CILONGESA 103
“Bumwene Bwobe Bwije”
Yehova nakulahesele ngwendi: ‘Kulila kucikakalako nambe kuziba kubabala nambe kutsa. Njikasikumuna misozi yoshe ku mesho abo. Byuma byoshe byabibi bakabibala.’
Yehova wakele Adama na Eva mu lihya lya Edeni mangana balikuwe kuyoya mu kwoloka na mu kubwahelela. Bapandele kulemesa Ishabo wa mwilu na kushulisa lino lifuti-libu na bana babo. Nameme Adama na Eva kubononokele Yehova, oloni biyongola byendi kubyatengulukile. Muno mu libulu tunalimwena ngwetu byuma byoshe byakakulahesa Njambi bikalishulisilila. Bumwene bwendi bukanena bibezikiso byabibwa ha lifuti-libu ngwe mwakulaheselele Abrahamu.
Ololo batundisa Satana na badimona bendi na banu boshe bababi. Banu boshe bakalemesa lika Yehova. Kutukababala nambe kutsa. Oloni ha litangwa na litangwa, tukapwa ba kubwahelela na kukala na mibila ya kukanyama. Lifuti-libu likapwa paradaisi. Banu boshe bakakala na byakulya na binjibo byabibwa. Kukukakala bikenya nambe baka-lwozi, banu bakakala na ngozi. Tusitu ba mu shwata kubakatutewe, co netu lalo kutukabatewe.
Tukabwahelela manene Yehova mwakashangumuka kusangula banu. Tukatambula banu bayoyele kunima ba kufwa ngwe Abele, Nowa, Abrahamu, Sala, Mosesa, Ruthi, Esta na Devidi. Bakalikwatasana hamo netu mu kutengulula lifuti-libu na kulipwisa paradaisi. Simbu yoshe kukakala bipangi byabingi byabibwa bitukapanga.
Yehova atonda ngwendi mukakaleko. Mukamuzibuka mu ngila ya kulitila. Tutwaleleleniho kushwena kuyehi na Yehova ha litangwa na litangwa na ku myaka yoshe.
“Obe Yehova Njambi yetu, unafwila kutambula bumpau na kasingimiko na nzili, mwafwa yobe watangele byuma byoshe, co mwafwa ya cizango cobe mukemwo byakeleko, co wabitangele.”—Kujombolola 4:11