Ishamatanga Yetu Watwaka Mbunge

1. ISHAMATANGA YETU IKEYE AKATUHWISA LITANGWA

Kutwasa kuyoya hano hasi kwa kujeneka litangwa. Litangwa likelyo likakwasa miti ijobelele, kutemwina bintemo, kwima bushuka na kukala na bimbuto. Likakwasa lalo mizi ya miti ikoke mema mu libu, kuwatwala ku maputa na kuwalingisa akakumukile mwilu.

Cikupulo cije cimwesa mulikamonekela lihya lya miti ya tii ije ili ha munkinda nga muli mu bukambwila.

2. ISHAMATANGA YETU IKEYE AKANYOKESA NYONZI

Njambi ikeye akatwana nyonzi ije ikakolesa byakulya bitukali. Njambi ikeye akanyokesa nyonzi kutundilila kwilu, akatwana bimbuto ha simbu yaibwa na kutwana byakulya bije bikatukwasa tupwe ba kubwahelela.

Kazila natongama ha munango, co ashaka kulya bushuka buje bunapotoka.

3. ISHAMATANGA YETU IKEYE AKATWANA BYAKULYA NA BIZALO

Bisemi babanalume babangi bakalishoshomwena mwa kuwanena naanga yabo byakulya na bizalo. Bisoneka ngwabyo: “Kengeni tuzila, kubesi kukuba nameme kuteja nambe kutulika mu bishete, oloni Ishweni ali mwilu ali na kubalisa. Yeni muli na seho yakama kutubakana tuzila.”—Mateo 6:25, 26.

“Kengeni bishani muje mu bikakolo . . . ; oloni njimileka ngwange nameme Mwene Solomoni mu bufuko bwendi bwoshe kazalele buzalo bwabubwa ngwe bwa bishani ebi. Oloni nga Njambi azika mwila wa mushwata . . . , kuma kasa kumizika ndi?”—Mateo 6:28-30.

Njambi akatwana byakulya na bizalo, co asa lalo kutwana byuma bikwabo bitutonda mu kuyoya kwetu. Nga tulinga cizango cendi, co asa kutukwasa tuteje nga tulima byakulya nambe kutukwasa tuwane cipangi mangana twase kulanda byuma bitutonda.—Mateo 6:32, 33.

Kusinganyekesesa ha litangwa, nyonzi, tuzila na bintemo, kutulingisa tuzeme Njambi. Mu ñanda inatako, tusimutwiya ha bingila byanapangesa Ishamatanga yetu mangana asimutwiye na banu.