Nga Umo mu Bulo Alinga Bubi

“Munalume wange mwanjilekele ngwendi atsiya bulo bwetu na kulyambata na mumbanda weka, njashakele kutsa. Njazibile kubabala ku mbunge, maneneni omwo njanukile byuma byoshe binjamulingililile.”—Maria wa ku Spain.

“Munakazi wange mwanjisezele, njalizibile ngwe cilyo cimo ca mubila wange cinatsi. Biyongola na byuma byoshe bitwalikumiiye kulinga byatangukile. Simbu imo njakele na kuziba mu bwongo heu, oloni kukapwa muje bishoti byanjiwana lalo.”—Bill wa ku Spain.

MUNU asa kuziba manene kubabala ku mbunge nga muka-limbo lyendi amutengulukila. Baka-kulyambata bamo bakakonekela muka-limbo lyabo nga natenguluka mu busunga, co bakatwalelelaho kukala nendi mu bulo.a Oloni nameme bulo butwalelelaho kukalako nambe buhwe, nga munu azibuka ngwendi muka-limbo lyendi nalingi bubi ha simbu yailaha akalizibi manene kubabala ku mbunge. Bika byasa kukwasa munu nga aziba kubabala ku mbunge?

BISONEKA BIJE BYASA KUMIKWASA

Kuli Bisoneka bikazembeleka baje bakalizibi kubabala ku mbunge mwafwa ya kujeneka kulongwa kwa muka-limbo lyabo. Banalilongesa ngwabo Njambi nendi kesi kuliziba mwamubwa nga baliziba kubabala ku mbunge.—Malakiya 2:13-16

“Omwo biyongola mu mbunge yange byatumine, oloni yobe wanjizembelekele na kunjibwahelelesa”—Myaso 94:19.

Bill wendekele ngwendi: “Omwo njakele na kutanda eyi vesi, njalizibile ngwe Yehova ali na kunjizembeleka mu cizemo ngwe mwakalingila cisemi wa munalume wa cizemo.”

“Yobe wapwa wa kulongwa kuli baje ba kulongwa kuli yobe.”—Myaso 18:25.

Munalume wa Carmen mwatwaleleleleho kulinga bubi ha bingonde, Carmen wendekele ngwendi: “Munalume wange kapwile wa kulongwa. Oloni njakulahelele ngwange Yehova kanjiyengula mwafwa wapwa wa kulongwa kuli yange.”

“Kesi mushote mbunge ha cuma cimo, oloni mu malombelo eni oshe lombeni Njambi ha bije munajeneka . . . Co kwoloka kwa Njambi, kuje munu naumo wahi asa kuzibisisa, kukanyunga bimbunge byeni.”—Filipu 4:6, 7.

Sasha wendekele ngwendi: “Njikatanda awa majwi simbu yoshe. Munjatwaleleleho kulombela kuli Njambi, wanjikwasele njiyoye mu kwoloka.”

Boshe batunasimutwiya balizibile kuzeya ha simbu imo. Oloni bakulahelele Yehova Njambi, co wabatakamesele kwitila mu Lijwi lyendi. Bill ngwendi: “Kukala na likulahelo kwanjitakamesele ha simbu ibyakaluwile byuma mu kuyoya kwange. Nameme simbu imo njalizibile ngwe ‘njenda mukati ka butsiki mu lisusulungu,’ oloni Njambi wakele hamo nange.”—Myaso 23:4.

a Nga mushaka kuzibuka byabingi ha ñanda ya kukonekela muka-limbo lyeni nambe embwe, tandeni Toneni! ya Ingilishi ya April?22, 1999, ha liputa 3, 5, na 9 ha mutwe wa “When a Mate Is Unfaithful

Byuma Byakwasele Bamo Balikolese mu Bukalu

Tandeni na kusinganyekesesa ha bisoneka bije byasa kumizembeleka.

Bill wendekele ngwendi: “Njatandele libulu lya Myaso na lya Yombi na kufundika mavesi aje endeka manene ha byuma binjaliwanene nabyo mu kuyoya. Njanangukile ngwange aba baka-kusoneka Mbimbiliya baliwanene na bishoti na bukalu ngwe bunjaliwanene nabwo.”

Tolilileni ku myaso ya kuzembeleka.

Carmen wendekele ngwendi: “Munjakele na kulifwita na cilabulabu, njakele na kutolilila ku myaso ya kuzembeleka. Kulinga ngoco, kwanjizembelekele manene.” Daniel wendekele ngwendi: “Njalilongesele kwimba gita, co kulinga ngoco kwakele na kunjishubulwisa.”

Lekeniko bakweni mumuli na kulizibila.

Daniel wendekele ngwendi: “Kunjashakele kulekesa bakwetu munjilizibila. Oloni njakele na babusamba bababwa, co njakele na kusimutwiya nabo ha litangwa na litangwa. Njabalekele munjakele na kulizibila mu kubasonekela mikanda nambe kubaleka mu kanwa ha simbu injakele na kusimutwiya nabo. Kulinga ngoco kwanjikwasele manene.” Sasha wendekele ngwendi: “Baka-nanga yange banjikwasele manene. Banana simbu yoshe bakele na kunjikwasa. Bakele na kunjitolilila mwamubwa munjakele na kwendeka. Batate nabo banjakele manene mbunge, co banjizembelekele.”

Lombeleni simbu yoshe.

Carmen wendekele ngwendi: “Njakele na kulombela simbu yoshe. Njalizibile ngwange Njambi wakele muyehi nange, wakele na kunjitolilila, na kunjikwasa. Njashwenyene manene muyehi na Njambi mu simbu eyi injaliwanene na bukalu.”