Kuvwethzelela ku Vutongwe Vwetu vwa mu Lihya—Kwambulwila Munu Uje Endeka Lilimi Lyeka

Vichapwila cha Kulema: Yehova washaka vanu va miyati yoshe vathzivuke vuthunga. (Vil. 10:34, 35) Ngechi, Yesu wendekele ngwendi evi viñanda vyavivwa vakavyambulula “mu kaye mwoshe” na “ku miyati yoshe.” (Mat. 24:14) Zakaliya wapolofwetele ngwendi vanu “vaka-kwija [va ku malimi oshe NW]” vakatavela muthzimbu wauvwa. (Zak. 8:23) Kwetheketha na chimona cha kapositolo Yowano, vaje vakovoka ñavava yakama vakatunda “ku miyati yoshe na ku mafuti oshe na ku vanu voshe na ku vindaka vyoshe” nambe ngwetu ku malimi oshe. (Kuj. 7:9, 13, 14) Nga tuwana munu uje endeka lilimi lyeka mu chitingitingi chetu, tunapande kumwambulwila muthzimbu wauvwa.

Mwakulingila:

Livwahetheleni. Longekeyeni mukanda wa Good News for People of All Nations mu ngonga yeni. Thzivukeni mwa kupangethela mashiko ali ha mutwe wa “Mwa Kukwathela Vaje Vendeka Lilimi Lyeka,” ku maputukilo ou mukanda. Thinganyekeni ha malimi a munatha kuwana mu lihya, mangana mwambate vindiyo nambe mukanda ha jw.org wa mu malimi owo na kuvyaka ha foni yeni nga chinatha. Pangetheni JW Language app mangana mulilongethe kwendeka majwi amo. Nga vikungulukilo vya malimi a kulyangununa vikambulwila mu chitingitingi chimo lika, cho vaka-kwambulula vanapande kupangetha mikanda ya mu lilimi lya chikungulukilo chavo ha kwambulwila ku njuvo na njuvo. Oloni nga vaya na kwambulwila ku mbunga kuje vanu vakendeka malimi amangi, cho vanapande kwambata mikanda ya mu malimi a vanu vavanatha kuwana.
Nga muwana munu uje kathzivuka kwendeka lilimi lyeni, ethekeni kumwambulwila “vyuma vya kukomokesa vije vyanalingi Njambi” mu lilimi lyendi. (Vil. 2:11) Mulekeni keyala ya jw.org mangana alitandele mithzimbu yaingi mu lilimi lyendi. Nga navwahelela, cho thonekeni vwathivwathi fomu ya silozi ya Shangwe Mu Mu Potele (S-43) na kuyana kuli muka-kuthoneka. Twaleleleniho kwambulwila munu uje navwahelela kweta noho vakamwendela vaka-kwambulula vaje vendeka lilimi lyendi.

Kavangeyeni Vyuma Vino mu Ngonde Ino:

Ha thimbu ya Kulombela kwa Nanga, lingeni chimwetho chije chimwetha mwa kwambulwila ku munu uje endeka lilimi lyeka.