Biñanda bya Kupangesa mu Mukanda wa Biwano wa Buyoye Bwetu Baka-Kilistu na Cipangi Cetu
NOVEMBER 4-10
BISIMPI BYA SEHO BYA MU LIJWI LYA NJAMBI | 1 YOWANO 1-5
“Kesi Muzeme Kaye Nambe Cuma Cije Cinakundama ku Kaye”
(1 Yowano 2:15, 16) Kesi muzeme kaye nambe cuma cije cinakundama ku kaye. Nga muzema kaye, co kumwesi na kuzema Tate. 16 Omwo byuma byoshe bije binakundama ku kaye, bije bishungwiya mashungu amabi a bunu, bije banu bamona na kubishungwiya na byuma byoshe bya muno mu kaye bije banu bali na kulyalesa nabyo, na cimo cahi hali ebi catunda kuli Tate, byoshe ebi byatunda mu kaye.
w05 1/1 10 ¶13
Kabangeyeni Mwanja Watumwesele Yesu
13 Bamo basa kwendeka ngwabo keti byuma byoshe bya muno mu kaye byapwa byabibi. Nameme ngoco, byuma bya mu kaye byasa kutwonowesa kupangela mwamubwa Yehova. Byuma bya muno mu kaye kubyasa kutukwasa tushwenye kuyehi na Njambi. Nga tuzema byuma bya muno mu kaye nameme keti byabibi, co twasa kukobela mu bukalu. (1 Ti 6:9, 10) Bwingi bwa byuma bya muno mu kaye byapwa byabibi, co byasa kutungumuna. Nga tukakenge mafilimu nambe mapulogilamu a bukenya, a kushakezeka bufuko nambe a bukwizi, mu kwita kwa simbu kutuwamono ngwetu amabi, co twasa kulinga byuma byabibi. Nga tulikwatasana na banu baje bashakezeka bufuko, co netu twasa kushangumuka kushakezeka bufuko.—Mat 6:24; 1 Ko 15:33.
(1 Yowano 2:17) Kaye na byuma byoshe bilimo bije banu bashungwiya bili na kwita, oloni baje balinga cizango ca Njambi bakayoya myaka yoshe.
w13 8/15 27 ¶18
Liluleni Mumone Mumunapande Kupwila
18 Majwi asonekele Yowano atukwasa tubyane ‘byuma bya mu kaye.’ Wasonekele ngwendi: “Kaye na byuma byoshe bilimo bije banu bashungwiya bili na kwita, oloni baje balinga cizango ca Njambi bakayoya myaka yoshe.” (1 Yo 2:17) Kaye ka Satana kasholoka ngwe kukakahu, oloni litangwa limo kakahwa. Byuma bya muno mu kaye ka Satana kubikakalako myaka yoshe. Nga simbu yoshe twanuka ngwetu byuma bya muno mu kaye ka Liyabolo ololo bihwa, co kutungumuka.
Kutondesesa Bisimpi bya Seho
(1 Yowano 2:7, 8) Basamba bange banjazema, lishiko eli njili na kusoneka kuli yeni kesi lyaliha embwe, linapu lishiko lya laja, likelyo bene mwakele nalyo tunde ha kulibanga. Lishiko lya laja lyapwa lijwi lije mwalizibile laja. 8 Nameme ngoco, lishiko linjili na kumisonekela linapu lyaliha, omwo busunga bwalyo banabumono muli Kilistu na muli yeni lalo. Omwo lisusulungu lili na kwita, co ceke ca busunga cinashangumuka laja kutwa.
Binangulo bya Yehova Byapwa bya Busunga
14 Bisoneka bya Cingiliki bya baka-Kilisitu byashula na binangulo bije bitukwasa tulizeme umo na mukwabo. Yesu wendekele ngwendi lishiko lyakama lya mu cibali linapu “kuzema mukweni ngwe muwalizema yobe babenya.” (Mat 22:39) Co lalo Yakomba ndolome ya Yesu wasonekele ngwendi cizemo capwa “lishiko lya bumwene.” (Yak 2:8) Kapositolo Yowano wasonekele ngwendi: “Basamba bange banjazema, lishiko eli njili na kusoneka kuli yeni kesi lyaliha embwe, linapu lishiko lya laja, likelyo bene mwakele nalyo tunde ha kulibanga.” (1 Yo 2:7, 8) Yowano walumbunwine bika mwendekele ngwendi “lishiko lya laja”? Walumbunwine lishiko lya cizemo. Eli lishiko walitumbwile ngwendi lya laja mwafwa Yesu walyendekele “ha kulibanga.” Oloni lyapwile “lyaliha” mwafwa bandongesi ba Yesu bapandele kulizema manene omwo baliwanene na bukalu bwa kulisezaseza. Mu kaye, banu balizema bakebo babenya. Ngeci, ha kupwa bandongesi ba Kilistu tunapande kwononoka binangulo bije bitukwasa tuzeme bakwetu.
(1 Yowano 5:16, 17) Nga umona muka-kukulahela alinga bubi buje kubwasa kumutwala ku kutsa, unapande kulombela kuli Njambi, uje akamwana mwonyo. Eci cinakundama kuli baje bibi byabo kubibatwala ku kutsa. Oloni kuli bubi buje butwala ku kutsa, co kunjasa kwendeka ngwange munapande kulombela kuli Njambi ha bubi bwa ngacije. 17 Bilinga byoshe byabibi byapwa bubi, oloni kuli bubi buje kubwasa kutwala ku kutsa.
it-1 862 ¶5
Kukonekela
Kukwabihile kulombela kuli Njambi mangana akonekele bakwetu nambe kulombelela cikungulukilo coshe. Mosesa walekele Njambi bubi bwa Baisalele na kumulomba abakonekele, co Yehova wamukumbulwile. (Kul 14:19, 20) Ha simbu ya kukundika tembele, Solomoni nendi walombelele kuli Yehova ngwendi akonekele banu baje becelele bubi bubalingile. (1 Vi 8:30, 33-40, 46-52) Ezela nendi lalo wendekele ku mbunga bubi bwa Bayunda baje batundile mu bunzinda. Mwalombelele kutundilila kwisi ya mbunge na kushongangeya banu batenguluke, walingisile banu balingeko bimo mangana Yehova abakonekele. (Ezl 9:13–10:4, 10-19, 44) Yakomba wendekele ngwendi nga kuli umo ali na kubinja ku sipilitu, napande kusana bakulunu mu cikungulukilo mangana bamulombelele, “nga nalingi bubi, co bakamusambesa.” (Yak 5:14-16) Oloni kuli ‘bubi butwala ku kutsa.’ Obu bubi bunapu bwa kubiisila sipilitu ya kujela. Nga munu alinga bubi bwa cifwa eci mushakelo, co kubamukonekela. Muka-Kilistu kapandele kulombelela banu balinga bubi bwa cifwa eci.—1 Yo 5:16; Mat 12:31; Hev 10:26, 27.
Kutanda Mbimbiliya
(1 Yowano 1:1–2:6) Tuli na kusoneka kuli yeni ha Lijwi lya mwonyo, lije lyakeleko tunde ku kushangumuka. Tunalizibi, co tunalimono na mesho etu, eyo, tunalimono, co tunalikwata na maboko etu. 2 Omwo mwonyo ou washolokele, twaumwene, ngeci bene, tuli na kuwendeka na kumileka bya mwonyo wa myaka yoshe uje wakele hamo na Tate, co batusholwelelewo. 3 Bije tunamono na kuziba tuli na kumilekabyo lalo, ngeci mulipandakane hamo netu mu kulitombola kuje tuli nakwo na Tate na Munendi Yesu Kilistu. 4 Tuli na kusoneka ebi ngeci kujolela kwetu kukapwe kwa mutunu. 5 Ololo lijwi lije twazibile lya kutunda kuli Munendi na kulyambulula kuli yeni linapu eli, Njambi ikeye ceke, co muli ikeye kumwesi lisusulungu na limo lyahi. 6 Ngeci bene, nga twendeka ngwetu tuli na kulitombola muli ikeye, oloni ha simbu imolika tuli na kuyoya mu lisusulungu, tuli na kwendeka makuli mu majwi etu na mu bilinga byetu. 7 Oloni nga tuyoya mu ceke, ngwe ikeye ali mu ceke, asinoni tulitombola umo na mukwabo, co maninga a Yesu, Munendi, atujelesa ku bubi bwoshe. 8 Nga twendeka ngwetu kutwesi na bubi, tuli na kulikwisa yetu babenya, co muli yetu kumwesi busunga bwahi. 9 Oloni nga tulitabela bibi byetu kuli Njambi, co Ikeye anyunga cikulaheso cendi na kulinga bije bya busunga, ikeye akatusambesa ku bibi byetu na kutujelesa ku bilinga byetu byoshe byabibi. 10 Nga twendeka ngwetu kutwalingile bubi, co tunapwisa Njambi muka-makuli, co lijwi lyendi kulyesi muli yetu.
2 Bana bange babandondo, njili na kumisonekela ebi, ngeci kesi mulinge bubi, oloni nga umo alinga bubi, tuli naumo muka-kutwimanena kuli Tate, ikeye Yesu Kilistu, muka-busunga. 2 Co Kilistu ikeye babenya napu ñombelo ya bibi byetu ngeci babisambese, co kesi bibi byetu lika embwe, oloni na bibi bya banu boshe lalo. 3 Nga twononoka mashiko a Njambi, co mwa busunga bene tunamuzibuka. 4 Nga twendeka ngwetu tumuzibuka oloni kutwononoka mashiko endi, tunapu tu baka-makuli, co kumwesi busunga muli yetu. 5 Oloni nga twononoka lijwi lyendi, tunapu baje bazema omwo Njambi banamupwisa muka-busunga. Omu mukemwo twasa kuzibuka ngwetu tuli muli Njambi, 6 nga twendeka ngwetu simbu yoshe tuli na kuyoya muli ikeye, tunapande kuyoya ngwe mwalingile Yesu Kilistu.
NOVEMBER 11-17
BISIMPI BYA SEHO BYA MU LIJWI LYA NJAMBI | 2 YOWANO 1–YUNDA
“Tunapande Kulwa Mangana Tukale mu Busunga”
(Yunda 3) Basamba bange, njalingile ngwe munjinasela kumisonekela ha kwoboka kuje tunalipangezela, omwo njawanene ngeci mwamubwa kumisonekela ololo na kumitakamesa kutwalaho kulwila kukulahela kuje Njambi wanenene lumo kuli banu bendi boshe.
w04 9/15 11-12 ¶8-9
“Twaleleleniho Kukolesa Muli Mwene”
8 Mbimbiliya inatulumbunwina butumbe bwa Satana, ngeci tunabuzibuka. (2 Ko 2:11) Satana mwesekele Yombi, wanyongesele bufuko bwendi, watsiile banu bazemene, walingisile naanga yendi imulwise, wamubinjisile na kulingisa babusamba bendi bamupaye ha byuma bije kalingile. Yombi wazeyele manene, co wasinganyekele ngwendi Njambi wamuyengwile. (Yom 10:1, 2) Ano matangwa, Satana ali na kutunenela tuyando mu bingila bije kutwasa kunanguka bwasi. Co otu tuyando twasa kutuzeyesa.
9 Muno mu matangwa a kukotoka, kuli byuma byabingi bije byasa kutuzeyesa ku sipilitu. Tuli na kuyoya mu kaye muje banu bali na kushakezeka bufuko kutubakana kulyakela bilengo bya ku sipilitu. Co baka-mizimbu bali na kumwesa ngwe kulinga bukwizi kukwabihile, oloni kunena kubwahelela. Bwingi bwa banu ano matangwa ‘bazema senga kutubakana kuzema Njambi.’ (2 Ti 3:1-5) Ngeci, tunapande ‘kulwila likulahelo’ lyetu mangana byuma bya cifwa eci keti bituzeyese ku sipilitu.—Yun 3.
Kutondesesa Bisimpi bya Seho
(Yunda 4) Omwo banu bamo baka-kujeneka kukulahela banakobela mu bushweke hakati ketu, banu baje baka-kutengulula lijwi ha kutetela kwa Njambi ngeci balisambese bakebo babenya mu mashungu abo amabi, co banabyana Yesu Kilistu, Shukulu yetu na Mwene yetu. Kusañulu Bisoneka byambulwile cihiso cije cibanatambula.
(Yunda 12) Aba banu bakebo banapu ngwe [mamanya analishweke kwisi ya mema, NWT] mu biwano byeni bya cizemo omwo balya neni kujeneka shwamwa. Bashakezeka lika byabo babenya. Banapu ngwe mashelwa a kupekumuka lika na lihunzi oloni kuwesi kunena nyonzi. Banapu ngwe miti kuyesi kwima bushuka, nambe mu simbu ya nyangao, miti ije ibanatukula na mizi yayo inapu ya kutsa bene.
it-2 279
Biwano bya Cizemo
Mbimbiliya kuyalumbunwine mubyakele na kufwila bije biwano bya cizemo, co lalo kuyendekele indi byakele na kukalako kushwa kumo. (Yun 12) Yesu Kilistu na tupositolo bendi kubashikile ngwabo kukalekale ebi biwano, co kukwesi lishiko limwesa ngwalyo binapande kukalako. Banu bamo bakendeka ngwabo ebi biwano byapwile bya baka-Kilistu ba kufuka baje bakele na kulanya bakwabo baka-kukulahela ba kuhutwa mangana bakalye nabo. Ngeci, bisiwa, bifwile, baka-kufuka na baka-kuhutwa bakele na kulila hamo byakulya mwafwa bapwile naanga imo ya ku sipilitu.
it-2 816
Limanya
Lijwi likwabo lya Cingiliki lya spi·lasʹ, lilumbununa limanya lije linalishweke kwisi ya mema. Yunda wapangesele eli lijwi mwendekele bya banalume baje bakobelele mu cikungulukilo ca baka-Kilistu mangana bashulisilile biyongola byabo byabibi. Mamanya aje alishwekele kwisi ya mema asele kunena bukalu ku bwato. Mu ngila imo lika, baje banalume basele kunena bukalu mu cikungulukilo. Yunda wendekele ngwendi baje banu bapwile ngwe mamanya alishwekele kwisi ya mema mu biwano byabo bya cizemo.—Yun 12.
(Yunda 14, 15) Inoke lalo uje wapwile wa mu citanu na umo ku batekulwila ba Adama, uje kusañulu wambulwila buka-kwimanena hali bakebo, co wendekele ngwendi, “Kengeni, Mwene [wezile, NWT] na makulukazi a tangelo twendi, 15 mu kusompa boshe, mu kuhisa banu boshe banalingi bilinga bya kushaula Njambi na majwi abo oshe amabi a kushaula Njambi abamwendekele aje kubapandele kuwendeka kuli ikeye.”
‘Wazibisile Njambi Kubwaha’
Inoke wapolofwetele bika? Wapolofwetele ngwendi: “Kengeni, Mwene [wezile, NWT] na makulukazi a tungelo twendi, mu kusompa boshe, mu kuhisa banu boshe banalingi bilinga bya kushaula Njambi na ha majwi abo oshe amabi a kushaula Njambi abamwendekele aje kubapandele kuwendeka kuli ikeye.” (Yun 14, 15) Mpamo munananguka ngweni, Inoke nendeka awa majwi mu ngila ije imwesa ngwe Njambi nashulisilila laja obu bupolofweto. Eyi ikeyo ngila bapangesele tupolofweto bakabangeyeyeho. Mwafwa bupolofweto bukendeka cuma cije cikalingiwa kulutwe ngwe calingiwa laja.—Isa 46:10.
‘Wazibisile Njambi Kubwaha’
Likulahelo lya Inoke linapande kutushongangeya tulilule yetu babenya mangana tumone indi tukamono kaye ngwe mwakakamwena Njambi. Kusompa cije wambulwile Inoke mu kusimpa anga kucicili. Netu twacibandamena ngwe mubacibandamenene banu ba mu matangwa a Inoke. Byuma byapolofwetele Inoke byalishulisilile omwo Yehova wanenele libazi lyakama lije lyanyongesele banu bababi ba mu matangwa a Nowa. Oloni kunyongesa cije cemaneneneko kunyongesa cakama cije cikaija kulutwe. (Mat 24:38, 39; 2 Pe 2:4-6) Banu matangwa ano anga bacilinga byuma byabibi bije bikanenesa ngwabo Njambi akaije lalo na tungelo twendi na kubanyongesa. Munu na munu napande kwaka majwi a Inoke ku mbunge na kulekako bakwabo. Babushoko na babusamba betu banasa kutulwisa. Simbu imo tunasa kuliziba buli. Oloni Yehova kayengwile Inoke. Na bangamba bendi ba matangwa ano kakabebala embwe.
Kutanda Mbimbiliya
(2 Yowano 1-13) Mukanda wa kutunda kuli Mukulunu [uje uya] kuli ndokazi wa cizemo na kuli bana bendi, baje banjazema mwa busunga. Co kesi yange lika, oloni boshe baje bazibuka busunga bakuzema, 2 omwo busunga bwakala muli yetu, co bukakala muli yetu myaka yoshe. 3 Njambi Tate yetu na Yesu Kilistu Muna [Tate], atwane kutetela na mema ku mbunge na kwoloka, ebi bipwe byetu mu busunga na mu cizemo. 4 Njabwahelelele manene omwo njawanene ngeci bamo bana beni bali na kuyoya mu busunga, ngwe muje mwatushikile Tate. 5 Co ololo njikulomba yobe ndokazi wa cizemo ngwange, tulizemeni umo na mukwabo. Eli kesi lishiko lyaliha njimisonekela, eli likelyo lishiko tunakala nalyo tunde ha kulibanga. 6 Cizemo eci njendeka cilumbunuka ngeci tunapande kuyoya mu kwononoka kushika kwa Njambi. Kushika, ngwe yeni boshe mwaziba laja tunde ha kulibanga, kunapu ngeci, yeni boshe munapande kuyoya mu cizemo. 7 Omwo baka-kukwisa babangi banashandokela mu kaye mwoshe, banu baje kubataba ngeci Yesu Kilistu wezile mu cifwa ca bunu. Munu wa cifwa cangacije napu muka-kukwisa, ikeye napu Citozi ca Kilistu. 8 Linyungeni yeni babenya, kutewa muzimbalesa bije twapangelele, oloni mukatambula cikandelela ceni ca mutunu. 9 Munu woshe uje kakala na bilongesa bya Kilistu, oloni abipulakana, ikeye kesi na Njambi. Woshe uje akala na bilongesa ali na byoshe bibali, lshe na Mwana. 10 Ngeci bene, nga munu umo aija kuli yeni, oloni kaminenela bilongesa ebi, kesi mumutambule mu binjubo byeni, nambe kesi mwendeke kuli ikeye ngweni, “Kwoloka kukale nobe.” 11 Omwo woshe uje abakandelela mu kwoloka alitombola nabo mu bubi buje bubakalingi. 12 Njili na byabingi bya kumileka, oloni kunjasa kubisoneka ha lipapelo na tinta, oloni njili na [lilabelelo lya] kwija kuli yeni na kusimutwiya neni mesho na mesho, ngeci kubwahelela kwetu kukapwe kwa mutunu. 13 Bana ba ndokazi yeni wa cizemo banatumu bihindu byabo kuli yeni.
NOVEMBER 18-24
BISIMPI BYA SEHO BYA MU LIJWI LYA NJAMBI | KUJOMBOLOLA 1-3
“Njinazibuka Bije Biunalingi”
(Kujombolola 1:20) Eci cikeco kulumbunuka kwa cisiñiko ca bingongonosi bitanu na bibali bije unamono mu liboko lyange lya cilyo, na bitumbikilo bya bindeya bya ngolinde bitanu na bibali, bingongonosi bitanu na bibali binapu tungelo ba bije bikungulukilo bitanu na bibali, co bitumbikilo bya bindeya bitanu na bibali binapu bije bikungulukilo bitanu na bibali.
w12 10/15 14 ¶8
Muli na Kumwesa Sipilitu ya Kufwa Bati?
8 Kwanuka ngwetu Mbimbiliya inamwesa Yesu oku na kwata bingongonosi “bitanu na bibali” mu liboko lyendi lya cilyo kutukwasa tujeneke kukala na sipilitu ya kulwisa. “Bingongonosi” bimanena tunyungi ba kubwabesa, co lalo byasa kwimanena tunyungi boshe ba mu cikungulukilo. Yesu asa kutwamenena bingongosi bili mu liboko lyendi mu ngila yamona ngwendi inapande. (Kuj 1:16, 20) Ngeci, Yesu ha kupwa mutwe wa cikungulukilo ca baka-Kilistu, ali na nzili ya kutwamenena bakulunu mu bikungulukilo. Nga kuli mukulunu atondeka kumunangula, co Uje ali na ‘mesho a kuhyahyata ngwe mulangi wa tuhya’ alinga ngoco ha simbu yamona Ikeye ngwendi inapande, co lalo mu ngila yaibwa. (Kuj 1:14) Oloni nga kanda alinge ngoco, co tunapande kusingimika banu bayangwile sipilitu ya kujela. Paulu wasonekele ngwendi: “Ononokeni [baje bali na kumitwamenena] na kukaba mashiko abo. Bakebo bali na kuminyungilako myonyo yeni kujeneka kuhwima, omwo banapande kulyambulwila bipangi byabo kuli Njambi. Nga yeni mubononoka, co bakalinga bipangi byabo na kujolela, nga kesi ngoco, co bakabilinga na kubihilila, co na cimo cahi cikamikwasa.”—Hev 13:17.
(Kujombolola 2:1, 2) “Kuli kangelo ka cikungulukilo ca mu Efeso soneka ngwobe, ‘Eli likelyo lijwi lyatundu kuli uje nakwata bingongosi bitanu na bibali mu liboko lyendi lya cilyo, uje ali na kwendangana hakati ka bitumbikilo bya bindeya bya ngolinde bitanu na bibali. 2 Njinazibuka bije biunalingi, njinazibuka kundangana kwobe na kusimpa kwobe. Njinazibuka ngwange kuwasa kuundangana hamo na baka-kulinga bya bibi embwe, co lalo unelula baje bakakwendeka ngwabo banapu miluwa oloni kesi bakebo embwe, co banasholoka ngeci kuma banapu baka-makuli.
w12 4/15 29 ¶11
Yehova ali na Kutunyungilila Mangana Tukoboke
11 Cimona cili ku mukanda wa Kujombolola capita 2 na 3, cimwesa Yesu Kilistu oku elula bikungulukilo bya kupwa 7 bya mu Asia Minor munima ya kusanguka kwendi. Eci cimona cimwesa ngwaco Kilistu akamono cuma na cuma cili na kulingiwa mu cikungulukilo. Mwakele na kwendeka ha bikungulukilo bimo, watumbwile banu bamo, co wakele na kubazumbangeya nambe kubanangula. Oku kumwesa bika? Bikungulukilo bya kupwa 7 bimanena baka-Kilistu bakubwabesa munima ya 1914. Co bije binangulo byanangwile bikungulukilo bya kupwa 7 bicipanga na mu bikungulukilo bya baka-Kilistu ano matangwa. Ngeci, Yehova ali na kupangesa Munendi mu kutwamenena banu bendi. Asa kututwamenena bati?
w01 1/15 20-21 ¶20
Endeleleni Hamo na Munga ya Yehova
20 Kuzibuka ngwetu Njambi ikeye nangula Yesu apwe mutwe wa cikungulukilo kutukwasa twendelele hamo na munga ya Yehova. (Efe 5:22, 23) Co lalo ku Isaya 55:4 Yehova wendekele ngwendi: “Njamupwisile ntwama na muka-kushika miyati ya banu, co wapwile mukaleho wange kuli bakebo.” Yesu azibuka kutwamenena byuma mwamubwa. Azibuka bimanga bendi na bilinga byabo. Yesu mwelwile bikungulukilo bya mu Asia Minor, wendekele lutanu ngwendi wazibukile bibakele na kulinga. (Kuj 2:2, 19; 3:1, 8, 15) Yesu azibuka bitutonda ngwe mwa Ishe Yehova. Simbu kanda alombele Lilombelo lya Kutalelako, Yesu wendekele ngwendi: “Ishweni nazibuka laja bije bimunajeneka omwo kanda mulombe.”—Mat 6:8-13.
Kutondesesa Bisimpi bya Seho
(Kujombolola 1:7) Kengeni, ali na kwija ha mashelwa. Banu boshe bakamumona, hamo lika na baje bamutibile makunga. Miyati yoshe ya banu hano hasi bakalila mbimbi mitwe omwo bakamumona. Mwa busunga cikapwa ngacije bene. Ewa.
Bumwene bwa Njambi Butundisa Bitozi Byabwo
10 Muzimbu wa kusompa. Bitozi boshe ba Bumwene bwa Njambi bakalimwena byuma bije bikabajujwisa manene. Yesu wendekele ngwendi: “Asinoni Muna Munu akasholoka, akaija ha mashelwa na nzili yakama na bumpau.” (Mak 13:26) Eyi nzili muikasholoka, ikamwesa ngwayo Yesu naija na kusompa. Mu bupolofweto bukwabo bwa matangwa a kukotoka, Yesu walumbunwinine bya kusompa kuje kukakalako ha simbu oyo. Ebi biñanda tubiwana mu cisimo ca bimanga na bimembe. (Mat 25:31-33, 46) Baje bakundwiya Bumwene bwa Njambi bakabasompa ngwabo banapu “bimanga,” co ‘bakakatuka na kukenga kwilu’ omwo bakamona ngwabo ‘kupatuka kwabo kuli muyehi.’ (Luk 21:28) Oloni baje balwisa Bumwene bwa Njambi bakabasompa ngwabo banapu “bimembe,” co “bakalila mbimbi mitwe” omwo bakamona ngwabo babanyongesa.—Mat 24:30; Kuj 1:7.
(Kujombolola 2:7) Nga uli na matwi, tolilila bije byali na kwendeka munzinzime ku bikungulukilo. “Kuli baje bahyana, njikabana moko ya kulya ku bushuka bwa muti wa mwonyo uje uli mu lihya lya Njambi.
w09 1/15 31 ¶1
Bisimpi bya Kulitila bya mu Mukanda wa Kujombolola—I
2:7—Lihya lya Njambi nambe ngwetu paladaisi ya Njambi yapwa ika? Awa majwi bawasonekelele baka-Kilistu ba kubwabesa. Ngeci, eyi paladaisi inatalesa ku paladaisi ya mwilu muje mwakala Njambi. Bakubwabesa ba kulongwa bakabana cikandelela ca kulya ku “muti wa mwonyo,” co kubakatsi.—1 Ko 15:53.
Kutanda Mbimbiliya
(Kujombolola 1:1-11) Mu libulu eli banasonekamo byuma bije byajombolwele Yesu Kilistu. Njambi wamwanene kujomboloka oku ngeci abisholole kuli bangamba ba Njambi bije bikalingiwa bwasi bwasi. Kilistu wajombolwele byuma ebi kuli ngamba yendi Yowano ha kutuma kangelo kendi kuli ikeye, 2 co Yowano nambulula byoshe bije byamwene. Obu bukebwo bukaleho bwendi kupwisa ku muzimbu watundile kuli Njambi na busunga buje bwajombolwele hali Yesu Kilistu. 3 Kubwahelela kuli uje ali na kulaba eli libulu, co lalo kubwahelela kuli baje batolilila ku majwi a muzimbu wa buka-kwimanena na kwononoka bije bibanasoneka mu libulu eli. Omwo simbu ili muyehi omwo byoshe ebi bikalingiwa. 4 Bihindu bya kutunda kuli Yowano bya kutuma ku bikungulukilo bije bitanu na bibali bya mu lifuti lya Asiya. Kutetela na kwoloka bya kutunda kuli Njambi ou aliko na uje wakeleko, co na uje akaija, bipwe byeni, co binatundu lalo kuli minzinzime ije itanu na ibali ili kulutwe lwa litanda lyendi, 5 na kuli Yesu Kilistu, mukaleho wa busunga, mushoke wa kulibanga kusanguka ku kutsa, co uje lalo muka-kuswana bimyene ba hano ha kaye. Watuzema, co ha ñombelo ya kutsa kwendi natupatula ku bibi byetu, 6 co natupwisa bumwene bwa baka-kukombelela mu kupangela Njambi na Ishe. Kuli Yesu Kilistu kukale bumpau na nzili ku myaka yoshe. Ewa. 7 Kengeni, ali na kwija ha mashelwa. Banu boshe bakamumona, hamolika na baje bamutibile makunga. Miyati yoshe ya hano hasi bakalila mbimbi mitwe omwo bakamumona. Mwa busunga cikapwa ngacije bene. Ewa. 8 “Yange wa kulibanga na muka-kukotokela,” mwanendeka Shukulu Kalunga Njambi Muka-nzili yoshe, uje aliko na uje wakeleko na uje akaija. 9 Yange Yowano, ndolome yeni, co ha kupwa ndongesi ya Yesu njili hamo neni na likakateya mu ñababa ije ili na kwija kuli baje banakundama ku Bumwene bwendi. Banjakele ha liñanda lya Patimose omwo njambulwile lijwi lya Njambi lya busunga buje bwasholwele Yesu. 10 Ha litangwa lya Mwene njakele mu Munzinzime, co njazibile lijwi lyakama, lyalifwile ngwe cililimo ca lupembo, lyendekele munima yange. 11 Lyendekele ngwalyo, “Soneka byoshe bije umona, co tuma libulu ku bikungulukilo ebi bili mu binganda bitanu na bibali, Efeso na Simina na Pelengamu na Tiyatila na Salendisiya na Filandelufiya na Laondisiya.”
NOVEMBER 25–DECEMBER 1
BISIMPI BYA SEHO BYA MU LIJWI LYA NJAMBI | KUJOMBOLOLA 4-6
“Baka-kulonda Tubalu Bawana”
(Kujombolola 6:2) Njakengele, co kwakele kabalu wa kutoka. Uje walondeleho wakwatele buta bwa lusipa, co bamwanene cilongo. Wakatukile ngwe muka-kuhyana aya mu kuhyana.
Baka-kulonda Tubalu Bawana Bemanena Bika?
Iya walondele ha kabalu wa kutoka? Banamwendeka mu libulu lya Kujombolola lya mu Mbimbiliya. Banamwendeka ngwabo “Lijwi lya Njambi.” (Kuj 19:11-13) Lijwi napu Yesu Kilistu, mwafwa wapwa muka-kwendekelako Njambi. (Yow 1:1, 14) Co bamutumbula lalo ngwabo “Mwene ya bimyene na Shukulu ya bashukulu,” uje wapwa “Muka-kulongwa na Busunga.” (Kuj 19:11, 16) Wapwa mwene uje ali na nzili ya kulwa, oloni kesi kuipangesa mu ngila yaibi. Tucisimutwiyeni ha bihula ebi.
wp17.3 4 ¶5
Baka-kulonda Tubalu Bawana Bemanena Bika?
Aba baka-kulonda tubalu bashangumukile tangwa lika kulondaho? Anukeni ngweni muka-kulonda kabalu wa kulibanga Yesu, walondele ha kabalu omwo bamwanene cilongo. (Kuj 6:2) Yesu washangumukile kuyula mwaka uka mwilu? Omwo welukile mwilu, kashangumukile kuyula oho bene. Mbimbiliya imwesa ngwabo wakabandamenene tahi. (Hev 10:12, 13) Yesu walekele baka-kumukabangeya ngwendi, omwo bakamona bizibukiso, co bakananguke ngwabo simbu yendi ya kubandamena inahu, co nashangumuka kuyula mwilu. Wendekele ngwendi omwo akashangumuka kuyula, byuma mu kaye bikabihya manene. Wendekele ngwendi kukakala binzita na njala na mishongo. (Mat 24:3, 7; Luk 21:10, 11) Munima ya Nzita ya Kaye ya kulibanga ya 1914, casholokele mwamubwa ngwabo ikeyo simbu yendekele Yesu, ije batumbula lalo mu Mbimbiliya ngwabo “simbu ya matangwa a kukotoka.”—2 Ti 3:1-5.
(Kujombolola 6:4-6) Co kabalu mukwabo lalo watuhukile, wapwile wa kubenga. Uje walondeho bamwanene nzili ya kunena nzita hano hasi, ngeci banu balitsiye umo na mukwabo. Bamwanene moko yakama ya mukwale. 5 Asinoni Muna Manga wabatwile lalo kasateso ka mu citatu, co njazibile cikashama wa kuyoya wa mu citatu endeka ngwendi, “Ija.” Njakengele, co kuje kwakele kabalu wa kuzibala. Uje walondeleho wakwatele cipeseleso mu liboko lyendi. 6 Co njazibile lijwi litunda mukati kabaje bikashama bawana ba kuyoya ngwalyo, “Lita ya tiliku inapu ngwe fweto ya litangwa lyoshe lya mutunu, co lalo malita atatu a mbale ya maumwa anapu fweto ya litangwa lyoshe lya mutunu. Oloni kesi ubiise mazi a olive na mikolobozi ya bushuka bwa binyu.”
Baka-kulonda Tubalu Bawana Bemanena Bika?
Ou muka-kulonda kabalu emanena binzita. Banamwana nzili ya kunena binzita hano ha lifuti libu. Mukemwo mu 1914, kwakele nzita ya kaye. Co kwezile lalo nzita ya kaye ya mu cibali ije yanyongesele banu babangi. Baka-kutondesesa bamo bendekele ngwabo, kushwa mu 1914, binzita binanyongesa banu ba kutubakana 100 milyoni. Co kwakele lalo banu babangi baje babulumukile manene.
wp17.3 5 ¶4-5
Baka-kulonda Tubalu Bawana Bemanena Bika?
“Njakengele, co kuje kwakele kabalu wa kuzibala. Uje walondeleho wakwatele cipeseleso mu liboko lyendi. Co njazibile lijwi litunda mukati ka baje bikashama bawana ba kuyoya ngwalyo: ‘Lita ya tiliku inapu ngwe fweto ya litangwa lyoshe lya mutunu, co lalo malita atatu a mbale ya maumwa anapu fweto ya litangwa lyoshe lya mutunu. Oloni kesi ubiise mazi a olive na mikolobozi ya bushuka bwa binyu.’”—Kuj 6:5, 6.
Ou muka-kulonda kabalu emanena njala ya lyangengela. Byakulya byakehele manene, mwafwa lita imo ya tiliku bailandele mbongo imo ya siliva ije yapwile fweto ya litangwa lya mutunu, mu cita ca myaka ca kulibanga. (Mat 20:2) Eyi mbongo yasele lalo kulanda malita atatu a mbale ya maumwa, ije kuyapwile ya seho manene ngwe tiliku. Kuma naanga yakele na kupwisamo na byakulya ebi ndi? Banu babalekele ngwabo kubapandele kushandozola byakulya, maneneni bije byakeleko ha simbu ije bya kufwa ngwe olive na mikolobozi ya bushuka bwa binyu.
(Kujombolola 6:8) Njakengele, co kwasholokele kabalu wa kutokoloka. Uje walondeleho bamulukile lizina ngwabo Kutsa, co Bukalo bwa Batsi bwamukabele kuyehi munima. Babanene nzili hakamwa ya mutambela umo wa mitambela iwana ya hano hasi, ngeci batsiye na moko ya mukwale na njala ya lyangengela na mishongo na bikashama.
wp17.3 5 ¶8-10
Baka-kulonda Tubalu Bawana Bemanena Bika?
Muka-kulonda kabalu wa mu ciwana emanena kutsa kuje kukaija mwafwa ya mishongo na byuma bikwabo byeka. Kutunda lika mu 1914, mamilyoni a banu ananyongo ku mushongo wa Spanish flu. Banu ba kweta ku 500 milyoni batambwile ou mushongo. Kulumbununa ngwabo munu umo, ha banu batatu wakele nawo.
Oloni kesi mushongo wa Spanish flu lika. Baka-kutondesesa ngwabo mu cita ca myaka ca bu 20, mushongo wa cingongo (smallpox) watsiile banu babangi manene. Nameme kuli baka-kupanga mambanda, oloni mishongo ya kufwa ngwe AIDS na TB na malaliya anga icili na kutsiya banu babangi.
Binzita na mishongo na njala, byoshe bili na kutsiya banu. Co Bimbumbo bicili na kulehula banu, co eci cikazeyesa baje banu.
Kutondesesa Bisimpi bya Seho
(Kujombolola 4:4) Co kulitanda lije kwazengelekele matanda akwabo makumi abali na awana aje abatumbamene bakulunu makumi abali na bawana bazalele buzalo bwa kutoka, co bazalele bilongo bya ngolinde ku mitwe yabo.
(Kujombolola 4:6) Co lalo kulutwe lwa litanda lije kwakele mema a kalunga a kulifwa ngwe kalikengelo ka kutungukwa ngwe kilisitale. Co ku mutambela umo na umo wa litanda, kwazengelekele bikashama bawana ba kuyoya bakele na mesho kulutwe na kunima.
re 76-77 ¶8
Bumpau bwa Litanda lya Yehova
8 Yowano wazibukile ngwendi Njambi wangwile tupilistu mangana bapange mu mbalaka. Co hamo wakomokele byuma byamwene. Ngwendi: ‘Co ku litanda lije kwazengelekele matanda akwabo makumi abali na awana aje abatumbamene bakulunu makumi abali na bawana bazalele buzalo bwa kutoka, co bazalele bilongo bya ngolinde ku mitwe yabo.’ (Kuj 4:4) Kukwasholokele tupilistu, oloni kwasholokele bakulunu ba kupwa 24 baje bakele ha matanda, co babazikile bilongo ngwe bimyene. Aba bakulunu bemanena beya? Aba banapu baka-Kilistu ba kubwabesa baje banasanguka, co bakakala mwilu ngwe mwabakulaheselele Yehova. Tuzibuka bati ngoco?
re 80 ¶19
Bumpau bwa Litanda lya Yehova
19 Aba bikashama bemenena bika? Cimona camwene kapolofweto Ezekiyele citukwasa tuwane cikumbululo. Ezekiyele wamwene Yehova oku ali ha litanda mu litemba lya mwilu. Eli litemba lyakele na kwenda hamo na bikashama ba kuyoya ba kufwa ngwe baje banendeka Yowano. (Eze 1:5-11, 22-28) Ezekiyele wamwene lalo lije litemba lya litanda hamolika na bikashama ba kuyoya. Co wendekele ngwendi baje bikashama bapwile bakelumbi. (Eze 10:9-15, NWT) Baje bikashama bamwene Yowano bemanena bakelumbi babangi ba Njambi. Bakelumbi bapwa tungelo ba nzili manene mu munga Yendi ya ku sipilitu. Yowano kakasamene mwamwene ngwendi baje bakelumbi bakele kuyehi na Yehova mwafwa kusañulu mu mbalaka kwakele bakelumbi babali ba ngolinde baje bakele ha cifwiko ca cikasha ca cikumiiyo. Cije cikasha ca cikumiiyo cemanenene litanda lya Yehova. Lijwi lya Yehova lyazibikilile mukati ka baje bakelumbi mwanene mashiko kuli Baisalele.—Kut 25:22; Mya 80:1.
(Kujombolola 5:5) Asinoni umo wa baje bakulunu wendekele kuli yange ngwendi, “Kesi ulile. Kenga. Ndumba wa kutunda ku muyati wa Yunda, naanga yakama ya kuli Ndabiti, ikeye nahyana, co asa kubatula tusateso otu tutanu na tubali na kufukula eli libulu.”
cf 36 ¶5-6
“Kenga. Ndumba wa Kutunda ku Muyati wa Yunda”
5 Kakangi ndumba bakamwendeka ngwabo wapwa wa kusimpa. Kuma mwalimonaho laja mesho na mesho na ndumba wa nkomba ndi? Nga mwalimonaho laja nendi, co hamo kwakele cibumbe camyangunwine hakati. Nameme ngoco, kulimona na ndumba kutewesa. Nga mukenga eli licikashama lya nzili mu mesho omwo limikenga nalyo, kumwasa kusinganyeka ngweni lyasa kutewa cuma cimo. Mbimbiliya inendeka ngwayo kuli ndumba umo uje ‘wapwa wa nzili manene kutubakana tusitu boshe, co kesi kutewa cuma na cimo cahi.’ (Vis 30:30) Kukekwo kusimpa kwa Yesu.
6 Tusimutwiyeni ha bingila bitatu omwo Yesu wamwesele kusimpa ngwe ndumba: wemanenene busunga, wasompele mu busunga, co wasimpile mubamulwisile. Co lalo tulilongesa mutwasa kutembwininina Yesu ha kupwa ba kusimpa nameme twapwa ba kusimpa na laja indi embwe.
Kutanda Mbimbiliya
(Kujombolola 4:1-11) Munima yebi njakele na cimona cikwabo, co njamwene cikolo ca kushokoloka mwilu. Co lijwi lya cililimo lya kulifwa ngwe lupembo, lijwi lije njazibile lyendekele kuli yange ha kulibanga, lyendekele ngwalyo, “Ija kuno kwilu, co njikakumwesa byuma bikasholoka munima yebi.” 2 Co haje bene njakele mu Munzinzime. Muje mwilu, njamwene litanda na uje watumbameneho. 3 Cihanga cendi califwile ngwe mamanya a seho a njasipa na kanelya, co ku litanda kwoshe kwoshe kwazengelekele nkongolo yalifwile ngwe limanya lya emalinde. 4 Co ku litanda lije kwazengelekele matanda akwabo makumi abali na matanda awana aje abatumbamene bakulunu makumi abali na bakulunu bawana bazalele buzalo bwa kutoka, co bazalele bilongo bya ngolinde ku mitwe yabo. 5 Co ku litanda lije kwatundile byeke bya muhyato, na cililimo na kuluma kwa kushwakumo. Co byeke bya mitetengo itanu na ibali byakele na kushukuma kulutwe lwa litanda, eyi inapu minzinzime itanu na ibali ya Njambi. 6 Co lalo kulutwe lwa litanda lije kwakele mema a kalunga a kulifwa ngwe kalikengelo ka kutungukwa ngwe kilisitale. Co ku mutambela umo na umo wa litanda, kwazengelekele bikashama bawana ba kuyoya bakele na mesho kulutwe na kunima. 7 Cikashama wa kulibanga walifwile ngwe ndumba, wa mu cibali walifwile ngwe muna ngombe, wa mu citatu wakele na cihanga ngwe ca munu, co wa mu ciwana walifwile ngwe ngonga wa kupulula. 8 Umo na umo wa baje bikashama bawana ba kuyoya wakele na mambaba atanu na limo, co oshe akele na mesho, mukati na hanja. Bakebo kubalikelele kwimba butsiki na mutanya ngwabo, “Wa kujela, wa kujela, wa kujela, ikeye Shukulu Kalunga Njambi Muka-nzili yoshe, uje wakeleko, uje aliko, na uje akaija.” 9 Baje bikashama bawana ba kuyoya baimba myaso ya bumpau na kasingimiko na kukandelela kuli uje natumbama ha litanda, uje wayoya ku myaka yoshe, omwo baimba, 10 co baje bakulunu makumi abali na bawana bakulama kulutwe lwa uje natumbama ha litanda na kulemesa uje wayoya ku myaka yoshe. Co bombila bilongo byabo hasi kulutwe lwa litanda na kwendeka ngwabo, 11 “Mwene yetu na Njambi yetu. Yobe wafwila kutambula bumpau na kasingimiko na nzili. Omwo yobe watangele byuma byoshe, co ku cizango cobe babyanene kuyoya na mwonyo.”