‘Anguleni ku Litangwa Lya Lelo Iya Imukapangela’

1. Byuma muka bitunapande kulinga mangana tupwe bakubwahelela, co mwafwa bika? (Isaya 48:17, 18)

TATE yetu wa mwilu Yehova watuzema manene. Co atonda ngwendi tulikuwe kuyoya ha simbu ino na kulutwe. (Ekele 3:12, 13) Watutangele na cashu ca kulinga byuma byabingi. Oloni katutangele na nzili ya kuliyula yetu babenya, nambe cashu ca kulyangwila yetu babenya byabibwa na byabibi. (Ekele 8:9; Jele 10:23) Azibuka ngwendi twasa kupwa lika bakubwahelela nga tumupangela na kuyoya mu kulitombola na mashiko endi.—Tandeni Isaya 48:17, 18.

2. Satana atonda ngwendi tukulahele bika, co bika byanalingi Yehova?

² Satana atonda ngwendi tukulahele ngwetu twasa kupwa bakubwahelela kwa kujeneka Yehova, co lalo banu basa kuliyula bakebo babenya. (Gene 3:4, 5) Yehova natabesa banu baliyule bakebo babenya ha simbu yaindondo mangana amwese ngwendi Satana wapwa muka-makuli. Tunalimwena omwo banu banonowa kuliyula bakebo babenya. Nameme ngoco, Mbimbiliya inendeka banalume ha banakazi babangi baje bapwile ba kubwahelela mwafwa ya kupangela Yehova. Yesu wapwile umo wabo uje wabwahelelele manene mwafwa ya kupangela Yehova. Muno mu cilongesa tukumbulula bihula binaatako: (1) Bika byashongangeyeye Yesu angule kupangela Yehova. (2) Mwafwa bika Yehova nafwila kumulemesa? Na (3) bika binatushongangeya twangule kupangela Yehova?

BIKA BYASHONGANGEYEYE YESU ANGULE KUPANGELA YEHOVA?

3. Satana wakulahesele kwana Yesu byuma muka, co bika byalingile Yesu?

³ Yesu mwakele hano hasi, wakele na lisesa lya kulyangwila kupangela Yehova nambe Satana. Satana wakulahesele kwana Yesu bumwene bwoshe bwa hano hasi, nga atsikama na kumulemesa lika lumo. Yesu wakumbulwile ngwendi: “Tundaha obe Satana! Mwafwa banasoneka ngwabo: ‘Yehova Njambi yobe ikeye iunapande kulemesa, co ikeye lika iunapande kupangela cipangi ca kujela.’” (Mate 4:8-10) Mwafwa bika Yesu wangwile kupangela Yehova? Tucisimutwiyeni byuma bimo byamushongangeyeye alinge ngoco.

4-5. Byuma muka bikwabo byashongangeyeye Yesu angule kupangela Yehova?

⁴ Cuma cakama cashongangeyeye Yesu angule kupangela Yehova capwile cizemo cakele naco hali Ishe. (Iwano 14:31) Kutundaho, Yesu wangwile kupangela Yehova mwafwa wazibukile ngwendi kunapande kulinga ngoco. (Iwano 8:28, 29; Kujo 4:11) Wazibukile ngwendi Yehova ikeye watangele byuma byoshe, twasa kumukulahela, co lalo Ikeye akatwana byuma byoshe babibwa. (Samu 33:4; 36:9; Yako 1:17) Yehova akendeka busunga kuli Yesu simbu yoshe, co lalo Ikeye namwana byuma byoshe byali nabyo. (Iwano 1:14) Oloni Satana nalisezela kulako na Yehova. Mwafwa Satana nalingisa banu balinge bubi buje bunanene kutsa. Satana wapwa muka-makuli, co lalo wakala na nuna na linyanyamena. (Iwano 8:44) Yesu wazibukile mwamubwa Yehova na Satana. Ngeci, kashakele kutembwinina Satana na kutengulukila Yehova.—Filp 2:5-8.

⁵ Yesu wangwile lalo kupangela Yehova mwafwa wazibukile ngwendi kuli bubwa butunda mu kulinga ngoco. (Hebe 12:2) Wazibukile ngwendi nga atwalelelaho kupwa wakulongwa, co ajelesa lizina lya Ishe na kumanesa bubi na kutsa bije byanenele Satana.

MWAFWA BIKA YEHOVA NAFWILA KUMULEMESA?

6-7. Mwafwa bika banu ano matangwa kubesi na kulemesa Yehova, co mwafwa bika kunafwila kumulemesa?

⁶ Banu babangi ano matangwa kubesi na kulemesa Yehova mwafwa kubazibuka bifwa byabibwa byakala nabyo na byuma byanabalingila. Banalifu na banu bambulwilile kapositolo Paulu mu Atena. Nabo kubazibukile Njambi.—Bili 17:19, 20, 30, 34.

⁷ Kapositolo Paulu walekele banu ba mu Atena ngwendi, Njambi “Ikeye akana banu boshe kuyoya na kuhwima na byuma byoshe.” Watwaleleleho kwendeka ngwendi: “Co mwafwa ya ikeye, tuli na kuyoya, tuli na kwenda, co kutuli.” Njambi ikeye watangele byuma byoshe, co “watangele miyati yoshe ya banu kutunda ku munu umolika.” Ngeci Ikeye lika itunapande kulemesa.—Bili 17:25, 26, 28.

8. Byuma muka kasa kulinga Yehova, co namwesa bati ngwendi watuzema?

⁸ Yehova wapwa Ishamatanga na Mwene wa mwilu na hasi, co asa kulinga byoshe-byoshe byashaka. Ngwe Yehova washakele ngwe watusindiyiye kumupangela. Oloni Yehova kesi kulinga ngoco. Nameme ngoco, natwana bukaleho buje bumwesa ngwabwo kwakala, co lalo wazema umo na umo wetu. Atonda ngwendi banu babangi bapwe ba busamba bendi myaka yoshe. (1 Timo 2:3, 4) Mukemwo Yehova natulongesa, mangana tulongese bakwetu byuma byabibwa bya nayongola kukatulingila kulutwe. (Mate 10:11-13; 28:19, 20) Co lalo nabwahesa cikungulukilo kuje kutwasa kumulemesela na kutambula binangulo kutundilila ku bakulunu baje batuzema.—Bili 20:28.

9. Yehova namwesa bati ngwendi wazema banu boshe?

⁹ Yehova namwesa cizemo cendi ha kwana byuma byabibwa na ku banu baje kubakulahelele ngwabo kwakala. Cakumwenako, kushwa lika kunima, banu babangi banalyangwila kulinga byuma bibamona bakebo ngwabo binapu byabibwa kutubakana kwononoka Yehova. Nameme ngoco, Yehova nabana byuma bije bibakwasa batwaleleleho kulikuwa kuyoya. (Mate 5:44, 45; Bili 14:16, 17) Mwafwa Yendi basa kukala na bana, babushoko baje babazema na babusamba. Co lalo basa kupanga na kulikuwa buyoye. (Samu 127:3; Ekele 2:24) Obu bunapu bukaleho buje bumwesa ngwabwo, Tate yetu wa mwilu wazema manene banu. (Ekizo 34:6) Tucisimutwiyeni ha byuma binatulingisa twangule kupangela Yehova na bibezikiso bitundamo nga twangula kumupangela.

BIKA BINATUSHONGANGEYA TWANGULE KUPANGELA YEHOVA?

10. (a) Cuma muka cakama cikatushongangeya tupangele Yehova? (Mateu 22:37) (b) Kukonekela kwa Yehova kunamikwasa bati? (Samu 103:13, 14)

¹⁰ Yesu wangwile kupangela Yehova mwafwa wamuzemene, mu ngila imolika netu tukapangela Yehova mwafwa twamuzema. (Tandeni Mateu 22:37.) Tukashwene manene kuyehi na Yehova mu tukalilongesa bifwa byendi. Cakumwenako, Yehova wapwa muka-kukonekela. BaIsalele mubalikelele kwononoka Yehova, Yehova wabalekele ngwendi: “Njimilomba museze bingila byeni byabibi.” (Jele 18:11) Yehova azibuka ngwendi kutwalumbunukile. (Tandeni Samu 103:13, 14.) Kusinganyekesesa ha kukonekela kwa Yehova na bifwa byakala nabyo kutushongangeya tumupangele myaka yoshe.

11. Byuma muka bikwabo binatushongangeya tulyangwile kupangela Yehova?

¹¹ Tukapangela lalo Yehova mwafwa cikeco cuma cacibwa citunapande kulinga. (Mate 4:10) Co lalo tuzibuka ngwetu kuli byuma byabibwa bitunda mu kupwa bakulongwa kuli Yehova. Nga tupangela Yehova mu kulongwa, co tujelesa lizina lyendi na kumwesa ngwetu Satana wapwa muka-makuli. Co lalo tuzibisa Tate yetu kubwaha ku mbunge. Nga twangula kupangela Yehova ha simbu ino, co tukamupangela myaka yoshe kulutwe.—Iwano 17:3.

12-13. Bika bitulilongesa ku byuma byaliwanene nabyo Jane na Pam?

¹² Omwo tucili tu banike, twasa kulilongesa kuzema manene Yehova. Co cizemo cetu kuli Ikeye citwalelelaho kwama omwo tukola. Ebi bikebyo byalingiwile kuli ndokazi Jane na shongo yendi Pam.a Jane wakele na myaka 11, Pam wakele na myaka 10 mubashangumukile kulilongesa Mbimbiliya. Nameme bisemi babo kubashakele kulilongesa Mbimbiliya, batabesele Jane na Pam balilongese Mbimbiliya na Bakaleho ba Yehova. Oloni babalekele ngwabo basa lika kubatabesa nga bataba kuya na naanga yabo ku ceci calumingo na calumingo. Jane wendekele ngwendi: “Byuma bibanjilongesele Bakaleho ba Yehova kutundilila mu Mbimbiliya, byanjikwasele njijeneke kulikobelesa mu bilinga byabibi bya kufwa ngwe; Kupangesa mambanda akupendesa na kulinga bupangala, byuma bije bibakele na kulinga banjakele na kukobela nabo sikola.”

¹³ Munima ya myaka yaindondo, Jane na Pam bapwile baka-kwambulula. Kutundaho, bashangumukile kulinga bupainiya oku bali na kunyunga bisemi babo baje bakulubalele. Jane wendekele mwalizibilile ha byuma byabalingililile Yehova, ngwendi: “Njalilongesele ngwange Yehova akanyungilila babusamba bendi ngwe mumwesela mukanda wa 2 Timothi 2:19 uje wendeka ngwawo, ‘Yehova azibuka banu bendi.’” Kwendeka lika busunga, Yehova akanyungu boshe baje bamuzema na kumupangela.

14. Twasa kwimanena bati Yehova? (Taleni na bikupulo.)

¹⁴ Tushaka kujelesa lizina lya Yehova. Acisinganyekeni ngwe muli na kabusamba uje wakala na ngozi, muka-kwana, co lalo muka-kukonekela. Co litangwa limo, muziba munu endeka kabusamba keni ngwendi wapwa munu wamubi, co kapwile wa kulongwa. Mwasa kulinga bati? Tukulahela ngwetu mwimanena kabusamba keni. Mu ngila imo lika, nga Satana na baje bali na kulikwatasana nabo bendeka byuma bya makuli hali Yehova, tukamwimanena na kwendeka busunga hali Ikeye. (Samu 34:1; Isaya 43:10) Tukamwesa ngwetu tushaka kupangela Yehova na mwonyo wetu woshe, co tukamwesa ngoco mu bilinga na majwi etu.

15. Byuma muka byabibwa byatundilemo, kapositolo Paulu mwatengulwileko bimo mu buyoye bwendi? (Filipi 3:7, 8)

¹⁵ Tukatengululako bimo mu kuyoya kwetu mangana tupangele Yehova na kulinga byabingi mu cipangi Cendi. Cakumwenako, kapositolo Paulu wakele na citwamo ca seho mu bulombelo bya ciJuda. Oloni walyangwilile kuseza buje bulombelo na kupwa ndongesi ya Kristu na kupangela Yehova. (Gala 1:14) Bika byatundilemo? Paulu walikuwile byuma byabibwa mu cipangi ca Yehova, co akayula na Kristu mwilu. Paulu kalibeyele mwafwa ya kupangela Yehova. Ngeci netu nga twangula kupangela Yehova, kutukalibeye nambe kamandondo.—Tandeni Filipi 3:7, 8.

16. Bika bitulilongesa ku byuma byaliwanene nabyo Julia? (Taleni na bikupulo.)

¹⁶ Nga tumona kupangela Yehova kupwa cuma ca seho manene mu kuyoya kwetu, co Yehova atubezikisa ha simbu ino na kulutwe. Tucisimutwiyeni ha byuma byaliwanene nabyo ndokazi Julia. Mwapwile mwanike, Julia wakele mu cibunga ca baka-kwimba mu ceci mwakele. Wakele na kwimba mwamubwa. Ngeci bashangumukile kumulongesa mangana apwe muka-kwimba wa mutongwe. Munima ya simbu yaindondo, Julia watsimanene manene, co washangumukile kwimbila na mu myela ya kutsimana. Mwakele ku sikola ya kulilongesa kwimba myaso, yakele na kukobela nendi sikola washangumukile kwendeka nendi bya Njambi na kumuleka ngwendi Njambi ikeye Yehova. Kukwetile simbu yailaha, Julia washangumukile kulilongesa Mbimbiliya lubali mu calumingo. Mu kwita kwa simbu, walyangwilile kupangesa simbu na nzili yendi mu kupangela Yehova kutubakana kupwa muka-kwimba. Kukwapwile kwakwasi kulinga ngoco. Julia wendekele ngwendi: “Banu babangi bakele na kwendeka ngwabo nji cilema mwafwa ya kulikela kwimba na kushangumuka kupangela Yehova. Oloni njashakele kupangela Yehova mu kuyoya kwange kwoshe.” Julia ali nakuliziba bati mwafwa ya byuma byangwile kulinga myaka 30 kunima? Wendekele ngwendi: “Njinabwahelela mwafwa njinangula kupangela Yehova, co njakulahela ngwange Yehova akashulisilila byuma biinashungwiya mbunge yange kulutwe.”—Samu 145:16.

TWALELELENIHO KUPANGELA YEHOVA

17. Kuyoya ku mamaneselelo akatumameno ka myaka ino kunakundama bati banu baje banalyangwila kupangela Njambi na baje kanda balinge ngoco?

¹⁷ Tuli na kuyoya ku mamaneselelo a katumameno ka myaka ino. Kapositolo Paulu wasonekele ngwendi: “Mwafwa ‘kunasala simbu yaindondo lika,’ co ‘uje ali na kwija ololo eta, co kakotokela.’” (Hebe 10:37) Ei ñanda inatukundama bati? Simbu inasalako inapu yaindondo, ngeci banu banapande kwangula kupangela Yehova. (1 Kori 7:29) Nga mwalyangwila kupangela Yehova, zibukeni ngweni nameme muli na kuliwana na byeseko, binapu bya “simbu yaindondo lika.”

18. Yehova na Yesu bashaka ngwabo tulinge byuma muka?

¹⁸ Yesu washongangeyeye banu ngwendi bapwe bandongesi bendi na kutwalelelaho kumukabangeya. (Mate 16:24) Nameme tunapangela Yehova ha myaka yaingi, tunapande kulifwita mangana tutwaleleleho kumupangela. Keti kwakwasi kulinga ngoco, oloni nga tutwalelelaho kupangela Yehova tupwa bakubwahelela na kulikuwa bibezikiso byabingi nameme ha simbu ino.—Samu 35:27.

19. Bika bitulilongesa ku byuma byaliwanene nabyo Gene?

¹⁹ Bamo bakasinganyeka ngwabo nga bapangela Yehova, co kubalikuu buyoye. Nga mucili mu banike, kuma muli na kuliziba ngweni kupangela Yehova kumilingisa mujeneke kulikuwa buyoye ndi? Ndolome Gene wendekele ngwendi: “Njalizibile ngwange kupwa Mukaleho wa Yehova kunjilingisa njijeneke kulikuwa buyoye. Njamwene bakwetu banike balikuwa kuya ku bilika, kukala na mapangala nambe kweha bweho bwa lwozi ha makina. Oloni yange njakele na kupangesa simbu yange yoshe kuya na kwambulula na kuya ku biwano.” Kukala na bisinganyeka bya cifweci kwalingisile Gene alinge bika? Wendekele ngwendi: “Njashangumukile kulinga byuma byabibi bibakele na kulinga bakwetu banike.” Watwaleleleho kwendeka ngwendi: “Ha kulibanga, njakele na kulikuwa kulinga ebi byuma oloni mu kwita kwa simbu kunjapwile wa kubwahelela. Njashangumukile kusinganyekesesa bibezikiso bikatundu mu kwononoka Mashiko a mu Mbimbiliya, co njalyangwilile kupangela Yehova na mbunge yange yoshe. Kutunda haje bene, njalimwena Yehova mwanakumbulwila malombelo ange oshe.”

20. Byuma muka bitunapande kulyangwila kulinga?

²⁰ Muka-kwimba wembilile Yehova ngwendi: “Nabwahelela uje iwangula na kumunena kuyehi nobe mangana akale mu malapa obe.” (Samu 65:4) Ngeci, tutwaleleleniho kupangela Yehova. Ngeci lika mwa Joshua, netu twendeka ngwetu: ‘Oloni yange na naanga yange, tukapangela Yehova.’—Joshua 24:15.