Tupana epowȳro kuap waku pe ereig̃neꞌen eꞌaito eharyꞌi wȳwo

Ieuwaa ti rat woꞌomenaru nug̃ hat. Tupana Ehay henoi Ieuwa tunug̃ saꞌawyꞌi wuat haryporia hawyi tutum Atãu eharyꞌi wo. Miꞌi hawyi Atãu iwepīt kahato hawyi toꞌe — Taꞌi mej̃um ti toig̃neꞌen ekag̃ maꞌato uiat uikag̃ kawiat iꞌewȳte epuꞌi uipuꞌi sese kawiat en e. (Ienesi 2:22 hawyi 23) Ieuwa tikyꞌesat te woꞌomenaru haria wepīt hap wȳwo tukupteꞌen hap.

Eremenaru hawyi asuwe erenentup — Waku kahato aru watoig̃neꞌen ere. Seꞌaito hawyi seharyꞌi toꞌokyꞌe kahato pykai wen maꞌato putꞌokꞌe kuap iꞌatuete niatpo hap koꞌi. (1 Kurintiu 7:28) Mesūwat popera puo pyi etipuenti hamo Tupana Ehay piat woꞌonãpin hap koꞌi. Miꞌi woꞌonãpin hap koꞌi emowepīt kuap eꞌaito hawyi eharyꞌi wȳwo. — Saumu 19:8-11 kape

1 ETUNUG̃ O TUPANA MIKYꞌESAT OKTĀN

KAN TUPANA EHAY AIMŪꞌE — Seꞌaito ti g̃etap piat akag̃. — Ewesu 5:23

Ieuwa tikyꞌesat kahato seꞌaito teropat teharyꞌi ikyꞌe hap wȳwo. (1 Peteru 3:7) Tupana tunug̃ haryporia ihaig̃nia powȳro sese hanuat. Miꞌi pote toikyꞌesat kahato ihaig̃nia timontypot teharyꞌi hawyi toimoherep woꞌokyꞌe sese hap hupi. (Ienesi 2:18) Waku etikyꞌe eharyꞌi aikotā̃ ewekyꞌe hap ewy hawyi waku etipowȳro eharyꞌi aikotā̃ epowȳro hap ewy. — Ewesu 5:25-29 kape

Haryporiaꞌīn Ieuwa tikyꞌesat kahato eweimontypot pȳwo pe eiꞌaito iꞌewȳte ipowȳro Tupana mikyꞌesat nug̃ hamo wy. (1 Kurintiu 11:3; Ewesu 5:33) Hawyi eipyꞌa pe eweipowȳro o eiꞌaito miꞌaira koꞌi aira hamo. (Korosi 3:18) Miꞌi hap etunug̃ mote Ieuwa wanentup hawe hawyi eꞌaito wanentup hawe en waku kahato rakat erepyhuꞌat hamo. — 1 Peteru 3:1-6 kape

KAN ETUNUG̃ KUAP.

• Waku apo ere eꞌaito eharyꞌi pe — Aikotā̃ e pote asom areig̃neꞌen seharyꞌi seꞌaito wakuatno ere kuap. Erenentup kahato o eharyꞌi eꞌaito e hap koꞌi kape hawyi etunug̃ o iwoꞌonãpin hap koꞌi ewy.

• Mōtꞌi kahato kuap eweipuenti eiwoꞌomowepīt hap miꞌi pote etimoherep ewese hap.

2 ETIMOHEREP O WOꞌOKYꞌE SESE HAP

KAN TUPANA EHAY AIMŪꞌE — Waku erenentup kahato eꞌaito eharyꞌi mikyꞌesat koꞌi kape. Etimoherep o woꞌokyꞌe hap eharyꞌi eꞌaito upi e. (Wiripu 2:3 hawyi 4) Waku hotꞌokꞌe ēte Ieuwa tikyꞌesat tomohey haria iwese rakaria wo teꞌeropyhuꞌat yne mītꞌīn me. (2 Timoteu 2:24) Tupana Ehay toꞌe — Uwe ihay kahato tuwekaipyi toig̃neꞌen aikotā̃ kyseꞌyp ãpy ewywuat. Maꞌato iweꞌeg̃ rakat ehay wyti aikotā̃ mohag̃ ewy e. (Porowepiu 12:18) Miꞌi pote waku etiꞌaira sehay se kahato rakaria. Tupana paꞌãu epowȳro ehay sehay wakuat koꞌi woꞌokyꞌe hap wȳwo hamo. — Karasia 5:22 hawyi 23; Korosi 4:6

KAN ETUNUG̃ KUAP.

• Ehay eꞌaito eharyꞌi wȳwo eꞌyj̃an mete waku ehentup Tupana kape. Miꞌi hawyi Tupana epowȳro etimoherep woꞌowese hap hamo hawyi erenentup weꞌeg̃ wo.

• Erenentup hepamo kat ere ehay hamo eꞌaito eharyꞌi wȳwo hawyi aikotā̃ me ehay iwȳwo hamo.

3 WENTUP EWY YN WAKU EWEIKUPTEꞌEN

KAN TUPANA EHAY AIMŪꞌE — Eremenaru hawyi wentup ewy yn ereig̃neꞌen eꞌaito eharyꞌi wȳwo. (Mateu 19:5) Maꞌato eꞌaito eharyꞌi tuweupi ekai miꞌi pote tuwanentup tuweupi. Miꞌi tupono waku woꞌomenaru haria wentup ewy yn tukupteꞌen. (Wiripu 2:2) Miꞌitā̃ mote waku kahato eweiꞌaira eimiꞌaira koꞌi hamo. Tupana Ehay henoi — Waku etikāt kahato wakuat enãpin hap miꞌi pote ti aru ereig̃neꞌen waku pe kahato e. (Porowepiu 20:18) Waku etiꞌaro Tupana Ehay piat woꞌonãpin hap koꞌi eiwoꞌopowȳro eimiꞌaira koꞌi aira hamo. — Porowepiu 8:32 hawyi 33

KAN ETUNUG̃ KUAP.

• Ehay o eꞌaito eharyꞌi wȳwo ewanentup hawiat koꞌi epyꞌa pywiat koꞌi etiat.

• Etiꞌaira emiꞌaira koꞌi eꞌyj̃an mete waku ehenoi eꞌaito sio eharyꞌi pe.