Kuma Tunapande Kulombela ku Banu Baje Babamona Kupwa ba Kujela Ndi?

Biyendeka Mbimbiliya

Embwe. Mbimbiliya ngwayo tunapande lika kulombela kuli Njambi mu lizina lya Yesu. Yesu walekele bandongesi bendi ngwendi: ‘Munapande kulombela ngweni: Tate yetu uli mwilu, lizina lyobe balijelese.’ (Mateo 6:9) Kashikile bandongesi bendi ngwendi balombele ku banu baje babamona kupwa ba kujela, ku tungelo nambe ku munu woshe-woshe, kubanga kuli Njambi lika.

Yesu walekele lalo baka-kumukabangeya ngwendi: ‘Yange ngila na busunga na mwonyo. Naumo wahi aija kuli Tate, kubanga etile muli yange.’ (Yowano 14:6) Yesu ikeye lika yanangula Njambi mangana atwendekeleko kuli ikeye.—Vahevelu 7:25.

Batico nga njilombela kuli Njambi na kulombela lalo ku banu baje babamona kupwa ba kujela?

Mu lishiko limo hakati ka Mashiko Likumi, Njambi wendekele ngwandi: “Yange Kalunga Njambi yeni, njapwa Njambi wa lifuwa.” (Kutuuka 20:5) Njambi wakala na “lifuwa” mu ngila muka? Mu Mbimbiliya ya Bisoneka bya Kaye Kakaha, eli lijwi banalinungulula ngwabo “washaka kumulemesa lika ikeye.” Ngeci, Njambi washaka ngwendi tulemese lika ikeye na kulombela lika kuli ikeye.—Isaya 48:11.

Nga tulombela ku munu woshe-woshe, kwambateselela na banu babamona kupwa ba kujela nambe tungelo, co tulubalesa Njambi. Omwo kapositolo Yowano washakele kulemesa kangelo, owo kangelo wamubindikile, co wamulekele ngwendi: “Kesi ulinge ngeci! Yange njinapu ngamba ngwe yobe na bakweni lalo boshe baje bakakateya ku busunga buje bwasholwele Yesu. Lemesa Njambi!” —Kujombolola 19:10.