Nga Muliziba Ngweni Kumwasa Kutwalelelaho Kulikolesa

Adriana wa ku Brazil wendekele ngwendi: “Njatwaleleleho kukala na bisinganyeka bya cifwa eci. Ngeci njamwene ngwange cacibwa kulitsiya lika.”

MWALIZIBAHO laja kubabala ku mbunge kweta na ha seteko ya kusinganyeka kulitsiya ndi? Nga mukemwo, co muzibisisa mwamubwa mwalizibililemo Adriana. Walifwitile na bishoti byabingi manene na kuliziba busiwa na kujeneka kukala na lilabelelo. Adriana wabinjile mushongo wa kuliziba busiwa simbu yoshe.

Tucisimutwiyeni lalo hali Kaoru wa ku Japan uje wakele na kubinjisa bisemi bendi ba tukulukazi. Wendekele ngwendi: “Ha simbu eyi njakele na kujuka manene ku bipangi. Mu kwita kwa simbu cashu cange ca kulya cahwile, co njalifwitile manene na cilabu-labu. Ngeci njasinganyekele ngwange njinapande kulitsiya mangana njipatuke ku bukalu.”

Munalume umo wa ku Nigeria wa lizina lya Ojebode wendekele ngwendi: “Njakele na kuliziba busiwa simbu yoshe na kulila, co njashakele kuwana ngila ya kulitsiyilamo.” Kubezika Ojebode, Kaoru, na Adriana, kubalitsiyile. Oloni ha mwaka na mwaka banu babangi bakalitsiyi.

KULI KUTWASA KUWANA BUKWASI?

Banu babangi baje bakalitsiyi bapwa banalume, maneneni baje kubesi kulomba bukwasi mwafwa ya shwamwa. Yesu wendekele ngwendi baka-kubinja bakatondo cimbanda. (Luka 5:31) Ngeci, nga neni mukasinganyeka bya kulitsiya, kesi muzibe shwamwa kulomba bukwasi. Banu babangi baje bali na kulifwita na bishoti banawana ngwabo kupangesa bumbanda nakwo kwasa kubakwasa balizibeko mwamubwa na kulikolesa. Ojebode, Kaoru, na Adriana bapangesele bumbanda, co ano matangwa bali na kulikolesa.

Bandotolo bakakwasa baka-kwombwa kupangesa bumbanda nambe kusimutwiya lika nabo nambe kupangesa bingila byoshe bibali. Co lalo baka-kwombwa bakalizibi mwamubwa nga babusamba na baka-nanga yabo babazibisisa, babaka mbunge, na kubanyunga mwamubwa. Kabusamba wamubwa itwasa kukala nendi napu Yehova Njambi, uje akatukwasa kwitila mu Lijwi lyendi, Mbimbiliya.

KUMA OBU BUKALU TANGWA BUKAHWA NDI?

Baje banombwa, banapande kutambula bukwasi kuli bandotolo simbu yoshe na kutengululako tulingo-lingo twabo tumo. Co lalo banapande kusinganyekesesa ha bikulaheso bya Njambi, ngwe mwalingile Ojebode. Wendekele ngwendi: “Njinabandamena kukalimwena muukalishulisilila mukanda wa Isaya 33:24, uje wendeka ngwawo na umo wahi hano hasi akendeka ngwendi ‘njili na kubinja.’” Ngwe mwa Ojebode, cikulaheso ca Njambi ca kunena “kaye kakaha” muje kumukakala “kukemanga” casa kumizembeleka. (Kujombolola 21:1, 4) Mu kaye kakaha kumukakala bishoti. Busiwa bumuli na kuziba bwoshe bukahwa njwa. Byuma byoshe bikazibisa banu kubabala ku mbunge “bakabibala.”—Isaya 65:17.

Bisoneka bya mu Mbimbiliya Bije Byasa Kumikwasa

Njambi akazibisisa mumukalizibila.

“Yange Kalunga Njambi yeni, njikamikolesa na kumileka ngwange, ‘Kesi muzibe lyoba, njikamikwasa.’” —Isaya 41:13.

Yehova akazibisisa mutukalizibila kutubakana munu woshe woshe, co lalo washaka kutukwasa.

Singanyekeseseni ha Lijwi lya Njambi.

“[Elinja] washakele ngeci atse. Co walombelele ngwendi, ‘. . . Shukulu Kalunga, tundisa mwonyo wange, ngeci njitse.’”—1 Vimyene 19:4.

Ojebode wendekele ngwendi: “Kusinganyekesesa ha Lijwi lya Njambi kwanjikwasele. Njanangukile ngwange kapolofweto Elinja walizibile ngwe munjalizibilile.”

Lilongeseni ku myanja ya banu ba mu Mbimbiliya.

“Oloni yange [Yesu] njinakulombelela Simoni [Petulu], ngeci kukulahela kwobe kesi kuhwe.”—Luka 22:32.

Omwo kapositolo Petulu wabyanene Yesu lutatu, wazibile kubabala ku mbunge, co walilile manene. Kaoru wendekele ngwendi: “Kusinganyekesesa ha byuma byalingile Petulu nomwo mwamukwaselelemo Yesu, kwanjikwasele njimone ngwange Yehova na Yesu bazibisisile mwalizibililemo Petulu. Eci canjishongangeyeye manene.”

Byuma byoshe bikazibisa banu kubabala ku mbunge “bakabibala.”—Isaya 65:17