Bika Biyendeka Mbimbiliya ha Nzita ili mu Mafuti ali ku Middle East?

Banu banalishoshomwena ha nzita ili mukati ka lifuti lya United States, Israel na Iran. Kuma ei nzita yasa kweta na ku mafuti akwabo ndi? Kuma bifulumende byasa kumanesa binzita na kunena kwoloka kwa busunga ndi?

Banu bazibuka bupolofweto bwa mu Mbimbiliya banasa kulihula ngwabo, kuma ei nzita ili mu mafuti ali ku Middle East akewo mashangumukilo a nzita ya Amagidoni ibanendeka ku mukanda wa Kujombolola ndi?

Bika biyendeka Mbimbiliya?

Kuma bifulumende byasa kumanesa nzita ili mu mafuti ali ku Middle East ndi?

Mbimbiliya ngwayo: “Keti mukulahele bamyata nambe kukulahela muna munu uje kasa kunena kwoboka.”—Samu 146:3.

Tubandamena lika na kumona indi bifulumende byasa kumanesa nzita ili mukati kawa mafuti ali ku Middle East. Nameme ngoco, Mbimbiliya inendeka mu kubatula ngwayo kukwesi ntwama wa bupolitiki nambe fulumende ya banu nambe cibunga ca banu casa kumanesa nzita na kunena kwoloka. Njambi lika ikeye asa kumanesa “binzita ha lifuti-libu hoshe.”—Samu 46:9.

• Mona mushaka kulilongesa byabingi, tandeni Kaposhi ka Kukengela ka mutwe wa “Bika Bikamanesa Binzita?”

Kuma nzita ili mu mafuti ali ku Middle East ili na kushulisilila bupolofweto ndi?

Mbimbiliya ngwayo: “Mukaziba binzita na mizimbu ya binzita. . . . Muyati ukalwisa muyati ukwabo, bumwene bukalwisa bumwene bukwabo.”—Mateu 24:6, 7.

Nzita ili mu mafuti ali ku Middle East inapu imo ya byuma bimwesa ngwabyo tuli na kuyoya ku “mamaneselelo a katumameno ka myaka ino” aje abanatumbula mu Mbimbiliya ngwabo “matangwa a mamaneselelo.” (Mateu 24:3; 2 Timothi 3:1) Binzita biliko ano matangwa bimwesa ngwabyo ololo Njambi alingako bimo mangana amanese binzita na byuma bikwabo bili na kuyandesa banu.

• Mona mushaka kuzibuka byabingi, tandeni ñanda ya Ingilishi ya “What Is the Sign of ‘the Last Days,’ or ‘End Times’?”

Kuma Amagidoni ishangumukila ku Middle East ndi?

Mbimbiliya ngwayo: “Co babakungulwilile ku mwela ubasana mu Cihebelu ngwabo Amagidoni.”—Kujombolola 16:16.

Nzita ya Amagidoni keti nzita ya mukati ka bifulumende bya banu ije ili ku Middle East, oloni inapu nzita ije ikakala mukati ka Njambi na bifulumende byoshe bya banu.

• Mona mushaka kuzibuka byabingi, tandeni ñanda ya “Nzita ya Amagidoni Yapwa Ika?”

Bika bitukwasa tuwe mbunge mona kuli byuma byabibi bili na kulingiwa?

Mbimbiliya ngwayo: “Keti mulishoshomwene ha cuma nambe cimo, oloni mu byuma byoshe, lombeni Njambi bimutonda kwitila mu lilombelo na kulambelela, hamolika na kukandelela.”—Filipi 4:6.

Yehovaa Njambi atonda ngwendi tulombele kuli ikeye. Njambi atolilila ku malombelo etu na kutukwasa mona tuli mu bishoti mwafwa watwaka mbunge. (1 Pita 5:7) Namwesa ngwendi watwaka mbunge ha kutuleka binalingisa kukale binzita nomu mubikahwila nebi lalo byakalinga mangana amanese bukalu butuli na kuliwana nabwo.—Kujombolola 21:3, 4.

• Mona mushaka kuzibuka mwakatukwasela Njambi, tandeni ñanda ya Silozi ya mutwe wa “Kana Nakona Kufumana Manzwi Aomba-Omba Mwa Bibele?.”