‘Twaleleleniho Kukabangeya’ Yesu Munima ya Kumimbwitika

1-2. Bibezikiso muka byakawana munu munima ya kumumbwitika?

MUNU akapu manene wa kubwahelela mubakamumbwitika na kupwa umo wa mu naanga ya Yehova. Baje babanambwitika basa kwendeka ngwe mwendekelele Devidi uje wendekele ngwendi: ‘Nabwahelela uje iwangula [Yehova] na kumunena kuyehi nobe.’—Samu 65:4.

² Yehova kesi kukokela munu woshe-woshe mu munga yendi. Ngwe mutunalilongeselele mu cilongesa cinahu, akalyangwila kushwena kuli baje bamwesa ngwabo bashaka kushwena kuli ikeye. (Jems 4:8) Nga mulikundika kuli Yehova na kumimbwitika, co mushwena kuyehi nendi mu ngila ya kulitila. Munima ya kumimbwitika, Yehova ‘amibezikisa na kumyana byuma byabingi bije mukajeneka kwakubitulikila.’—Mala 3:10; Njele 17:7, 8.

3. Cipangi muka cakama cibali naco baka-Kristu baje banalikundika kuli Yehova na kubambwitika? (Muka-kwambulula 5:4, 5)

³ Cimbwitiko capwa mashangumukilo a buyoye bwa kulyana kupangela Yehova. Munima ya kumimbwitika, munapande kutwalelelaho kulinga mwoshe mumwasela kushulisilila cikumiiyo ceni ca kupangela Yehova na kutwalelelaho kupwa ba kulongwa nameme muliwana na byeseko. (Tandeni Muka-kwambulula 5:4, 5.) Ha kupwa ndongesi ya Yesu, munapande kukabangeya mwanja wendi na mashiko endi. (Mate 28:19, 20; 1 Pita 2:21) Cino cilongesa cimikwasa kulinga ngoco.

‘TWALELELENIHO KUKABANGEYA’ YESU NAMEME MULIWANA NA BYESEKO

4. Baka-Kristu basa kwambata bati “citi ca kuyandesela”? (Luka 9:23)

⁴ Munima ya kumimbwitika, muliwana na byeseko. Yesu wendekele ngwendi bandongesi bendi bambata ‘citi cabo ca kuyandesela.’ Co banapande kulinga ngoco “ha litangwa na litangwa.” (Tandeni Luka 9:23.) Kuma Yesu walumbunwine ngwendi baka-kumukabangeya baliwana na tuyando simbu yoshe ndi? Embwe. Walumbunwine ngwendi nameme balikuwa bibezikiso, baliwana na byeseko. Co byeseko bimo bipwa byabikalu manene.—2 Timo 3:12.

5. Bibezikiso muka byakulahesele Yesu baje balyana kujeneka kukala na byuma bimo mwafwa ya kushaka kumukabangeya?

⁵ Hamo baka-naanga yeni bali na kumilwisa, nambe hamo mu kushaka kwaka bya Bumwene bwa Njambi mu mutamba wakulibanga, kumwesi na kulinga byuma bije byasa kumiwanesa bimbongo byabingi. (Mate 6:33) Nga mukemwo, co kulaheleni ngweni Yehova ali na kumona bimuli na kulinga mu kushaka kumupangela. (Hebe 6:10) Co hamo mwalimwena busunga bwa majwi a Yesu uje wendekele ngwendi: ‘Naumo wahi naseze njibo, nambe bandolome, nambe bandokazi, nambe ina, nambe ishe, nambe bana, nambe mahya, mwafwa yange na muzimbu waubwa uje kakatambwilaho byuma bikwabo bya kutubakana 100 mu simbu ino, bya kufwa ngwe binjibo, bandolome, bandokazi, baina, bana na mahya mu tuyando. Co mu katumameno ka myaka kaje kali na kwija kulutwe, akatambula kuyoya kwa myaka yoshe.’ (Maki 10:29, 30) Bibezikiso bimunawana binapu byakama manene kutubakana byuma byoshe-byoshe bimunajeneka kukala nabyo mwafwa ya kupangela Yehova.—Samu 37:4.

6. Mwafwa bika munapande kutwalelelaho kulwisa “mashungu a situ” munima ya kumimbwitika?

⁶ Munapande kutwalelelaho kulwisa “mashungu a situ” munima ya kumimbwitika. (1 Iwa 2:16) Twapwa banu ba kujeneka kulumbunuka mwafwa twatunda kuli Adama. Ngeci, simbu imo munasa kuliziba ngwe mwalizibilile kapositolo Paulu uje wendekele ngwendi: “Mu mbunge yangeni njazema manene lishiko lya Njambi, oloni mu mubila wange njili na kumonamo lishiko likwabo lije lili na kulwisa lishiko lili mu bisinganyeka byange, co lili na kunjitwala mu bundungo bwa lishiko lya bubi lije lili mu mubila wange.” (Loma 7:22, 23) Munasa kuliziba kuzeya mwafwa ya kutwalelelaho kulwisa mashungu amabi. Nameme ngoco, kusinganyekesesa ha kulikundika kweni kuli Yehova na byuma bimunamukulahesa kumikwasa kutwalelelaho kuhyana byeseko. Kulikundika kuli Yehova kumikwasa nga muliwana na byeseko. Mu ngila muka?

7. Kulikundika kuli Yehova kumikwasa bati kutwalelelaho kupwa ba kulongwa kuli ikeye?

⁷ Nga mulikundika kuli Yehova, mulibyana yeni babenya. Oku kulumbununa kubyana kushungwiya byuma byabibi nambe kulyakela bilengo bije kubilitombola na cizango ca Yehova. (Mate 16:24) Ngeci, nga muliwana na ceseko, kumuuwasana ha byuma bimunapande kulinga, mwafwa munangwila cimweja bimulinga mangana mutwaleleleho kupwa ba kulongwa kuli Yehova. Kulinga ngoco kumikwasa mukolese ngwe mwalingilile Yombi. Nameme waliwanene na bukalu bwakama manene, Yombi wendekele ngwendi: ‘Kunjumbila kuti kulongwa kwange.’—Yombi 27:5.

8. Kusinganyekesesa ha lilombelo lyeni lya kulikundika kumikwasa bati kuhyana byeseko?

⁸ Kusinganyekesesa ha lilombelo lya kulikundika kweni kuli Yehova, kumikwasa kuhyana ceseko coshe-coshe. Cakumwenako, kuma mwasa kushangumuka kulizilila mu kutubakanesa na munakazi nambe munalume wambala ndi? Embwe! Munakulahesa laja Yehova ngweni kumulingi byuma bya cifwoco. Ngeci, nga kumutabesa mashungu amabi kukala muli yeni, co kumipwila kwakwasi kuwahyana. ‘Kumwende mu ngila ya baka-kulinga byuma byabibi.’—Prov 4:14, 15.

9. Kusinganyekesesa ha lilombelo lyeni lya kulikundika kumikwasa bati kutwalelelaho kwaka bya Yehova mu mutamba wakulibanga?

⁹ Bati nga mwawana cipangi cije cimyonowesa kukunguluka simbu yoshe? Kumuuwasana ha byuma bimwangula kulinga, mwafwa simbu kanda muwane oco cipangi mwalibwahesela laja ngweni kumutambula cipangi cije cimyonowesa kukunguluka. Kukumikaluwila kuzibuka byakulinga mwafwa munangula laja kwaka bya Yehova mu mutamba wakulibanga. Kusinganyekesesa ha mwanja wa Yesu kutukwasa. Yesu wononokele Ishe. Ngeci, neni nga mwalikundika kuli Njambi, munapande kumwononoka.—Mate 4:10; Iwano 8:29.

10. Yehova amikwasa bati ‘kutwalelelaho kukabangeya’ Yesu munima ya kumimbwitika?

¹⁰ Byuma bimulinga nga mwaliwana na bukalu nambe ceseko bimwesa indi mushaka ‘kutwalelelaho kukabangeya Yesu.’ Co Yehova amikwasa nga mwalyakela cilengo ca kutwalelelaho kukabangeya Yesu. Mbimbiliya ngwayo: “Njambi wapwa wa kulongwa, kasa kumyecelela muliwane na ceseko cije kumwasa kukolesela. Nga muliwana na ceseko, Njambi amishokolwela ngila mangana mwase kukolesa omwo mu ceseko.”—1 Kori 10:13.

TWASA KUTWALELELAHO BATI KUKABANGEYA YESU?

11. Ngila muka imo ku bingila byabibwa bimwasa kutwalelelaho kukabangeya Yesu? (Taleni na cikupulo.)

¹¹ Yesu wapangelele Yehova na mbunge yendi yoshe, co watwaleleleleho kushwenya kuli ikeye kwitila mu lilombelo. (Luka 6:12) Co imo ya bingila byabibwa bimwasa kutwalelelaho kukabangeya Yesu munima ya kumimbwitika inapu kulinga byuma bije bimishwenyesa kuyehi na Yehova. Mbimbiliya ngwayo: “Hoshe-hoshe hatunete mu kukola, tutwaleleleniho kwenda mwamubwa omu mu ngila ya kulifwa.” (Filp 3:16) Simbu imo muziba-ziba bya bandolome na bandokazi baje banalyakela bilengo bimo mu kushaka kulinga byabingi omwo bapangela Yehova. Hamo banaile ku Sikola ya Baka-kwambulula bya Bumwene nambe kukapangela kuje kuli manene bujene. Banu ba Yehova bashaka kulinga byabingi mu kumupangela. (Bili 16:9) Bati nga ha simbu ino kumwasa kulinga ngoco? Kumwapandele kuliziba ngweni baje basa kulinga ngoco banamitubakana. Cakama lika kutwalelelaho kukolesa. (Mate 10:22) Yehova ali na kumona byuma bimwasa kulinga kupwa bya seho nameme binasa kumoneka ngwe byabindondo. Ei inapu ngila ya seho imwasa kutwalelelaho kukabangeya Yesu.—Samu 26:1.

12-13. Bika bimunapande kulinga nga muliziba ngweni kumwesi na kupangela Yehova na ntwima ngwe mumwakele na kulingila kunima? (1 Korinte 9:16, 17) (Taleni lalo cipalo ca “Twaleleleniho Kushatuka.”)

¹² Bati nga muliziba ngweni malombelo eni kuwesi na kutundilila kwisi ya mbunge nambe kuliziba ngweni kumwesi na kulikuwa cipangi ca kwambulula? Bati nga kumwesi na kulikuwa kutanda Mbimbiliya ngwe mumwakele na kulingila kunima? Nga mukemwo mumulizibila munima ya kumimbwitika, kumwapandele kuliziba ngweni kumwesi na sipilitu ya Yehova. Mwafwa ya kujeneka kupwa ba kulumbunuka, tunasa kuliziba mu bingila bya kuliseza-seza ha bisimbu bimo. Nga ntwima imunakele nayo ishangumuka kutepuluka, co singanyekeseseni ha mwanja wa kapositolo Paulu. Nameme washakele kutembwinina Yesu, Paulu wazibukile ngwendi bisimbu bimo kumukaluwila kukala na lishungu lya kulinga byuma byatondele kulinga. (Tandeni 1 Korinte 9:16, 17.) Wendekele ngwendi: “Nameme njilinga ca kulisindiya, anga njicili na cipangi ca bungamba cibananjana.” Mu ngila ikwabo, Paulu washakele kulinga cipangi ca kwambulula nameme simbu imo wazeyele.

¹³ Neni kumwapandele kwangula kulinga byuma bimo kwesekesa lika nomu mumulizibila. Lyakeleni cilengo ca kulinga byuma byabibwa nameme munasa kuliziba ngwe kumwasa kulinga ngoco. Nga mutwalelelaho kulinga byuma byabibwa, mu kwita kwa simbu kumulizibi ngweni kumwasa kulinga obyo byuma. Kutwalelelaho kukala na cilongesa ca munu endilika, kulombela, kukunguluka na kwambulula kumikwasa mukabangeye Yesu munima ya kumimbwitika. Kukolesa kweni mu kupangela Yehova kwasa kutakamesa bandolome na bandokazi beni.—1 Tesa 5:11.

“TWALELELENIHO KULYESEKA . . . TWALELELENIHO KULILULA”

14. Bika bimunapande kwilula simbu yoshe, co mwafwa bika? (2 Korinte 13:5)

¹⁴ Kunapu kwa seho manene kulilula kushwa kumo munima ya kumimbwitika. (Tandeni 2 Korinte 13:5.) Simbu yoshe munapande kumona indi mukalombela ha litangwa na litangwa, kutanda Mbimbiliya na kulilongesayo, kukunguluka na kulinga cipangi ca kwambulula. Waneniko bingila bimwasa kulikuwilamo ebi byuma mangana bimikwase. Cakumwenako, lihuleni ngweni: ‘Kuma njasa kulumbunwinako bakwetu bilongesa bimo bya seho bili mu Mbimbiliya ndi? Kuma kuli bingila bimo binjasa kulikuwilamo cipangi ca kwambulula? Kuma njikalombela ha byuma binjitonda na kumwesa ngwange njakulahela Yehova mu kushula ndi? Kuma simbu yoshe njikakunguluka ndi? Bika binjikwasa kutolilila mwamubwa na kukumbulula nga njili ku biwano?’

15-16. Bika bimunalilongesa ku byuma byaliwanene nabyo ndolome umo ha kuhyana ceseko?

¹⁵ Munapande lalo kunanguka buzeye bweni. Ndolome wa lizina lya Robert wendekele byuma byaliwanene nabyo bije bimwesa seho ya kulilula. Wendekele ngwendi: “Munjakele na myaka ya kukokela ku 20, njawanene cipangi cinjakele na kupanga ha matangwa amo. Litangwa limo munima ya bipangi, mumbanda umo injakele na kupanga nendi wanjilanyele ku njibo yendi. Wendekele ngwendi tukakala lika tubabali, co ‘tukalikuwa.’ Njashangumukile kumubyanena helu-helu lika. Oloni kukapwa muje, njamubyanenene. Co njamulekele nebi binjalingilile ngoco.” Ou ndolome wahyanene eci ceseko, co walingile mwamubwa. Oloni mu kwita kwa simbu mwasinganyekeseseleho, wamwene ngwendi kamukumbulwile mu ngila inapande. Co wendekele ngwendi: “Kunjamubyanenene mu kukanyeka nambe mu bwasi-bwasi ngwe mwalingilile Jozefu mwabyanenene munakazi wa Potifa. (Gene 39:7-9) Njakasamene manene mukwanjipwililile kwakukalu kumubyanena. Oku kwanjilingisile njinanguke ngwange njinapande kukanyamesa busamba bwange na Yehova.”

¹⁶ Neni muwana bukwasi nga mulilula ngwe mwalingilile ndolome Robert. Nameme munahyana ceseko cimo, lihuleni ngweni, ‘Kwanjambatelele simbu ya kupwa hali kucihyana?’ Nga mumona ngweni kuli hamo hamunapande kupangela, kumwapandele kuzeya. Kwakubwa manene kunanguka hamunapande kupangela. Lombeni Yehova amikwase, co lingeniko bimo mangana muyoye mu kulitombola na binangulo byendi.—Samu 139:23, 24.

17. Byuma byaliwanene nabyo Robert byakundamene bati lizina lya Yehova?

¹⁷ Kuli bikwabo bitwasa kulilongesa ku byuma byaliwanene nabyo Robert. Watwaleleleleho kwendeka ngwendi: “Munima ya kumubyanena, owo mumbanda wendekele ngwendi, ‘Unahyana ceseko!’ Munjamwihwile byalumbunwine, wendekele ngwendi kabusamba kendi umo uje wapwileho Mukaleho kunima, wamulekele ngwendi Bakaleho boshe ba bakwenje na bambanda bakalingi byuma byabibi ku bushweke. Co ou mumbanda walekele owo kabusamba kendi ngwendi anjeseka mangana amone indi mukemwo bene. Njanangukile ngwange njalingile mwamubwa manene kwimanena lizina lya Yehova.”

18. Byuma muka bimunayongola kulinga munima ya kumimbwitika? (Taleni lalo cipalo ca “Ñanda ya Mitamba Ibali Ije Yasa Kumikwasa.”)

¹⁸ Nga mulikundika kuli Yehova na kumimbwitika, mumwesa ngweni mushaka kujelesa lizina lyendi nameme byuma bifwe bati. Co lalo muzibuka ngweni Yehova azibuka byeseko bimuli na kuliwana nabyo. Amibezikisa nga mulinga mwoshe mumwasela kutwalelelaho kupwa ba kulongwa. Kulaheleni ngweni kwitila mu sipilitu yendi ya kujela, asa kumyana nzili ya kulinga ngoco. (Luka 11:11-13) Yehova asa kumikwasa mutwaleleleho kukabangeya Yesu munima ya kumimbwitika.