Bizindo Tangwa Bikahwa Byoshe Njwa!
Nameme tulifwita kutundisa bizindo mu bimbunge byetu, oloni kutwasa kwecelesa bakwetu kukala na cizindo. Banu babangi ba kujeneka mulonga bali na kuyanda mwafwa ya kubazinda. Co iya asa kumanesa bizindo byoshe?
Yehova Njambi ikeye lika asa kumanesa bizindo byalisala mu kaye. Co Mbimbiliya yakulahesa ngwayo akalinga ngoco.—Visimo 20:22.
NJAMBI AKAMANESA BYUMA BILI NA KULINGISA BANU BALIZINDE
1. SATANA LIYABOLO. Satana, kangelo uje watengulukilile Njambi, ikeye ali na kulingisa banu balizinde. Njambi akanyongesa Satana na banu boshe baje bali na cizindo ngwe ikeye.—Myaso 37:38; Loma 16:20.
2. KAYE KAKABI KA SATANA. Njambi akanyongesa byuma byoshe bili na kulingisa banu balizinde bije binalisala hano ha kaye kwambateselela na baka-bupolitiki na bakulunu ba bulombelo baje bali na kulingisa bizindo bilibwezelele. Njambi akanyongesa na baka-mingoso ba linyanyamena baje bali na kulyapula banu.—2 Petulu 3:13.
3. KUJENEKA KULUMBUNUKA. Mbimbiliya imwesa ngwayo banu boshe kubalumbunukile, mukemwo bakasinganyeka byabibi, kuliziba mwamubi na kulinga byuma byabibi. (Loma 5:12) Kujeneka kulumbunuka kukalingisa banu bazinde bakwabo. Njambi akakwasa banu bakapwe ba kulumbunuka, co kubakazindi bakwabo lalo.—Isaya 54:13.
MBIMBILIYA YAKULAHESA NGWAYO MU KAYE KUMUKAKALA BIZINDO
1. NA UMO WAHI IBAKALINGA MWAMUBI. Bumwene bwa Njambi bukayula kaye koshe kutundilila mwilu, co ha simbu oyo kukukakala bizindo lalo. (Ndanyele 2:44) Kaangu kakahwa. Njambi akamanesa bubi bwoshe butuli na kumona mu kaye.—Luka 18:7.
2. BANU BOSHE BAKAKALA MU KWOLOKA. Binzita na lwozi bikahwa. (Myaso 46:9) Ha kaye hakakala lika banu bababwa baje bashaka kwoloka na cizemo.—Myaso 72:7.
3. BANU BOSHE BAKAPWA BA KULUMBUNUKA CO BAKAYOYA MYAKA YOSHE. Banu boshe bakakala hano hasi bakalizema manene umo na mukwabo. (Mateo 22:39) Na umo wahi akayanda nambe kusinganyeka na kwanuka byuma bije bizibisa kubabala ku mbunge. (Isaya 65:17) Bubi bwoshe mubukahwa banu “bakajolela na kukala mu kwoloka.”—Myaso 37:11.
Kuma neni mushaka kukayoya mu kaye ka cifwa eci ndi? Banu babangi bali na kupangesa biyendeka Mbimbiliya, co banecela kuzinda bakwabo. (Myaso 37:8) Mukemwo mubali na kulingila Bakaleho ba Yehova babangi mu kaye koshe. Nameme batunda ku bisemwa bya kuliseza-seza oloni balizema umo na mukwabo, co banalikwatasana ngwe naanga imo lika.—Isaya 2:2-4.
Bakaleho ba Yehova babwahelela manene kumilekako byuma bibanalilongesa bije bikabakwasa bakolese nga babalinga mwamubi nambe kubayengula. Bimulilongesa bimikwasa mujeneke kukala na cizindo, oloni muzeme banu. Bimikwasa lalo muzibuke mwa kumwesela cizemo banu baje baka-kujeneka kukandelela nambe baje bamizinda. Kulinga ngoco kumikwasa mupwe ba kubwahelela na kuyoya mwamuwa na bakweni. Cuma ca seho manene cibamilongesa cinapu kuzibuka bimunapande kulinga mangana mukakale mu kaye omwo Bumwene bwa Njambi bukamanesa bizindo byoshe.—Myaso 37:29.