Watchtower LAIBRALI YA HA INTANETI
Watchtower
LAIBRALI YA HA INTANETI
Mbunda
  • MBIMBILIYA
  • MABULU
  • BIWANO
  • w26 January pp. 20-25
  • Bika Bimunapange Kulinga Mukumwesa Kukandelela ku Ndando ya Kupatula?

Haunanyateka kuhesi vidio.

Cabihya, kuli bukalu bunonowesa ei vidio kushokoloka.

  • Bika Bimunapange Kulinga Mukumwesa Kukandelela ku Ndando ya Kupatula?
  • Kaposhi Ka Kukengela Kali Na Bumwene Bwa Yehova (Kaposhi ka Kukengela ka Kulilongesa)—2026
  • Tumitwe twa Biñanda
  • Biñanda bya Kulifwa
  • BAJE BALI NA KULILONGESA MBIMBILIYA
  • BAKA-KRISTU BA KUMBWITIKA
  • BIMANGA BA KUZIMBALA
  • MUNALYANGWILA KULINGA BIKA?
  • Cizemo ca Yehova Citukwasa Bati?
    Kaposhi Ka Kukengela Kali Na Bumwene Bwa Yehova (Kaposhi ka Kukengela ka Kulilongesa)—2025
  • Bika Bitulilongesa ku Ndando ya Kupatula?
    Kaposhi Ka Kukengela Kali Na Bumwene Bwa Yehova (Kaposhi ka Kukengela ka Kulilongesa)—2025
  • Bika Bitutondela Ndando ya Kupatula?
    Kaposhi Ka Kukengela Kali Na Bumwene Bwa Yehova (Kaposhi ka Kukengela ka Kulilongesa)—2026
  • Mwalibwahesela Litangwa lya Seho Manene mu Mwaka Ndi?
    Kaposhi Ka Kukengela Kali Na Bumwene Bwa Yehova (Kaposhi ka Kukengela ka Kulilongesa)—2024
Tala Bikwabo
Kaposhi Ka Kukengela Kali Na Bumwene Bwa Yehova (Kaposhi ka Kukengela ka Kulilongesa)—2026
w26 January pp. 20-25

MARCH 23-29, 2026

MWASO 18 Twakandelela ha Kutwana Ndando ya Kupatula

Mwasa Kumwesa Bati Kukandelela ku Ndando ya Kupatula?

“Mwafwa cizemo cali naco Kristu cikatushongangeya.”—2 KORI 5:14.

BILI MUNO MU CILONGESA

Mu twasa kumwesela kukandelela ku ndando ya kupatula.

1-2. Ndando ya kupatula inapande kutushongangeya kulinga byuma muka, co mwafwa bika? (2 Korinte 5:14, 15) (Taleni na cikupulo.)

LINGENI ngwe banamyobola mu njibo ije inamilundumukilile, kuma kumumwesa kukandela kuli munu na myobola ndi? Cili bene mumukandelela manene na kumuleka ngweni kumukebala byanamilingila.

2 Ngwe mutunalilongesela mu cilongesa cinahu, kutwasa kulyobola yetu babenya ku bubi butunatambula kuli Adama na Eva. Nameme ngoco, mwafwa ya ndando ya kupatula Yehova asa kutukonekela bubi bwetu na kutukwasa tulikute busamba nendi, co lalo twasa kukala na lilabelelo lya kupwa ba kulumbunuka kulutwe. Ngeci tuli na lilabelelo lya kukayoya myaka yoshe mu kaye kakaha. Yesu watumwesele cizemo mwalyanene kwija na kututsila, co watuzemene manene nameme te kanda aije hano hasi. (Prov 8:30, 31) Kapositolo Paulu wasonekele ngwendi “cizemo cali naco Kristu cikatushongangeya.” (Tandeni 2 Korinte 5:14, 15.) Oku kumwesa ngwabo tunapande kweseka mwoshe mutwasela kumwesa kukandelela ku cizemo canatumwesa Yesu.

3. Mwafwa bika munu na munu nasa kumwesa kukandelela ku ndando ya kupatula mu mu ngila ya kuliseza na bakwabo?

3 Mwasa kumwesa bati kukandelela ku ndando ya kupatula? Munu na munu nasa kumwesa kukandelela mu ngila ya kuliseza na bakwabo. Cakumwenako, acisinganyekeni ngweni banu batatu bali mu bungenzi, co bali na kuya ku mutambela umo. Oloni umo na umo wabo atunda kumutambela weka, co lalo boshe bapangesa bingila bya kuliseza. Mu ngila imo lika munasa kupangesa ngila ya kuliseza na bakweni mu kumwesa kukandelela ku ndando ya kupatula kwesekesa nomwo mubunakanyamena busamba bweni na Yehova. Ngeci muno mu cilongesa tusimutwiya ha bibunga bitatu bya banu na kumona mubasa kumwesela kukandelela ku ndando ya kupatula. Cakulibanga, baje bacili na kulilongesa Mbimbiliya. Camucibali, baka-Kristu ba kumbwitika. Camutitatu, bimanga baje banatundu ha butanga.

BAJE BALI NA KULILONGESA MBIMBILIYA

4. Yehova akamono bati baje bacili na kulilongesa Mbimbiliya?

4 Nga muli na kulilongesa Mbimbiliya, co zibukeni ngweni lishungu lyeni lya kushaka kulilongesa Mbimbiliya limwesa ngwalyo Yehova ashaka ngwendi mupwe babusamba bendi, co amikwasa mangana mushwene kuyehi nendi. (Iwano 6:44; Bili 13:48) “Yehova akelula bimbunge bya banu.” Oku kulumbununa ngwabo akamono kufwitangana kweni, co ali na kuziba kubwaha kumimona muli na kweseka mwoshe mumwasela kutengulula futisi yeni mangana mumuzibise kubwaha. (Prov 17:3; 27:11) Ndando ya kupatula yamyanene Yehova ikeyo inalingisa mwase kulikuta busamba nendi. (Loma 5:10, 11) Ngeci keti mwombwanese obu bwana.

5. Baje bacili na kulilongesa Mbimbiliya basa kupangesa bati cinangulo cili ku mukanda wa Filipi 3:16?

5 Nga muli na kulilongesa Mbimbiliya, mwasa kumwesa bati kukandelela ku ndando ya kupatula? Mwasa kulinga ngoco nga mukabangeya cinangulo ca kapositolo Paulu canangwile baka-Filipi ngwendi: “Hoshe-hoshe hatunete mu kukola, tutwaleleleniho kwenda mwamubwa omu mu ngila ya kulifwa.” (Filp 3:16) Mu Mbimbiliya ikwabo bananungulula ei vesi ngwabo: “Tunapande kutwalelelaho kwenda mu ngila ya kulifwa.” Ngeci keti mutabese cuma coshe-coshe cimyonowese kwenda mu ngila iya ku kuyoya.—Mate 7:14; Luka 9:62.

6. Bika bibanapande kulinga baje bacili na kulilongesa Mbimbiliya nga kuli na kubakaluwila kutengululako bimo mu kuyoya? (Detronoma 30:11-14) (Taleni na cikupulo.)

6 Batico nga kuli na kumikaluwila kukulahela cilongesa cimo cimunalilongesa mu Mbimbiliya? Nga mukemwo, co tondeseseni hali oco cilongesa na kulomba Yehova amikwase kucizibisisa mwamubwa. (Samu 86:11) Nga kucili na kumikaluwila kucizibisisa, co keti mushote mbunge, oloni twaleleleniho kulilongesa Mbimbiliya. Mu kwita kwa simbu mwasa kukacizibisisa mwamubwa. Batico nga kuli na kumikaluwila kwecela kulinga byuma biinabindika Mbimbiliya? Anukeni ngweni Yehova kasa kumileka mulinge byuma bije kumwasa kulinga. Ngeci mwasa kuyoya mu kulitombola na binangulo byendi. (Tandeni Detronoma 30:11-14.) Co lalo Yehova nakulahesa kumikwasa. (Isaya 41:10, 13; 1 Kori 10:13) Ngeci twaleleleniho kumwononoka. Kutubakana kwaka manene mbunge ku bukalu bumuli na kuliwana nabwo, kandeleleni ku byuma byali na kumilingila Yehova, maneneni ndando ya kupatula yanamyana. Omwo mutwalelelaho kuzema Yehova mulimwena ngweni cili bene “mashiko endi kuwapwile a kulema.”—1 Iwa 5:3.a

7. Bika bibanapande kusinganyekesesa babaha baje bali na kukolela mu busunga?

7 Batico kuli yeni babaha muli na kukolela mu busunga? Neni muli na kulilongesa Mbimbiliya. Co yeni munapu bilongesa bya Mbimbiliya bya seho manene ku bisemi beni. Mbimbiliya inendeka ngwayo: “Shweneni kuli Njambi, co nendi ashwena kuli yeni.” (Jems 4:8; 1 Kolo 28:9) Nga mweseka mwoshe mumwasela kushwena kuli Yehova, co nendi ashwena kuyehi neni. Kukolela mu busunga keti kukekwo kunalingisa Yehova amyake mbunge, oloni wamyaka mbunge mwafwa ashaka ngwendi mupwe kabusamba kendi. Bika byanamilingila Yehova mangana mwase kulikuta nendi busamba? Namyana ndando ya kupatula, co kumwapandele kwombwanesa obu bwana bwabubwa bwanamyana. (Loma 5:1, 2) Simbu kanda muye ku Canukiso ca uno mwaka, singanyekeseseni manene ha byuma byanamilingila Yehova na Yesu. Co singanyekeseseni ha byuma bimushaka kulinga mu kuyoya kweni na kulyakela bilengo bije bimwesa ngwabyo munakandelela ku byuma byanamilingila Yehova.b

BAKA-KRISTU BA KUMBWITIKA

8. Baka-Kristu ba kumbwitika banamwesa bati likulahelo mu ndando ya kupatula?

8 Nga mu baka-Kristu ba kumbwitika, co munamwesa laja likulahelo mu ndando ya kupatula mu bingila byabingi. Cakumwenako, munatengulula yoyesi yeni na kulinga byuma bizibisa Yehova kubwaha na kupwa kabusamba kendi. Munononoka lishiko lya Yesu lya kupwisa banu bandongesi ha kulekako bakweni bya likulahelo lyeni. Munalyangwilile kulikundika kuli Yehova na kumimbwitika. Kuma kuli bamo bamilwisile mwafwa ya kwimanena kulemesa kwa busunga ndi? (2 Timo 3:12) Kukolesa kweni kunamwesa ngwakwo mwazema Yehova, co munakandelela ku ndando ya kupatula.—Hebe 12:2, 3.

9. Mwafwa bika baka-Kristu ba kumbwitika banapande kunyanyama?

9 Ha kupwa baka-Kristu ba kumbwitika tunapande kunyanyama. Nga kutunyanyama twasa kushangumuka kwombwanesa ndando ya kupatula. Mu ngila muka? Tucisimutwiyeniko hali baka-Kristu bakulibanga ba mu Efeso. Yesu washangalele aba baka-Kristu mwafwa ya kukolesa kwabo. Nameme ngoco, wabalekele ngwendi: ‘Bukalu bunjinawana kuli yeni obu: munaseze cizemo cimwakele naco hakulibanga.’ (Kujo 2:3, 4) Ngwe muwamwesela majwi a Yesu, ntwima ya muka-Kristu yasa kutepuluka kamandondo-kamandondo. Munu wa cifweci asa kulombela, kuya ku biwano na kuya mu lihya, oloni kesi na ntwima yakele nayo hakulibanga. Ngeci ha simbu ei ali na kulingila lika lishiko, keti mwafwa ya cizemo. Bika bimwasa kulinga nga muliziba ngweni cizemo ceni kuli Yehova cili na kutepuluka?

10. Twasa ‘kusinganyekesesa’ bati na ‘kwaka manene mbunge’ ku bipangi bya ku sipilitu? (1 Timothi 4:13, 15)

10 Kapositolo Paulu walekele Timothi ngwendi ‘asinganyekesese’ na ‘kwaka manene mbunge’ ku bipangi bya ku sipilitu byakele na kupanga. (Tandeni 1 Timothi 4:13, 15.) Ngwe mucimwesela eci cinangulo, esekeni kusinganyekesesa ha bingila bije bimikwasa mutwaleleleho kukala na “ntwima ya sipilitu.” (Loma 12:11) Cakumwenako, nga mushaka ngweni mukake manene mbunge ku biwano, co libwaheseleni mwamubwa. Co lalo nga mushaka ngweni musinganyekesese mwamubwa ha byuma bimutanda, co lingileni cilongesa ca munu endilika ku mwela wa kwoloka. Ngecilika mutukashambeya tuhya mangana tutwaleleleho kushukuma, netu tunapande kulinga ebi byuma bitunasimutwiya mangana tumwese kukandelela ku ndando ya kupatula na ku byuma byoshe byanatulingila Yehova. Singanyekeseseni manene ha byuma bimuli na kulikuwa ha kupwa umo wa Bakaleho ba Yehova mu byalumingo bya kukokela ku Canukiso. Oku kumikwasa mumwese manene kukandelela ku ndando ya kupatula ije inalingisa mulikute busamba bwa kukanyama na Yehova.

11-12. Nga simbu imo muliziba kuzeya, kuma oku kulumbununa ngwabo Yehova kesi na kumyana sipilitu yendi ya kujela ndi? Lumbununeni. (Taleni na cikupulo.)

11 Nga muliziba ngweni ntwima yeni ya kulemesa Yehova ili na kutepuluka, co keti muzeye nambe kusinganyeka ngweni kumwesi na sipilitu ya Njambi. Anukeni byasonekele kapositolo Paulu kuli baka-Korinte kutalesa ku cipangi cendi ca kwambulula. Wasonekele ngwendi: “Oloni nameme njilinga ca kulisindiya, anga njicili na cipangi ca bungamba cibananjana.” (1 Kori 9:17) Bika byalumbunwine?

12 Bisimbu bimo Paulu kakele na lishungu lya kwambulula. Nameme walizibile ngoco, watwaleleleleho na cipangi cendi ca kwambulula. Ngeci neni mwasa kulinga ngoco. Twaleleleniho kulinga byuma byabibwa nameme bisimbu bimo muliziba ngweni kumwesi na lishungu lya kulinga ngoco. Lombeni Yehova amyane “lishungu na nzili ya kulinga byuma” byashaka ngwendi mulinge. (Filp 2:13) Twaleleleniho kulinga byuma bije bimikwasa mushwene muyehi na Yehova. Kulaheleni ngweni mu kwita kwa simbu cizemo ceni kuli Yehova citwalelelaho kukola.

13. Twasa kulilula bati mangana tumone indi tucili na likulahelo?

13 Kunapu kwa seho kulilula mutuli na kuyoyela ngwe muumwesela mukanda wa 2 Korinte 13:5 uje wendeka ngwawo: “Twaleleleniho kulyeseka mangana mumone indi mucili mu kukulahela. Twaleleleniho kulilula mangana mumone mumunapu.” Ngeci munasa kulihula ngweni: ‘Kuma njikaka bya Bumwene mu mutamba wakulibanga mu buyoye bwange ndi?’ (Mate 6:33) ‘Kuma byuma binjikalizimi nabyo buli bimwesa ngwabyo njazinda byuma byabibi ndi?’ (Samu 97:10) ‘Kuma njikakundwiya likwatasano mukati ka bakwetu baka-kutaba ndi?’ (Efeso 4:2, 3) Simbu ya Canukiso ikeyo simbu yaibwa ya kusinganyekesesa ha ndando ya kupatula yatwanene Yehova na kulilula yetu babenya mangana tumone indi tuli na kuyoyela Kristu indi tuli na kuliyoyela yetu babenya.c

BIMANGA BA KUZIMBALA

14. Bika byasa kulingisa baka-Kristu bamo balikele kulikwatasana na cikungulukilo?

14 Baka-Kristu bamo banalikele kulikwatasana na cikungulukilo munima ya kupangela Yehova mu kulongwa ha bingonde nambe ha myaka yaingi. Mwafwa bika? Bamo banalingi ngoco mwafwa ya “bishoti bya mu kuyoya.” (Luka 21:34) Bamo banatanuka mwafwa ya majwi nambe bilinga bya bakwabo baka-Kristu. (Jems 3:2) Bamoco balingile bubi bwakama, co kuli na kubakaluwila kulomba bukwasi. Mwoshe-mwoshe mubinafwila byuma kuli yeni, bika bimikwasa mwilukile kuli Yehova? Ndando ya kupatula imishongangeya mulinge bika?

15. Yehova namwesa bati ngwendi waka mbunge bimanga ba kuzimbala? (Ezekiele 34:11, 12, 16)

15 Acisinganyekeni mwakalizibila Yehova hali baje banalikele kulikwatasana na cikungulukilo. Yehova kabayengwile, oloni ali na kubashakezeka. Ali na kubakwasa beluke kuli ikeye. (Tandeni Ezekiele 34:11, 12, 16.) Kuma neni Yehova ashaka kumikwasa ndi? Eyo. Omwo muli na kutanda cino cilongesa, munamwesa laja ngweni mushaka lalo kumuzibisa kubwaha. Yehova wamwene byabibwa muli yeni mukemwo wamikokelele kuli ikeye. Co lalo na simbu ino acili na kumona byabibwa muli yeni mukemwo ashaka ngwendi mwiluke kuli ikeye.

16. Bika byasa kukwasa bimanga ba kuzimbala beluke kuli Yehova? (Taleni na cikupulo.)

16 Tumilomba musinganyekesese mwamubwa ha majwi ali mu broshuwa ya Mukutele ku Jehova. Ei broshuwa inendeka ngwayo: “Kulaheleni ngweni Yehova amikwasa manene omwo mwilukila kuli ikeye. Amikwasa mangana keti mulishoshomwene nambe kuliziba kubihya, co amikwasa mukale na kwoloka kwa mu bisinganyeka mwafwa ya kukala na citakutaku ca kujela. Byoshe ebi bimikwasa mupangele lalo Yehova hamo na bandolome na bandokazi beni.” Anukeni lalo ngweni bakulunu bashaka manene kumikwasa. Banapu “ngwe mwela wa kubanda lihunzi, mwela wa kubanda nyonzi ya lihunzi.” (Isaya 32:2) Mu kushaka kumwesa kukandelela ku ndando ya kupatula, lihuleni ngweni, ‘Bika binjinapande kulinga mangana njibwahese byuma mukati kange na Yehova?’ (Isaya 1:18; 1 Pita 2:25) Cakumwenako, mwasa kuya ku biwano ku Njibo ya Bumwene. Mwasa lalo kuleka mukulunu umo ngweni mushaka kuzibuka bimunapande kulinga mangana mwiluke kuli Yehova, co oku kunasa kwambateselela na kumitondela munu mangana alilongese neni Mbimbiliya ha simbu ya kupwamo. Kulaheleni ngweni Yehova amibezikisa omwo mulifwita kulinga byuma bije bimwesa ngwabyo mwakandelelela ku ndando ya kupatula ya Munendi.

MUNALYANGWILA KULINGA BIKA?

17-18. Twasa kupangesa bati mwamubwa simbu yetu simbu kanda Canukiso ca uno mwaka cete?

17 Yesu wendekele ngwendi Yehova wamutumine kwakwana mwonyo wendi kupwa ndando ya kupatula “mangana woshe amukulahela keti anyonge, oloni awane kuyoya kwa myaka yoshe.” (Iwano 3:16) Yehova napangesa ndando ya kupatula kupwa ngila ya kutupatwilamo ku bubi na ku kutsa. Kutushaka kwombwanesa bwana bwa kulitila bwa ndando ya kupatula. (Loma 3:23, 24; 2 Kori 6:1) Matangwa a kukokela ku canukiso akewo matangwa a kusinganyekesesa manene ha cizemo canatumwesa Yehova na Yesu. Kulinga ngoco kutushongangeya tumwese kukandelela ku byuma bibanatulingila.

18 Mwasa kumwesa bati kukandelela ku ndando ya kupatula? Munu na munu nasa kumwesa kukandelela mu ngila ya kuliseza na bakwabo. Kulaheleni ngweni Yehova abezikisa kulifwita kweni omwo mulemesela hamo Yehova na bakweni baka-Kristu, ‘baje kubesi na kuliyoyela bakebo babenya, oloni bali na kuyoyela uje wabatsililile.’—2 Kori 5:15.

MWASA KUMWESA BATI KUKANDELELA KU NDANDO YA KUPATULA NGA . . .

  • muli na kulilongesa Mbimbiliya?

  • mu baka-Kristu ba kumbwitika?

  • munalikele kulikwatasana na cikungulukilo?

MWASO 14 Shangazaleni Mwene Wamuha wa Kaye

a Pangeseni mutamba wa “Cilengo” uje uli ku mamaneselelo a cilongesa na cilongesa ca mu libulu lya Likuweni Kuyoya Myaka Yoshe! mangana mupangese byuma bimunalilongesa.

b Nga mushaka kuzibuka bilengo bimwasa kulyakela, tandeni cilongesa ca mutwe wa “Eni Vanike ‘Kakateyeni mu Vipangi Vyeni Mangana Mukovoke’” cije cili mu Kaposhi ka Kukengela ka kulilongesa ka December 2017.

c Nga mushaka kuzibuka bimwasa kulinga mangana mumwese kukandelela kuli Yehova, co tandeni cilongesa ca mutwe wa “Ki Sifi Se Si Mi Susueza ku Sebeleza Mulimu?” mu Kaposhi ka Kukengela ka kulilongesa ka Silozi ka June 15, 1995.

    Mabulu a Mbunda (1987-2026)
    Tundaho
    Kobela
    • Mbunda
    • Anako bakweni
    • Biushaka
    • Copyright © 2025 Watch Tower Bible and Tract Society of Pennsylvania
    • Mashiko a Mwakuipangesela
    • Mwakupangesela Mizimbu Yobe
    • Mwakunonekela Mizimbu Yobe
    • JW.ORG
    • Kobela
    Anako Bakweni