Mwakushangumukila Kusimutwiya na Banu Kupangesa Matilakiti

Kushwa lika mu 2018 mu January, liputa lya helu lya Mukanda wa Biwano wa Buyoye na Cipangi Cetu lili na kumwesa bingila bya kwendekelamo. Banatushongangeya ngwabo tusimutwiye na banu kutubakana kubana lika mabulu. Mavidio amwesa bingila bya kwendekelamo ali na kukwasa baka-kwambulula bapangese Mbimbiliya omwo bashangumuka kusimutwiya na banu. Kuma oku kulumbununa ngwabo kutwapandele kupangesa mabulu omwo twambulwila ha njubo na njubo ndi? Embwe. Cakumwenako, matilakiti apwa amabwa kuwapangesa omwo tushangumuka kusimutwiya na banu. Nga tupangesa matilakiti, twasa kulinga ebi byuma binatako:

1. Ihuleni cihula cili ha liputa lya kulibanga na bikumbululo bili kwisi.

2. Bamweseni muinakumbulwila Mbimbiliya helu ya liputa lya mu cibali. Nga citaba, tandeni na kusimutwiya biñanda bimo bili mukati ka tilakiti.

3. Aneni tilakiti babenya njubo, co bashongangeyeni batande biñanda byoshe mubawana simbu.

4. Simbu kanda muye, basezeleni cihula cili mwisi ya “Singanyekeni ha Cihula Eci,” co lizibasaneni litangwa limwakusimutwiya muinakumbulwila Mbimbiliya oco cihula.

Omwo mwilukilako, munapande kukasimutwiya ha cihula cimwasezele na kuseza lalo cihula ca bungenzi bukwabo. Mwasa kuseza cihula citunda ha webusati yetu nambe cije citunda mu libulu libanamwesa kunima ya tilakiti imunabasezelele. Ha simbu inapande, mwasa kubasezela kalibulu ka Muzimbu Waubwa wa Kutunda Kuli Njambi! nambe libulu lyeka lya mu Cikasha ca Bikwata bya Kupangesa mu Kulongesa.