Mwasa Kukanyamesa Bati Busamba Bweni na Yehova?

MWAKA na mwaka, banu babangi bali na kwiluka mu cikungulukilo. Kukakala “kujolela [kwakama] mwilu” mubakeluka. (Luka 15:7, 10) Ngeci, nga muneluka mu cikungulukilo, co zibukeni ngweni Yehova na Yesu na tungelo banabwahelela manene mumunalingi ngoco. Oloni omwo mutwalelelaho kupangela Yehova, munasa kuliwana na bukalu. Bukalu muka, co bika byasa kumikwasa?

BUKALU MUKA BUMUNASA KULIWANA NABWO?

Banu babangi bakatwalelelaho kuliziba kukala na mulonga nameme baneluka mu cikungulukilo. Mwene Ndabiti nendi walizibile ngoco. Nameme Njambi wamukonekelele, oloni wendekele ngwendi: “Bubi bwange bunatumu manene.” (Myaso 40:12; 65:3) Nameme munu neluka mu cikungulukilo, nasa kutwalelelaho kuliziba kukala na mulonga nambe kuziba shwamwa ha myaka yaingi. Isabelle, uje watundile mu cikungulukilo ha myaka ya kutubakana 20,a wendekele ngwendi: “Kwanjikaluwilile kukulahela ngwange Yehova nanjikonekela.” Nga muliziba manene kukala na mulonga, co busamba bweni na Yehova bunasa kuzeya lalo. (Visi 24:10) Keti mwecelele cuma ca cifwa eci cilingiwe kuli yeni.

Bamo bakalizibi ngwabo kubasa kulinga byuma byoshe bitondeka mangana balikute lalo busamba bwa kukanyama na Yehova. Munima ya kumwilwisa mu cikungulukilo, Antoine wendekele ngwendi: “Njalizibile ngwange njinebala byuma byoshe binjalilongesele nomwo munjakele na kulingila byuma te njicili mu cikungulukilo.” Kukala na bisinganyeka bya cifwa eci, kukalingisa bamo bajeneke kupanga bipangi bya mu cikungulukilo na ntwima.

Cakumwenako, nga kankumba kabiisa njibo ya munu, nasa kuzeya omwo asinganyekesesa ha bukama bwa cipangi ca kuitungulula na simbu inasa kuhwilaho. Mu ngila imolika, nga busamba bweni na Yehova bunatsile mwafwa ya kulinga bubi bwakama, munasa kuliziba ngweni kulikuta lalo busamba nendi cinapu cipangi cakama manene. Oloni anukeni ngweni Yehova amikwasa.

Yehova ali na kutulanya ngwendi: “Ijeni tulizibasane.” (Isaya 1:18) Munapanga laja na nzili mangana ‘mulizibasane’ nendi. Yehova wamizema manene mwafwa ya kulifwita kweni. Anukeni ngweni omwo muneluka kuli Yehova munamwesa ngweni Satana wapwa muka-makuli.—Visi 27:11.

Kwiluka kuli Yehova kunamilingisa mushwenye kuyehi nendi, co nendi namikulahesa ngwendi ashwenya kuyehi neni. (Yako 4:8) Oloni munapande kulingako bimo keti kushaka lika ngweni bakweni bamimone ngwabo muneluka mu cikungulukilo. Munapande kutwalelelaho kukanyamesa busamba bweni na Yehova. Mwasa kulinga bati ngoco?

LYAKELENI BILENGO BIMWASA KUSHULISILILA

Esekeni kulyakela bilengo bije bimwasa kushulisilila. Hamo mucili na kwanuka byuma bimwalilongesele hali Yehova na byuma byanakulahesa kukalingila banu kulutwe. Oloni munapande lalo kushangumuka kulinga byuma bya ku sipilitu bya kufwa ngwe kwambulula, kukunguluka na kulikwatasana na bandolome na bandokazi beni. Tusimutwiyeniko ha bilengo bimo bimwasa kulyakela.

Lombeleni kuli Yehova kushwa kumo. Yehova azibuka ngwendi kutwalelelaho kuliziba kukala na mulonga kunasa kumyonowesa kulombela kuli ikeye. (Loma 8:26) Nameme ngoco, “lombeleni simbu yoshe” na kuleka Yehova ngweni mushaka kupwa kabusamba kendi. (Loma 12:12) Andrej wendekele ngwendi: “Njakele na kuliziba manene kukala na mulonga na shwamwa. Oloni munima ya kulombela, njakele na kulizibako bwino. Co njakele na kuliziba kushubuluka.” Nga kumuzibuka bimunapande kwendeka mu lilombelo, tandeni malombelo a Mwene Ndabiti uje watengulukile, abanasoneka ku mukanda wa Myaso 51 na 65.

Lilongeseni Mbimbiliya ha litangwa na litangwa. Kulinga ngoco kukanyamesa manene likulahelo lyeni na kumilingisa muzeme manene Yehova. (Myaso 19:7-11) Felipe wendekele ngwendi: “Kujeneka kulinga byuma bya ku sipilitu kukekwo kwanjizeyesele ku sipilitu na kunjilingisa njiseze Yehova. Kunjashakele lalo kuzibisa Yehova kubabala ku mbunge, ngeci njikalingi cilongesa ca likalyange kushwa kumo.” Neni mwasa kutembwinina Felipe. Nga kukamikaluwila kuwana biñanda byabibwa bya kulilongesa ha simbu ya cilongesa ca munu endi lika, co mwasa kulomba muka-Kilistu wa kuhya ku sipilitu mangana amikwase.

Kanyameseni busamba bweni na bandolome na bandokazi. Bamo mubakelukila mu cikungulukilo bakalishoshomwena ngwabo bandolome na bandokazi babamona ngwe bacili baka-bubi. Larissa wendekele ngwendi: “Njakele na kuliziba manene shwamwa. Njalizibile ngwange njashawisa cikungulukilo. Njatwaleleleho kuliziba ngoco ha simbu yailaha.” Zibukeni ngweni bakulunu na bandolome na bandokazi bakwabo ba kuhya ku sipilitu bashaka kumikwasa mukanyamese lalo busamba bweni na Yehova. (Taleni cipalo ca “Bibanapande Kulinga Bakulunu.”) Banabwahelela manene mumuneluka mu cikungulukilo, co bashaka ngwabo neni mupwe ba kubwahelela.—Visi 17:17.

Bika byasa kumikwasa mulikwatasane manene na bandolome na bandokazi beni? Kungulukeni simbu yoshe na kwambulwila hamo nabo. Kulinga ngoco kumikwasa bati? Felix wendekele ngwendi: “Bandolome na bandokazi bakele na kubandamena ngwabo njiluke mu cikungulukilo. Co munjelukile, banjitambwile na maboko abali. Banjikwasele njilizibe kuzituka na kuliziba ngwange Yehova nanjikonekela. Co lalo, njalizibile ngwange njasa kutwalelelaho kumupangela.”—Taleni cipalo ca “Bimunapande Kulinga.”

KETI MUZEYE!

Satana atwalelelaho kuminenela byeseko bya kuliseza-seza mangana amyonowese kutwalelelaho kupangela Yehova. (Luka 4:13) Kanyameseni busamba bweni na Yehova ha simbu ino mangana mulibwahesele kukolesa omwo muliwana na byeseko.

Yehova nakulahesa bimanga bendi ngwendi: “Njikashakezeka baje banazimbala na kwilwisa baje bali na kuyebangela mwangoco, co njikakuta baje banabetwa na kukangwisa baje bali na kubinja.” (Ezeki 34:16) Yehova nakwasa banu babangi baje batundile mu cikungulukilo balikute lalo busamba nendi. Ngeci, zibukeni ngweni ashaka kumikwasa mutwaleleleho kukanyamesa busamba bweni nendi.

Bibanapande Kulinga Bakulunu

Bakulunu bali na cipangi cakama ca kukwasa baje baneluka mu cikungulukilo balikute busamba na Yehova lalo. Bakulunu, munapande kulinga byuma binatako mangana mukwase baje baneluka mu cikungulukilo.

Batakameseni. Kapositolo Paulu wazibukile ngwendi munu uje natenguluka nasa ‘kuziba manene busiwa.’ (2 Koli 2:7) Simbu imo, nasa kuliziba manene kukala na mulonga nambe kuziba shwamwa. Paulu walekele cikungulukilo ngwendi: “Munapande kumusambesa na kumutakamesa.” Tunapande kukwasa baje baneluka mu cikungulukilo balizibe ngwabo Yehova na bandolome na bandokazi babazema manene. Ngeci, nga bakulunu babashangala na kubakwasa, co kubazeye.

Lombeleni hamo nabo. “Lilombelo lya munu muka-busunga lili na nzili manene.” (Yako 5:16) Larissa itunabanga kusimutwiya wendekele ngwendi: “Njalekele bakulunu mwoshe munjakele na kulizibila. Ngeci, balombelele hamo nange. Co njanangukile ngwange bakulunu kubanjilubalelele, oloni bashakele kunjikwasa njilikute lalo busamba na Yehova.” Theo wendekele ngwendi: “Malombelo a bakulunu anjikwasele njikulahele ngwange Yehova wanjizema manene, co kesi kwaka lika mbunge ku tupenga twange. Oloni akaka mbunge na ku bifwa byange byabibwa.”

Likuteni nabo busamba. Munu uje neluka mu cikungulukilo atonda kukala na babusamba. Mukulunu wa lizina lya Justin ngwendi: “Waneniko simbu ya kupanga nabo mu lihya na kubendela ku binjibo byabo. Kulikuta nabo busamba kwapwa kwa seho manene.” Mukulunu mukwabo wa lizina lya Henry wendekele ngwendi: “Nga bandolome na bandokazi bananguka ngwabo bakulunu bali na kulikuta busamba na baje baneluka mu cikungulukilo, co nabo balikuta nabo busamba.”

Bakwaseni bazibuke mwakulingila cilongesa ca munu endi lika. Ndolome nambe ndokazi wa kuhya ku sipilitu asa kukwasa uje neluka mu cikungulukilo ashangumuke kulinga-linga cilongesa ca likalyendi. Mukulunu wa lizina lya Darko ngwendi: “Njikabaleke bisimpi binjinawana omwo njinakele na kulinga cilongesa ca likalyange na kubaleka bikanjilingisa njilikuwe kulilongesa Mbimbiliya. Co lalo, tukalikumiiya kwa kulilongesa ñanda imo hamolika.” Co Mukulunu wa lizina lya Clayton wendekele ngwendi: “Njikabashongangeya batande mizimbu ya mu Mbimbiliya ya banu baje baliwanene na bukalu bubanaliwana nabwo na kumona bibasa kulilongesa kuli bakebo.”

Pweni kanyungi wamubwa. Baje baneluka mu cikungulukilo bakamono bakulunu ngwe maako. Oloni banapande kumona bakulunu kupwa tunyungi. (Njele 23:4) Ngeci, batolilileni mwamubwa na kubashangala. Co lalo, simutwiyeni nabo kushwa kumo. Tusimutwiyeni byakalingi mukulunu wa lizina lya Marcus nga alinga bungenzi bwa bunyungi. Wendekele ngwendi: “Tukabatandela cisoneka, kubashangala na kubaleka ngwetu twabwahelela manene mubanalifwiti kwiluka mu cikungulukilo, co Yehova nendi nabwahelela. Co kumamaneselelo a bungenzi bwetu, tukalikumiiya litangwa litukabendela lalo.”

a Muno mu ñanda mazina banawatengulula.