Mwasa Kukala Bati mu Kwoloka Nameme Kuli Binzita na Lwozi?
Gary uje wapwile liswalale kunima wendekele ngwendi: “Simbu kanda njililongese Mbimbiliya kunjazibukile byakele na kulingisa mu kaye mukale manene bukenya na bubi. Oloni hano njili mu kwoloka kwa mu bisinganyeka. Njizibuka ngwange Yehova akanena kwoloka mu kaye.”
Gary keti ikeye lika ali na kuliziba ngoco. Tusimutwiyeni omwo Mbimbiliya inakwaselamo banu babangi.
MBIMBILIYA NGWAYO: “Yobe, Obe Yehova uwamubwa, co walibwahesela kukonekela.”—Samu 86:5.
AWA MAJWI ATUKWASA BATI? “Ei vesi ikanjikwasa njikulahele ngwange Yehova wapwa muka-kutetela. Njizibuka ngwange anjikonekela ku byuma byoshe binjalingile kunima munjakele na kulwa mu binzita.”—Wilmar, ku Colombia.
MBIMBILIYA NGWAYO: “Njitanga melu amaha na lifuti-libu lyaliha, co byuma bya laja kubakabyanuka, co kubikakala lalo mu bimbunge byabo.”—Isaya 65:17.
AWA MAJWI ATUKWASA BATI? “Njakala na mushongo wa kwombwa na kukala manene na bishoti mwafwa ya byuma binjaliwanene nabyo mujapwile liswalale. Oloni ou mukanda ukanjanukisa ngwawo ololo Yehova anjikwasa njibale byuma byoshe byabibi bya kunima. Co kubikelukila lalo mu bisinganyeka byange. Obu bunapu bwana bwabubwa manene!”—Zafirah, ku United States.
MBIMBILIYA NGWAYO: “Mu matangwa akayula, munu wa kusungama akasikima. Co kukakala kwoloka kwakama myaka yoshe ngwe ngonde muyakalako myaka yoshe.”—Samu 72:7.
AWA MAJWI ATUKWASA BATI?: “Njikasinganyekesesa manene hali awa majwi.Binzita na bukalu bwoshe buje bukaija mwafwa ya nzita ololo bihwa. Banu batwazema bakakala mu kwoloka na kubanyungilila kwa busunga.”—Oleksandra, ku Ukraine.
MBIMBILIYA NGWAYO: “Batsi bobe bakayoya. . . . Indukeni na kutambeka mu kubwahelela, yeni munalala mu likungu!”—Isaya 26:19.
AWA MAJWI ATUKWASA BATI? “Babushoko bange babangi batsile omwo banu ba ku miyati ikwabo bashakele kutsiya banu boshe ba ku muyati wange. Oloni ei vesi inakulahesa ngwayo njikamona babushoko bange lalo. Njabandamena kukaziba majwi abo a kubwahelela mubakasanguka!”—Marie, ku Rwanda.
MBIMBILIYA NGWAYO: “Kunasala lika kasimbu kakandondo, co banu bababi kubakakalako . . . Oloni banu bababotsi bakaswana lifuti-libu, co bakabwahelela manene mwafwa bakalikuwa kwoloka kwakama.”—Samu 37:10, 11.
AWA MAJWI ATUKWASA BATI? “Nameme nzita inahu, anga kucili bilinga byabibi na baka-bubi. Awa mavesi ananjikwasa manene. Yehova akamono byuma byoshe, co akazibisisa byuma binjili na kuliwana nabyo. Nakulahesa kutundisako tuyando twoshe, co kutukatwanuka lalo.”—Daler, ku Tajikistan.
Banu babanendeka omu mu magazini banapu bamo ba mbunga yakama ya Bakaleho ba Yehova baje bainakwasa Mbimbiliya kukala mu kwoloka. Banalilongesa mwa kuhyanena bizindo. (Efeso 4:31, 32) Bakaleho ba Yehova kubesi kulikobelesa mu biñanda bya bupolitiki nambe kulwa.—Iwano 18:36.
Bakaleho ba Yehova bakalikwasa umo na mukwabo mu kaye koshe. (Iwano 13:35) Cakumwenako, Oleksandraitunendeka hakulibanga, watewelele ku lifuti lyeka hamolika na ndokazi yendi mwafwa ya nzita. Wendekele ngwendi: “Mutwajombokele lika nginga ya lifuti lyetu, twawanene Bakaleho baje batubandamenene mangana batutambule. Bukwasi bwabo bwatukwasele twizilile yoyesi yomu mu lifuti mutwatewelele.”
Bakaleho ba Yehova bamilanya ku biwano byabo kuje kubakalilongesa bya muzimbu waubwa wa mu Mbimbiliya, nomu mumwasa kupangesela ou muzimbu. Yeni ha jw.org mangana muzibuke mutamba wa kukungulukila uli kuyehi neni nambe kulomba Mukaleho wa Yehova umo alilongese neni Mbimbiliya kwa kujeneka kufweta, kupangesa libulu lya Likuweni Kuyoya Myaka Yoshe!