꞌiria tukupteꞌen sej̃am ikahu kahato rakat rote Eteĩ e hap tote hamo iꞌewȳte iꞌapykok hamo. (Ienesi 2:8, 15) Tupana toꞌe iꞌatuepe Pyno waku eiwemomtypyꞌi kahato ro mesūwat yi tote are e. Mesup ti worohoꞌonug̃ naꞌyn eipe mesūwat yi wato kaꞌiwatno e. (Ienesi 1:28) Atãu hawyi Ewa tukupteꞌen irane mesūwat yi nusuken note wuatꞌi eꞌāt pe. Maꞌato taꞌatuꞌaira taꞌatumontypotꞌi Tupana hap. Miꞌi pote ȳt aikotā̃ me kuapꞌi poꞌog̃ Tupana tum kuap iꞌatuepe mesūwat yi wuatꞌi eꞌāt pe tukupteꞌen hamo. Miꞌitā̃ pykai Tupana tikyꞌesat re asom mītꞌīn kupteꞌen nusuken notiat hap. Miꞌi hap etiat watikuap hamo te maꞌato miꞌi hap eꞌyj̃an mete ti raꞌyn watikuap hamo kat Tupana tunug̃ aheupiat hap.

TUTUM AHEPE TEHAY

Kat pote asom Ieuwa tum tehay ahepe. Kat pote toikyꞌesat ahepiat tokuap hap. (Porowepiu 2:1-5) Tupana Ehay henoi yneꞌi aimikuap terān Tupana etiat hap. Aikowat poperaꞌi henoi kuap hetiat. (Ekeresiasi 3:11) Maꞌato yne Tupana ehay piat mienoi koꞌi aipowȳro Ieuwa kuap hap ete. Watimowempāp ihay hawyi watikuap aikotā̃ me Tupana tiꞌatuerohik mītꞌīn hap iꞌewȳte aikotā̃ rakat imowepīt hap iꞌewȳte aikotā̃ rakat minug̃ imoꞌarōt hap. (Saumu 15:1-5) Iꞌewȳte aimūꞌe aikotā̃ me toikyꞌesat tomontypot hap iꞌewȳte tohenoi kat waku rakat hap etiat iꞌewȳte kat ȳt nakuꞌi rakat hap etiat hawyi dinheiro etiat iꞌewȳte irania kat koꞌi kat koꞌi hap etiat. Tehay puo pyi Tupana henoi tosaꞌyru minug̃ koꞌi etiat. Miꞌi hap aipowȳro watikuap poꞌog̃ Ieuwa etiat hamo. — Iuwãu 14:9.

Ieuwa tum ahepe tehay aipowȳro aiwepīt hap wȳwo watoig̃neꞌen hamo hawyi watikuap kat hamo watoig̃neꞌen hap. Tupana Ehay pe Ieuwa aipowȳro hawyi tohenoi kat waku watunug̃ aiwepīt aiwyriaꞌīn wȳwo hamo hap. Iꞌewȳte aiwepīt aiwat toig̃ hit rakaria wȳwo hamo hawyi aipowȳro aiwanentup kowoꞌi kowoꞌi hap watiꞌywyk hamo. Meikowat popera henoi Tupana Ehay puo pyi hamo. Kat pote mītꞌīn hoꞌopot kahato hap iꞌewȳte aikotā̃ hamuat meij̃uran wuat hap etiat hap. Iꞌewȳte Tupana Ehay henoi wy kat Tupana tunug̃ naꞌyn tuwemoherep tomikyꞌesat koꞌi hap ewy hamo hap.

Watikuap poꞌog̃ hamo kat pote watimohey kuap Tupana Ehay tūt ikaipyi hap. Tupana Ehay wan haria 40 ok takaria ihaig̃niaꞌīn. Taꞌatuwan kahu Tupana Ehay 1600 anu koꞌi turān. Iwan haria ȳt toꞌoꞌyatypeꞌi tukupteꞌen pykai maꞌato taꞌatuwan Tupana Ehay wentup awy yn. Tupana Ehay pe ti Ieuwa wanentup hap koꞌi yn. (2 Timoteu 3:16) Nimuat popera koꞌi kai Tupana Ehay tuweupi kahato. Ȳt karamuoꞌi Tupana Ehay piat koꞌi tuweꞌywyk. Miꞌi hap watikuap nimuat popera Tupana Ehay porerokosap hap puo pyi. Nimo poꞌog̃ ȳt taꞌatukyꞌesatꞌi Tupana Ehay aputsit hap hawyi imõꞌẽ hap iꞌewȳte neig̃ Tupana Ehay mowempāp hap. Maꞌato miꞌi pykai maꞌato korā̃ te torānia puo taꞌatumõꞌẽ Tupana Ehay hawyi taꞌatuꞌaputsit wy. Miꞌi hap tuwemoherep aikotā̃ Isaia 40:8 piat ewy Uito Tupana uhehay wuatꞌi eꞌāt pe toig̃neꞌen e. — Isaia 40:8.

UIꞌE HAP EWY ARU TUWEMOHEREP YNE E IEUWA

Tupana tunug̃ kuap yne tomikyꞌesat mītꞌīn piat wemoherep hamo hap. Watikuap taꞌyn Tupana tikyꞌesat mītꞌīn kupteꞌen wuatꞌi eꞌāt piat mesūwat yi totiat hap. Maꞌato karāmpe Atãu ȳt tihaymontypotꞌi Tupana hap upi torānia raꞌyn haipepiaria tukupteꞌen kuapꞌi poꞌog̃ wuatꞌi eꞌāt pe. Tupana Ehay toꞌe — Nimo te Atãu ȳt tunug̃ꞌi Tupana mikyꞌesat ewy miꞌi hawyi Tupana toꞌe Atãu me – Meketā̃ etunug̃ saꞌag̃ hawyi ti aru ekuꞌuro hap topyhuꞌat e. Miꞌi hawyi yne aito Atãu ewywuat saꞌag̃ nug̃ haria watopyhuꞌat. Miꞌi tupono yne mītꞌīn ikuꞌuro rakaria wo tukupteꞌen Tupana e hap ewy. (Humanu 5:12) Atãu tiꞌaparap taꞌyn hawyi asom Tupana ȳt tunug̃ꞌi poꞌog̃ kuap tomikyꞌesat mītꞌīn upiat hap.

Yne tomiꞌaira tominug̃ koꞌi puo pyi Ieuwa timoherep towat wakuat koꞌi hap. Atãu hawyi Ewa iꞌatumiꞌaparap upi Ieuwa tiꞌatuꞌapiheg̃ waku yne hampȳk hap wȳwo. Atãu saipepiaria upi Ieuwa timoherep woꞌokyꞌe hap hawyi tutunug̃ yne iꞌatupowȳro hamo hawyi ti Ieuwa tiꞌaira raꞌyn weꞌeg̃ hap wȳwo kat tutunug̃ Atãu saipepiaria powȳro hamuat hap. (Ienesi 3:15) Tosaꞌyru kuꞌuro hap puo pyi Ieuwa ahehakyeraꞌat kuap iꞌaparap hap pyi hawyi g̃uꞌuro hap pyi. Aikotā̃ me asom miꞌi hap tutunug̃.

Ahehakyeraꞌat hamo Ieuwa tipoꞌoro tosaꞌyru Iesui mesūwat yi kape. Mesūwat yi tote turān Iesui hoꞌomūꞌe mītꞌīn kat waku taꞌatunug̃ tukupteꞌen kuap wuatꞌi eꞌāt pe hamo hap iꞌewȳte toweig̃neꞌen hap hum kat saꞌup mītꞌīn kyiat Tupana watnuat hamo.a (Mateu 20:28; Iuwãu 14:6) Aikotā̃ Atãu ewy Iesui ete ȳt katꞌi iꞌaparap hap. Maꞌato Iesui tuweupi Atãu kai toimontypot Ieuwa yne hap ete tokuꞌuro hap kape. Miꞌi pote tutum kuap toweig̃neꞌen hap ahehakyeraꞌat kuap hamo. Tomiꞌaparap upiꞌi tupono ȳt tekyꞌesatꞌi Iesui kuꞌuro hap wen maꞌato ikuꞌuro miꞌi pote Ieuwa tihymūt g̃uꞌuro pyi hawyi toteraꞌaipok iraꞌyn atipy kape. Atãu ȳt tum kuapꞌi aheig̃neꞌen wuatꞌi eꞌāt piat kuap hap. Maꞌato miꞌi hap Iesui tum kuap ahepe. Tupana Ehay toꞌe Saꞌawyꞌi te ti ahaꞌaseꞌi pot Atãu ȳt topyhuꞌat hinꞌi Tupana Ehay upi. Miꞌi hawyi imempytꞌīn hemiariruꞌīn iꞌewywuaria tukupteꞌen. Miꞌi turān putꞌokꞌe wentup ok mīt inug̃ yne Tupana mikyꞌesat oktān nakat. Miꞌi mīt Atãu ewywuat maꞌato Tupana mikyꞌesat ewywuat nug̃ hat. Miꞌi pote koitywy Tupana toꞌe kuap Tosaꞌyru mohey haria pe – Eipe waku kahato uipyꞌa pe e. (Humanu 5:19) Iesui kuꞌuro hap puo pyi Tupana tunug̃ kuap yne hamo toꞌe hap ewy mītꞌīn tukupteꞌen wuatꞌi eꞌāt pe mesūwat yi tote hamo hap.

Atãu tiꞌaparap hawyi Ieuwa miꞌaira aimūꞌe kahato. Miꞌi hap puo pyi watikuap ȳt uweꞌi Ieuwa pyhyp kuap yne tomikyꞌesat koꞌi hap nug̃ hap ete hawyi Ieuwa Ehay e hap karāmpeꞌi tuweꞌywyk hap. (Isaia 55:11) Iꞌewȳte watikuap Ieuwa aikyꞌe kahato hap. Tupana Ehay toꞌe Tupana timoherep taꞌyn aikyꞌe kahato hap toipoꞌoro Tosaꞌyru sēse ahewowi aimoieig̃neꞌen pakupꞌi hap nug̃ hamo ȳt watikyꞌe ite Tupana pykai. Toipoꞌoro Tosaꞌyru aiminug̃ saꞌag̃ koꞌi atumomã yne hamo. 1 Iuwãu 4:9, 10.

Tupana tum naꞌyn tosaꞌyru sēse tomikyꞌe poꞌog̃ nakat ahehakyeraꞌat hamo ikuꞌuro aikyꞌe hap upi hamo. Miꞌi pote watimohey kuap tutum nerān ahepe ȳt kat saꞌupꞌi yne yne ȳt katꞌi rakat. (Humanu 8:32) Kat hap aru Tupana tunug̃ toꞌe hap ewy aheupi. Miꞌi hap etiat watikuap hamo.