Twasa Kumwesa Bati Ngwetu Twazema Bakwetu?

Tubaboshe twapwa naanga imo lika mwafwa twatunda kuli Adama. Banu ba mu naanga imo banapande kulizema na kulisingimika. Oloni ano matangwa banu babangi kubesi na kulinga ngoco. Njambi yetu wa cizemo washaka ngwendi tulizeme na kulisingimika umo na mukwabo.

BIYENDEKA MBIMBILIYA HA CIZEMO

“Zema mukweni ngwe muwalizema yobe babenya.”—VALEVI 19:18.

“Zemeni bitozi beni.”—MATEO 5:44.

KUZEMA BAKWETU KULUMBUNUNA BIKA?

Tusimutwiyeni byendeka Njambi ha cizemo ku mukanda wa 1 Kolinte 13:4-7:

‘Cizemo cili na likakateya na kutetela.’

Acisinganyekeni ha ñanda eyi: Mukalizibi bati nga bakweni bamwesa likakateya na kumitetela, co lalo kubamilubalela nga munasebuka?

‘Cizemo kucesi na cipululu.’

Acisinganyekeni ha ñanda eyi: Mukalizibi bati nga bakweni bamisinganyekela ngwabo mwalingi byuma bimo nambe kumizibila cipululu?

“Cizemo kucesi kulitondela byaco cikeco babenya.”

Acisinganyekeni ha ñanda eyi: Mukalizibi bati nga bakweni bamitolilila, co lalo kubakakateya lika ngwabo mulinge byuma bibatonda?

“Cizemo kucesi kukala na likiti-kiti ha byuma byabibi.”

Acisinganyekeni ha ñanda eyi: Njambi akakonekela banu baje banamubiisila. ‘Kesi kuhisa simbu yoshe, co lalo kesi kulubala simbu yoshe.’ (Myaso 103:9) Tukazibi kubwaha nga munu itunabiisila atukonekela. Ngeci, netu tunapande kukonekela bakwetu nga batubiisila.—Myaso 86:5.

“Cizemo kucesi kujolela [ha] bubi.”

Acisinganyekeni ha ñanda eyi: Nga tukobela mu bukalu, kutwesi kushaka bakwetu babwahelele mwafwa ya bukalu bwetu. Ngeci, kutwesi kuziba kubwaha nga bakwetu bakobela mu bukalu nameme baje banatulingi mwamubi.

Nga tushaka Njambi atubezikise, co tunapande kumwesa ngwetu twazema banu boshe mu bingila bitunasimutwiya. Twasa kumwesa lalo ngwetu twazema bakwetu nga tukwasa baje bali mu bujene.