Muka-Kristu Napande Kulinga Byuma Mungila Muka?—Bika Biyendeka Mbimbiliya?

Banu babangi bali na kulishasha ngwabo bapwa baka-Kristu, oloni bali na kulinga byuma bili na kuzibisa bakwabo kubabala ku mbunge. Bamo bakala na nuna, beka kubapwile baka-busunga, co kubesi na ngozi. Beka lalo bali na kulinga bukoi. Bilinga byabo bili na kulingisa banu bamo balihule ngwabo, ‘muka-Kristu napande kulinga byuma mungila muka?’

Muka-Kristu wapwa iya?

Kwakwasi munu kulitumbula ngwendi wapwa muka-Kristu. Oloni byabingi byalibungilamo. Kwesekesa na Mbimbiliya, muka-Kristu napu munu uje wapwa ndongesi ya Yesu Kristu. (Bilinga 11:26) Yesu wendekele ngwendi: “Nga mutwalelelaho kunyunga lijwi lyange, co cili bene mu bandongesi bange.” (Iwano 8:31) Cili bene, wahi asa kwononoka majwi a Yesu mu kulumbunuka. Oloni muka-Kristu napande kumwesa ngwendi ali na kukabangeya byendekele Yesu kwitila mu byuma byangula kulinga ha litangwa na litangwa. Tusimutwiyeniko ha byakumwenako binatako.

Baka-Kristu bakamwesa cizemo ca busunga

Byendekele Yesu: “Njili na kumyana lishiko lyaliha ngwange, mulizeme umo na mukwabo. Ngwe munjinamizemena yange, neni lizemeni umo na mukwabo. Banu boshe bakazibuka ngwabo mu bandongesi bange, nga mulizema mukati keni.”—Iwano 13:34, 35.

Byalingile Yesu: Yesu wazemene banu boshe, kakele na kangu. Wakangwisile babezi, wanene byakulya banu bakele mu njala na kwana mwonyo wendi mwafwa ya bakwabo.—Mateu 14:14-21; 20:28.

Bibakalingi baka-Kristu: Baka-Kristu bakamwesa cizemo ca busunga ha kupwa baka-kwana, kujeneka kukala na kangu na kukonekela bakwabo. Bakakwasa bakwabo baje bali mu bujene, co banasa kubana nameme byuma byabo bya seho mangana byase kubakwasa.—1 Iwano 3:16.

Baka-Kristu bakalingi byuma mu busunga

Byendekele Yesu: “Yange . . . busunga.”—Iwano 14:6.

Byalingile Yesu: Yesu wakele na busunga mu byoshe byendekele na kulinga. Kakwata-kwatele banu ha mesho nambe kubongumuna na majwi endi. Bamuzibukile kupwa muka-busunga, co wendekele busunga nameme wazibukile ngwendi kulinga ngoco kumukobelesa mu bukalu.—Mateu 22:16; 26:63-67.

Bibakalingi baka-Kristu: Baka-Kristu kubesi kukwisa. Bakafwete mitelo, kubesi kwiba, bakapanga na nzili ha litangwa na litangwa nga bali ku bipangi kwesekesa na bimbongo bibakapangela. (Loma 13:5-7; Efeso 4:28) Kubesi kunyanyamena bakwabo, kubesi kukwisa nga basoneka byeseko ku sikola nambe kusoneka biñanda bya makuli ha mafomu akulomba bipangi nambe mafomu eka.—Bahebelu 13:18.

Baka-Kristu bakala na ngozi

Byendekele Yesu: “Ijeni kuli yange yeni boshe muli na kuundangana na kwambata byakulema, co njakumihwimisa. Ambateni joko yange na kulilongesa kuli yange, mwafwa njawa mbunge, co lalo njiwa kulikehesa mu mbunge, co mukahwima. Mwafwa joko yange yayasi kuyambata, co citele cange cacehu.”—Mateu 11:28-30.

Byalingile Yesu: Yesu wakele na ngozi, co wapwile wamwasi kusimutwiya nendi. Wakele na kusimutwiya mwamubwa na banike, kuzembeleka baje bakele mu bishoti, co wasingimikile banu boshe.—Maki 10:13-15; Luka 9:11.

Bibakalingi baka-Kristu: Baka-Kristu bakasimutwiya mwamubwa na bakwabo, kubesi kwendeka majwi amabi. (Efeso 4:29, 31, 32) Bakala na cizemo, co bakatondo bingila byakukwaselamo bakwabo.—Galatiya 6:10.

Baka-Kristu bakatwalelelaho kupwa ba kulongwa ku munu ibanalyambata nendi

Byendekele Yesu: “Canaka hamo Njambi, munu keti acangunune.”—Maki 10:9.

Byalingile Yesu: Nameme Yesu kambatele, oloni washongangeyeye baka-kulyambata bapwe ba kulongwa kuli umo na mukwako. (Mateu 19:9) Wabanangwile ha byuma bije byasele kutsiya bulo.—Mateu 5:28.

Bibakalingi baka-Kristu: Baka-Kristu bakajenjuka kulinga byuma bije byasa kutsiya bulo bwabo. (Bahebelu 13:4) Baje banalyambata bakalisingimika umo na mukwabo na kulimwesa cizemo.—Efeso 5:28, 33.