Binzita na Lwozi Bikahwa Bati?

NJAMBI AKANYONGESA BIYULO BYA BANU

Njambi akanyongesa biyulo bya banu byoshe ha nzita ibanatumbula mu Mbimbiliya ngwabo Amagidoni.a (Kujombolola 16:16) Ha simbu oyo, “bimyene ba ha lifuti-libu” bakabakungulwila hamo ku “nzita ya litangwa lyakama lya Njambi Muka-nzili Yoshe.” (Kujombolola 16:14) Amagidoni ikeyo ikapwa nzita yamamaneselelo hano hasi.

Njambi akengisa biyulo bya banu na Bumwene bwendi. Obu Bumwene bukayula kutundilila kwilu, co bukebo lika bukakalako myaka yoshe. (Daniele 2:44) Njambi nangula Munendi Yesu Kristu kupwa Mwene wa Bumwene bwa Njambi. (Isaya 9:6, 7; Mateu 28:18) Yesu walongesele baka-kumukabangeya balombe obu Bumwene.b (Mateu 6:9, 10) Banu boshe bakalikwatasana mwisi ya ciyulo cimo ca Mwene Yesu cije cikayula kaye koshe.

Yesu kakapangesa moko yendi mu kulitondela byendi lika, ngwe mubakalingila baka-kuyula ba hano hasi. Yesu kakele na kangu. Ngeci mwakayula kukwesi munu ibakalinga mwamubi mwafwa ya muyati na lifuti nambe mwela kwatunda. (Isaya 11:3, 4) Co lalo banu kubakanene lwozi mwafwa ya kubalinga mwamubi. Mwafwa bika? Mwafwa Yesu akaka mbunge kuli umo na umo wetu. “Akamena kahutu uje alomba bukwasi, co lalo akamena munu wa kwisi uje kesi nou wa kumukwasa. . . . Akabamena ku baka-kulyatelela na baka-lwozi.”—Samu 72:12-14.

Bumwene bwa Njambi bukamanesa bitwa bya nzita byoshe. (Mika 4:3) Co lalo bukatundisako banu bababi baje bali na kubyana kwecela lwozi na kuyandesa bakwabo. (Samu 37:9, 10) Banu boshe bakakala mu kwoloka kwoshe-kwoshe kubali mu kaye.—Ezekiele 34:28.

Bumwene bwa Njambi mu bukayula kaye, banu boshe bakayoya mwamubwa. Obu Bumwene bukatundisako byuma byoshe bije bikalingisa banu balwe, byakufwa ngwe buhutu na njala na kujeneka myela yaibwa kwakukala. Banu boshe bakakala na byakulya byabingi byabibwa na myela yaibwa kwakukala.— Samu 72:16; Isaya 65:21-23.

Bumwene bwa Njambi bukatundisako bukalu bwoshe buje bukaija mwafwa ya nzita. Obu bukalu bunambateselela buyanga na busiwa na bukalu bukwabo bwabwingi buje bukaija mwafwa ya nzita. Nameme baje banatsi, bakasanguka na kutwalelelaho kuyoya hano hasi. (Isaya 25:8; 26:19; 35:5, 6) Binaanga bikakala hamo, co binzita bikapwa “byuma bya laja [bije] bineti.” Co wahi lalo akabisinganyeka.—Kujombolola 21:4.

NJAMBI AKAMANESA BUBI

Bumwene bwa Njambi mu bukayula hano hasi, banu boshe bakalemesa lika Yehovac Njambi wa busunga, uje wapwa “Njambi wa cizemo na kwoloka.” (2 Korinte 13:11) Banu bakalilongesa mwa kuyoyela hamo mu kwoloka. (Isaya 2:3, 4; 11:9) Boshe baje bapangesa bibalilongesa mu Mbimbiliya bakapatuka ku bubi.—Loma 8:20, 21.

NJAMBI AKANYONGESA SATANA NA BADIMONA BENDI

Bumwene bwa Njambi bukanyongesa Satana na badimona bendi baje bakashongangeya banu balwe. (Kujombolola 20:1-3, 10) Mu bakanyongesa Satana na badimona bendi, “kukakala kwoloka kwakama.”—Samu 72:7.

Kulaheleni ngweni cikulaheso ca Njambi ca kumanesa binzita na lwozi cikalishulisilila. Mwafwa Njambi ali na nzili na lishungu lya kumanesa binzita.

• Njambi ali na mana na nzili ya kumanesa binzita na lwozi. (Yombi 9:4) Na cimo cahi cije kasa kulinga Njambi.—Yombi 42:2.

• Njambi wazinda kumona banu bayanda. (Isaya 63:9) Co lalo “wazinda munu woshe uje wazema lwozi.”—Samu 11:5.

• Simbu yoshe Njambi akalingi byanendeka, kesi kukwisa.—Isaya 55:10, 11; Tito 1:2.