Kuvwethzelela ku Vutongwe Vwetu vwa mu Lihya—Kulongetha Vaka-kwambulula Vavaha Mwakwambulwila

Vichapwila cha Kulema: Vandongethi va Yesu vavaha vanapande kwononoka “vyuma vyoshe” vyashikile Yesu. Echi chinambatethelela na kulongetha vakwavo vuthunga. (Mat. 28:19, 20) Vanu vavangi vanalithoneketha laja mu Sikola ya Kulilongetha Kwambulula, cho vanambulwila laja vavushoko vavo na vavuthamba vavo mu chintulu. Omu vatwalelelaho kulilongetha, vamona ngwavo Yehova ashaka vanu voshe vathzive muthzimbu wauvwa. Echi chivalingitha vakale na lishungu lya kwambulula. (Lom. 10:13, 14) Tunapande kulongetha mwamuvwa vaka-kwambulula va kujeneka kumbwitika mwakwambulwila. Nga tulinga ngocho, tuvakwatha vathimpe omwo vatwalelelaho kukola ku sipilitu.—Luk. 6:40.

Mwakulingila:

Kwatheni muka-kwambulula wamuha ambate mikanda yanapande kukapangetha mu lihya. Mumwetheni mikanda imukalongekeya mu ngonga yeni ya mu lihya. Mulekeni lalo vimukambatela mikanda yoshe ije ili mu ngonga yeni.
Anguleni ngila imo yakwendekelamo ya mu Chipangi Chetu cha Vumwene na kulitulwithamo hamo nendi. Mushongangeyeni ayikwate mu mutwe, mangana akathe kwendeka kwa kujeneka kutanda. Anguleni na ngila yakwambulwilamo ije yatha kupanga mu chitingitingi cheni mu livulu lya Silozi lya Sikolo sa Bukombwa, ha liputa 82. Mulumbunwineni vwino theho ya kuthzala na kusholoka mwamuvwa.—2 Koli. 6:3, 4.
Twaleleniho kumulongetha. Mwetheni muka-kwambulula wamuha kati ya chitingitingi. Mulongetheni mwakupangethela lipapelo lya mithzimbu ya ku njuvo na njuvo. Mumwetheni mwakuthonekela mithzimbu ya vanu vaje vamwetha kuvwahelela. Mulongetheni mwakupangethela mukanda wa Good News for People of All Nations na jw.org mu lihya. Mukwatheni atwaleleleho kwendela vanu vakuvwahelela vaje awana mu lihya.—1 Koli. 3:6.
Kwateni mbunge nga kakwata vwathi vimumuleka. Mushangathzaleni hanalingi mwamuvwa. (Vis. 25:11) Kethi mumuleke lika vya kulinga, oloni pangeni nendi. Kaleni na ntwima, na kumuthzema. Nga mulinga ngocho, mumona vuvwa vutunda mu kulifwita kweni mu kwita kwa thimbu.

Kavangeyeni Vyuma Vino mu Ngonde Ino:

Ambulwileni ku njuvo na njuvo na munu imukalilongetha nendi. Yeni nendi ku vungendthzi vwa kwilukila nambe ku chilongetha cha Mbimbiliya. Nga kumwethi na munu imukalilongetha nendi, cho munatha kulanyako muka-kwambulula wamuha woshe-woshe.