Aikotā̃ meig̃ eweiꞌakīt kuap niatpo hap koꞌi.

Eremenaru hawyi erokosap kuap niatpo etiat hap koꞌi. Miꞌi hap tuwemoherep kuap seꞌaito hawyi seharyꞌi teꞌeruwanentup teꞌeruweupi pote. Iꞌewȳte putꞌokꞌe kuap niatpo hap koꞌi woꞌomenaru haria ete. Kotā̃ e hap. Asuwe ȳt katꞌi miꞌu sio iꞌatuꞌyat yꞌy wato tomig̃ sio iꞌatumikyꞌe kahato koꞌi iꞌatukuꞌuro kuap.

Ȳt nakuꞌi epyꞌahak eꞌaito eharyꞌi ete maꞌato waku woꞌowese haria wo eweikupteꞌen. (Mateu 5:23 hawyi 24) Miꞌi hamo waku etunug̃ aikotā̃ Tupana piat ainãpin hap ewy.

1 EHAY TUERETO EHARYꞌI EꞌAITO WȲWO

KAN TUPANA EHAY AIMŪꞌE — Asuwe waku ehay maꞌato asuwe waku eponik e. (Ekeresiasi 3:1 hawyi 7, TNM) Niatpo hap putꞌokꞌe ewoꞌomenaru hap ete pote waku eiwoꞌoꞌehay miꞌi hap etiat. Ȳt nakuꞌi heso eiwoꞌope maꞌato ehay tuereto eharyꞌi eꞌaito wȳwo epyꞌa pyi hawyi ewanentup hawiat koꞌi etiat. (Ewesu 4:25) Ȳt epyꞌahakꞌi eꞌaito eharyꞌi ete neig̃ ewuꞌuka teiꞌo iwȳwo. Maꞌato waku ehay tuereto eꞌaito eharyꞌi wȳwo wakuat sehay ete. Miꞌitā̃ etunug̃ mote woꞌowese hap wȳwo ereig̃neꞌen hamo eꞌaito eharyꞌi wȳwo. — Porowepiu 15:4; 26:20

Etikyꞌesatꞌi eꞌaito eharyꞌi minug̃ koꞌi pote ehay iwȳwo perupꞌi popuo hawyi etimoherep woꞌokyꞌe sese hap iꞌewȳte etimontypot ro eharyꞌi eꞌaito. (Korosi 4:6) Putꞌokꞌe niatpo hap koꞌi ewoꞌomenaru hap ete pote waku meremo neꞌi etiꞌatuꞌakīt. Iꞌewȳte waku ehay tuereto eꞌaito eharyꞌi wȳwo. — Ewesu 4:26

KAN ETUNUG̃ KUAP.

• Etiꞌaira o karāmpe waku ehay eꞌaito eharyꞌi wȳwo. Ehehay turān ewei’aira wakuat sehay ko’i.

• Eꞌaito eharyꞌi ihay ewȳwo turān waku erenentup ihay kape. Ȳt nakuꞌi epohep toꞌe hap. Miꞌi ihay kahu hawyi ehay kuap hamo.

2 EREWANENTUP HAWYI ETIKUAP O EꞌAITO EHARYꞌI WANENTUP HAP KOꞌI

KAN TUPANA EHAY AIMŪꞌE — Waku etikāt kahato aikotā̃ waku watoꞌomontypot hamuat e. (Humanu 12:10) Etimoherep kuap erenentup kahato eꞌaito eharyꞌi ihay kape. Waku etikāt eꞌaito eharyꞌi wanentup hawe hawyi waku etimoherep woꞌokyꞌe sese hap iꞌewȳte wemowatoꞌi hap. (1 Peteru 3:8; Tiaku 1:19) Eꞌaito eharyꞌi ihay turān waku erenentup pȳwo pe ti rat toꞌe hap. Iꞌewȳte waku epohep kat koꞌi kat koꞌi eminug̃ erenentup ihay kape hamo. Sio — Watoꞌoꞌehay kuap asom miꞌi hap etiat meiko ere kuap. Woꞌomenaru haria wentup ewy yn tukupteꞌen mote ȳt iꞌatupyꞌahakꞌi toꞌoꞌete iũteꞌen. — Ekeresiasi 7:9

KAN ETUNUG̃ KUAP.

• Eꞌaito sio eharyꞌi ihay emikyꞌesat ewywuat’i pote miꞌi pykai wen waku erenentup kahato ihay kape.

• Waku erenentup kahato eꞌaito eharyꞌi tehay kape maꞌato waku etunug̃ poꞌog̃ waku etimoherep erenentup ihay pȳwo piat koꞌi.

3 EWETUNUG̃ NO AIKOTĀ̃ EWEIWANENTUP HAP EWY

KAN TUPANA EHAY AIMŪꞌE — Uwe ipotpat haty wo hekat tuwemowato wyti aru maꞌato uwe ihay yn nakat ȳt kat ipotpat hap wȳwoꞌi ihakyꞌeꞌi rakat topyhuꞌat e. (Porowepiu 14:23) Etikuap woꞌomenaru hap piat niatpo hap koꞌi waku kahato maꞌato miꞌi hap ynꞌi. Waku etunug̃ poꞌog̃ rakat aikotā̃ eweiꞌaira eiwoꞌowȳwo hap ewy niatpo hap koꞌi akīt hamo. (Porowepiu 10:4) Miꞌi hap nug̃ hamo niatpo saꞌag̃ maꞌato eipotpap eiwoꞌomenaru hap waku kahato hamo imowepīt kahato. Eipotpap aikotā̃ wentup yn ewy Ieuwa eipoitȳro kahato hamo. — Ekeresiasi 4:9

KAN ETUNUG̃ KUAP.

• Eweiꞌaira kuap kat koꞌi kat koꞌi ewetunug̃ wentup tewoꞌi niatpo puo eweikupteꞌen turān.

• Karāmpe karāmpe waku eweiwanentup eiminug̃ koꞌi eiwoꞌomenaru hawe — Korā̃ poꞌog̃ waku saꞌawyꞌi wuat kai ere.