WEMŪꞌE HAP 2

Etikyꞌe ro eꞌaito eharyꞌi yn

— Miꞌi tupono ȳt eweitek teiꞌo Tupana mipoꞌi woꞌokyiꞌat hap e. — Maku 10:9

Ieuwa tikyꞌesat kahato tomohey sese haria woꞌokyꞌe hap yn wȳwo tukupteꞌen hap. (Saumu 6:8) Miꞌi pote waku woꞌomenaru haria toꞌokyꞌe kahato wy. Miꞌitā̃ mote toꞌomohey kahato hamo hawyi toꞌomohey hap iꞌatupowȳro waku pe tukupteꞌen woꞌomenaru hawe hamo.

Korā̃ iraniaꞌīn woꞌomenaru haria toꞌomohey kahatoꞌi. Maꞌato waku pe ereig̃neꞌen nerān eꞌaito eharyꞌi wȳwo pote kan waku etunug̃.

1 ETIMONTYPOT EWOꞌOMENARU HAP POꞌOG̃ KAT KOꞌI KAT KOꞌI KAI

KAN TUPANA EHAY AIMŪꞌE — Etiꞌaira o poꞌog̃ waku rakat. (Wiripu 1:10) Woꞌomenaru hap waku poꞌog̃ iraniaꞌīn kat koꞌi kat koꞌi kai. Miꞌi pote waku erewanentup poꞌog̃ woꞌomenaru hap kape iraniaꞌīn kat koꞌi kai.

Ieuwa tikyꞌesat kahato ewepīt eꞌaito eharyꞌi wȳwo hap. (Ekeresiasi 9:9) Tupana tikyꞌesat wy eteropat eꞌaito eharyꞌi hawyi woꞌopowȳro haria wo eweikupteꞌen. Iꞌewȳte waku erehik eꞌaito eharyꞌi ete wepīt hap wȳwo eweikupteꞌen hamo. (1 Kurintiu 10:24) — Morokyꞌe kahato uheꞌaito uheharyꞌi waku ere. Miꞌi hap waku etimoherep eminug̃ koꞌi puo pyi.

Seꞌaito tum teharyꞌi pe ihy hakup takat. Seꞌaito putꞌokꞌe toꞌyat pe hawyi toipuenti teharyꞌi tuwemiꞌu nug̃ turān.

KAN ETUNUG̃ KUAP.

Waku mōtꞌi ereig̃neꞌen eꞌaito eharyꞌi wȳwo. Waku etimoherep ikyꞌe hap hawyi woꞌoꞌeropat haria wo eweikupteꞌen hamo.
Ȳt erenentup teiꞌo ewowi yn maꞌato waku erenentup eꞌaito eharyꞌi kape wy.

Seꞌaito teharyꞌi wȳwo tukupteꞌen toꞌowȳwo teꞌerenuk turān

2 ETIꞌONKA O EPYꞌA

KAN TUPANA EHAY AIMŪꞌE — Uwe tehaꞌat haryporia kape ikyꞌesat hap wȳwo tuwanentup hawe pote ȳt nakuꞌi kahato rakatno toig̃neꞌen Tupana wanentup hawe e. (Mateu 5:28) Ȳt erenentup teiꞌo aat kaꞌap saꞌag̃ koꞌi kape sewaire hap kape. Miꞌitā̃ etunug̃ mote etiꞌaparap hamo eꞌaito eharyꞌi pe.

Tupana Ehay henoi — Pyno eweꞌeg̃ wo kat som putꞌokꞌe epyꞌa piat kaipyi e. (Porowepiu 4:23; Ieremia 17:9) Etiꞌonka terān epyꞌa pote waku emitumuo kat kape erehaꞌat pupi. (Mateu 5:29, 30) Waku etunug̃ aikotã Io ewy. Miꞌi ȳt karāmpeꞌi tehaꞌat haryporia kape ikyꞌesat hap wȳwo. (Io 31:1) Karāmpe teiꞌo erehaꞌat video koꞌi sio iaꞌag̃kap koꞌi mītꞌīn ȳt sokpe piariaꞌi kape. Iꞌewȳte ȳt nakuꞌi ihaig̃nia typy ok iharyꞌi iꞌewȳte ȳt nakuꞌi haryporia typy ok heꞌaito.

Ipotpap hawe seꞌaito hoꞌokup wentup haꞌag̃kap teharyꞌi ete

KAN ETUNUG̃ KUAP.

Waku torānia ikuap epiat eꞌaito sio eharyꞌi kyꞌe sese hap.
Erenentup kahato o eꞌaito eharyꞌi wanentup hawiat koꞌi kape. Ewyꞌok timopyꞌahak eꞌaito sio eharyꞌi pote waku pya ereig̃neꞌen ewyꞌok kai.