Biñanda bya Kupangesa mu Mukanda wa Biwano wa Buyoye Bwetu Baka-Kilistu na Cipangi Cetu
AUGUST 5-11
BISIMPI BYA SEHO BYA MU LIJWI LYA NJAMBI | 2 TIMATEO 1-4
“Njambi Katwanene Sipilitu ya Lyoba”
(2 Timateo 1:7) Omwo Njambi katwanene sipilitu ya lyoba, oloni sipilitu yendi yatushulisa na nzili na cizemo na [kusinganyeka mwamubwa.]
Banike—Bipangi Byeni Bisholoke
9 Paulu wanukisile Timateo ngwendi: ‘Njambi katwanene sipilitu ya lyoba, oloni sipilitu yendi yatushulisa na nzili na cizemo na kusinganyeka mwamubwa.’ (2 Ti 1:7) Kusinganyeka mwamubwa kunapu kwilula byuma. Co lalo, kunambatesela kupwa ba kusimpa nameme byuma kubyende mwamubwa ngwe mututondela. Banike bamo bakapangesa bumbanda bwa kupendesa, kunwa manene bwala, kulala simbu yailaha na kukenga TV nambe kulinga bupangala mwafwa bakazibila bakwabo lyoba. Oloni baka-Kilistu banabanangula ngwabo banapande “kubyana yoyesi ya kujeneka kulemesa Njambi na mashungu amabi, [oloni banapande] kuyoya yoyesi ya kulemesa Njambi hano ha kaye mu kulinyunga na mu kusungama.”—Tit 2:12.
(2 Timateo 1:8) Ngeci bene, keti uzibe shwamwa ya kwambulula bukaleho bwa Mwene yetu, nambe keti ukale na shwamwa hali yange, cinzinda omwo hali Kilistu. Oloni ambatako mutambela mu kuyandela Biñanda Byabibwa, ngwe omwo Njambi akwana nzili ya kubilinga.
Simpeni na Kukolesa
7 Paulu wasonekelele Timateo ngwendi: ‘Omwo Njambi katwanene sipilitu ya lyoba, oloni sipilitu yendi yatushulisa na nzili. . . Ngeci bene, keti uzibe shwamwa ya kwambulula bukaleho bwa Mwene yetu.’ (2 Ti 1:7, 8; Mak 8:38) Ngeci, tunasa kulihula ngwetu: ‘Njikazibi shwamwa kuleka banu byuma binjakulahela indi njapwa wa kusimpa? Njikaleke banjikapanga nabo nambe baje banjikakobela nabo sikola ngwange njapwa Njimukaleho wa Yehova indi njikalishweke? Njikazibi shwamwa kusholoka mu ngila ije yaliseze na bakwetu indi njikalyangununa nabo mwafwa ya busamba bwange na Yehova?’ Nga kuli muka-Kilistu uje kashaka kwambulula nambe akazibila shwamwa cipangi ca kwambulula, napande kunanguka cinangulo ca Yehova kuli Yoshwa. Wamulekele ngwendi: “Kolesa na kusimpa.” Ngeci kutwapandele kwibala ngwetu byuma byoshe bitulinga kutwesi kubilingila batwapanga nabo nambe batwakobela nabo sikola, oloni tukashaka kuzibisa Yehova na Yesu Kilistu kubwaha.—Nga 1:10.
Kutondesesa Bisimpi bya Seho
(2 Timateo 2:3, 4) Ngeci bene, kakateya mu ñababa, ngwe liswalale wamubwa wa Kilistu Yesu. 4 Liswalale naumo wahi asa kulinga nebi nebi mu bipangi byendi bya buswalale, omwo biyongola byendi binapu kushaka kubwahelelesa uje ntwama yendi.
Kushakezeka Bufuko Bwabubwa
13 Timateo wakulahelele manene Njambi. Hanima ya kushangala Timateo ngwendi ‘liswalale wamubwa wa Kilistu Yesu,’ Paulu wamulekele ngwendi: ‘Naumo wahi apanga cipangi ca buswalale alikobelesa mu bipangi bya mingoso, mwafwa ashaka kuzibisa kubwaha uje namukobelesa buswalale.’ (2 Ti 2:3, 4, NWT) Baka-kukabangeya Yesu matangwa ano kwambateselela na baje bali mu cipangi ca simbu yoshe ba kutubakana 1 milyoni, bakapangesa eci cinangulo ca Paulu. Bakabyana kulikobelesa mu mikuli na mu byuma bya mu kaye mwafwa bakanuka cinangulo ca kwendeka ngwaco: “Baje boshe bakumuna bapwa bindungo ba baka-kukumwisa.” (Vis 22:7) Satana washaka ngwendi tumanesele simbu yayingi na nzili yetu yoshe ku mingoso ya muno mu kaye. Byuma bimo bitwangula kulinga binasa kutupwisa bindungo ha myaka yaingi. Kutambula maloni na kukumuna bimbongo bya cilika ca bulo na kukumuna minyau, byasa kutunenela bishoti. Tumwesa ngwetu tuli na mana nga twasiwisa buyoye bwetu na kutepulula ku mikuli na byuma bya kulanda landa, mangana twase kupangela mwamubwa Njambi, keti kupwa bindungo ba kano kaye ka mingoso.—1 Ti 6:10.
(2 Timateo 2:23) Oloni litenge ku bimata bya bulema na bunzimba, wazibuka ngwobe kukotoka kwabyo kunapu bimata lika.
w14 7/15 14 ¶10
Banu ba Yehova Kubapandele ‘Kulinga Byabibi’
10 Bakaleho ba Yehova kubesi kulikwatasana na banu baje banatengulukila cikungulukilo. Co lalo banapande kubyana bilongesa bya makuli. Kulikwatasana nambe kulikanangana nambe kusimutwiya na muka-kutengulukila kupangesa makina nambe mu ngila yoshe yoshe kunapu kwakubi manene. Nameme nga tunashakele kukwasa munu wa cifwa eci, Bisoneka byendeka ngwabyo kutwapandele kulikwatasana nabo. Co lalo, ha kupwa banu ba Yehova, kutwapandele kulikwatasana na baka-kutengulukila.
Kutanda Mbimbiliya
(2 Timateo 1:1-18) Mukanda wa kutunda kuli yange Paulu, muluwa wa Kilistu Yesu ku cizango ca Njambi, uje wanjitumine mu kwambulula mwonyo wa cikulaheso uje tulinawo muli Kilistu Yesu. 2 Kuli Timateo, munange injazema. Njambi Tate na Kilistu Yesu Mwene yetu bakwane kutetele na mema ku mbunge na kwoloka. 3 Njikandelela kuli Njambi, uje njili na kupangela na citaku-taku ca kutungukwa ngwe mubalingile bakukulwila bange. Njikamukandelela omwo njikakwanuka simbu yoshe mu malombelo ange butsiki na mutanya. 4 Njili na kwanuka misozi yobe, co njishaka manene kukumona, ngeci njakujolele manene. 5 Njili na kwanuka kukulahela kwobe kwa busunga, kukulahela kuje kuku yobe Loisi na banyoko Yunisi bakele nakwo. Njakulahela ngwange nobe lalo uli nakwo. 6 Ngeci bene, njili na kukwanukisa ngeci ubwezeleleko lalo ku bwana buje bwakwanene Njambi omo njakukambekele maboko. 7 Omwo Njambi katwanene sipilitu ya lyoba, oloni sipilitu yendi yatushulisa na nzili na cizemo na kulinyunga. 8 Ngeci bene, keti uzibe shwamwa ya kwambulula bukaleho bwa Mwene yetu, nambe keti ukale na shwamwa hali yange, cinzinda omwo hali Kilistu. Oloni ambatako mutambela mu kuyandela Biñanda Byabibwa, ngwe omwo Njambi akwana nzili ya kubilinga. 9 Ikeye watwobwele, co watusanene ngeci tupwe banu bendi, keti omwo ha bilinga byetu embwe, oloni omwo ha butumbe na ha kutetela kwendi. Watwanene kutetela oku muli Kilistu Yesu ku simbu ya ku sañulu, 10 oloni ololo banacisholola kuli yetu ha kwija kwa Muyoyesi wetu, Kilistu Yesu. Ikeye namanesa nzili ya kutsa, co ha muzimbu nasholola mwonyo uje kuwesi kutsa. 11 Njambi nanjangula kupwa muluwa na mulongisi mu kwambulula Biñanda Byabibwa, 12 eci cikeco cili na kunjilingisa ngeci njiyande. Oloni kunjesi na shwamwa embwe, omwo njinazibuka uje njinakulahela, co njazibuka mwa busunga ngwange ikeye asa kunyunga mwamubwa bije byananjikundika noho ku Litangwa lije. 13 Kakateya mbe ku majwi a busunga aje njakulongesele, apwe cimweso kuli yobe mu kuwakaba, co unapande kukala mu kukulahela na cizemo bije binapu byetu muli Kilistu Yesu. 14 Nyunga byuma byabibwa bije bibanakukundika ha nzili ya Sipilitu ya Kujela ije ili na kuyoya muli yetu. 15 Unazibuka ngwobe banu boshe mu lifuti lya Asiya bananjikengesa nima, Fingelyase na Helemengenese nabo lalo bananjiseza. 16 Mwene amwese mema ku mbunge ku naanga ya Onesifolase, omwo ikeye bisimbu byabingi wanjibwahelelesele. Kazibile shwamwa omwo yange njili mu kamenga, 17 oloni bwasi-bwasi omwo wetele mu Loma, washangumukile kunjishakezeka noho wanjiwanene. 18 Mwene akamwane kutetela kwendi ha Litangwa lije. Wazibuka mwamubwa kukwasa kwendi muje njakele mu Efeso.
AUGUST 12-18
BISIMPI BYA SEHO BYA MU LIJWI LYA NJAMBI | TITO 1–FILIMONI
Kwangula Bakulunu ba Bikungulukilo
(Tito 1:5-9) Ebi bikebyo njakusezelele mu Kelete ngeci ubwahese byuma byasaleleko, na kwimika bakulunu ba bikungulukilo ku nganda na nganda. Anuka bilongesa byange, 6 mukulunu wa cikungulukilo napande kupwa wa kujeneka mulonga, napande kupwa munalume wa munakazi umo lika, co bana bendi banapande kupwa baka-kukulahela, keti bipapoki nambe baka-kujeneka kwononoka embwe. 7 Omwo [kanyungi] wa cikungulukilo napu kanyungi ka bipangi bya Njambi, napande kupwa wa kujeneka mulonga. Kapandele kupwa muka-kulyalesa nambe muka-kulubala bwasi, nambe muka-kupenda, nambe muka-lwozi, nambe muka-cipululu ku bimbongo, 8 oloni apwe muka-kujumbula bangenzi na muka-kuzema byabibwa. Napande kupwa muka-kulinyunga, muka-kusungama, muka-kujela na muka-kwononoka. 9 Napande kupwa muka-kukakateya mu lijwi mbe, lije basa kukulahela, co lilizibasana na kulongesa kwetu. Mu ngila eyi bene akasa kutakamesa bakwabo na bilongesa bya busunga, na kusholola lalo milonga ya baje bali na kushaula lijwi.
w14 11/15 28-29
Bihula bya Baka-kutanda
Nameme Bisoneka kubyendekele mu kushula mubakele na kwangwila bakulunu mu cikungulukilo, oloni kuli byuma bitukwasa tuzibuke mubakele na kubangwila. Paulu na Mbanambase mubakele na kwiluka kwimbo kutunda mu bungenzi bwabo bwa bumishinali bwa kulibanga, bakele na kwangula bakulunu mu cikungulukilo na cikungulukilo, co ‘balombelele nabo na kulikela kulya, babakundikile kuli Yehova uje bakulahelele.’ (Vil 14:23) Munima ya myaka, Paulu wasonekelele kabusamba kendi Tito ngwendi: “Ebi bikebyo njakusezelele mu Kelete, ngeci ubwahese byuma byasaleleko na [kwangula] bakulunu ba bikungulukilo mu nganda na nganda, anuka bilongesa byange.” (Tit 1:5) Co lalo, na Timateo uje wakele na kwenda na Paulu mu mangenzi endi bamwanene cipangi ca kulifwa. (1 Ti 5:22) Oku kumwesa ngwabo tunyungi ba kuzenguluka bakebo bangwile bakulunu, keti tupositolo nambe bakulunu baje bakele mu Yelusalema embwe.
Eyi ñanda inakwasa Cibunga ca Kutwamenena ca Bakaleho ba Yehova citengulule ngila ya mwakwangwila bakulunu na baka-kupangela. Kushangumuka ha September 1 2014, Cibunga ca Kutwamenena cabwahesele ngwaco, tunyungi ba kuzenguluka bakebo belula baje babanashangala bakulunu. Tunyungi ba kuzenguluka mubakendela bikungulukilo, bakashaka kupanga mu lihya na baje babanashangala bakulunu mangana babazibuke mwamubwa. Munima ya kuliyongola na cibunga ca bakulunu, tunyungi ba kuzenguluka bakangula baje banapande kupwa bakulunu nambe baka-kupangela. Kulinga ngoco kunalifu nomwo bakele na kwangwila mu cita ca myaka ca kulibanga.
Beya bakatwamenena eci cipangi? “Ndungo wa kulongwa na kunyanyama” ikeye ali na cipangi ca kutwamenena na kulisa banu ba Njambi. (Mat 24:45-47) Eci cipangi cinambateselela kutondesesa Bisoneka bije bikwasa munga ya Njambi mu kaye koshe ilikwatasane. Co lalo ikeye akangula tunyungi ba kuzenguluka na ba mu Komiti ya Munango. Maofisi a munango oshe akakabangeya binangulo byendi. Bakulunu ba cikungulukilo banabana cipangi cakama ca kwituluka mwamubwa mu Bisoneka na kumona baje babashangala indi banapwisamo byuma bije bitondeka mangana munu apwe mukulunu nambe muka-kupangela. Tunyungi ba kuzenguluka nabo bakatondesesa mu bisoneka na kulombela manene mangana bamone indi baje babanashangala bakulunu banapande kubangula.
Kutondesesa Bisimpi bya Seho
(Tito 1:12) Co umo wabo, umo wa baka-kwimanena wabo wendekele ngwendi, “Baka-Kelete simbu yoshe bapwa baka-makuli, bikashama bya bubi, bolwa bakulakama.”
w89 5/15 31 ¶5
Bihula bya Baka-kutanda
Paulu katabele banu baje bamwesele kangu nambe baje bakele na kwendeka byuma byabibi ha banu ba mu Kelete. Tuzibuka ngoco mwafwa Paulu wazibukile mwamubwa ngwendi, mu Kelete mwakele baka-Kilistu baje baangwile Njambi na kubabwabesa na sipilitu yendi ya kujela. (Vil 2:5, 11, 33) Mwakele baka-Kilistu babangi baje basele kutunga bikungulukilo mu nganda na nganda. Nameme baje baka-Kilistu kubapwile ba kulumbunuka, oloni kubapwile baka-makuli nambe bolwa baka-nuna. Tuzibuka ngoco mwafwa ngwe bakele nebi bilinga ngwe Yehova kabangwile bapwe banu bendi. (Fil 3:18, 19; Kuj 21:8) Nameme muno mu kaye munashulu banu bababi, oloni tukawana banu ba bimbunge byabibwa. Mu ngila imo lika, mu Kelete namwo mwakele banu baje bakele na kukabangeya yoyesi ya kujela, co bashakele kutambula muzimbu waubwa.—Eze 9:4 esekeseni Vil 13:48.
(Filimoni 15, 16) Hamo Onesimasi walyangunukile nobe kasimbu ngeci eluke, ukale nendi simbu yoshe. 16 Co ololo, ikeye keti ndungo lalo, oloni ololo natubakana ndungo, ikeye napu musamba wa cizemo na ndolome muli Kilistu. Oloni ololo ali na mbwase kuli yange. Co akakala na mbwase yakama lalo kuli yobe, byoshe bibali, ndungo na ndolome muli Mwene.
w08 10/15 31 ¶4
Bisimpi bya Kulitila bya mu Mukanda wa Tito, Filimoni na Vahevelu
15, 16—Mwafwa bika Paulu kalombele Filimoni ngwendi apatule Onesimasi? Mwafwa Paulu wakele mana ku cipangi cendi ca ‘kwambulula muzimbu waubwa wa Bumwene bwa Njambi na Yesu Kilistu.’ Ngeci kalikobelesele mu biñanda byeka maneneni bije byendekele ha kupwa ndungo.—Vil 28:31.
Kutanda Mbimbiliya
(Tito 3:1-15) Anukisa banu bapwe baka-kulikehesa kuli baka-kuswana na baje bali na moko ya kuswana, ngeci babononoke, na kulibwahesela mu kulinga mwamubwa mu byuma byoshe. 2 Baleke keti bakashaule munu naumo wahi, oloni bapwe baka-kwoloka na kulizema, co simbu yoshe basholole bubwa bunapandemo ku mesho a banu boshe. 3 Omwo yetu lalo twapwile tu bilema, baka-kujeneka kwononoka, na kulinga mwamubi. Twapwile tu bindungo ba mashungu na senga ya kulisezaseza. Twombilile simbu yetu mu byuma bya muuka na nuna, bakwetu batuzindile, co netu twabazindile. 4 Oloni omwo ngozi na cizemo ca Njambi Muyoyesi wetu byasholokele, 5 ikeye watwobwele. Keti ngwe ku bilinga byetu babenya bya kusungama bitwalingile embwe, oloni omwo ku kutetela kwendi babenya ngeci watwobwele, hali Sipilitu ya Kujela ije yatwana kusemuka kwakuha na mwonyo wauha ha kutukusha. 6 Njambi wetilile mubwingi Sipilitu ya Kujela hali yetu hali Yesu Kilistu Muyoyesi wetu, 7 ngeci ha kutetela kwendi batupwise baka-busunga ku mesho a Njambi na kutwana mwonyo wa myaka yoshe uje tuli na kukengezeka. 8 Oku kunapu kwendeka kwa busunga. Njishaka wendeke manene byuma ebi, ngeci boshe baje baka-kukulahela kuli Njambi bakane simbu yabo mu kulinga bipangi byabibwa, bije binapu byabibwa, co bikwasa banu. 9 Oloni yobe tewa ku bimata bya bulema, na bya mikana ya mazina a bakukulwila na kujokota na kulizunga ha Lishiko. Ebi binapu byangocongoco, kubyesi na seho. 10 Nangula lumo nambe lubali munu uje anena kaangu, co hanima keti ulinge cuma ceka lalo nendi. 11 Unazibuka ngeci munu wa cifwa cangacije wamubi, co bibi byendi bili na kumusholola ngeci nabiisa. 12 Omwo njikatuma Aletemase nambe Taikikase kuli yobe, co unapande kweseka kwija kuno kuli yange ku Nikopolise, omwo njayongola kukala kuje cisika coshe. 13 Unapande kukwasa Zenase muka-mashiko na Apolo kubwahesa bya bungenzi bwabo, co lalo kenga mwamubwa ngeci bakale na byoshe bya ha bungenzi bwabo bije bashaka. 14Banu betu banapande kulilongesa kukala na simbu ya kulinga bipangi byabibwa, ngeci keti bajeneke cuma cimo, co kubapandele kuyoya mu byuma byangocongoco. 15 Boshe baje njili nabo kuno banatumu bihindu kuli yobe. Ana bihindu byetu kuli basamba betu boshe mu kukulahela. Kutetela kwa Njambi kukale neni boshe.
AUGUST 19-25
BISIMPI BYA SEHO BYA MU LIJWI LYA NJAMBI | VAHEVELU 1-3
Zemeni Busunga na Kuzinda Byuma Byabibi
(Vahevelu 1:8, NWT) Oloni hali Mwana wendekele ngwendi: “Njambi ikeye litanda lyobe, ku myaka yoshe. Mulamu wa Bumwene bwobe ukewo mulamu wa busunga.
w14 2/15 5 ¶8
Shangazaleni Kilistu, Mwene Wamubwa
8 Yehova wanene Munendi moko ya kuyula mu Bumwene bwa Bumesiya mu 1914. ‘Mulamu wa Bumwene bwendi ukewo mulamu wa busunga.’ Co lalo, ciyulo cendi capwa cacibwa manene co cikakalako myaka yoshe mwafwa ‘Njambi ikeye litanda lyendi.’ Oku kulumbununa ngwabo Yehova ikeye babenya bumwene. Ngeci, bumwene bwa Yesu bukakalako “myaka yoshe.” Twabwahelela kupangela Yehova oku tuli mwisi ya ciyulo ca Mwene wa nzili uje yanangula Njambi.
(Vahevelu 1:9) Wazema busunga, co wazinda bubi. Ngeci bene, Njambi, Njambi yobe na kubwabesa na mazi a kujolela kuhyana bakweni.”
Shangazaleni Kilistu, Mwene Wamubwa
7 Yesu wazemene manene busunga na kuzinda byuma byabibi bije byasele kushawisa lizina lya Yehova. Mukemwo bamwangwile kupwa Mwene wa Bumwene bwa Njambi. (Mya 45:6, 7) Yesu ‘bamubwabesele na mazi a kujolela kuhyana bakwabo’ bimyene ba muyati wa Yunda ba ku cikota ca Ndabiti. Mungila muka? Yehova ikeye wabwabesele Yesu, keti munu weka embwe. Co lalo, wamubwabesele mangana apwe Mwene na Kapilisitu Wakama. (Mya 2:2; Hev 5:5, 6) Kutundaho, wamubwabesele na sipilitu ya kujela keti na mazi. Co bumwene bwendi bwapwa bwa mwilu keti bwa hano hasi.
Kutondesesa Bisimpi bya Seho
(Vahevelu 1:3) Ikeye kutwa kwa ceke ca bumpau bwa Njambi, ikeye bene cifwa ca Njambi babenya, ha kukolesa byoshe mu kaye koshe na lijwi lyendi lya nzili. Omwo nashokolola laja ngila ngeci bibi bya banu boshe babisambese, co watumbamene mwilu ku liboko lya cilyo lya Njambi, Muka-nzili yoshe.
it-1 1185 ¶1
Cifwa
Kuma Yesu akamwesa bifwa mpundu byakala nabyo Ishe ndi?
Yesu wapwa Muna Njambi wa ntwatwa, co ikeye cifwa ca Njambi. (2 Ko 4:4) Simbu kanda Yesu aije hano hasi, Njambi wendekele kuli Munendi ngwendi: “Ololo oni tutangeni munu wa kulifwa netu na mu cifwa cetu.” Yesu Kilistu wafwile Ishe kushwa lika habamutangelele. (Kus 1:26; Yow 1:1-3; Kol 1:15, 16) Yesu mwakele hano hasi, wapwile wa kulumbunuka, co bilinga byendi byamwesele bifwa bya Ishe mu kushula, ngeci wasele kwendeka ngwendi, “Woshe uje nanjimono namono Tate.” (Yow 14:9; 5:17, 19, 30, 36; 8:28, 38, 42) Yesu wamwesele manene ebi bifwa bya Ishe ha simbu yasangukile na ha simbu ibamwanene moko kuli Ishe ya kuswana mwilu na hasi. (1 Pe 3:18; Mat 28:18) Ha simbu ino, Yesu ali na kumwesa bifwa bya Ishe kutubakana nomu mwakele na kubimweselamo te kanda aije hano hasi, mwafwa Njambi namwaka ha “mwela wa hakamwa.” (Fil 2:9; Hev 2:9) Hano napu “bene cifwa ca Njambi babenya.”—Hev 1:2-4.
(Vahevelu 1:10-12) Co ikeye wendekele lalo ngwendi, “Yobe, [Mwene] ha bushangumukilo watangele kaye, co melu anapu bipangi bya maboko obe. 11 Bikebyo byoshe bikaita, oloni yobe ukakala, bikebyo byoshe bikakulubala ngwe buzalo bwa laja. 12 Ukabyeteka ngwe cikobeyo, bikakulubala ngwe buzalo. Oloni yobe kuwesi kukulubala, co mwonyo wobe kuwesi kuhwa.”
it-1 1063 ¶7
Mwilu
Majwi ali ku Myaso 102:25, 26 anatalesa kuli Yehova, oloni Paulu nawatalesa na kuli Yesu Kilistu. Walingile ngoco mwafwa Yehova wapangesele Munendi umo lika mu kutanga byuma byoshe bya mwilu nebi bya hasi. Paulu wamwesele kuliseza kuli mukati ka Yesu na byuma bya kutanga. Wendekele ngwendi byuma bya kutanga binapu ngwe cikobeyo cije cibasa kweteka oloni Yesu akakalako myaka yoshe.—Hev 1:1, 2, 8, 10-12; esekeseni 1 Pe 2:3.
Kutanda Mbimbiliya
(Vahevelu 1:1-14) Kusañulu Njambi wendekele kuli bakukulwila betu hali baka-kwimanena bisimbu byabingi na mu bingila byeka na byeka, 2 oloni ha matangwa ano a kukotokela nendeka kuli yetu hali Munendi, uje yanapwisa swana ya byuma byoshe, co hali ikeye lalo watangele byuma byoshe. 3 Ikeye kutwa kwa ceke ca bumpau bwa Njambi, ikeye bene cifwa ca Njambi babenya, akukolesa byoshe mu kaye koshe na lijwi lyendi lya nzili. Omwo nashokolola laja ngila ngeci bibi bya banu boshe babisambese, co watumbamene mwilu ku liboko lya cilyo lya Njambi, Muka-nzili yoshe. 4 Mwana bamupwisile wakama kuhyana tungelo, ngwe ku lizina lije lyamwanene Njambi lya kuhyana mazina abo. 5 Omwo Njambi kendekele kuli umo wa tungelo twendi ngwendi, “Yobe unapu u Munange, litangwa lya lelo njinakukiti.” Naimo simbu yahi Njambi nendeka kuli kangelo umo ngwendi, “Yange njikapwa nji Ishe, co ikeye akapwa Munange.” 6 Oloni omwo Njambi wakele kuyehi na kutuma Munendi wa ntwatwa mu kaye, co wendekele ngwendi, “Tungelo boshe ba Njambi banapande kumulemesa.” 7 Oloni kuli tungelo Njambi wendekele ngwendi, “Njambi napwisa tungelo twendi lihunzi, co ikeye napwisa bangamba bendi milangi ya tuhya.” 8 Oloni nameme ngoco hali Mwana, Njambi wendekele ngwendi, “[Njambi ikeye litanda lyobe], likakala ku myaka yoshe. Waswana banu bobe na busunga. 9 Wazema busunga, co wazinda bubi. Ngeci bene, Njambi, Njambi yobe nakubwabesa na mazi a kujolela kuhyana bakweni.” 10 Co ikeye wendekele lalo ngwendi, “Yobe, [Mwene] ha bushangumukilo watangele kaye, co melu anapu bipangi bya maboko obe. 11 Bikebyo byoshe bikaita, oloni yobe ukakala, bikebyo byoshe bikakulubala ngwe buzalo bwalaja. 12 Ukabyeteka ngwe cikobeyo, bikakulubala ngwe buzalo. Oloni yobe kuwesi kukulubala, co mwonyo wobe kuwesi kuhwa.” 13 Njambi nalumo lwahi wendekele kuli tungelo twendi ngwendi, “Tumbama kuno ku liboko lyange lya cilyo, noho njifungulula bitozi bobe.” 14 Tungelo bapwa bikajo? Bapwa [sipilitu ije ikapangela] Njambi, co abatuma mu kukwasa baje bali na kutambula kwoboka.
AUGUST 26–SEPTEMBER 1
BISIMPI BYA SEHO BYA MU LIJWI LYA NJAMBI | VAHEVELU 4-6
“Lifwiteni Mangana Mukobele mu Kuhwima kwa Njambi”
(Vahevelu 4:1) Ololo, Njambi natusezela cikulaheso ngeci tukakobele mu kuhwima kuje kwendekele. Ngeci bene, nyanyameni kutewa hakati keni hakakala umo kakakobela mu kuhwima kuje kwanatukulahesa.
(Vahevelu 4:4) Omwo mu Bisoneka byeka banendeka ha litangwa lya mu citanu na abali ngwabo, “Njambi wahwimine ha litangwa lya mu citanu na abali ku bipangi byendi byoshe.”
Kuhwima kwa Njambi Kwapwa Kuka?
3 Kuli bukaleho bubali butulingisa twendeke ngwetu litangwa lya sabata te licitwalelelaho na mu cita ca myaka ca kulibanga. Bukaleho bwa kulibanga obu. Acisinganyekeni byendekele Yesu kuli baje bakele na kumulwisa mwafwa ya kukangwisa mubezi ha litangwa lya sabata. Yesu wabalekele ngwendi: “Tate ali na kupanga simbu yoshe, co nange lalo njinapande kupanga.” (Yow 5:16, 17) Mwafwa bika wendekele ngoco? Nangukeni ngweni Yesu bamwanene mulonga ha kupanga lya sabata. Ngeci mwabakumbulwile ngwendi “Tate ali na kupanga simbu yoshe” wa manesele bije bimata. Kunapu lika ngwe Yesu wabalekele ngwendi: ‘Cipangi cange neci ca Tate cinapu cimo lika. Njasa kupanga ha litangwa lya sabata mwafwa Tate nendi natwalelelaho kupanga kushwa lika ha litangwa lyendi lya kuhwima.’ Eci cikumbululo ca Yesu cimwesa ngwaco litangwa lya sabata lya kuhwima kwa Njambi kanda licihwe.
4 Bukaleho bwa mu cibali tubuwana mu majwi endekele Paulu mwapangesele majwi ali ku Kushangumuka 2:2 aje anendeka ha kuhwima kwa Njambi. Bamuhwimininine asoneke ngwendi: “Ngeci bene, yetu tunakulahela, tukakobela mu kuhwima.” (Hev 4:3, 4, 6, 9) Obu bukaleho bumwesa ngwabwo litangwa lya sabata te licitwalelelaho na mu simbu ya Paulu. Litangwa lya sabata likahwa mwaka uka?
5 Nga tushaka kuwana cikumbululo, tunapande tahi kuzibuka bibakelele lije litangwa lya sabata. Mukanda wa Kushangumuka 2:3 unalumbununa mwamubwa ngwawo: “Njambi wabezikisile litangwa lya mu citanu na abali, na kulijelesa.” Yehova wajelesele lije litangwa mangana ashulisilile biyongola byendi. Wayongwele ngwendi hano ha kaye hakale banu baje bamwononoka na kunyunga kaye mwamubwa na byuma byoshe byakalaho. (Kus 1:28) Yehova Njambi na Yesu Kilistu uje wapwa Mwene wa litangwa lya sabata banatwalelelaho kupanga kweta na lelo lino mangana bashulisilile bije biyongola. (Mat 12:8) Ngeci, litangwa lya Njambi lya kuhwima litwalelelaho kweta ha simbu ibikalishulisilila bije biyongola, munima ya Myaka 1,000 ya Kuyula kwa Kilistu.
(Vahevelu 4:6) Baje bazibile Biñanda Byabibwa ha kulibanga kubakobelele mu kuhwima omwo kubakulahelele. Ngeci bene, kuli beka oni banabatabesa kukobelamo.
Kuhwima kwa Njambi Kwapwa Kuka?
6 Njambi walekele Adama na Eva biyongola byendi, oloni kubamwononokele. Adama na Eva bakebo banu bapwile ba kulibanga baje kubononokele Njambi. Co lalo, banu babangi kubesi na kwononoka Njambi. Nameme Baisalele baje bapwile banu ba Njambi nabo kubononokele. Mukemwo Paulu wanangwile Baka-Kilistu bamu cita ca myaka ya kulibanga ngwendi nabo banyanyame kutewa bawila mu mweto wa kulifwa ngwe mubalingile Baisalele baje kubononokele Njambi. Wasonekele ngwendi: “Ngeci bene, tutakameni ngeci tukatambule kuhwima kuje, moneni ngeci naumo wahi wetu onwe ngwe mubalingile bakebo omwo kubakulahelele.” (Hev 4:11) Nangukeni ngweni Paulu wendekele ngwendi nga munu kononoka co kasa kukobela mu kuhwima kwa Njambi. Tulilongesako bika? Tulilongesa ngwetu nga kutwononoka Njambi co kutukakobela mu kuhwima kwendi. Kuzibuka eyi ñanda kunapu kwa seho manene.
(Vahevelu 4:9-11) Nameme ngoco hanga kunasala banu ba Njambi bahwime lumo ngwe mwahwimine Njambi ha litangwa lya mu citanu na abali. 10 Omwo woshe uje [nakobela] mu kuhwima kuje kwakulahesele Njambi [nahwimi] ku bipangi byendi ngwe mwahwimine Njambi ku bipangi byendi. 11 Ngeci bene, tutakameni ngeci [tutambule] kuhwima kuje, moneni ngeci naumo wahi wetu onwe ngwe mubalingile bakebo omwo kubakulahelele.
Kuhwima kwa Njambi Kwapwa Kuka?
16 Baka-Kilistu bamo basa kusinganyeka ngwabo nga bakabangeya Mashiko a Mosesa co bakoboka. Oloni Paulu bamuhwimininine asonekele baka-Efeso ngwendi: “Omwo ha kutetela munoboka ha kukulahela. Eci keti ngwe ha bilinga byeni embwe, oloni cinapu bwana bwa Njambi, keti ha bilinga, kutewa munu alishashe.” (Efe 2:8, 9) Bika bibananapande kulinga baka-Kilistu mangana bakobele mu kuhwima kwa Njambi? Yehova wangwile litangwa lya sabata kupwa litangwa lyendi lya kuhwima ku bipangi bya kushulisilila biyongola byendi bya kutanga kano kaye. Twasa kukobela mu kuhwima kwa Yehova nga twononoka na kukundwiya biyongola byendi ngwe muikatulekela munga yendi.
17 Oloni, nga twombwanesa binangulo bya mu Mbimbiliya byali na kutwana ndungo wa kulongwa na kunyanyama na kulyangwila kulinga bitushaka yetu babenya, co twabyana biyongola bya Njambi. Co oku kwasa kutsiya busamba bwetu na Yehova.
Kutondesesa Bisimpi bya Seho
(Vahevelu 4:12) Lijwi lya Njambi lili na kuyoya na kupanga, lyabambuka kuhyana moko ya mukwale ya bubela kubali. Lishalaba mwoshe muje mukaliwanena mwonyo na munzinzime, na muje mukaliwanena manunga na busoso. Likelyo liilula biyongola na bizango bya bimbunge bya banu.
Bihula bya Baka-kutanda
“Lijwi lya Njambi” libanatumbula ku mukanda wa Vahevelu 4:12 ngwabo “lili na kuyoya na kupanga,” lyapwa lika?
▪ Majwi ali oku ku mukanda amwesa ngwawo kapositolo Paulu wakele na kwendeka ha muzimbu nambe ngwetu ha biyongola bya Njambi bije bili mu Mbimbiliya.
Kakangi mukanda wa Vahevelu 4:12 banaupangesa mu mabulu etu mu kumwesa ngwabo Mbimbiliya yakala na nzili ya kutengulula futisi ya munu, co kuupangesa mu ngila eyi kukwabihile. Oloni kutanda ñanda yoshe mu kushula kutukwasa tuzibuke byalibulingilamo. Paulu washongangeyeye Bahebelu ngwendi bononoke biyongola bya Njambi. Bwingi bwa byuma byabalekele babisonekele mu mikanda ya kujela. Paulu wapangesele cakumwenako ca Baisalele baje babapatwile mu Ingito. Baisalele bapandele kukobela mu lifuti lya cikulaheso muje ‘mwashulile buki na mabele’ muje mubapandele kukahwima.—Kut 3:8; Kwi 12:9, 10.
Bikebyo byayongwele Njambi. Oloni Baisalele bakolesele bimbunge co kubakulahelele ngeci bwingi bwabo kubakobelele mu kuhwima. (Kul 14:30; Yos 14:6-10) Oloni Paulu wendekele lalo ngwendi, “Njambi natusezela cikulaheso ngeci tukakobele mu kuhwima kuje kwendekele.” (Hev 3:16-19; 4:1) Eci cikulaheso naco cinapu cimo ca biyongola byendi. Ngwe mubalingilile Bahebelu, netu twasa kutanda biyongola bya Njambi na kubyononoka. Paulu wapangesele majwi amo ali ku mukanda wa Kushangumuka 2:2 na Myaso 95:11 ha kumwesa ngwendi ebi bikulaheso bya Njambi byakala mu Mbimbiliya.
Ngeci tunapande kubwahelela mwafwa “Njambi natusezela cikulaheso ngeci tukakobele mu kuhwima kuje kwendekele.” Twakulahela ngwetu tukakobela mu kuhwima kwa Njambi. Ngeci, tunapande kumona ngwetu bitulinga bitukwasa tukakobele mu kuhwima kwa Njambi. Kukabangeya Mashiko a Mosesa nambe kulinga bipangi bimo keti kukeko kukatulingisa tukobele mu kuhwima kwa Yehova. Oloni tunapande kukala na likulahelo lije litulingisa twononoke Njambi na kukundwiya biyongola byendi. Ngwe mutunasimutwiya ha kulibanga, banu babangi mu kaye koshe bali na lishungu lya kushaka kuzibuka biyongola bya Njambi. Babangi bali na kutengulula yoyesi yabo na kukala na likulahelo co banabambwitika na kupwa baka-Kilistu. Kutengulula buyoye bwabo kuli na kumwesa ngwabo cili bene “lijwi lya Njambi lili na kuyoya na kupanga.” Biyongola bya Njambi bije bili mu Mbimbiliya byalingisa tutengulule buyoye bwetu co lalo hanga bicitukwasa mu buyoye.
(Vahevelu 6:17, 18) Njambi omwo washakele kucisholola mwamubwa kuli baje bashakela kutambula cikulaheso cije, co wakulahesele ngeci kashaka lalo kutengulula butumbe bwendi, ngeci bene, wabwezeleleleko lalo kulisinga ku cikulaheso cendi. 18 Ngeci bene, kuli byuma bibali bije kubitaba kubitengulula nambe ha bikebyo Njambi kasa kwendeka makuli. Ngeci bene, kuli yetu baje banawana kwamena muli ikeye banatutakamesa manene na lukakateya mbe ku [lilabelelo] cije banatutulikila kulutwe.
it-1 1139 ¶2
Lilabelelo
Lilabelelo libakala nalyo baje bakayoya myaka yoshe hano hasi na lije libakala nalyo baje bakayoya mwilu, linemana ha byuma bibali. Njambi uje kesi kukwisa ikeye natuleka ebi byuma bibali. (Hev 3:1) Ca kulibanga, cikulaheso na cikumiyo cendi. Ca mu cibali, lilabelelelo lyetu likalishulisilila mwafwa linemana hali Kilistu uje ali na mubila uje kuwasa kutsa. Mukemwo banalitumbula ngwabo linapu ngwe “ñobo ya cikongo ca mbunge, ikeyo ya kukola, yaibwa, ikeyo ipulyasana nanga ije ya mu njubo ya Shukulu Kalunga ya mwilu na kukobela ku Mulili wa Kujela [ngwe mwakele na kukobela kapilisitu wakama mu Mulili wa Kujela Manene ha litangwa lya kulyamba], kuje Yesu natutwamenenako, co nakobelamo napu laja Muka-kukombelela Wakama wa ku myaka yoshe ngwe ku cifwa ca Melekizendeki.”—Hev 6:17-20.
Kutanda Mbimbiliya
(Vahevelu 5:1-14) Muka-kukombelela Wakama woshe wapwa wa kwangula hakati ka banu na kumwimika ngeci apangele Njambi mu kubemanenako, kukombelela biñombelo na milambu ya ha bubi. 2 Omwo ikeye nendi wapwa wa kuzeya mu bingila byabingi, ngeci napu muka-lyobwaobwa mu kukwasa baje bali ku nzimba baka-kubulumuna milonga. 3 Omwo ikeye lalo wapwa wa kuzeya, napande kukombelela ñombelo keti ya baje banu baka-bubi lika embwe oloni na bubi bwendi babenya lalo. 4 Naumo wahi walyangwile ikeye babenya kupwa Muka-kukombelela Wakama na kasingimiko kubanga bamusane kuli Njambi ngeci munu apwe Muka-kukombelela Wakama ngwe mubasanene Alone. 5 Ha ngila eyi bene, Kilistu kalishakezekelele ikeye babenya kasingimiko ka kupwa Muka-kukombelela Wakama. Oloni Njambi wendekele kuli ikeye ngwendi, “Yobe unapu u Munange, litangwa lya lelo njinapu nji Isho.” 6 Co ikeye wendekele lalo mu mitambela yeka ngwendi, “Yobe ukapwa u muka-kukombelela ku myaka yoshe, ngwe buka-kukombelela bwa Melekizendeki.” 7 Yesu mu kuyoya kwendi hano hasi walombele na kwihula na kutambeka na lijwi lyakama na misozi kuli Njambi, uje wasele kumwamena ku kutsa. Omwo ikeye wapwile muka-kulikehesa na muka-kulyana, Njambi wamuzibile. 8 Oloni nameme ikeye wapwile Muna Njambi, walilongesele kupwa muka-kwononoka mu ñababa yendi. 9 Omwo bamupwisile muka-kujela, wemukile nsina ya kwoboka kuje kwa myaka yoshe kuli boshe baje bamwononoka, 10 co Njambi wamusholwele kupwa Muka-kukombelela Wakama, kwinga muli Melekizendeki. 11 Kuli byabingi bya kwendeka ha biñanda ebi, oloni byabikalu kubinungulula kuli yeni, omwo yeni kumwesi kuzibisisa bwasi. 12 Ololo yeni, omwo simbu yakama ineti, mwapandele kupwa mubalongisi, oloni mucijeneka umo amilongese bilongesa bya kulibanga bya lijwi lya Njambi. Mwapandele kulya byakulya bya kukola, oloni mucili na kunwa mabele. 13 Omwo woshe uje muka-kunwa mabele acili mwanike, kazibuka mwamubwa biñanda bya busunga nambe byabibi. 14 Oloni byakulya byakukola byapwa bya bakulunu, baje banalilongesa na kwilula na kwangununa mukati ka byuma byabibwa nebi byabibi.