Yosiya Wakele na Vavuthamba Vavavwa

Uthinganyeka ngwove kwapwa kwakukalu kulinga vyuma vyavivwa ndi?— Vanu vavangi vaka thinganyeka ngocho vene. Mbimbiliya itumwetha ngwayo Yosiya mwapwile mwanike, chapwile chachikalu kuli ikeye kulinga vyuma vyavivwa. Oloni wakele na vavuthamba vavavwa vaje vamukwathele. Vandamena tulilongethe vya Yosiya na vavuthamba vendi.

Amoni ikeye wapwile ishe ya Yosiya. Amoni wapwile mwene wa Yunda, cho walingile vyavyuvi na kulombela tumponya. Ishe ya Yosiya mwathsile, vengithileho munendi Yosiya kupwa mwene mu Yunda. Wakele lika na myaka 8! Uthinganyeka ngwove nendi walingile vyavyuvi ngwe vaishe ndi?— Embwe, kalingile ngocho!

Nambe ngwavo wapwile mwanike manene, Yosiya washakele kuthingimika Yehova. Wangwile vavuthamba mukati ka vanu vaje vathzemene Yehova. Vakwathele Yosiya kulinga vyuma vyavivwa. Veya vapwile vavuthamba va Yosiya?

Zefaniya wapwile umo wa vavuthamba vendi. Wapwile kapolofweto mu Yunda. Walekethele vanu vamu Yunda ngwendi vakamona vukalu vwakama nga valombela tumponya. Yosiya watolililile vyendekele Zefaniya, cho walombelele lika Yehova kethi tumponya embwe.

Njelemiya nendi wapwile kavuthamba ka Yosiya. Voshe vapwile hamolika ku myaka cho vayoyele lalo mutamba umo nakukola hamo. Vuthamba vwavo vwakolele manene. Omwo Yosiya wathsile, Njelemiya wasonekele mwaso wavuthiwa mwafwa walinyengele manene ha vuthsi vwa Yosiya. Yelemiya na Yosiya valikwathele umo na mukwavo kulinga vyuma vyavivwa na kwononoka kuli Yehova.

Vika viulilongetha ku chakumwenako cha Yosiya?— Yosiya washakele kulinga vyuma vyavivwa, nambe ngwavo wapwile lika mwanike wamundondo. Wathzivukile ngwendi napandele kulikwata vuthamba na vanu vaje vathzema Yehova. Nove unapande kwangula vavuthamba vaje vatha kukukwatha kulinga vyavivwa na kuthzema Yehova!