Mwafwa Bika Binzita na Lwozi Binatwalelelaho Kukalako
Mbimbiliya inalumbununa mwamubwa byuma bikanene binzita na lwozi, na byuma bili na kulingisa binzita na lwozi bitwaleleleho kukalako.
BUBI
Njambi watangele bisemi betu bakulibanga Adama na Eva mu cifwa cendi. (Genese 1:27) Oku kulumbununa ngwabo bakele na bifwa bya Njambi byakufwa ngwe kwoloka na cizemo. (1 Korinte 14:33; 1 Iwano 4:8) Nameme ngoco, Adama na Eva kubononokele Njambi, co balingile bubi. Mukemwo tubaboshe tunatambula bubi na kutsa kuli bakebo. (Loma 5:12) Obu bubi, bukatulingisa tukale na bisinganyeka na bilinga bya bukenya.—Genese 6:5; Maki 7:21, 22.
BIFULUMENDE BYA BANU
Njambi katutangele ngwendi tuliyule yetu babenya. Mbimbiliya ngwayo: “Munu uje ali na kwenda kesi na nzili nameme ya kutwamenena linambo lyendi.” (Jelemiya 10:23) Ngeci bifulumende bya banu kubyasa kumanesa binzita na lwozi bili mu kaye.
SATANA NA BADIMONA BENDI
Mbimbiliya inendeka ngwayo: “Kaye koshe kali mu nzili ya uje wamubi.” (1 Iwano 5:19) “Uje wamubi” ibanendeka oku ku mukanda ikeye Satana Liyabolo, uje wapwa muka-kutsiya. (Iwano 8:44) Satana na badimona bendi bali na kungumuna banu na kubalingisa bashangumuke binzita na lwozi.—Kujombolola 12:9, 12.
Banu kubasa kumanesa byuma bikanene binzita na lwozi, kubanga Njambi ikeye asa kulinga ngoco.