Likuteni Busamba Na Banu Bamwamona Ngwe Mwaliseza Nabo

Bukalu

Nga kutulikwatasana na banu baje kutwashakele, co tukala manene na kaangu. Co lalo, nga tulikuta lika busamba na banu baje bakalingi byuma bya kulifwa nebi bitukalingi, twasa kusinganyeka ngwetu byuma bitwazema nebi bitukalingi bikebyo byabibwa manene bibanapande kulinga banu boshe.

Cinangulo ca mu Mbimbiliya

“Bimbunge byeni bishokoloke manene.”—2 KOLINTE 6:13.

Eci cinangulo cilumbununa bika? “Mbunge” yetu inasa kulumbununa bisinganyeka byetu nomu mutukalizibila. Nga twazema lika banu baje bakalingi byuma bya kulifwa nebi bitukalingi, co kunapu lika ngwe tunashoko mbunge yetu. Nga tushaka kujenjuka obu bukalu, co tunapande kulikuta busamba na banu batwamona ngwe twaliseza nabo.

Kulikuta Busamba na Banu Batwamona Ngwe Twaliseza Nabo Kutukwasa Bati?

Nga tuzibuka bakwetu mwamubwa, co twasa kuzibisisa bibakalingila byuma bya kuliseza nebi bitukalingi. Co omwo busamba bwetu nabo bukanyama, kutubamono ngwetu twaliseza nabo, oloni tubasingimika na kulikwatasana nabo.

Tusimutwiyeni hali Nazaré. Kashakele kulikwatasana na baka-kwija. Wendekele byuma byamukwasele ngwendi: “Njashangumukile kusikama nabo na kupanga nabo. Co njanangukile ngwange baje banu bakalingi byuma byabibwa bije byaliseze nebi bibakabasinganyekela banu babangi. Nga tulikuta busamba na banu ba muyati weka, co kutusinganyeka ngwetu banu ba muyati uje boshe bakalingi byuma bya kulifwa. Kulinga ngoco, kutulingisa tubazeme manene na kubasingimika.”

Byuma Bimwasa Kulinga

Waneni simbu ya kusimutwiya na banu ba cisemwa ceka, ba ku lifuti lyeka nambe baje bakendeka ndaka yeka. Mwasa:

Kubehula bamileke byuma bimo ha buyoye bwabo.
Kubalanya mangana mwakulye nabo byakulya.
Kutolilila omwo bendeka byuma binalingiwa mu kuyoya kwabo mangana muzibuke byuma bibamona kupwa bya seho.

Nga muzibuka byuma binalingiwa mu kuyoya kwabo, co muzibisisa bikabalingisa byuma bimo. Oku kumikwasa mubazeme.

Byakuliwana Nabyo: Kandasamy na Sookammah (Ba ku Canada)

“Twakolelele mu South Africa ha simbu ikwakele kaangu ka miyati. Kubakele na kutabesa banu ba miyati ya kuliseza-seza bakale mu citingitingi cimo. Eyi futisi, yalingisile banu bakale na kaangu ka miyati. Kutwapwile bindele, ngeci twazindile manene bindele mwafwa bindele bamo bakele na kutumona ngwe tu banu ba kwisi manene. Ha simbu ije kutwasinganyekele ngwetu twakele na kaangu. Oloni twalizibile ngwe bakwetu bakebo bakele na kutuyengula.

“Kushokolola manene bimbunge byetu na kushangumuka kulikwatasana na banu ba miyati yeka kwatukwasele tutengulule biyongola byetu. Mutwashangumukile kulikwatasana na bindele, twanangukile ngwetu twalifwa nabo mu bingila byabingi. Tubaboshe tukaliwana na byuma bya kulifwa na bukalu bwa kulifwa.

“Cindele umo na munakazi wendi bakukele ku njibo yetu ha simbu yailaha. Twalizibukile nabo mwamubwa. Mu kwita kwa simbu bapwile babusamba betu, co twanangukile ngwetu twalifu mu byuma byabingi. Ngeci, twashangumukile kuzema bindele.”