Nga Kunasholoka Bukalu bwa Cishitukila

“Twalizibile manene kuzeya. Byuma byoshe bitwakele nabyo byongumukile na libazi na lindoba lije lyatutumukile mu lilundu.”—Andrew, wa ku Sierra Leone.

“Lihunzi lyakama mulyahwile, twelukile ku njubo yetu. Co twakawanene byuma byoshe binanyongo. Twalikasamenene manene. Munange wa mumbanda wabulyamene, na kushangumuka kulila manene.”—David, wa ku Virgin Islands.

NGA neni mwaliwanaho laja na bukalu bwa cishitukila, mwasa kuzibisisa mubanalizibila baje banaliwana na bukalu bwa cifwa eci. Obu bukalu bukakomokesa manene, kuzeyesa, na kutanganesa, co bukanene bishoti. Banu babangi mubakaliwana nobu bukalu, bakalizibi ngwe kuyoya kesi kwa seho.

Nga mwaliwana na bukalu bwakama bwa cishitukila, neni mwasa kuliziba ngweni kuyoya kesi kwa seho. Munasa kusinganyeka ngweni cacibwa kutsa lika. Oloni Mbimbiliya imwesa ngwayo kuyoya kwapwa kwa seho manene, co lalo yamwesa byuma bitulingisa tukale na lilabelelo lya kukayoya mwamubwa kulutwe.

BUSUNGA BWA MU MBIMBILIYA BUTUKWASA TUKALE NA LILABELELO

Mukanda wa Muka-kwambulula 7:8 ngwawo: “Mamaneselelo a cuma anatubakana bushangumukilo bwaco.” Nga mwaliwana na bukalu, lilabelelo lyeni lyasa kuzeya. Oloni nga mweseka mumwasela mwoshe kulinga byuma bije byasa kumizembeleka, co mumona buyoye mu ngila yeka.

Mbimbiliya yakulahesa ngwayo, mu kaye “kumukakala kulila nambe busiwa.” (Isaya 65:19) Eci cikulaheso cikalishulisilila hano hasi hoshe mu hakapwa palandaisi mu Bumwene bwa Njambi. (Myaso 37:11, 29) Mu palandaisi kumukakala bukalu bwoshe bwoshe. Kutukanuka lalo bukalu buje bwatuzibisile kubabala ku mbunge, mwafwa Njambi Muka-ndthzili Yoshe nakulahesa ngwendi: “Byuma byalaja bikahwa, co bakabibala.”—Isaya 65:17.

Acisinganyekeni ha ñanda eyi: Ishamatanga natukulahesa kukayoya mwamubwa na kukala na lilabelelo mu Bumwene bwendi bwa kulumbunuka. (Njelemiya 29:11) Kuma kuzibuka eyi ñanda kumikwasa mupwe ba kubwahelela mu kuyoya ndi? Sally itunendeka mu cilongesa ca kulibanga wendekele ngwendi: “Nga tusinganyekesesa ha byuma byabibwa bibukatulingila Bumwene bwa Njambi kulutwe, co tulikolesa na kujeneka kwaka manene mbunge ku byuma byabibi byalingiwile kunima.”

Tumilanya ngwetu mulilongese byuma byabingi bibukatulingila Bumwene bwa Njambi. Nga mulinga ngoco, co mwasa kulikolesa ha simbu imuliwana na bukalu mwafwa muzibuka ngweni bukalu bwoshe bukahwa. Oloni ha simbu ino, binangulo bya mu Mbimbiliya byasa kumikwasa mulikolese nga muliwana na bukalu bwa cishitukila. Tucisimutwiyeniko ha byakumwenako bimo.

Bisoneka bya mu Mbimbiliya Bije Byasa Kumikwasa

Waneniko simbu yaingi ya kulala.

“Mwamubwa kukala lika na byabindondo mu kwoloka kutubakana kuungama bisimbu byoshe na kupanga na maboko abali mu kusheka lihunzi.”—Muka-kwambulula 4:6.

Baka-kutondesesa banawana ngwabo: “Nga munu ali mu bukalu, oloni kawana simbu yaingi ya kulala, . . . abwezelela manene ku bukalu bwendi.” Ngeci kunapu kwa seho manene kuwana simbu yaingi ya kulala.

Lekeniko bakweni bukalu bweni.

“Cishota mbunge capwa citele ca kulema, oloni majwi a ngozi anena kubwahelela.”—Visimo 12:25.

Lekeniko munu wa mu nanga yeni nambe kabusamba keni wa ha mbunge bukalu bweni. Kwakubwa kulinga ngoco mwafwa munu wa mu nanga yeni nambe kabusamba keni asa kumitolilila mwamubwa na kumitakamesa nambe kumikwasako mu bingila bikwabo.a

Singanyekeni ha byuma byabibwa bikalingiwa kulutwe.

“Yetu tubandamena bije byanakulahesa Njambi, bikebyo, lilu lyaliha na kaye kakaha, muje mukakala busunga.” —2 Petulu 3:13.

a Munu uje akalizibi kukala manene mu bishoti simbu yoshe napande kulimona na bandotolo.