Iwano Bamujombolwela Byuma Bikalingiwa Kulutwe

Kapositolo Iwano mwapwile lipanditi ha liñanda lya Patimosi, Yesu wamumwesele bimona nambe ngwetu bikupulo bya kupwa 16 bije bimwesa byuma bikalingiwa kulutwe. Ebi bimona byamwesele mubakajelesela lizina lya Yehova, mubukezila Bumwene bwendi nomu mubakalingila cizango cendi hano hasi ngwe mucili na kulingiwa mwilu.

Mu cimona cimo, Iwano wamwene litanda lya Yehova lya bumpau mwilu lije libazengelekele bakulunu 24 baje bazalele bizalo bya kutoka na bilongo bya goudi. Kuje ku litanda kwakele na kutunda mihyato na cililimo. Co bakulunu 24 bakele na kutsikamena Yehova na kumulemesa. Mu cimona cikwabo, Iwano wamwene mbunga yakama ya banu baje batundile mu mafuti oshe na bindaka byoshe balemesa Yehova. Muna Manga, Yesu ikeye wapwile kanyungi kabo, co wabatwalele ku mema a mwonyo. Co mu cimona cikwabo lalo, Iwano wamwene Yesu ashangumuka kuyula mwilu ha kupwa Mwene hamolika na bakulunu 24. Mu cimona cateleko, Iwano wamwene Yesu ali na kulwa na canzangombe uje wapwa Satana hamolika na badimona bendi. Yesu wabombilile hasi kutunda mwilu.

Kutundaho, Iwano wamwene cikupulo cacibwa ca Muna Manga na banu 144,000 banemana ha Munkinda wa Siyone. Wamwene lalo kangelo ali na kupulula hano hasi oku aleka banu ngwendi bazibile Njambi lyoba na kumwana bumpau.

Mu cimona cikwabo, nzita ya Amagidoni yakatukile. Yesu na maswalale bendi bahyanene Satana na kaye kendi kakabi. Mu cimona ca mamaneselelo, Iwano wamwene byuma bya kutanga bya mwilu nebi bya hasi byalikwatasana. Satana na bana bendi boshe babanyongesele. Co tungelo boshe mwilu na banu hasi bakele na kusingimika lizina lya Yehova na kulemesa lika ikeye.