Mbimbiliya Ikatengulula Buyoye Bwa Banu
“Njapatuka ku Bundungo bwa Kulemesa Tumponya.”—ABA DANSOU
MWAKA WA KUSEMUKA: 1938
LIFUTI KWANASEMUKILA: BENIN
YOYESI YENDI YA LAJA: MUKA-KULEMESA TUMPONYA
BUYOYE BWANGE BWA KUNIMA: Njakolelele mu limbo lya So-Tchahoué lije lyakala mu cana kuyehi na lishali. Banu bomu mwimbo bakatsii bisi na kulela bingombe, bimembe, bimanga, bingulu na tuzila. Oku ku mutambela, kukwakele bitapalo. Ngeci, banu bakapangesa manene mato. Babangi bakapangesa biti na mwila mu kutunga binjibo byabo, bamoco bakapangesa masitina. Co lalo banu babangi bapwa tuhutu. Nameme ngoco, kukwakele manene bukenya ngwe mu binganda.
Munjapwile mwanike, batate batutwalele kubakalilongesela mwakulemesela binjambi, nange na yayange wa munakazi. Co munjakolele njashangumukile kulemesa njambi ibakele na kulemesa mu cisemwa ca Ciyoruba wa lizina lya Dudua (Oduduwa.) Njatungilile ou njambi njibo, co njakele na kumulambwila bukola, mazi, mashunju, tusumbi, tutela na tusitu ba kuliseza-seza. Ebi byuma byatondele bimbongo byabingi, co kakangi njakele na kubiisilako bimbongo byoshe binjakele nabyo.
MBIMBILIYA MUYATENGULWILILE BUYOYE BWANGE: Munjashangumukile kulilongesa Mbimbiliya, njazibukile ngwange Yehova ikeye lika Njambi wa busunga. Njazibukile lalo ngwange kashaka ngwendi banu balemese tumponya. (Kutuuka 20:4, 5; 1 Kolinte 10:14) Co njanangukile binjapandele kulinga. Ngeci, njombilile kuti tumponya boshe na kutundisa byuma byoshe byakele mu njibo yange bije byakundamene ku kulemesa tumponya. Co lalo njecelele kutahesa na kukaba bisemwa bibakele na kukaba banu mu citingitingi cetu, kwambateselela na bisemwa bya ha byakutsa.
Kukwanjipwililile kwakwasi kulinga byuma byoshe ebi oku njili na myaka ya kutubakana 60. Babusamba bange, babushoko bwange na banu banjalyatele nabo bakele na kunjilwisa na kunjishendumuna. Oloni njalombele Yehova ngwange anjane nzili ya kulinga byabibwa. Majwi ali ku mukanda wa Visimo 18:10 akele na kunjitakamesa manene. Ou mukanda ngwawo: ‘Lizina lya Yehova lyapwa cimpaka ca nzili, muka-busunga atewelako, co oboka.’
Cuma cikwabo canjikwasele capwile kukunguluka hamo na Bakaleho ba Yehova. Munjakele na kukunguluka nabo, bakele na kunjimwesa cizemo. Co njalikasamenene munjamwene mubakele na kulifwitila kuyoya mu kulitombola na binangulo bya mu Mbimbiliya. Binjamwene byanjilingisile njikulahele ngwange Bakaleho ba Yehova bapwa baka-Kilistu ba busunga.
BUKWASI BUNJINAWANA: Kupangesa binangulo bya mu Mbimbiliya kunanjilingisa njilikwatasane manene na bana bange. Co lalo njikalizibi ngwe bananjitulu citele. Njakele na kubiisila byuma byange ku tumponya ba kujeneka seho, baje kubakele na kunjikwasa nameme kamandondo. Ha simbu ino njili na kulemesa Yehova uje akamanesa bukalu bwoshe butuli na kuliwana nabwo. (Kujombolola 21:3, 4) Njabwaheleloni mwafwa kunjesi na kulemesa tumponya, oloni njili na kulemesa Yehova uje ali na kunjinyunga na kunjinyungilila!