Mwakulilongethela Mbimbiliya mu Ngila Yaivwa Mangana Imikwathe

Yoshwa ali na kutanda Mashiko; vivumbe vya Yeliko vyathiuka, cho kwathala lika njuvo ya Lahave; Yoshwa nolwela mavoko endi mwilu oku ali na kulombela

YOSHWA walishoshomwenene manene ha chipangi chivamwanene. Wapandele kutwamenena mbunga ya Vaisalele mu Lifuti lya Chikulahetho, oloni kwakele vukalu vwakama vwalijujukilile. Oloni Yehova wamukulahethele na kumutakametha ngwendi: ‘Likolethe na kuthimpa. Nyunga mashiko ange. Alave mutanya na vuthsiki mangana wononoke vyuma vyoshe vije vivanathonekamo. Cho ukavethzika na kukala mwamuvwa mu kuyoya kwove.’—Yosh 1:7, 8.

Muno mu ‘matangwa a kukaluwa,’ tuli na kuliwana na vukalu vwakama. (2 Tima 3:1) Ngwe mwa Yoshwa, twatha kuvethzika nga tukavangeya vinangulo vya Yehova. Netu tunapande kutanda Mbimbiliya thimbu yoshe na kupangetha vitutanda mangana tuhyane vyetheko vituliwana navyo.

Oloni vwingi vwetu tunatha kwendeka ngwetu kulilongetha Mbimbiliya kukatukaluwila. Kulilongetha Mbimbiliya kwapwa kwa theho manene. Ngechi, pangetheni echi chipalo cha “Ethekeni Kupangetha Evi Vingila” mangana muwane vithimpi vije vimikwatha kutanda mwamuvwa Mbimbiliya.

Muka-kwimba wembile ngwendi: “Njitwamenene mu ngila ya mashiko ove, omwo muli akewo njili na kuvwahelela.” (Myatho 119:35) Muvwahelela manene nga thimbu yoshe mutanda Lijwi lya Njambi. Muwana vithimpi vya theho omwo mutondethetha mu Lijwi lya Njambi.

Nameme kumutwamenena mbunga ya vanu ngwe mwalingile Yoshwa, oloni kuli vukalu vumuli na kupinda navwo. Ngechi, ngwe mwa Yoshwa, lilongetheni vithoneka mangana vimikwathe. Nga mulinga ngocho, cho muvethzika manene na kukala na mana.

ETHEKENI KUPANGETHA EVI VINGILA

Lombeleni thimbu kanda mushangumuke kulilongetha. Mu Mbimbiliya mwakala vithinganyeka vya Njambi Muka-ndthzili Yoshe vije vyatha kumikwatha. Ngechi, omwo mutanda Mbimbiliya, mulombeni mangana amikwathe kuthzivithitha na kwanuka vimutanda na kuvipangetha mu vuyoye vweni.—Ezela 7:10.
Lihuleni vihula omwo mutanda Mbimbiliya nambe mavulu a kukundama ku Mbimbiliya. Lihuleni ngweni: ‘Ou muthzimbu unjilongetha vika hali Yehova? Evi Vithoneka vinakundama vati ku muthzimbu wa mu Lijwi lyendi? Njatha kupangetha vati evi vithoneka mu kukwatha vakwetu?’
Thinganyekethetheni ha vyuma vimutanda. Echeleni tahi kutanda, cho thinganyekethetheni ha vihula evi: ‘Njinalithzivi vati munjinatanda eyi ñanda? Yendeka vika ha vuyoye vwange vwa kunima novu vwa thimbu ino nambe vwa kulutwe? Njatha kupangetha vati evi vinangulo vya mu Mbimbiliya mu vuyoye vwange?’ (Yombi 23:5; Myatho 49:3) Thinganyekeni vikalingitha Yehova aleke vangamba vendi ngwendi kethi valinge vyuma vimo na vukalu vutunda mu kulinga ovyo vyuma.—Kwitu. 32:28, 29.
Lingeni ngwe muli na kumona vimutanda nga mutanda ñanda ije yendeka ha vyuma vimo. Chakumwenako, lingeni ngwe muli na kumona vandolome va Yosefa vamulandetha ku Vaishimaela. (Kusha. 37:18-28) Vika muli na kuthziva nambe kumona, cho lwengo muka muli na kuthziva? Lyakeni mu chifwa chovo vanu vavanendeka. Vali na kuthinganyeka vika, cho vali na kulithziva vati? Nga mulinga ngocho, cho mulilongetha mu ngila yaivwa.
Pangetheni vikwata vimuli navyo mangana vimikwathe mu kutondethetha. Thzivukeni mwakupangethela vikwata vili mu ndaka yeni vije vili ha intaneti na vije vivanapulinta. Kethi muthzive shwamwa kwihula vakweni mangana vamikwathe mwa kuvipangethela mwamuvwa. Chakumwenako, mwatha kupangetha Watch Tower Publications Index nambe Buka ya Lipatisiso ya Lipaki za Jehova. Evi vikwata vimikwatha kutanekeya viñanda vyavingi vivanendeka, cho lalo vimikwatha kuthzivuka muvanalumbunwina mavesi amangi a mu Mbimbiliya. Pangetheni Litaba Zeekelizwe mu Bibele ya Toloko ya Lifasi Lelinca. Evi viñanda vinendeka ha mitamba na thimbu ivyalingiwile vyuma vitutanda na kulema kwa vyuma vivapangethele na vipetheletho vivakele navyo na vyuma vyeka.
Itulukeni mu vithimpi vyakama mangana mwanuke vwathi viñanda vimunalilongetha. Lekeniko vakweni vyuma vimunalilongetha. Kuli vyuma vimo vimwatha kupangetha mu lihya ndi? Nga mulinga ngocho, kumwanuka lika vithimpi vyakama, oloni mukwatha vakweni mangana navo valilongetheko chimo.