Biñanda bya Kupangesa mu Mukanda wa Biwano bya Buyoye Bwetu Baka-Kristu na Cipangi Cetu
© 2025 Watch Tower Bible and Tract Society of Pennsylvania
SEPTEMBER 1-7
BISIMPI BYA SEHO BYA MU LIJWI LYA NJAMBI PROVEBIA 29
Byaneni Bisemwa na Bilongesa Bije Kubilitombola na Bisoneka
wp16.06 6, cipalo
Bimona Bije Bisholola Byuma Bya Mwilu
Banu babangi banalikobelesa mu bulozi na mu minzinzime yaibi, ngwe cinzinda uje ali mu malyenge. Bakatondo mambanda na kuzala mikalo na kulinga manseno mangana balinyungilile. Yeni kumwapandele kulinga ebi byuma. Mbimbiliya yakulahesa ngwabo: “Shukulu Kalunga akanyungu kaye koshe, ngeci amwese nzili baje banakulahela kuli ikeye na bimbunge byabo byoshe.” (2 Kolonika 16:9) Njambi wa busunga Yehova, uje wakala na nzili kutubakana Satana, asa kuminyungilila nga mumukulahela.
Nga mushaka ngweni Yehova amikwase, co munapande kuzibuka byashaka na kubilinga. Cakumwenako, mu cita ca myaka ca kulibanga, baka-Kristu ba mu nganda ya Efeso bakungulwile mabulu abo a manseno na kuwenyeka. (Bilinga 19:19, 20) Neni nga mushaka ngweni Njambi aminyunge, co kumwapandele kupangesa mambanda na mikalo na mabulu a manseno nambe kupangesa byuma byoshe bya “kulinyungilila” nabyo bije binakundama ku bandemone.
Keti Bamikwise ha Ñanda ya Kutsa
13 Nga kumuzibisisa mwamubwa bilika bimo, co lombeni Yehova mangana amyane mana. (Tandeni Jemusi 1:5.) Co tondeseseni mu mabulu etu, co lalo nga citaba ihuleni bakulunu ba cikungulukilo ceni mangana bamikwase. Bakulunu ba cikungulukilo kubamyangwila bya kulinga, oloni bamikwasa muzibuke binangulo bya mu Mbimbiliya bya kufwa ngwe ebi bitunasimutwiya. Nga mulinga ngoco, co mulongesa mana eni a kwilula. Awa mana amikwasa ‘mwangunune byuma byabibwa ku byabibi.’—Hebe 5:14.
“Njenda mu Busunga Bwobe”
12 Bisemwa na bilika bije kubilitombola na bisoneka. Baka-nanga yetu, batukapanga nabo, nambe batukakobela nabo sikola basa kutulanya ku bilika byabo. Bika bitukwasa tujeneke kulikobelesa mu bilika bije kubilitombola na mashiko a Yehova? Tunapande kuzibuka mwakamwena Yehova ebi bilika. Twasa kutondesesa mu mabulu etu mangana tuzibuke mubyashangumukilile bilika bimo. Nga tunanguka ngwetu bilika bitunabyana kulinga kubilitombola na Bisoneka, co tumona ngwetu tuli na kulinga byuma bije bizibisa Njambi kubwaha. (Efeso 5:10) Kukulahela Yehova na Lijwi lyendi kutukwasa tujeneke “kuzibila banu lyoba.”—Pro 29:25.
Kutondesesa Bisimpi bya Seho
Kulikwisa Kushangala
Shangaleni bandolome beni mu busunga. Tunapande kuwana simbu ya kushangala bakwetu, mwafwa kulinga ngoco kunapu ‘kulitunga’ umo na mukwabo. (Efeso 4:29) Oloni tunapande kushangazala bakwetu mu busunga. Kulinga ngoco, kutulingisa tubashangale ha byuma byabibwa bibanalingi na kubanangula haje kubalingile mwamubwa. (Prov. 29:5) Kushangala bakwetu mu ngila ije kuyapandele kunapu kumwesa makuli. Kapositolo Paulu watwakelele mwanja waubwa wa kumwesa cizemo ca busunga omwo wakele na kushangala bakwabo mu busunga. Cakumwenako, washangalele baka-Kristu ba ku Korinte ha futisi yabo yaibwa. (1 Kori. 11:2) Oloni omwo wanangukile ngwendi bilinga byabo byapwile byabibi, wabanangwile mu cizemo.—1 Kori 11:20-22.
SEPTEMBER 8-14
BISIMPI BYA SEHO BYA MU LIJWI LYA NJAMBI PROVEBIA 30
“Keti Unjipwise Kahutu Nambe Kunjana Bufuko”
Cizemo Muka Cikanene Kubwahelela kwa Busunga?
10 Nameme ngoco tubaboshe twatonda bimbongo mwafwa bikatukwasa mu bingila bimo. (Ekele. 7:12) Nga munu ali na byuma bya kupwamo, kuma asa kupwa wa kubwahelela ndi? Eyo. (Tandeni Ekelesiya 5:12.) Aga muna Jake wasonekele ngwendi: “Keti unjipwise kahutu nambe kunjana bufuko. Njane lika mutamba wange wa byakulya.” Twasa kuzibisisa byuma byamwendekesele ngwendi kesi apwe kahutu. Walumbunwine ngwendi kuhutwa manene kumulingisa apwe mwizi, co bwizi bukashawisa lizina lya Njambi. Co mwafwa bika walombele lalo ngwendi kesi apwe muka-kufuka manene? Wasonekele lalo ngwendi: “Mangana keti njikale na byuma byabingi manene na kukubyana.” (Prov. 30:8, 9) Hamo neni mwasa kwanuka banu baje bakulahela manene bufuko bwabo kutubakana Njambi.
11 Banu baje bazema bimbongo kubasa kuzibisa Njambi kubwaha. Yesu wendekele ngwendi: “Munu na umo wahi asa kupangela bashukulu babali, kubanga azindeho umo na kuzemaho mukwabo, nambe apwa wa kulongwa ku umo na kushaula mukwabo. Co kuwasa kupangela Njambi na kupangela lalo bimbongo.” Mukemwo wanangwile ngwendi: “Kesi mulitulikile bufuko bwa hano hasi, haje hali tunembulu na ñalawe bikakububihisa, co hali na bezi lalo batuba na kubwiba. Oloni litulikileni bufuko bwa mwilu, muje tunembulu nameme ñalawe kubasa kububihisa, nambe bezi kubasa kubutuba na kubwiba.”—Mateo 6:19, 20, 24.
12 Banu babangi banamono ngwabo kwasiwisa buyoye kunabanenela kubwahelela, co banawana simbu yaingi ya kupangela Yehova. Cakumwenako, Jack walandesele njubo yendi yakama na mingoso yakele nayo mangana awane simbu ya kulinga bupainiya na munakazi wendi. Wendekele ngwendi: “Kwapwile kwakukalu kuseza njubo yetu yaibwa na byuma betu. Oloni ha myaka yaingi njakele na kuliziba kuzeya nga njinalembuka, mwafwa ya bukalu bunjakele na kuliwana nabwo ku bipangi. Oloni munakazi wange uje wapwile painiya wa simbu yoshe wapwile wa kubwahelela simbu yoshe. Co wanjilekele ngwendi, ‘Ntwama wa bipangi byange wapwa wa kulitila.’ Ha simbu ino, nange njinapu painiya, co tubaboshe tuli na kupangela Ntwama wa kulitila, Yehova.”
“Wanjizema Kutubakana Aba Ndi?”
15 Banu babangi ano matangwa bashaka manene buzalo bwabuha na tumakina na bikwabo byeka. Ngeci, muka-Kristu woshe napande kulilula na kumona byuma byashaka manene na kulihula-ihula ngwendi: “Kuma kuzema manene bufuko kukanjilingisa njisinganyeke bya kukala na minyau nambe buzalo bunatuhuka ololo na kunjonowesa kulibwahesela biwano bya cikungulukilo ndi? Kuma bipangi bya litangwa na litangwa bikanjonowesa kulombela na kutanda Mbimbiliya ndi?’ Nga tunanguka ngwetu cizemo ca bufuko cinahyana cizemo cetu kuli Kristu, tunapande kwanuka majwi a Yesu uje wendekele ngwendi: “Nyanyameni na kulinyunga ku cipululu coshe.” (Luka 12:15) Yesu wendekelele bika awa majwi?
16 Yesu wendekele ngwendi: “Munu na umo wahi asa kupangela bashukulu babali.” Wendekele lalo ngwendi: “Kuwasa kupangela Njambi na kupangela lalo bimbongo.” Mwafwa “bashukulu” boshe bashaka kubapangela na mbunge yoshe. Yesu ngwendi, tunasa ‘kuzindaho umo na kuzemaho mukwabo. Nambe kulongwa ku umo na kushaula mukwabo.’ (Mateu 6:24) Ha kupwa banu ba kujeneka kulumbunuka, tubaboshe tunapande kulwisa “mashungu etu a bunu” kwambateselela na kuzema manene bufuko.—Efeso 2:3.
17 Banu baje bazema manene byuma bya ku mubila, kukabakaluwila kukala na bisinganyeka byabibwa ha bufuko. Mwafwa bika? Mwafwa kubamono seho ya byuma bya ku sipilitu. (Tandeni 1 Korinte 2:14.) Kukabakaluwila kwangununa byuma byabibwa ku byabibi, mwafwa mu bisinganyeka byabo mwashulu byuma bya mu kaye. (Hebe. 5:11-14) Mukemwo bamo bakazeme manene bufuko, co kubesi kujauka na byuma bibawana. (Ekele. 5:10) Twakandelela ha kukala na cuma cije casa kutunyungilila ku kuzema manene bufuko. Kutanda Lijwi lya Njambi, Mbimbiliya simbu yoshe kutukwasa manene. (1 Pita 2:2) Kupangesa binangulo bya mu Mbimbiliya kutukwasa kulwisa mashungu a kushaka manene bufuko ngwe omwo busunga bwa mu Mbimbiliya bwakwasele Yesu akolesele byeseko. (Mateu 4:8-10) Nga tulinga ngoco, co tumwesa ngwetu twazema manene Yesu kutubakana bufuko.
w11 6/1 10 ¶4
Munu Asa Kujauka Bati na Byuma Byalinabyo?
Tulikeniko bimbongo simbu kanda mulande cuma cimo. Nameme banu bamo bakasinganyeka ngwabo kutulikako bimbongo inapu lingisi ya laja, oloni kutukwasa kuzibuka mwakupangesela mwamubwa bimbongo. Co lalo kutulikako bimbongo kukakwasa banu babangi mangana keti bafwete bimbongo byabingi mwafwa ya mikuli. Mbimbiliya inamwesa ngwayo mashatoka bakala na “mana” mwafwa “kukungulula byakulya byabo ha simbu ya kuteja” mangana bakabipangese kulutwe.—Provebia 6:6-8; 30:24, 25.
Twaleleleniho Kupwa Bangenzi mu Tenti ya Yehova
18 Kunapu kwa seho manene kusinganyekesesa mutwamwenamo bimbongo. Lihuleni ngweni ‘kuma njikasinganyekesesa manene ha bimbongo na byuma binjasa kulanda ndi? Nga njakolota bimbongo, kuma njikambata simbu kubilwisa mwafwa ya kusinganyeka ngwange munu nanjikolotesa bimbongo hamo kashaka kubipangesa ndi? Kuma kukala na bimbongo kukanjilingisa njilizibe kupwa wa seho na kujeneka kukwasako bakwetu ndi? Kuma njikasinganyeka ngwange bandolome na bandokazi baje bali na bimbongo bazema manene bufuko ndi? Kuma njikashaka kulikwatasana lika na baje bali na bimbongo na kuyengula tuhutu ndi? Kunapu kwa seho manene kusinganyekesesa ha bihula ebi mwafwa kunapu kubezika kwakama manene kupwa bangenzi ba Yehova. Twasa kutwalelelaho kupwa bangenzi ba Yehova nga kutuzeme bimbongo. Nga tulinga ngoco, co Yehova katuyengula!—Tandeni BaHebelu 13:5.
Kutondesesa Bisimpi bya Seho
w09 4/15 17 ¶11-13
Mana a Yehova Tukaanangukila mu Byuma bya Kutanga
11 Lishea wapwa kasitu wamundondo, oloni twasa kulilongesako bilongesa bya seho kuli ikeye. (Tandeni Provebia 30:26) Ashaka kulifwa na kalumba, oloni ikeye wakala na matwi a mubundungulu na mendi amehi. Ou kasitu wamundondo wakala mu mitambela ya mamanya. Lishea akamono mwamubwa byuma bili halako, co wakala mu mitambela ije ili na mena. Oku kukamukwasa amone byuma byasa kumunenela bushonde na kushatukila bwasi mu mena. Mashea bakakala mu bibunga, co oku kukabakwasa balinyungilile na kuziba kushaluka ha simbu ya cisika.
12 Bika bitwasa kulilongesa kuli lishea? Cakulibanga, lishea kesi kukala ku mitambela kuje kwasa kumukobelesa mu bushonde. Akapangesa mwamubwa mesho endi mu kumona bikashama bili kulako na kukala kuyehi na mena mangana atewelemo. Mu ngila imolika, netu tunapande kutona ku sipilitu mangana twase kunanguke byeseko bili mu kaye ka Satana. Kapositolo Pita wanangwile baka-Kristu ngwendi: “Singanyekeni mwamubwa, toneni, citozi ceni Liyabolo ali na kwendangana ngwe ndumba ali na kubuluma uje ali na kutonda yalya.” (1 Pita 5:8) Yesu mwakale hasi, watwaleleleleho kupwa wa kutona na kuhyana byeseko byoshe byamunenelele Satana. (Mateu 4:1-11) Yesu wamwesele baka-kumukabangeya mwanja waubwa.
13 Ngila imo itwasa kupwilamo bakutona inapu kulinga byuma bya ku sipilitu bije byanatubwahesela Yehova. Kutwapandele kwombwanesa kutanda Lijwi lya Njambi na kukunguluka ku biwano. (Luka 4:4; Heb 10:24, 25) Kutundaho, ngwe mwa mashea baje bakakala mu bibunga, netu tunapande kukala muyehi na bandolome na bandokazi mangana ‘tulitakamese umo na mukwabo.’ (Lom 1:12) Nga tutabesa Yehova atunyungilile, co tumwesa ngwetu tunataba majwi endekele Devidi muka-kwimba ngwendi: “Yehova ikeye limanya lyange na cimpaka cange, uje anjamena. Njambi yange ikeye limanya lyange kunjitewela.”—Sm 18:2.
SEPTEMBER 15-21
BISIMPI BYA SEHO BYA MU LIJWI LYA NJAMBI PROVEBIA 31
Bitulilongesa ku Binangulo bya Cisemi wa Munakazi
w11 2/1 19 ¶7-8
Longeseni Bana Beni Binangulo Byendeka ha Byuma Byabibi na Byabibwa
Balongeseni busunga bwoshe bwalibungila ha ñanda ya kulilala. Kuleka bana beni byuma byabibi bitunda mu kulilala kunapande. (1 Korinte 6:18; Jemusi 1:14, 15) Oloni Mbimbiliya imwesa ngwayo kulilala bwapwa bwana bwanatwana Njambi, keti muheto wa Satana. (Provebia 5:18, 19; Mwaso wa Solomoni 1:2) Kuleka lika bana beni byuma byabibi bikatundu mu kulilala kwasa kubalingisa bajeneke kuzibuka bibyendeka bisoneka hali ei ñanda. Ndokazi Corrina wa ku France ngwendi: “Bisemi bange bakele na kwendeka lika byuma byabibi bikatundu mu kulilala. Co oku kwanjilingisile njimone kulilala mu ngila ya kuhenga.”
Moneni ngweni mulongesa bana beni busunga bwoshe ha ñanda ya kulilala. Nadia cisemi wa munakazi wa ku Mexico ngwendi: “Njikatwalelelaho kuleka bana bange ba bakwenje na bambanda ngwange: “Kulilala kwapwa kwakubwa, co Yehova Njambi ikeye watutangele nawa mashungu akulilala mangana tulikuwe. Oloni baje bali mu bulo bakebo lika banapande kulilala. Kulilala kwasa kulingisa munu apwe wa kubwahelela nambe kukobela mu bukalu nga kazibuka simbu yanapande kulinga ngoco.”
Simutwiyeni na Bana Beni ha Ñanda ya Bwala
Lingeni mwoshe mumwasela kusimutwiya na bana beni ha ñanda ya bwala. Mark cisemi wa ku Britain ngwendi: “Banike kukabakaluwila kuzibuka indi kunwa bwala kunapande nambe embwe. Ou cisemi wendekele lalo ngwendi: “Njehwile munange wa munalume uje ali na myaka 8, nga kunwa bwala kunapande indi kukwapandele. Njakele na kusimutwiya nendi mu ngila ije yamulingisile ashubuluke kwendeka, co oku kwamukwasele endeke byoshe byakele ku mbunge yendi.”
Kusimutwiya na bana beni kushwa kumo ha ñanda ya bwala kubakwasa manene. Kwesekesa na myaka yali nayo muneni, simutwiyeni nendi biñanda bya mu kuyoya bya seho bya kufwa ngwe ñanda ya bwalwa, kulinyungilila ha tapalo na biñanda binakundama ku kulilala.
Bamweseni mwanja waubwa. Bana bapwa ngwe ciponji cije cikatsembe byuma byoshe-byoshe mubacimbwitika. Bakakutondesesa banawana ngwabo bana bakatembwinina byuma bibakalingi bisemi babo. Nga cisemi anwa bwala simbu yoshe yali mu bishoti, co na munendi alilongesa ngwendi nga ali mu bishoti napande kunwa bwala. Ngeci, bisemi munapande kumwesa bana beni mwanja waubwa. Munapande kunwa bwala mu ngila inapande.
g17.6 9 ¶5
Longeseni Bana Beni Bapwe ba Kulikehesa
Bashongangeyeni bapwe baka-kwana. Kwaseni muneni amone ngwendi: “Mu kwana muli kubwahelela kwakama kutubana mu kutambula.” (Bilinga 20:35) Mwasa kulinga bati ngoco? Pangeleni hamo na muneni mu kusoneka banu baje batonda bukwasi bwa kufwa ngwe kukabalandelako byuma bimo, kubambata na mota nambe kubabwahesela byuma bimo binabihya ku njibo yabo. Lingileni hamo na muneni obyo byuma. Kwaseni muneni amone kubwahelela cimulinaco mwafwa ya kukwasa baje bali mu bujene. Nga mulinga ngoco, co mukwasa manene muneni apwe wa kulikehesa.—Cinangulo ca mu Mbimbiliya: Luka 6:38.
Kutondesesa Bisimpi bya Seho
Banalume Singimikeni Banakazi Beni
16 Mulekeni ngweni wapwa wa seho kuli yeni. Munalume uje akasingimika munakazi wendi, akamushangala na kumushongangeya. Ngila imo mwanasa kulingila ngoco, inapu kukandelela ku byuma byoshe byabibwa byakamulingila. (Kolo 3:15) Nga munalume ashangala munakazi wendi kutundilila kwisi ya mbunge, co amuzibisa manene kubwaha ku mbunge. Nga aleka munakazi wendi byazema manene hali ikeye, co munakazi wendi aliziba ngwendi wamuzema, akamusingimika na kumunyungilila.—Prov 31:28.
SEPTEMBER 22-28
BISIMPI BYA SEHO BYA MU LIJWI LYA NJAMBI EKELESIYA 1-2
Twaleleleniho Kulongesa Cisemwa Cinatako
“Ebi Byuma Byane ku Banu ba Kulongwa”
3 Bwingi bwetu twazema bipangi bitukalingi, co twashaka kutwalelelaho kubipanga. Oloni calubinda, kutunda lika mu matangwa a Adama, bisemwa bikanyongo, co kwija byeka lalo. (Ekele 1:4) Oku kutenguluka kwa byuma kunanene bukalu kuli baka-Kristu ba busunga. Cipangi ca banu ba Yehova cinalibwezelela, co bali na kucipanga mu bingila byabingi. Ano matangwa kuli na kusholoka byuma byabiha byabingi byakupangesa mu cipangi cetu bije bitunapande kupangesa netu. Bakulunu bamo bali na kuwana manene bukalu mu kupangesa ebi byuma. (Luka 5:39) Kesi lika obyo, oloni na banike nabo bali na nzili manene kutubakana tukulukazi. (Prov 20:29) Ngeci, bakulunu balinga manene mwamubwa kulongesa banike bipangi byabingi.—Tandeni Samu 71:18.
4 Kunasa kukaluwa kuli baje bali na moko kulongesa banike bipangi. Bamo bakatewe ngwabo hamo babatambula cipangi cabo. Beka bakalishoshomwa ngwabo kubabasingimika nambe kusinganyeka ngwabo banike kubasa kupanga ngwe mubakapangela bakulunu. Bakwabo lalo bacinasa kusinganyeka ngwabo kubesi na simbu ya kulongesa mukwabo cipangi. Banike nabo banapande kukwata mbunge nga kubabanene bipangi byabingi bya kulinga.
Kutondesesa Bisimpi bya Seho
w18.12 p.22 pp.14
Banike, Ishamatanga Yeni Ashaka Ngwendi Mupwe ba Kubwaelela
14 Solomoni wafukile manene, co lalo wakele na nzili, oloni kapwile wa kubwaelela. Walingile byuma byoshe byashakele ngwendi hamo apwa wa kubwaelela. (Eke 2:1-10) Watungile binjubo, walimine bitungu na kupanga myela ya kwehela na kulinga byoshe bije byashakele. Hanima ya kulingila ebi byoshe walizibile bati? Wabwaelelele ndi? Solomoni mwanukile byuma byaliwanene nabyo, wendekele ngwendi: “Oloni munjatalele bipangi byoshe binjapangele . . . . njamwene ngwange byoshe byapwile byangoco . . . Nacimo bene capwile ca seho hano hasi cahi.” (Eke 2:11) Eci cinapu cilongesa cakama. Mwalilongesako bimo ku byuma byaliwanene nabyo Solomoni ndi?
SEPTEMBER 29–OCTOBER 5
BISIMPI BYA SEHO BYA MU LIJWI LYA NJAMBI EKELESIYA 3-4
Kanyameseni Bulo Bweni
Mutwasa Kupangesela Makina Etu Mwamubwa
● Nga banu baje bali mu bulo bapangesa mwamubwa makina, asa kubakwasa. Cakumwenako, banalume na banakazi bamo baje banalyambata bakapangesa makina mangana basimutwiye ha simbu ije kubesi hamo.
Jonathan ngwendi: “Kusonekela ka muzimbu munu iunalyambata nendi ka kwendeka ngwako njakuzema nambe njili na kukusinganyeka kwasa kukanyamesa manene bulo.”
● Kujeneka kupangesa mwamubwa makina, kwasa kunena bukalu mu bulo. Cakumwenako, banu baje bakabiisila simbu yaingi mu kupangesa makina, kubesi kuwana simbu ya kusikama hamo na munu ibanalyambata nendi, co oku kukabalingisa bajeneke kumumwesa cizemo.
Julissa ngwendi: “Munalume wange akashaka kusikama nange, oloni njikazezama manene na makina.”
● Banu bamo bakendeka ngwabo basa kuwana simbu yaingi ya kusikama na munu ibanalyambata nendi namene banazezama ha likina. Sherry Turkle uje akalilongesa mubakalingilamo byuma banu ngwendi: “Kucitaba nambe kamandondo kulinga byuma byabingi ha simbu imolika.” Nameme banu bakendeka ngwabo kwasiwa kupanga byuma byabingi ha simbu imo lika, co lalo ngwabo ei ngila ya kulingilamo byuma inapu yaibwa manene, oloni awa anapu makuli. Sherry Turkle wendekele lalo ngwendi: “Kutwasa kupanga mwamubwa bipangi bitulinabyo ha simbu imolika nga tubwezelelako bikwabo.”
Sarah ngwendi: “Njikalikuu kusimutwiya na munalume wange nga kesi na kulinga bipangi byabingi ha simbu imolika. Munalume wange mwakasimutwiya nange oku nazezama ha foni njikalizibi ngwe kunjapwile wa seho kuli ikeye.”
Simpi yakama: Mumupangesela makina kwasa kumilingisa mupwe bakubwahelela nambe kunena bukalu mu bulo bweni.
Twaleleleniho Kushambeya ‘Mulangi wa Jah’
12 Baje bali mu bulo basa kutembwinina bati Akwila na Prisila? Acisinganyekeni ha bipangi bimuli nabyo yeni na muka-limbo lyeni. Cakumwenako, Akwila na Prisila bakele na kwambulwila hamo. Kuma neni mukambulwila hamo ndi? Akwila na Prisila lalo bakele na kupangela hamo. Yeni na baka-limbo lyeni munasa kupanga bipangi bya kuliseza. Oloni kuma mwasa kupangelako hamo bipangi bya ha njibo ndi? (Ekele 4:9) Nga mulikwasa umo na mukwabo kulinga bipangi bimo, mulikwatasana manene, co muwana simbu ya kusimutwiya. Tusimutwiyeniko ha cakumwenako ca Robert na Linda baje banapwisa myaka ya kutubakana 50 mu bulo. Robert ngwendi: “Kwendeka lika busunga, kutwesi kuwana simbu yaingi ya kulinga byuma bya kulizima nabyo buli. Oloni tukabwahelela manene mutukapangela hamo. Cakumwenako, nga njili na kukusha malonga, co munakazi wange awashanda. Nga njili na kulima hanja, co munakazi wange eja na kupangela hamo nange. Kulingila hamo ebi bipangi kukatulingisa tulikwatasane manene. Cizemo cetu cikatwalelelaho kukola.”
13 Munapande kwanuka ngweni kukala lika hamo kukulumbununa ngwabo munalume na munakazi baje bali mu bulo balikwatasana. Munakazi umo wa kushomboka wa ku Brazil ngwendi: “Ano matangwa kuli byuma byabingi byasa kututanganesa. Ngeci, tunasa kuwila mu ceseko ca kusinganyeka ngwetu tuli na kuwana simbu ya kusikama hamo mwafwa twakala mu njibo imo. Njananguka ngwange kuli byuma bikwabo binjinapande kulinga, keti kukala lika hamo. Njinapande kwaka mbunge ku byuma byatonda muka-limbo lyange. Tumoneni byakalingi Bruno na muka-limbo lyendi Tays mangana base kwaka mbunge ku byuma byatonda mukwabo. Bruno ngwendi: “Ha simbu itukakala hamo, tukaka mafoni etu ku mukulo mangana tulikuwe simu itukala hamo.”
14 Batico nga yeni na muka-limbo lyeni kumwesi kulikuwa simbu imukasikama hamo? Hamo mwazema byuma bya kuliseza-seza nambe hamo mukalilubalesa kushwa kumo. Mwasa kulinga bika? Tusimutwiyeni lalo ha cakumwenako ca tuhya citunabanga kwendeka hakulibanga. Tuhya kutwesi kukwata oho bene. Tukakwata kamandondo-kamandondo. Munapande kwakako bikuni byakama mangana otwo tuhya tushukume manene. Mu ngila imolika, neni mwasa kushangumuka kusikama-sikama hamo ha simbu yaindondo lika ha litangwa. Lingeni byuma bije bimwashaka mubaboshe, keti byuma bije bimyangununa. (Jems 3:18) Nga mushangumuka kamandondo-kamandondo kulingila hamo byuma, cizemo ceni cikola lalo.
Twaleleleniho Kushambeya ‘Mulangi wa Jah’
3 Mulangi wa Jah’ wasa kutwalelelaho kushukuma nga munalume na munakazi baje bali mu bulo batwalelelaho kukanyamesa busamba bwabo na Yehova. Kulikuta busamba bwa kukanyama na Yehova kubakwasa bati mu bulo bwabo? Nga baje bali mu bulo bakanyamesa busamba bwabo na Yehova na kupangesa binangulo byendi, oku kubakwasa mangana base kutwalelelaho kukolesa mu bukalu bubanasa kuliwana nabwo buje bwasa kulingisa cizemo cabo citonole. (Tandeni Ekelesiya 4:12.) Banu baje bali na busamba bwa kukanyama na Yehova bakalingi mubasela mwoshe kumwesa bifwa byakala nabyo bya kufwa ngwe ngozi, kukwata mbunge na kukonekela. (Efeso. 4:32–5:1) Nga baje bali mu bulo bamwesa ebi bifwa, co balizema manene. Ndokazi Lena uje nakala mu bulo ha myaka ya kutubakana 25 ngwendi, “Kwakwasi kuzema na kusingimika munu wa kuhya ku sipilitu.”
Kutondesesa Bisimpi bya Seho
Twasa Kuyoya Myaka Yoshe
7 Yehova watutangele lalo na lishungu lya kushaka kuyoya myaka yoshe. Mbimbiliya inendeka ha banu ngwayo Njambi “naka kuyoya kwa myaka yoshe mu bimbunge byabo.” (Ekele 3:11) Mukemwo twamona kutsa kupwa citozi. (1 Kori 15:26) Nga tubinja manene, kuma tukatumama lika na kubandamena litangwa lya kutsa ndi? Embwe. Kakengi tukai ku cipatela mangana bakatwane bumbanda buje butukwasa tukanguke. Tukalingi mwoshe mutwasela mangana keti tutse. Co nga munu itwazema natsi, ipwe mwanike nambe mukulunu, tukazibi manene kubabala ku mbunge. (Iwano 11:32, 33) Twasa kutwalelelaho kulilongesa na kukala na lishungu lya kukayoya myaka yoshe mwafwa Ishamatanga yetu wa cizemo mukemwo mwatutangelele, co twakulahela ngwetu akashulisilila biyongola byendi. Oloni kuli byuma bikwabo lalo bitulingisa tukulahele ngwetu tukayoya myaka yoshe. Tusimutwiyeni ha byuma byalingile Yehova kusañulu, bije bimwesa ngwabyo ashaka kushulisilila biyongola byakele nabyo ha kulibanga.
OCTOBER 6-12
BISIMPI BYA SEHO BYA MU LIJWI LYA NJAMBI EKELESIYA 5-6
Twasa Kumwesa Bati Kasingimiko Kakama Kuli Njambi Yetu Wakama?
w08 8/15 15-16 ¶17-18
Aneni Yehova Bumpau ha Kumusingimika
17 Omwo tulemesa Yehova, tunapande kulinga ngoco mu kasingimiko. Mukanda wa Ekelesiya 5:1 ngwawo: “Nyanyama nomu muwendela nga uya ku njibo ya Njambi wa busunga.” Yehova walekele Mosesa ashulule masanda mwakele mu mwela wa kujela. Simbu ikwabo walekele Joshua alinge byuma byakulifwa. (Ekz 3:5; Jos 5:15) Balingile ngoco mu kumwesa kasingimiko kuli Yehova. Yehova washikile tupilistu ba baIsalele kuzala “tuputula twa lineni mangana tufwike mibila yabo.” (Ekz 28:42, 43) Oku kwalingisile bilyo bya mibila yabo keti bisholoke mu bakele na kupangela ku mutula. Munu woshe wa mu naanga ya tupilistu wapandele kukabangeya mashiko aje abakwasele kusingimika Njambi simbu yoshe.
18 Ngeci, omwo tulemesa Njambi tunapande kumwana bumpau na kasingimiko. Twasa kwana Njambi bumpau na kasingimiko kwitila mu bilinga byetu. Kutwapandele kusingimika lika Njambi kwitila mu zalesi, oloni tunapande kumwesa ngoco na mu bilinga byetu. Njambi uje akamono bimbunge bya banu ikeye napande kumona ngwendi tuli na kumusingimika. (1Sa 16:7; Pro 21:2) Tunapande kumwesa kasingimiko kwitila mu bilinga na futisi yetu nomwo mutuyoyela na bakwetu na kulisingimika yetu babenya. Ngeci tunapande kumwesa kasingimiko simbu yoshe, mu byuma bitulinga na kwendeka. Bilinga byetu na futisi yetu na zalesi hamolika na sholwesi yetu binapande kulitombola na majwi endekele kapositolo Paulu ngwendi: “Kutushaka kulinga cuma cije citanwisa banu mangana cipangi cetu keti baciwanene mulonga; Oloni mu byuma byoshe tuli na kulizimbula yetu babenya ngwetu tu baka-kupangela Njambi.” (2Kr 6:3, 4) Ngeci, ‘mu byuma byoshe tumweseni bubwa bwa bilongesa bya Njambi Mwobole wetu.’—Tito 2:10.
w09 11/15 11 ¶21
Kutanda Mbimbiliya Kwasa Kumikwasa Mulombele Malombelo Amabwa
21 Malombelo a Yesu amwesele ngwawo wasingimikile Yehova na kumukulahela. Simbu kanda asangule Lazalo, “Yesu wandwile mesho endi mwilu na kwendeka ngwendi: ‘Tate, njikukandelela mwafwa unanjizibi. Cili bene njizibuka ngwange simbu yoshe ukanjizibi.’” (Iwano 11:41, 42) Kuma malombelo eni akamwesa ngwawo munakulahela na kusingimika Yehova ndi? Nga mulilongesa lilombelo lya kutalelako lya Yesu, munanguka ngweni byuma bya seho byendekele mu lilombelo lyendi byapwile kujelesa lizina lya Yehova, kulomba bumwene bwendi bwije na kulinga cizango cendi. (Mateu 6:9, 10) Kuma malombelo eni akamwesa ngwawo mwamona bumwene bwa Yehova na kulinga cizango cendi na kujelesa lizina lyendi kupwa bya seho manene ndi? Tunapande kumona ebi byuma kupwa bya seho.
w24.03 4 5
Mwalibwahesela Kulikundika Kuli Yehova Ndi?
5 Mwasa kulikundika bati kuli Yehova? Mwasa kulinga ngoco nga mukulahesa Yehova mu lilombelo ngweni mwaka cizango cendi mu mutamba wakulibanga mu kuyoya kweni. Co mumukulahesa ngweni mutwalelelaho kumuzema ‘na mbunge yeni yoshe na mwonyo weni woshe na bisinganyeka byeni byoshe na nzili yeni yoshe.’ (Maki 12:30) Lilombelo lya kulikundika kuli Yehova mulilombela kwa likalyeni lika. Oloni cimbwitiko bakacilingila ku mbunga, co cikamwesa banu baliko ngwabo munu nalikundika kuli Njambi. Kulikundika kuli Yehova capwa cikumiiyo ca seho manene. Ngeci, munapande kutwalelelaho kunyunga eci cikumiiyo, co lalo mukemwo mwatondela Yehova.—Eke 5:4, 5.
Kutondesesa Bisimpi bya Seho
Bihula bya Baka-kutanda
Mukanda wa Ekelesiya 5:8, unendeka bya muka-kuyula uje ayandesa tuhutu na kubalinga mwamubi. Unamwesa lalo ngwawo owo muka-kuyula napande kuzibuka ngwendi bakwabo baje bali na moko yakama kumutubakana bali na kumona byali na kulinga. Co kunasa kukala bakwabo baje banabatubakana. Tuzibuka ngwetu aba baka-kuyula boshe banasa kulinga byuma mu ngila ya kuhenga, co banu banasa kuyanda.
Nameme kusholoka ngwe byuma kubyasa kutenguluka, oloni kuzibuka ngwetu Yehova ali na kumona bibali na kulinga baka-kuyula, kutuzembeleka. Twasa kulomba Njambi atukwase na kukundika tuyando twetu kuli ikeye. (Sm 55:22; Filp 4:6, 7) Tuzibuka ngwetu “Shukulu Kalunga [ali na kumona] kaye koshe, ngeci amwese nzili baje banakulahela kuli ikeye na bimbunge byabo byoshe.”—2 Mizi 16:9.
Ngeci mukanda wa Ekelesiya 5:8 utukwasa kumona byuma bili na kulingiwa muno mu kaye. Umwesa ngwawo kuli banu bali na moko kutubakana bakwabo. Ou mukanda utukwasa lalo tuzibuke ngwetu Yehova ikeye ali na moko kutubakana banu boshe. Ali na kuyula kwitila muli Munendi, Yesu Kristu uje napu Mwene wa Bumwene bwendi. Co Yehova Muka-nzili Yoshe na Munendi bakalingi byuma mu ngila yaibwa.
OCTOBER 13-19
BISIMPI BYA SEHO BYA MU LIJWI LYA NJAMBI EKELESIYA 7-8
“Yeni ku Njibo ya Butsi”
it ‘Kulila’ ¶9
Kulila
Simbu ya Kulila. Mukanda wa Ekelesiya 3:1, 4 ngwawo: “Kuli simbu ya kulila na simbu ya kujola. Kuli simbu ya kumbolozoka na simbu ya kukina.” Banu boshe bakaliwana na bukalu bwa butsi, mukemwo Mbimbiliya inamwesa ngwayo mbunge ya muka-mana “ili ku njibo ya butsi,” kuyesi ku njibo kuje kuli kulisamba. (Eke 7:2, 4; esekeseni Pro 14:13) Ngeci, muka-mana akai ku njibo ya butsi mangana akazembeleke baje banatsisa kutubakana kuya ku njibo kuje kuli kulisamba. Kulinga ngoco kukamukwasa alyanukise ngwendi simbu yoshe-yoshe asa kutsa, ngeci akalingi byuma bije bizibisa kubwaha Ishamatanga yendi.
Kwaseni Bakweni Baje Bali na Bishoti
15 William, uje watsisile munakazi wendi mu myaka ya kunima wendekele ngwendi: “Njikazibi kubwaha nga bakwetu banjileka byuma byabibwa byalingile munakazi wange. Njikamono ngwange bamuzemene na kumusingimika. Oku kukanjizembeleka manene, mwafwa munakazi wange wapwile wa seho manene kuli yange.” Fwile wa lizina lya Bianca wendekele ngwendi: “Njikashubuluka nga bakwetu balombela nange nambe kunjitandela cisoneka cimo nambe bibali. Njikazibi kubwaha nga bendeka hali munalume wange na kunjitolilila nga njendeka hali ikeye.”
“Lileni na Baje Bali na Kulila”
16 Kulombelela bakweni baka-Kristu inapuko ngila ikwabo ya kubazembeleka. Simbu imo tukonowa kulombela mwafwa ya kupokoka manene bimbunge, oloni tunapande kweseka mutwasela mwoshe kubalombelela kutundilila kwisi ya mbunge mangana tubazembeleke. Dalene wendekele ngwendi: “Bandokazi mubakanjendela, njikabalombo ngwange balombele. Mubakashangumuka kulomba kubesi kuzituka, kukapwa muje, majwi abo ashangumuka kuzibika mwamubwa na kulomba kutundilila kwisi ya bimbunge byabo. Likulahelo lyabo na cizemo cabo na kunjaka mbunge kwabo kunatakamesa likulahelo lyange.”
“Lileni na Baje Bali na Kulila”
17 Banu bamo bakalizibi busiwa mu bingila bya kulisezaseza. Ngeci, bendeleni simbu yoshe, kesi lika ha simbu ya bya kutsa, oloni na hanima ya bya kutsa omwo babushoko na babusamba babo banabaseze likalyabo. “Kabusamba wa busunga amwesa cizemo simbu yoshe, co napu ndolome uje iwasa kukulahela nga kuli bukalu.” (Prov. 17:17) Bakwetu baka-Kristu basa kutuzembeleka mwakama nga tuli mu busiwa mangana tukolese.—Tandeni 1 Tesalonika 3:7.
18 Anukeni ngweni baje banatsisa bakalizibi manene busiwa ha simbu ya kwanuka litangwa, nambe kutolilila ku myaso imo nambe kukenga bikupulo bimo, nambe kupanga bipangi bimo nambe kunika kwa lwengo lumo nambe kuziba majwi amo nambe ha bisimbu bimo bya mukati ka mwaka. Baje banatsisa baka-limbo lyabo basa kuliziba manene busiwa omwo baya likalyabo ku Canukiso nambe ku ciwano. Ndolome umo wendekele ngwendi: “Njayongwele kulinga ka cilika ka kwanuka litangwa lyetu lya bulo, oloni kwanjikaluwilile. Ngeci bandolome na bandokazi bamo babwaheseleko ka cilika ka kubwahelela na babusamba bange ba ha mbunge mangana njijeneke kukala likalyange.”
19 Baje banatsisa bashaka kubazembeleka simbu yoshe, kesi ha simbu lika ya bilika embwe. Junia wendekele ngwendi: “Banu bakalizibi mwamubwa nga babakwasa na kubazembeleka ha simbu yoshe yoshe. Kukwasa munu ha simbu yoshe yoshe kukamutakamesa manene.” Nameme kutwasa kumanesa busiwa bwoshe bubali nabwo banu omwo ya kutsisa munu ibazema, oloni twasa kubazembeleka na kubatakamesa nga tubakwasa. (1 Iwano 3:18) Gaby wendekele ngwendi: “Njikandelela manene kuli Yehova ha kulikwasesa bakulunu baje banjikwasele mu bukalu bunjakele nabwo. Bukwasi bwabo bwanjikwasele kumona ngwange Yehova wanjizema manene.”
Kutondesesa Bisimpi bya Seho
“Banu Boshe Bakazibuka Ngwabo mu Bandongesi Bange”
18 Simbu imo tunasa kuliziba ngwetu tunapande kusimutwiya na mukwetu muka-Kristu uje natulubalesa. Oloni tunapande tahi kulihula ngwetu: ‘Kuma njizibuka mwamubwa byuma byoshe binalingiwa ndi? (Prov 18:13) Kuma ou ndolome nambe ndokazi nalingila lika shakelo ndi? (Ekele 7:20) Kuma nange njalingaho laja cuma ca kulifwa ndi? (Ekele 7:21, 22) Kuma kusimutwiya nendi kubwezelela lika ku bukalu ndi? (Tandeni Provebia 26:20.) Kusinganyekesesa ha bihula bya cifweci, kutukwasa tukonekele ndolome nambe ndokazi yetu mwafwa twamuzema.
OCTOBER 20-26
BISIMPI BYA SEHO BYA MU LIJWI LYA NJAMBI EKELESIYA 9-10
Kaleni na Biyongola Byabibwa ha Bukalu Bumuli na Kuliwana Nabwo
w13 8/15 14 ¶20-21
Keti ‘Mulubalele Yehova’
20 Zibukeni imunapande kwana mulonga. Mwafwa bika kunapu kwa seho kulinga ngoco? Mwafwa simbu imo yetu babenya tukalinenela bukalu. Nga yetu babenya tunalinenela bukalu, co tunapande kulitala na byuma bitundamo. (Gal 6:7) Keti twane Yehova mulonga ha bukalu bu tuli na kuliwana nabwo. Mwafwa bika kulinga ngoco kukwapandele? Tusimutwiyeni ha cakumwenako eci: Mota yasa kushatuka lumbisi lwakama. Oloni muka-kwendesa mota atubakana lumbisi lwanapande kushatuka nalwo, co akala mu monde. Kuma muka-kwendesa mota napande kwana mulonga uje naipanga ndi? Embwe. Mu ngila imolika, Yehova watutangele na nzili ya kulyangwila bya kulinga. Nameme ngoco, natwana mashiko aje atukwasa kwangula mwamubwa bya kulinga. Ngeci, kutwapandele kwana Ishamatanga yetu mulonga nga twasebuka.
21 Keti bukalu bwoshe butukaliwana nabwo bukaija mwafwa ya kujeneka kwangula mwamubwa bya kulinga na kujeneka kwononoka. Simbu imo tukaliwana na bukalu ‘mwafwa simbu ya bukalu na byuma bya kukasumuna bikatwizila tubaboshe.’ (Eke 9:11) Oloni keti twibale ngwetu Satana Liyabolo ikeye akanene bubi. (1Iw 5:19; Kuj 12:9) Ikeye citozi cetu, keti Yehova.—1Pi 5:8.
Yehova Wamona Bangamba Bendi ba Kulikehesa Kupwa ba Seho
10 Kulikehesa kutukwasa tuyoye mwamubwa. Oloni bisimbu bimo, twasa kuliwana na byuma bije bitumona ngwetu kubyesi bwino. Cakumwenako, mwene Solomoni wendekele ngwendi: “Njinamono bangamba bendela ha myongo ya tubalu, oloni bana ba bimyene benda hasi ngwe bangamba.” (Eke 10:7) Baje bali na cashu kubesi kubashangazala simbu yoshe. Oloni baje kubesi na cashu bisimbu bimo bakabashangazala manene. Mukemwo Solomoni wendekele ngwendi kutwapandele kulubala nga byuma kubitwendela mwamubwa, oloni tunapande kumona ngwetu mukemwo mubinafu byuma. (Eke 6:9) Nga tulikehesa tubwahelela nameme byuma bitenguluka, co kutusinganyeka ngwetu byuma byende mututondela.
w11 10/15 8 ¶1-2
Kuma Byuma Bimukalizimi Nabyo Buli Bikamikwasa Ndi?
BISONEKA byabingi bimwesa ngwabyo Yehova ashaka ngwendi tulikuwe kuyoya. Cakumwenako, mukanda wa Samu 104:14, 15 wendeka ngwawo Yehova alingisa “hasi hakale byakulya na binyu bije bilingisa mbunge ya munu ibwahelele na mazi aje alingisa cihanga ca munu cileleme na byakulya bije bikanyamesa mbunge ya munu.” Cili bene, Yehova ikeye akalingisa bimena bime binona na mazi na binyu bije bikatukwasa mangana tutwaleleleho kuyoya. Co lalo binyu ‘bikalingisa mbunge ya munu ibwahelele.’ (Eke 9:7; 10:19) Yehova ashaka ngwendi tubwahelele, mukemwo ‘akashulisa bimbunge byetu na kubwahelela.’—Bil 14:16, 17.
2 Ngeci, kukwabihile kuwana-wana simbu ya ‘kutalesesa mwamubwa tuzila’ na “bintemo bya mu shwata” nambe kulikuwa kulinga byuma bimo bije bikatushubulwisa na kutulingisa tubwahelele. (Mat 6:26, 28; Sm 8:3, 4) Buyoye bwabubwa bwapwa “bwana bya kutunda kuli Njambi.” (Eke 3:12, 13) Kumona kulishubulwisa kupwa bwana bwa kutunda kuli Njambi kutulingisa tubupangese mu ngila imuzibisa kubwaha.
Kutondesesa Bisimpi bya Seho
lff-cilongesa 29 simpi 1
Bika Bikalingiwa ku Munu Nga Natsi?
Yesu wesekesele kutsa ku kulala tulo. Munu nga ali mu tulo kasa kuzibuka byuma bili na kulingiwa. Kutsa kunalifu bati na tulo? Nga munu natsi kasa kuziba kubabala. Kesi kuziba buli nameme washakele manene kukala hamo na babusamba na babushoko bwendi. Mbimbiliya ngwayo: “Batsi neci bene bazibuka cahi.”—Tandeni Ekelesiya 9:5.
OCTOBER 27–NOVEMBER 2
BISIMPI BYA SEHO BYA MU LIJWI LYA NJAMBI EKELESIYA 11-12
Nyungilileni Bukangule Bweni Mangana Mulikuwe Kuyoya
Pangeseni Byuma bya Kutanga mu Kulongesa Bana Beni bya Yehova
Nga bisemi na bana bawana simbu ya kulikuwila hamo byuma bya kutanga, co bapwa ba kubwahelela na kulizema manene umo na mukwabo. Mbimbiliya yendeka ngwayo kuli, ‘simbu ya kujola’ na “simbu ya kukina.” (Eke 3:1, 4) Yehova natanga myela yaibwa hano hasi kuje kutwasa kulingila byuma bitwazema. Bisemi babangi bashaka kuya na bana babo ku myela kubakanyungila tusitu, ku membo, ku minkinda hamolika na ku bindonga mangana bamone byuma bya kutanga. Banike bamo bashaka kushatuka na kwehela mu myela ya kulishubulwisa, kukenga tusitu nambe kulapa mu bindonga, mashali na ku kalunga-ndonga. Kwoshe-kwoshe kutuli twasa kulikuwa kumona byuma bya kutanga na kulilongesako bimo hali Yehova.
Moneni Kuyoya Kupwa Bwana bwa Seho bwa Kutunda Kuli Njambi
6 Nameme Mbimbiliya kuyapwile libulu lije limwesa bitunapande kulya nambe mutunapande kunyungila mibila yetu, oloni imwesa mwakamwena ebi byuma Yehova. Cakumwenako, natunangula ngwendi ‘tulinyungilile ku byuma byabibi bije byasa kubiisa mibila yetu.’ (Ekele 11:10) Mbimbiliya imwesa ngwayo kutwapandele kulya manene nambe kunwa manene bwala, mwafwa ebi byuma byasa kwaka bukangule bwetu mu bushonde nambe kututsiya. (Prov 23:20) Yehova ashaka ngwendi tukale na mbunge ya kulibindika omwo twangula cifwa na bwingi bwa byakulya na byuma bitunwa.—1 Kori 6:12; 9:25.
7 Nga tupangesa mwamubwa cashu cetu ca kusinganyeka omwo twangula bya kulinga, co tumwesa ngwetu twakandelela manene kuli Njambi uje natwana kuyoya. (Sm 119:99, 100; tandeni Provebia 2:11.) Cakumwenako, twangula mwamubwa byuma bitulya. Nga twazema cakulya cimo oloni tuzibuka ngwetu nga tucilya citubinjisa, co tunapande kwecela kulya cije cakulya. Co lalo tumwesa ngwetu tuli na kupangesa mwamubwa cashu cetu ca kusinganyeka nga tukala na simbu yaingi ya kulala, kukala na simbu ya kulinga bweho bwa kukanyamesa mubila ha litangwa na litangwa, kujwela simbu yoshe na kujelesa ha binjibo byetu.
Pweni Baka-kulinga Bili mu Lijwi lya Njambi
2 Banu ba Yehova bapwa ba kubwahelela. Mwafwa bika? Kuli byuma byabingi bikatulingisa tubwahelele, oloni cuma cakama manene capwa kutanda Mbimbiliya na kupangesa byuma bitunatanda.—Tandeni Jemusi 1:22-25.
3 Kupwa “baka-kulinga byuma bili mu lijwi lya Njambi” kutubezikisa mu bingila byabingi. Cakumwenako, kulinga byuma bili mu Mbimbiliya inapu ngila itukazibisila Yehova kubwaha. Co kulinga ngoco kukatulingisa tubwahelele. (Ekele 12:13) Kukabangeya binangulo bya mu Lijwi lya Njambi kutukwasa tuyoye mwamubwa na baka-naanga yetu hamolika na bakwetu baka-Kristu. Twakulahela neni mwalimwena ngoco mu kuyoya kweni. Co lalo kukabangeya binangulo bya mu Mbimbiliya kutunyungilila ku bukalu bubakaliwana nabwo baje kubesi kubikabangeya. Cili bene tulitabasana na byuma byendekele mwene Devidi. Munima ya kwendeka bya mashiko na binangulo mu mwaso wendi, Devidi wendekele ngwendi: “Mu kuwanyunga muli cikandelela cakama.”—Samu 19:7-11.
Kutondesesa Bisimpi bya Seho
Moneni Kuyoya Kupwa Bwana bwa Seho bwa Kutunda Kuli Njambi
6 Nameme Mbimbiliya kuyapwile libulu lije limwesa bitunapande kulya nambe mutunapande kunyungila mibila yetu, oloni imwesa mwakamwena ebi byuma Yehova. Cakumwenako, natunangula ngwendi ‘tulinyungilile ku byuma byabibi bije byasa kubiisa mibila yetu.’ (Eke 11:10) Mbimbiliya imwesa ngwayo kutwapandele kulya manene nambe kunwa manene bwala, mwafwa ebi byuma byasa kwaka bukangule bwetu mu bushonde nambe kututsiya. (Prov 23:20) Yehova ashaka ngwendi tukale na mbunge ya kulibindika omwo twangula cifwa na bwingi bwa byakulya na byuma bitunwa.—1 Kori 6:12; 9:25.