Biñanda bya Kupangesa mu Mukanda wa Biwano bya Buyoye Bwetu Baka-Kristu na Cipangi Cetu
© 2024 Watch Tower Bible and Tract Society of Pennsylvania
MAY 6-12
BISIMPI BYA SEHO BYA MU LIJWI LYA NJAMBI BISAMU 36-37
“Keti Mulubale Mwafwa ya Baka-bubi”
Bika Bibakanyongesa Omwo Bumwene Bwa Njambi Bukaija?
4 Banu bababi bakatuyandesa bati matangwa ano? Munima ya kwendeka ngwendi matangwa ano akapwa amakalu manene, Paulu wasonekele ngwendi: “Banu baka-bubi na baka-manseno bakatwalelelaho kulinga bubi manene.” (2Ti. 3:1-5, 13) Bati, mwalimwena muwanalishulisilila awa majwi a bupolofweto ndi? Bwingi bwetu batuyandesa manene kuli banu bababi baje bapwa bikenya na baka-kangu. Bamo babo kubesi kulishweka, oloni bakwabo bakalimwesa ngwe bapwa bababwa kumani bashaka lika kungumuna banu. Nameme yetu kubatupakesele banu aba bababi, oloni bacili na kutuyandesa mu bingila byabingi. Tukazibi kubabala ku bimbunge omwo tusinganyeka ha bilinga byabo byabibi. Banu bababi mu bakayandeselamo banike na tukulukazi na banu baje kubasa kulyohyela, kukatuzibisa lyoba. Banu bababi bakamwesa sipilitu ya tusitu, na budimona. (Jms. 3:15) Oloni Lijwi lya Yehova likendeka lika bya muzimbu waubwa kesi waubi.
Yehova Akabezikisa Baje Bakonekela Bakwabo
10 Kukala na nkulundundu kwasa kutukobelesa mu bukalu. Nkulundundu yapwa ngwe citele ca kulema, mukemwo Yehova ashaka ngwendi tukonekele bakwetu. (Tandeni Efeso 4:31, 32.) Mukemwo atushongangeya ngwendi twecele kukala na butenu na matoto. (Sm 37:8) Kulinga ngoco kutukwasa. Kutulika nkulundundu kwasa kutunenela bukalu ku mubila na mu bisinganyeka. (Pro 14:30) Kukala na nkulundundu kukobelesa yetu mu bukalu keti munu uje natubiisila. Cakumwenako, nga tunwa bumbanda buje butsiya mwafwa ya munu uje natulubalesa, yetu tutsa keti uje munu natulubalesa. Ngeci, kukonekela bakwetu kutukwasa. (Pro 11:17) Tupwa ba kushubuluka, co tutwalelelaho kupangela Yehova mu kubwahelela.
“Bwaheleleni Manene Mwafwa ya Yehova”
20 Co, “banu bababotsi bakaswana lifuti-libu.” (Sm 37:11a) Oloni aba “banu bababotsi banapu beya?” Lijwi libananungulula ngwabo bababotsi litunda ha lijwi lilumbununa “kayando, kulikehesa na kushaula.” Banu bababotsi banapu baje babandamena kuli Yehova mangana abahwimise ku tuyando twoshe tubali na kuliwana natwo. “Bakabwahelela manene mwafwa bakalikuwa kwoloka kwakama.” (Sm 37:11b) Na matangwa ano, tuli na kulikuwa kwoloka kwakama manene mwafwa tuli mu paradaisi ya ku sipilitu ije inapu cikungulukilo ca baka-Kristu.
Kutondesesa Bisimpi bya Seho
it-2 445
Munkinda
Kukanyama, kukalako simbu yoshe na bukama. Kukanyama na kukalako simbu yoshe, awa majwi bana esekesa ku minkinda. (Isa 54:10; Hab 3:6; esekeseni Sm 46:2.) Ngeci, omwo muka-kwimba wendekele ngwendi kusunga kwa Yehova kwapwa ngwe “minkinda ya Njambi” (Sm 36:6) hamo walumbunwine ngwendi kusungama kwa Yehova kukwasa kuhwa. Hakuwana ngwe minkinda yapwa yakama, hamo oku kwasa kulumbununa lalo ngwabo kusungama kwa Njambi kwalisezela kulako noku kwa banu. (Esekeseni Isa 55:8, 9.) Kutalesa ku kwitila lilonga lya butenu bwa Njambi lya bu 7, mukanda wa Kujombolola 16:20 ngwawo: “Minkinda kubaiwanene.” Oku kulumbununa ngwabo nameme byuma byakama byakufwa ngwe minkinda, kubikoboka butenu bwa Njambi.—Esekeseni Jel 4:23-26.
MAY 13-19
BISIMPI BYA SEHO BYA MU LIJWI LYA NJAMBI BISAMU 38-39
Bukalu Bukaija Mwafwa ya Kuliziba Kukala Manene na Mulonga
“Kengeni Kulutwe”
12 Tandeni 1 Iwano 3:19, 20. Bisimbu bimo, tubaboshe tukalizibi kukala na mulonga. Cakumwenako, bamo bakalyana mulonga mwafwa ya byuma bibalingile simbu kanda balilongese busunga. Bamo bakalyana mulonga mwafwa ya byuma byabibi bibalingile munima ya kubamwitika. (Lom 3:23) Tubaboshe tukashaka kulinga byuma byabibwa. Oloni “bisimbu byabingi tukabiisa.” (Jms 3:2; Lom 7:21-23) Nameme kutwesi kuliziba mwamubwa mutukanuka byuma byabibi bitwalingile kunima, oloni kulinga ngoco kutukwasa. Mwafwa bika? Mwafwa kwanuka bubi butwalingile kunima kutulingisa tutengulule futisi yetu na kulyangwila kujeneka kwilukila kulinga buje bubi.—Heb 12:12, 13.
13 Oloni bisimbu bimo tunasa kuliziba manene kukala na mulonga. Oku kunapu kutwalelelaho kuliziba kukala na mulonga nameme tunatenguluka, co lalo Yehova namwesa laja ngwendi natukonekela. Kuliziba kukala na mulonga mu ngila eyi keti kwakubwa. (Sm 31:10; 38:3, 4) Mwafwa bika? Tusimutwiyeni hali ndokazi uje watwaleleleho kuliziba kukala na mulonga mwafwa ya bubi bwalingile kunima. Wendekele ngwendi: “Njakele na kuliziba ngwange kukwesi seho ya kupangela Yehova na nzili mwafwa kunjikoboka.” Bwingi bwetu hamo tukalizibi ngoco. Kutwapandele kutwalelelaho kuliziba manene kukala na mulonga. Mwafwa bika? Mwafwa Satana abwahelela nga tulikela kupangela Yehova okuni ikeye natukonekela.—Esekeseni 2 Korinte 2:5-7, 11.
w02 11/15 20 ¶1-2
Twasa Kumwesa Bati Yehova Ngwetu Tuli na Kupangesa Mwamubwa Simbu Yetu?
MATANGWA a tukayoyo apwa a mandondo, co lalo akahu bwasi. Devidi uje wapwile muka-kwimba wasinganyekesesele ha bwihi bwa buyoye bwa banu, co oku kwamulingisile alombele ngwendi: “Obe Yehova njikwase kuzibuka mamaneselelo a buyoye bwange, naha awanapu matangwa ange mangana njizibuke ngwange kuyoya kwange kwapwa kwa simbu yaindondo—cili bene, unakehesa matangwa ange, co myaka ya kuyoya kwange inapu yaindondo kuli yobe.” Devidi washakele kuyoya mu ngila ije izibisa Njambi kubwaha ku mbunge, walingile ngoco muendekesi na mu bilinga byendi. Wamwesele ngwendi wakulahelele Njambi omwo wendekele ngwendi: “Yobe lika lilabelelo lyange.” (Sm 39:4, 5, 7) Yehova wamutolililile. Wamwene bilinga bya Devidi, co wamubezikisile.
Tunasa kuzezama na bipangi bya ha litangwa na litangwa, co oku kunasa kutulingisa tulishoshomwene maneneni nga tuli na byabingi bya kulinga na byuma byabingi bitunapande kuzibuka, oloni kutwesi na simbu yaingi ya kulinga ngoco. Kuma netu tushaka kuzibisa Njambi kubwaha ngwe mwa Devidi ndi? Yehova akatala umo na umo wetu na kumwilula. Myaka 3,600 kunima, Yombi uje wazibilile Njambi lyoba wanangukile ngwendi Yehova wazibukile bingila byendi na kutanda minambo yendi yoshe. Yombi walihwile ngwendi: “Bika binji kumbulula mwanjileka ngwendi njilitabele?” (Yom 31:4-6, 14) Twasa kumwesa Njambi ngwetu tuli na kupangesa mwamubwa simbu yetu ha kutwameka byuma bya ku sipilitu mu mutamba wa kulibanga na kwononoka mashiko endi. Ngeci, tutwaleleleniho kwaka mbunge ku byuma ebi.
Mwasa Kukanyamesa Bati Busamba Bweni na Yehova?
Lombeleni kuli Yehova kushwa kumo. Yehova azibuka ngwendi kutwalelelaho kuliziba kukala na mulonga kunasa kumyonowesa kulombela kuli ikeye. (Lom 8:26) Nameme ngoco, “lombeleni simbu yoshe” na kuleka Yehova ngweni mushaka kupwa kabusamba kendi. (Lom 12:12) Andrej wendekele ngwendi: “Njakele na kuliziba manene kukala na mulonga na shwamwa. Oloni munima ya kulombela, njakele na kulizibako bwino. Co njakele na kuliziba kushubuluka.” Nga kumuzibuka bimunapande kwendeka mu lilombelo, tandeni malombelo a Mwene Devidi uje watengulukile, abanasoneka ku mukanda wa Bisamu 51 na 65.
Kutondesesa Bisimpi bya Seho
Lingeni Byuma Bije Bilingisa Bakweni Bamikulahele
16 Kukwata mbunge nako kulingisa bakwetu batukulahele. Kukwata mbunge kutukwasa mangana keti tulekese bakwetu biñanda bije kutwapandele kubaleka, co kulinga ngoco kulingisa bakwetu batukulahele. (Tandeni Provebia 10:19.) Oloni kunasa kutukaluwila kukwata mbunge omwo tupangesa intaneti. Nga kutunyanyama, tunasa kuleka banu babangi biñanda bije kubapandele kuzibuka. Nga tunatumu mizimbu ya cifwoco ha makina kutwasa kwonowesa banu kuipangesa mwoshe mubashakela nambe kwonowesa bukalu buje bwasa kutundamo. Kukwata mbunge kutukwasa mangana keti twendeka biñanda byakukundama ku bandolome na bandokazi betu omwo baka-kutulwisa batwihozola. Bikebyo bibakalingi tupokola mu mafuti muje mubanashoko cipangi cetu. Twasa kupangesa cinangulo ca “kukuta ku kanwa” mu bukalu bwa cifwa eci na bukwabo. (Sm 39:1) Tunapande kulinga byuma bije bilingisa bakwetu batukulahele omwo tulikwatasana na baka-naanga yetu, babusamba betu, bandolome na bandokazi betu nambe banu beka. Co lalo kukwata mbunge kulingisa bakwetu batukulahele.
MAY 20-26
BISIMPI BYA SEHO BYA MU LIJWI LYA NJAMBI BISAMU 40-41
Mwafwa Bika Tunapande Kukwasa Bakwetu?
Baka-Kwana Bapwa Banu ba Kubwahelela
16 Baka-kwana ba busunga kubesi kwana na kubandamena ngwabo nabo babane. Yesu wendekele ngwendi: “Omwo ulinga ciwano, lanyako baka-kuhutwa na baka-kujenduka na bilema na tupuputwa, co ukabezika, omwo bakebo kubasa kukwilwisila bije biunabana.” (Luk 14:13, 14) Mbimbiliya ngwayo: ‘Muka-kwana akabezika.’ Co lalo ngwayo: “Nabezika munu uje ayongola hali baka-kuzeya.” (Pro 22:9; Sm 41:1) Tupwa ba kubwahelela nga tukwasa bakwetu.
17 Omwo Paulu welukilile majwi a Yesu ngwendi: “Muli kujolela kwakama manene mu kwana kutubakana mu kutambula,” kalumbunwine kwana lika byuma bya ku mubila, oloni na kutakamesa na kutwamenena na kukwasa baje bali mu bukalu. (Bil 20:31-35) Endekesi na bilinga bya Paulu bimwesa ngwabyo kunapu kwa seho kwana simbu na nzili na mbunge na cizemo cetu.
18 Baka-kutondesesa bya buyoye bwa banu banawana ngwabo kwana kukalingisa munu apwe wa kubwahelela. Ñanda imo ngwayo: “Banu babangi banendeka ngwabo bakabwahelela manene munima ya kukwasa bakwabo.” Baka-kutondesesa banendeka ha bubwa buli mu kukwasa bakwetu ngwabo: “Kwana kukashubulwisa munu na kuzibuka byali na kuyoyela mwafwa azibuka byuma bya seho mu buyoye bwa munu.” Baka-kulilongesa bamo banawana ngwabo kunapu kwakubwa kulyana mu bipangi bya mbunga, mwafwa kukalingisa munu apwe wa kulikangula na kupwa wa kubwahelela. Kutukasama kuziba ebi biñanda bibanawana, mwafwa Ishamatanga yetu Yehova wa cizemo watuleka ngwendi kwana kutulingisa tupwe ba kubwahelela.—2 Ti 3:16, 17.
w15 12/15 24 ¶7
Yehova Aminyungilila
7 Nga tubinja, tukulaheleni ngwetu Njambi asa kutuzembeleka, kutwana mana na kutukwasa. Ngwe mubalingilile bangamba bendi ba kusañulu. Mwene Devidi wasonekele ngwendi: “Nabwahelela munu uje aka mbunge munu wa kwisi, Yehova akamwamena ha litangwa lya bukalu. Yehova amunyunga na kumulingisa atwaleleleho kuyoya.” (Sm 41:1, 2) Mu simbu ya Devidi, munu uje wakele mbunge munu wakwisi, katwaleleleho kuyoya myaka yoshe. Ngeci, aha Devidi kalumbunwine ngwendi uje aka mbunge munu wakwisi atwalelelaho kuyoya myaka yoshe. Awa majwi alumbununa ngwawo Njambi akwasa munu uje aka mbunge munu wakwisi. Amu kwasa bati? Devidi wendekele ngwendi: “Yehova akamukwasa ha mwela wendi hali na kubinjila. Ha simbu yabinja ukamunyunga.” (Sm. 41:3) Munu uje wakwasele munu wakwisi, wazibukile ngwendi Njambi wakele na kumona bilinga byendi byabibwa. Co, nzili ya mu mubila ya kulwisa mishongo yasele kumukwasa akanguke.
Tembwinineni Yehova Uje Wapwa wa Ngozi
17 Kumwapandele kumwesa lika ngozi mu kushaka ngweni neni bakamikwase. Oloni munapande kumwesa ngozi mu kushaka kutembwinina na kushangazala Yehova Njambi uje wapwa babenya ngozi na mema ku mbunge. (Pro. 14:31) Watwakelele mwanja waubwa manene. Twesekeni mutwasela mwoshe kumutembwinina mu kuzema bandolome betu na kulikwatasana na banu batwatunga nabo mu kubamwesa ngozi.—Gal. 6:10; 1 Iwa. 4:16.
Kutondesesa Bisimpi bya Seho
it-2 16
Yehova
Biñanda byoshe bili mu Mbimbiliya, bili na kukundwiya ciyulo ca Yehova. Ngeci, ebi bimwesa ngwabyo cuma cije capwa ca seho manene kuli Yehova cinapu kujelesa lizina lyendi. Oku kulumbununa kulijelesa ku biñanda byoshe bibakamubangeya. Oloni cuma ca seho cibanapande kulinga tungelo na banu cinapu kusingumika lizina lya Yehova lije lyapwa lya kujela. Tungelo na banu banalimwena ngwabo Yehova ikeye napande kuyula, co lalo ikeye ibanapande kusingimika. Mukemwo bakalyana kulinga cizango cendi na kumupangela mwafwa bamuzema. Lilombelo lya Devidi lili ku mukanda wa Bisamu 40:5-10 limwesa ngwalyo Devidi walyanene kupangela Yehova na kujelesa lizina lyendi. (Nangukeni kapositolo Paulu mwapangeselele majwi amo ali oku ku mukanda kutalesa kuli Kristu Yesu ku mukanda wa (Heb 10:5-10.)
MAY 27–JUNE 2
BISIMPI BYA SEHO BYA MU LIJWI LYA NJAMBI BISAMU 42-44
Waneni bukwasi mukushula kubilongesa bya Njambi
w06 6/1 9 ¶4
Bisimpi bili ku Mukanda wa Bisamu Wamucibali
42:4, 5, 11; 43:3-5. Nga kuli byuma bimo bitwonowesa kulikwatasana na Cikungulukilo ha simbu yaindondo, kwanuka byuma byabibwa bitwakele na kulinga na bandolome na bandokazi betu byasa kutukwasa. Nameme hakulibanga tunasa kuliziba buli, oloni kutukwasa tumone ngwetu Njambi ikeye butewelo bwetu, co tunapande kutalelela kuli ikeye mangana atukwase.
w12 1/15 15 ¶2
Byuma Bitukwasa Tulikuwe Kulilongesa
1 KULOMBELA: Cuma cakulibanga citunapande kulinga cinapu kulombela. (Sm 42:8) Mwafwa bika? Kutanda Lijwi lya Njambi inapu ngila imo itukamulemeselamo. Ngeci, tunapande kulomba Yehova atwane sipilitu yendi ya kujela mangana itukwase kuzibisisa bitutanda. (Luk 11:13) Barbara uje napu mishinali ha myaka yaingi wendekele ngwendi: “Njikalombela simbu kanda njitande Mbimbiliya. Kulombela kukanjilingisa njilizibe ngwange Yehova ali nange, co ali na kuziba kubwaha mwafwa ya byuma binjili na kulinga.” Kulombela simbu kanda tushangumuke kutanda Mbimbiliya kukashokolola bwongo na bimbunge byetu mangana tuzibisise bitutanda.
“Kesi Mutabe Maboko Eni Azeye Embwe”
11 Byuma bitukalilongesa ku biwano byetu bya baka-Krisitu na ku biwano bya citingitingi na ku biwano bya mutambela na ku ma sikola a kulilongesa kwambulula nabyo bikatukanyamesa. Ebi bilongesa byasa kutushongangeya tulyakele bilengo bya ku sipilitu na kupanga bipangi byoshe bya ku sipilitu bituli nabyo. (Sm 119:32) Neni mushaka ngweni ebi bilongesa bimikanyamese ndi?
12 Yehova wakwasele baIsalele bahyane baAmaleke na baIthopia, wanene lalo Nehemiya na babushoko bwendi nzili ya kumanesa cipangi ca kutungulula. Netu Njambi atwana nzili ya kukanyamena byeseko bi tuliwana nabyo mangana tutwaleleleho kupanga cipangi ca kwambulula. (1Pi. 5:10) Kesi tubandamene Yehova kutulingila bikomokeso. Oloni tunapande kulingako byuma bimo. Ebi byuma binambateselela kutanda Lijwi lya Njambi ha litangwa na litangwa na kulibwahesela biwano na kuya na kukunguluka calumingo na calumingo na kukuna bisinganyeka bya Yehova mu bimbunge byetu kwitila mu cilongesa ca ha kapandi na kulemesa kwa nanga na kulombela simbu yoshe. Kesi tutabese byuma bya kaye bitwonowese kutambula byuma byali na kutwana Yehova bije bitukanyamesa na kutushongangeya. Nga munanguka ngweni kuli hamo hamunazeye mu byuma ebi, co lombeni Njambi amikwase. Nga mulingimo, co mumona ngweni “Njambi ali na kupanga muli yeni ngeci mukale na cizango, co ngeci mwase kwononoka butumbe bwendi babenya.” (Flp. 2:13) Oloni bika bimunapande kulinga mangana mukanyamese maboko a bakweni?
Kutondesesa Bisimpi bya Seho
it-1 1242
Mbanje
Mu bisoneka muli byakumwenako byabingi bya mbanje. Yombi mwakele mu busiwa wendekele ngwendi wapwile “ndolome ya bimbanje.” (Yom 30:29) Banu ba Njambi mu babahyanene ku bitozi babo, hamo muka-kwimba wesekesele eyi nzita ku mwela ubakalililile bambanje banu baje babahyanene. (esekeseni Sm 68:23), mukemwo walilile ngwendi: “Oloni unatutikila kuje kwakala bimbanje. Unatufwiki mu lisusulungu lyakama.” (Sm 44:19) Mu Jelusalema mwakele njala yakama manene mubaizengelekele kuli ba Babiloni mu 607 B.C.E, oku kwalingisile bisemi babanakazi balinge mwamubi bana babo. Mukemwo Jelemiya wekendekele kuliseza kwakele mukati ka “banu bendi” baje bakenyukile na bimbanje mubakalelelamo bana babo.—Bus 4:3, 10.
JUNE 3-9
BISIMPI BYA SEHO BYA MU LIJWI LYA NJAMBI BISAMU 45-47
Mwaso wa Bulo Bwa Mwene
w14 2/15 9-10 ¶8-9
Bwaheleleni Mwafwa ya Bulo Bwa Muna Manga!
8 Tandeni Bisamu 45:13, 14a. Shombolwa nazala bizalo byabibwa bya bulo. Ku mukanda wa Kujombolola 21:2, shombolwa banamwesekesa ku nganda, ei nganda inapu Jerusalema yaiha, co “nalibwaesa ngwe shombolwa uje nalibwaesela munalume wendi.” Ei nganda ili mwilu ili na “bumpau bwa Njambi,” co ili na kubyakula “ngwe limanya lya seho manene, ngwe limanya lya jasipa lije libyakuma ngwe gilasi.” (Kuj 21:10, 11) Sholokesi ya nganda ya Jelusalema yaiha banayendeka mwamubwa ku mukanda wa Kujombolola. (Kuj 21:18-21) Mukemwo muka-kwimba wendekele ngwendi shombolwa napu “wamubwa manene”! Mwafwa obu bulo bukela mwilu.
9 Ou shombolwa bamutwalele kuli Cambato uje napu—Mwene wa Bumwene bwa Njambi bwa Bumesiya. Wakele na kumubwaesa, ‘na kumujelese na kumutanesa na mema kwitila mu lijwi.’ Wa ‘kujela, co kesi na kapenga.’ (Efe 5:26, 27) Ou shombolwa napande lalo kuzala bizalo bya bulo. Mukemwo bene mwanalingi! Cili bene, “bizalo byendi binapu bya goldi,” co “Bamunena kuli mwene oku nazala bizalo bya kutonga mwamubwa.” Ha bulo bwa muna manga, “banamutabesa kuzala bizalo bya lineni ya kubyakuma, ya kujela, yaibwa,—mwafwa lineni yaibwa imanena bilinga bya kusungama bya bakujela.”—Kuj. 19:8.
Byuma Muka Bikalingiwa Kulutwe Bibanendeka ku Mukanda wa Kujombolola?
10Yehova akalinga bika mubakalwisa bangamba bendi? Natuleke ngwendi: “Njikalubala manene.” (Ez 38:18, 21-23) Mukanda wa Kujombolola capita 19 utuleka byakalinga. Yehova akatuma munendi mangana akwamene banu bendi na kunyongese bitozi babo. Yesu hamo lika na tungelo ba kulongwa na baka-Kristu bakubwabesa baje banapu ‘bibunga bya maswalale ba mwilu’ bakalwisa bitozi ba Njambi. (Kuj 17:14; 19:11-15) Byuma muka bikalingiwa muikahwa ije nzita? Banu boshe baje bali na kulwisa Yehova bakanyonga.—Tandeni Kujombolola 19:19-21.
11 Banu ba Njambi ba kulongwa bakabwahelela manene bitozi ba Njambi mu bakabanyongesa. Ei ikapwa simbu yaibwa manene. Babiloni Wakama mubakamunyongesa, mwilu kukakala kubwahelela manene, oloni kuli cuma cikwabo lalo cikanena kubwahelela kwakama. (Kuj 19:1-3) Eci cuma cinapu “bulo bwa Muna Manga.” Co ei ñanda ikeyo inapu ya seho manene mu mukanda wa Kujombolola.—Kuj 19:6-9.
12 Obu bulo bukakalako simbu muka? Baka-Kristu bakubwabesa boshe bakakala mwilu simbu kanda nzita ya Amagidoni ije. Oloni ei keti ikeyo ikapwa simbu ya bulo bwa Muna Manga. (Tandeni Kujombolola 21:1, 2.) Bulo bwa Muna Manga bukakalako munima ya nzita ya Amagidoni, bitozi ba Njambi mubakabanyongesa.—Sm 45:3, 4, 13-17.
it-2 1169
Nzita
Ei nzita muikahwa, ha lifuti-libu hakakala kwoloka kwakama ha myaka 1,000. Mukanda wa samu wendeka ngwao “[Jehova] amanesa binzita ha lifuti-libu hoshe. Apokola buta bwa lusipa na kutika makunga. Enyeka matemba a nzita na tuhya,” obu bupolofweto bwalishulisilile lwakulibanga omwo Njambi walingisile kukale kwoloka mu Isalele, mwatikangele bitwa bya nzita bya bitozi ba baIsalele. Kristu mwakanyongesa banu boshe baje bali na kukundwiya nzita ha Amagidoni, ha lifuti-libu hakakala kwoloka kwakama manene. (Sm 46:8-10) Banu baje bakatambula mwonyo wa myaka yoshe banapu baje “bakafula mikwale yabo kuyipwisa matemo, co makunga abo bakaapwisa bimoko byakunongesa minango ya miti” na baje ‘kubakalilongesa kulwa.’ ‘Yehova muka-nzili yoshe nakulaesa eci.’—Isa 2:4; Mik 4:3, 4.
Kutondesesa Bisimpi bya Seho
Bika Bibakanyongesa Omwo Bumwene Bwa Njambi Bukaija?
9 Bika bikalingiwa ku bimunga bya baka-kaye? Kuma hano ha kaye hakasalako nambe bene cibunga cimo hanima ya Amagidoni ndi? Mbimbiliya inendeka ngwayo: “Kuli melu amaha na lifuti-libu lyaliha bije bituli na kubandamena kwesekesa nomu mwanakulahesa, co omu mukakala kusungama.” (2Pi. 3:13) Lilu lyalaja na kaye kalaja bije binapu bifulumende na bimunga bya baka-kaye bije bali na kutwamenena banu bikanyonga njwa. Bika bikayinga ebi bifulumende? “Lilu lyaliha na kaye kakaha,” bilumbununa fulumende yaiha ije ikayula banu ba busunga baje bakakala hano hasi. Bumwene bwa Yesu Kristu bukasholola bubwa bwa Yehova Njambi uje akalingi byuma byoshe mu busunga. (1Kr. 14:33) “Kaye kakaha” kakabwaha manene. Kukakala banalume baje bakatwamenena mwamubwa byuma. (Sm 45:16) Bakabatwamenena kuli Kristu na baje bakayula nendi bakupwa 144,000. Acisinganyekeni ha simbu ije ibakatundisako bimunga byoshe bya baka-kaye na kwingisamo fulumende yaibwa imo lika.
JUNE 10-16
BISIMPI BYA SEHO BYA MU LIJWI LYA NJAMBI BISAMU 48-50
Bisemi kwaseni naanga yeni ikulahele munga ya Yehova
Kulemesa Yehova Kumikwasa Mupwe ba Kubwahelela
11 Tukalemesa Yehova mutukalilongesa Lijwi lyendi na kukwasa bana betu bamuzibuke. Ha litangwa lya Sabata baIsalele kubakele na kupanga, oloni bapangesele eli litangwa ku kukanyamesa busamba bwabo na Yehova. (Ekz 31:16, 17) Bisemi ba kulongwa bakele na kulongesa bana babo bya Yehova na byuma byabibwa byabalingilile. Netu tunapande kukala na cinoneko ca kutanda na kulilongesa Lijwi lya Njambi. Ei inapu ngila itukalemeselamo Yehova, co ikatukwasa tushwenye kuyehi nendi. (Sm 73:28) Co lalo nga tulilongesa Mbimbiliya hamo lika na naanga yetu, co tukwasa bana betu balikute busamba na Tate yetu wa mwilu uje watuzema manene.—Tandeni Bisamu 48:13
Byuma Bimilingisa Mubwahelele
“Zengulukeni Siyone, Izengulukeni.Tandeni tuposhi twayo. Akeni bimbunge byeni ku bibumbe byayo bya kukola. Iluleni tuposhi twabyo twa kukola. Mangana mukambulule byayo ku bisemwa bya kulutwe.” (Sm. 48:12, 13) Muka-kwimba washongangeyeye baIsalele mangana baye nakukengesesa mwamubwa nganda ya Jelusalema. Acisinganyekeni lika kubwaha kubakele na kuziba baIsalele baje bamwene tempele yaibwa na nganda ya kujela mu bakele na kuya ku bilika mwaka na mwaka. Oku kwabalingisile balekeko bana babo na batekulu babo byuma bibamwene.
Acisinganyekeni mwene wa munakazi wa ku Sheba uje wakele na kuuwasana ha byuma byazibile ha bumwene bwa bubwa bwa Solomoni na mana akulitila akele nawo. Bika byamulisile akulahele ngwendi byuma byazibile byapwile bya busunga? Wendekele ngwendi “Oloni kunjakulahelele bije bibanjilekele banu kubanga omo njinaija mukulimwena yange babenya na mesho.” (2Ko 9:6) Cili bene, byuma bitumona na “mesho etu” byasa kutukwasa manene.
Mwasa kukwasa bati bana beni kulimwena bubwa bwa munga ya Yehova? Nga mwakala kuyehi na munango wa Bakaleho ba Yehova, co lingeni mwoshe mumwasela mangana muyeko. Cakumwenako, Mandy na Bethany bakele kulako na munango wa mu lifuti lyabo. Nameme ngoco, bakele na kuya ku munango na bisemi babo kushwakumo, maneneni mubapwile banike. Bendekele ngwabo: “Simbu kanda tushangumuke kuyayaya ku betheu twasinganyekele ngwetu kwakele lika bakulunu, co lalo kwakele buli. “Oloni twakawaneneko bakwenje na bambanda baje bakele na kupangela Yehova na nzili, co lalo bakele na kulikuwa kulinga ngoco. Twalimwenene ngwetu munga ya Yehova yapwile yakama kutubakana mutwakele na kusinganyekela, co kuyayaya ku Betheu kwakele na kutukanyamesa manene.” Kuya na kusikama ku betheu kwashongangeyeye Mandy na Bethany mangana bashangumuke kulinga bupainiya, co simbu imo babalanyele kukapangelaho ha simbu yakupwamo.
w12 8/15 12 ¶5
Twaleleleniho Kukundwiya Bumwene!
5 Zibukeni Biñanda bya Kusañulu. Munu uje ashaka kukala mu lifuti limo napande tahi kuzibuka biñanda bya bifulumende bya kusañulu byomwo mu lifuti. Mungila imo lika, boshe baje bashaka kukala mu Bumwene bwa Njambi banapande kulilongesa byobu Bumwene. Tusimutwiyeni ha mwanja wa bana ba Kola baje bapangelele Njambi. Bazemene Jelusalema na mwela wa kulemesela, co bashakele manene kusimutwiya ha byuma bya kusañulu byaije nganda. Sholwesi ya Jelusalema keti ikeyo yabazibisile kubwaha, oloni mwafwa ei nganda yemanenene kulemesa kwa busunga. Jerusalema yapwile “nganda ya Yehova uje wapwa Mwene wakama,” mwafwa kukeko kubakele na kulemesela Yehova. Kukekwo lalo kubakele na kulongesela Mashiko a Yehova. Banu babakele na kuyula kuli Mwene wa mu Jelusalema, babamwesele ngozi kuli Yehova. (Tandeni Bisamu 48:1, 2, 9, 12, 13.) Ngwe mwa bana ba Kola, kuma neni mwazema kulilongesa na kulekako bakweni mizimbu ya kusañulu ya mutamba wa munga ya Yehova ya mu kaye ndi? Nga mulilongesa bya munga ya Njambi na kumona mwali na kukwasela banu bendi, co mu kulahela manene Bumwene bwa Njambi. Kulinga ngoco kumikwasa mushake manene kwambulula muzimbu waubwa wa Bumwene.—Jel. 9:24; Luk 4:43.
Kutondesesa Bisimpi bya Seho
it-2 805
Bufuko
Lifuti lya baIsalele lyakele mu kwoloka, ngeci balikuwile kulya na kunwa (1Bi 4:20; Eke 5:18, 19), co bufuko bubakele nabwo bwabalingisile mangana keti bakala mu buhutu. (Pro 10:15; Eke 7:12) Nameme ngwabo Yehova ikeye wakwasele baIsalele balikuwe byuma bibakele nabyo mwafwa ya kupanga na nzili (esekeseni Pro 6:6-11; 20:13; 24:33, 34), oloni Yehova wanangwile baIsalele ha bukalu bwasa kutundamo nga bamwibala na kukulahela bufuko. (Det 8:7-17; Sm 49:6-9; Pro 11:4; 18:10, 11; Jel 9:23, 24) Wabanangwile lalo ngwendi bufuko bwapwa bwa simbu yaindondo lika (Pro 23:4, 5), co kubasele kubwana kuli Njambi kupwa ndando ya kupatula ije ipatula munu kukutsa (Sm 49:6, 7), co lalo kubwasele kukwasa batsi. (Sm 49:16, 17; Eke 5:15). Wabanangwile lalo ngwendi kuzema manene bufuko kwasele kubalingisa bakale na bilinga byabibi byakufwa ngwe linyanyamena. Oku kwasele kulingisa Yehova acele kubabezikisa. (Pro 28:20; esekeseni Jel 5:26-28; 17:9-11.) Kutundaho, babashongangeyeye ngwabo bapandele ku ‘singimika Yehova na byuma byabo bya seho.’—Pro 3:9.
JUNE 17-23
BISIMPI BYA SEHO BYA MU LIJWI LYA NJAMBI BISAMU 51-53
Byuma bitwasa kulinga mangana keti tulinge bubi bwakama
Twasa Kunyungilila Bati Mbunge Yetu?
4 Ku Provebia 4:23, lijwi lya “mbunge” lilumbununa “munu wa mukati,” nambe ngwetu bisinganyeka byetu, nomwo mutukalizibila na mashungu etu. (Tandeni Bisamu 51:6) Lilumbununa lalo bunu bwetu bwa mukati, keti sholwesi yetu ya hanja.
5 Tusimutwiyeni ha cakumwenako cino. Bukangule bwetu bwa ku mubila bukamwesa mutwafwila mukati. Cakulibanga, nga tushaka ngwetu tupwe ba kulikangula, tunapande kulya byakulya bije bitunga mubila na kulinga bweho bwa kukanyamesa mubila. Mu ngila imo lika, nga tushaka ngwetu tulikangule ku sipilitu, co tunapande kulya byakulya bya ku sipilitu na kukulaela Yehova. Tumwesa ngwetu twakulaela Yehova nga tupangesa byuma bitukalilongesa na kubileka bakwetu. (Lom 10:8-10; Jms 2:26) Camucibali, sholwesi yetu ya hanja, inasa kutulingisa tusinganyeke ngwetu tunalikangula ku mubila, kumani mukati muli mishongo. Mu ngila imo lika, twasa kuliziba ngwetu likulahelo lyetu linakanyama mwafwa ya byuma bya ku sipilitu bituli na kulinga, oloni mukati tunasa kukala na mashungu amabi. (1Kr 10:12; Jms 1:14, 15) Satana ashaka ngwendi tusinganyeke ngwe mwakasinganyekela ikeye. Ngila muka yanasa kupangesa mangana tukale na bisinganyeka byendi? Co twasa kulinyungilila bati?
Twasa Kupwa ba Kujela
5 Ngila imo itwasa kumwesalamo ngwetu twakulahela Yehova inapu kulwisa bisinganyeka bya kujwala kwitila mu lilombelo. Nga tushwena kuyehi na Yehova kwitila mu lilombelo, co nendi ashwena kuli yetu. Akatwana sipilitu ya kujela ije ikatukwasa kulwisa bisinganyeka bya kujwala mangana tutwaleleleho kupwa ba kujela. Ngeci, byuma bitukasinganyeka mu bimbunge byetu binapande kumwesa ngwabyo tushaka kuzibisa Njambi kubwaha ku mbunge. (Sm. 19:14) Kuma tukamulombo atwilule mangana tumone “ngila yaibi”—manshungu amabi —aje asa kutulingisa tulinge bubi ndi? (Sm. 139:23, 24) Kuma tukamulombo ngwetu atukwase kutwalelelelaho kupwa bakulongwa mutukaliwana na byeseko ndi?—Mat. 6:13.
6 Mubanatulelelamo nambe buyoye bwetu bwakunima bwasa kutulingisa tushake kulinga byuma byazinda Yehova. Nameme ngoco, asa kutukwasa tutenguluke na kutwalelelaho kumupangela mu ngila ije inapande. Mwene Devidi nendi wazibukile ngoco. Munima ya kulinga bukoi na Bati-sheba, Devidi walombele Yehova ngwendi: “Tanga mbunge ya kujela muli yange, Obe Njambi,Njane sipilitu yaiha ya kwimana mbe. (Sm. 51:10, 12) Tunasa kukala na mashungu amabi, oloni Yehova asa kutwana sipilitu yendi mangana tumwononoke. Nameme tunasa kukala na mashungu amabi aje asa kutwonowesa kukala na bisinganyeka byakujela, Yehova asa kutukwasa mangana twononoke mashiko endi. Asa kutunyungilila ku byuma bije byasa kujwalesa bisinganyeka byetu.—Sm. 119:133.
Kutondesesa Bisimpi bya Seho
it-1 644
Doegi
Wapwile kaEdomu uje wapwile lalo mukulunu wa tunyungi ba Mwene Saulu. (1Sa 21:7; 22:9) Cisholoka ngwe Doegi wapwile kapoloselite. Doegi wakele ‘ku mesho a Yehova’ ku Nobu, hamo mwafwa ya cikumiiyo calingile, nambe hamo waile na kulijelesa, indi nambe hamo wakele na mbumba. Co mwakele kuje ku mutambela walimwenenene Kapilistu Wahakamwa Ahimeleki oku ana Devidi makende na mukwale wa Goliati. Mukwita kwa simbu, Saulu mwendekele ngwendi bangamba bendi banamutengulukila, Doegi wamulekele byuma byamwene ku Nobu. Munima ya kusana tupilistu bahakamwa na tupilisitu bakwabo ba ku Nobu, Saulu washangumukile kwihozola Ahimeleki, co oho bene washikile bangamba bendi ngwendi batsiye tupilisitu. Omwo bangamba bendi babyanene, Saulu walekele Doegi ngwendi atsiye baje tupilisitu bakupwa 85, co walingile ngoco. Munima ya kulinga ebi byuma byabibi, Doegi wanyongesele nganda ya Nobu, na kutsiya banu boshe bakelemo, bakulunu na banike, hamolika na bimuna.—1Sa 22:6-20.
Ngwe muamwesela majwi a helu a Bisamu 52, Devidi wasokenele bya Doegi ngwendi: “Ndaka yobe ya kubambuka ngwe kabemba,Itumba matumbe amabi na kupanga bipangi bya makuli. Wazema manene bubi kutubakana bubwa. Na kukwisa kutubakana kwendeka busunga. Wazema majwi oshe aje azibisa bakweni kubabala ku mbunge.Yobe wakala na ndaka ikendeka makuli.”—Sm 52:2-4.
JUNE 24-30
BISIMPI BYA SEHO BYA MU LIJWI LYA NJAMBI BISAMU 54-56
Njambi Ali Neni
w06 8/1 22 ¶10-11
Kaleni na Mana—Zilibileni Njambi Lyoba!
10 Simbu imo Devidi watewelelele kuli Akishi Mwene wa Bafilisitiya mu nganda ya Gathi ije yapwile limbo lya Goliati. (1 Sa 21:10-15) Bangamba ba mwene bendekele ngwabo Devidi wapwile citozi cabo. Devidi walingile bati mwazibile bibakele na kwendeka? Walombelele kuli Yehova kutundilila kwisi ya mbunge yendi. (Bisamu 56:1-4, 11-13) Nameme ngwabo Devidi walipwisile cilema mangana ase kutunda mu bukalu bwaliwanene nabwo, wanangukile ngwendi Yehova ikeye wamwobolwe. Devidi mwamukulahelele Njambi, wamwesele ngwendi walizibilile Njambi lyoba.—Bisamu 34:4-6, 9-11.
11 Ngwe mwa Devidi, netu twasa kumwesa ngwetu tuli na kuzibila Njambi lyoba nga tukulahela ngwetu Njambi atukwasa omwo tuliwana na bukalu. Devidi wendekele ngwendi “Kundika ngila yobe kuli Yehova.Mukulahele, co akukwasa.” (Sm 37:5) Oku kukulumbununa ngwabo nga twaliwana na bukalu kutwapandele kulingako bimo. Devidi kalombelele lika na kujeneka kulingako bimo. Wapangesele mana na cashu ca kusinganyeka ca mwanene Yehova mangana atunde mu bukalu. Devidi wazibukile ngwendi kasele kumanesa bukalu bwaliwanene nabo kwa kujeneka bukwasi bwa Yehova. Netu tunapande kuzibuka ngoco. Munima ya kulingako bitwasa tunapande kuseza byuma byoshe mu maboko a Yehova. Kakangi tukalingiko lika byuma byabindondo, oloni tukakulahela lika Yehova. Ngeci, ebi bikebyo bikulumbununa kuzibila Njambi lyoba. Awa majwi anatako endekele Devidi atuzembeleka: “Baje bazibila Yehova lyoba, bakebo bapwa babusamba bendi ba ha mbunge, co abaleka cikumiiyo cendi.”—Sm 25:14.
cl 243 ¶9
Na Cimo Cahi Casa “Kutwangununa ku Cizemo ca Njambi”
9 Yehova akamono kukolesa kwetu. (Mat 24:13) Anukeni ngweni, Satana ashaka kumyangununa kuli Yehova. Nga mutwalelelaho kupwa bakulongwa ha litangwa na litangwa mukwasa Yehova mangana akumbulule Satana uje ali na kumupaya. (Pro 27:11) Bisimbu bimo kukatukaluwila kukolesa. Kubinja, kujeneka kukala na bimbongo byakupwamo, bishoti na bukalu bweka byasa kutwonowesa kukolesa. Nga cuma citunabandamena cikotokela kwija, twasa kukala mu bishoti. (Pro 13:12) Yehova akalizibi kubwaha ku mbunge nga tukolesa omwo tuliwana na bukalu bwa cifweci. Mukemwo Mwene Devidi walombele Yehova ngwendi: Kungulwila misozi yange mu “ngonga yobe ya cilambu.”Kuma kuwaisonekele mu libulu lyobe ndi? (Sm 56:8) Cili bene, Yehova ali na kumona misozi na tuyando tutuli na kuliwana natwo omwo tuli na kutwalelelaho kukolesa na kupwa bakulongwa kuli ikeye. Twapwa tu ba seho kuli ikeye.
Cizemo Citukwasa Bati Tupwe ba Kusimpa?
16 Satana azibuka ngwendi twashaka manene kuyoya. Ngeci, akendeka ngwendi twasa kulinga nameme byuma bije byasa kubihisa busamba bwetu na Yehova mangana tulinyungilile. (Yom 2:4,5) Oloni awa anapu makuli. Satana “ikeye ali na nzili ya kunena kutsa,” ngeci akatulingisa tutewe manene kutsa mangana tupokole mashiko a Yehova. (Heb 2:14, 15) Simbu imo, Satana akalingisa banu batujujwise ngwabo nga tutwalelelaho kulemesa Yehova, co batutsiya. Co nga tubinja, Satana akatujujwisa mangana tulisakese mu ngila ije kuilitombola na mashiko a Yehova. Bandotolo na babushoko bwetu baje kubapwile Bakaleho banasa kutusindiya ngwabo tutabe kutwaka maninga, nameme kulinga ngoco kunapu kupokola lishiko lya Njambi. Co bakwabo banasa kutushongangeya tulisakese mu bingila bikwabo bije kubilitombola na binangulo bya mu Mbimbiliya.
17 Twazinda kutsa. Oloni nameme tutsa, tuzibuka ngwetu Yehova atwalelelaho kutuzema. (Tandeni Loma 8:37-39.) Yehova akatwalelelaho kwanuka bangamba bendi nameme banatsi. (Luk 20:37, 38) Ashaka kukabasangula. (Yom 14:15) Yehova natwana Munendi kupwa ndando ya kupatula mangana tukakale na “mwonyo wa myaka yoshe.” (Iwa 3:16) Tuzibuka ngwetu Yehova watuzema manene, co lalo watwaka mbunge. Ngeci nga tubinja, kutwapandele kulinga byuma bije kubilitombola na mashiko a Yehova, oloni tunapande kumukulahela manene mangana atuzembeleke na kutwana mana na kutukanyamesa. Ebi bikebyo byalingile ndokazi Valérie na munalume wendi.—Sm 41:3.
Kutondesesa Bisimpi bya Seho
it-1 857-858
Kuzibuka Byuma Bilingiwa Kulutwe, Kwangula Cuma Simbu Kanda Cilingiwe
Judasi Isikalioti mwendele Yesu bungungu, washulisilile bupolofweto, co oku kwamwesele ngwabo Yehova na munendi bakala na cashu ca kuzibuka byuma bilingiwa kulutwe. (Sm 41:9; 55:12, 13; 109:8; Bi 1:16-20) Oloni kutwasa kwendeka ngwetu Njambi ikeye wabwaesele cimweja ngwendi Judasi ende Yesu bungungu. Bupolofweto bwamwesele ngwabwo Yesu bakamwenda bungungu kuli umo wa babusamba bendi ba ha mbunge, oloni kubwendekele lizina lyendi. Co lalo Mbimbiliya kuimwesa ngwayo Njambi wazibukile byakalinga Judasi kulutwe. Kapositolo Paulu wendekele ngwendi: “Keti uzambwile kukambeka munu maboko, nambe kukala na mutamba mu bubi bwa bakweni. Twalelelaho kupwa wa kujela.” (1Ti 5:22; esekeseni 3:6.) Yesu walingile mwoshe mwaselele kwangula mwamubwa tupositolo bendi 12, mukemwo walombelele butsiki boshe kuli Ishe. (Luk 6:12-16) Nga ngwabo Njambi wanonekele cimweja ngwendi Judasi ikeye enda Yesu bungungu, oku kwasele kumwesa ngwabo Njambi kesi kulinga mwaya mashiko endi, co lalo nendi wesikulitwasanene na Judasi uje walingile bubi.
Ngeci, ha simbu ibamwangwile kupwa kapositolo, Judasi kapwile cingungu. Wecelelele mashungu amabi kukola mu mbunge yendi, co oku kwamulingisile onowe kukabangeya mashiko a Njambi, oloni wakabangeyeye mashungu amabi aje atundile kuli Liyabolo. Ngeci, oku kwamulingiisile apwe mwizi na kwenda Yesu bungungu. (Heb 12:14, 15; Iwa 13:2; Bi 1:24, 25; Jms 1:14, 15; taleni JUDAS No. 4.) Ha simbu yakolele awa mashungu a Judasi, Yesu waseleoni kuzibuka byakele mu mbunge ya Judasi na kuzibuka ngwendi ikeye akamwenda bungungu.—Iwa 13:10, 11.