Josiya Wazemene Mashiko a Njambi

Josiya wapwile mwene wa baJuda mwakele na myaka 8. Mu matangwa aje banu bakele na kulinga manseno na kulemesa tumponya. Josiya mwakele na myaka 16, walingile mwoshe mwaselele mangana alemese Yehova mu ngila inapande. Mwakele na myaka 20, washangumukile kunyongesa tumponya na mitula ya tumponya yakele mu lifuti. Co mwakele na myaka 26, wayongwele kubwahesa tempele ya Yehova.

Kapilistu wahakamwa Hilikiya wawanene libulu lya kuzenga lya mashiko a Yehova mu tempele. Hamo lyapwile bene libulu lya kuzenga lyasonekele Mosesa. Muka-kusoneka wa lizina lya Shafani, watwalele lije libulu lya kuzenga kuli Mwene Josiya na kukalitanda mu kutambekela. Josiya mwazibile majwi akele muje mu libulu, wanangukile ngwendi banu kubakele na kwononoka Yehova ha myaka yaingi. Mwene Josiya walekele Hilikiya ngwendi: ‘Yehova natulubalela, ya ukasimutwiye nendi. Yehova atuleka bitunapande kulinga.’ Yehova wabakumbulwile kwitila muli kapolofweto wa munakazi wa lizina lya Huda, ngwendi: ‘BaJuda bananjiseze. Ngeci batambula kashitiko. Oloni keti ha simbu yali na kuyula mwene Josiya mwafwa nalikehesa.’

Mwene Josiya mwazibile uje muzimbu, waile ku tempele na kusana baJuda balikungulwile hamo. Co watandelele banu boshe Mashiko a Yehova mu kutambeka. Mwene Josiya na banu boshe balikumiiye kwononoka Yehova na bimbunge byabo byoshe.

BaJuda kubakele na kulinga cilika ca Paseka ha myaka yaingi. Oloni Mwene Josiya mwatandele mu Mashiko na kuwana ngwendi cilika ca Paseka bapandele kucilinga mwaka na mwaka, walekele banu ngwendi: ‘Tulingila Yehova cilika ca Paseka.’ Kutundaho, mwene Josiya wabwahesele milambu yaingi na kubwahesa bya baka-kwimba ku tempele. Ngeci banu balingile cilika ca Paseka, co munima balingile Cilika ca Makende a Kujeneka Musima. Co cambatele matangwa 7. Kushwa lika mu matangwa a Samwele, banu kubalingile cilika ca Paseka ngwe cije calingile mwene Josiya. Josiya wazemene manene Mashiko a Njambi. Kuma mukalikuu kulilongesa bya Yehova ndi?