Mukwenje natala banu bali na kukobela mu Njibo ya Bumwene

BIBAKEHULA BABAHA

Seho Muka ya Kukunguluka Hamo ku Njibo ya Bumwene?

Bakaleho ba Yehova bakakunguluka lubali mu calumingo ku myela ya kulemesela ibatumbula ngwabo Binjibo bya Bumwene. Bika bikalingiwa oku ku biwano, co kukunguluka hamo nabo kumikwasa bati?

Bika bikalingiwa ku Njibo ya Bumwene?

Njibo ya Bumwene wapwa mwela kubakalilongesela banu biñanda bya mu Mbimbiliya. Biwano bikakala ku Njibo ya Bumwene byasa kumikwasa:

kuzibuka busunga hali Njambi.
kuzibisisa byuma bili na kulingiwa mu kaye ano matangwa.
mupwe munu wamubwa.
kuwana babusamba bababwa.

Muzibuka ndi? Mwela ubakakungulukila Bakaleho ba Yehova bautumbula ngwabo Njibo ya Bumwene mwafwa bakasimutwiyako manene biñanda bya kukundama ku Bumwene bwa Njambi.—Mateo 6:9, 10; 24:14; Luka 4:43.

Bika bimunapande kuila ku Njibo ya Bumwene?

Biñanda bimukalilongesako bimikwasa. Binangulo bya mu Mbimbiliya bikakala ku biwano bya Bakaleho ba Yehova bimikwasa muwane “mana.” (Visimo 4:5) Oku kulumbununa ngwabo Mbimbiliya imikwasa kwangula mwamubwa byakulinga mu kuyoya. Imikwasa lalo kuwana bikumbululo ku bihula bya seho bya kufwa ngwe:

Mitwe inatako imwesa biñanda bimo bya Mbimbiliya bibakendeka ku biwano byetu bya ku mamaneselelo a calumingo:

Bika Bitutabesela Mbimbiliya Itutwamenene?
Kuli Kumuwana Bukwasi mu Simbu ya Tuyando?
Byuma Bibuli na Kutulingila Bumwene Bwa Njambi Ino Simbu

“Mukwetu injakele na kukobela nendi sikola wezile ku biwano byetu. Watumbamene na naanga yetu, co twapangesele hamo nendi mabulu etu. Munima ya biwano wanjilekele ngwendi wabwahelelele manene mwazibile bikumbululo byabibwa bibakele na kukumbulula banu ha simbu ya mitamba ya bihula na bikumbululo. Wendekele lalo ngwendi ku ceci yabo kubesi na mabulu amangi ngwe atuli nawo.”—Brenda.

Muzibuka ndi? Kumukafwete ha kukobela mu Njibo ya Bumwene nambe kutumbama ha bitwamo, co wahi aketisamo kalilonga ka kulambwila.

Bakweni bakamitakamesa. Mbimbiliya ngwayo cuma cimo cibanapande kukungulukila hamo baka-Kilistu cinapu ‘kulitakamesa umo na mukwabo.’ (Vahevelu 10:24, 25) Kulikwatasana na banu baje baka Njambi na bakwabo mu mutamba wa kulibanga muno mu kaye munashulu banu baje balishaka manene, kutushubulwisa.

“Munima ya kukala ku sikola litangwa lya mutunu, simbu imo njikalubala na kujuka manene, oloni bakwetu ku Njibo ya Bumwene bakanjishubulwisa. Munjikatundu ku biwano, njikapu wa kubwahelela, co njikalibwahesela kulingako bimo lyamukwabo.”—Elisa.

Muzibuka ndi? Kwakala bikungulukilo bya Bakaleho ba Yehova bya kutubakana 120,000 mu kaye koshe, co ebi bikungulukilo bikakungulukila ha myela ya kutubakana 60,000. Mwaka na mwaka bakatungu Binjibo bya Bumwene bya kweta ku 1,500 mangana banu babangi baje bali na kulibwezelela bawane mwakukungulukila.a

Bibakendeka bakweni

“Munjakele ku sekondali, bisimbu bimo mukwetu injakele na kukobela nendi waile nange ku biwano, co wabwahelelele manene kumona banu ba myaka ya kuliseza-seza balilongesela hamo Mbimbiliya. Mukulunu wetu ku bipangi nendi nezile ku biwano, co nakomokele mwanatumwene oku tupangesa Mbimbiliya kushwa kumo. Kumona mwashakelelemo biwano, kwanjilingisile njibimone kupwa bya seho manene!”—Jessica.

“Biwano bikanjikwasa njijeneke kusinganyeka manene ha bukalu bunjili na kuliwana nabwo na kulishoshomwena. Ku biwano, tukalilongesa mwakuyoyela mwamubwa, mwakupwila banu bababwa, na bikwabo. Simbu yoshe munjikatundu ku Njibo ya Bumwene njikatakama na kushubuluka.”—Timothy.

“Munima ya biwano, munalume umo injalanyele wendeleke ngwendi: ‘Njinezile kuno mangana njakumimwese ngwange bimwakulahela byapwa bya makuli. Oloni njalimwena ngwange binjakulahela bikebyo byapwa bya kuhenga!’ Co lalo wabwahelelele manene kumona nzanzu ibakala nayo Bakaleho ba Yehova. Wendekele ngwendi: ‘Nameme lukelwo lwa kulibanga kukunguluka neni, mwanjitambula mwamubwa ngwe twalizibukile laja!’”—Jacob.

“Bisimbu bimo njakele na kusinganyeka ngwange, ‘bicihwa lika biwano, njiluka ku njibo.’ Oloni ha simbu ya biwano, ebi biyongola byakele na kuhwa. Munima ya biwano, njakele na kusimutwiya na bakwetu, co kunjakele na kuliziba munjakele na kulizibila simbu kanda biwano bishangumuke. Ngwe kunjakele na kuya ku biwano, ngwe kunjesi na babusamba bababwa banjili nabo.”—Madison.

a Nga mushaka kuwana mwela wa kukungulukila, yeni ha mutamba wa “Biwano bya Cikungulukilo bya Bakaleho ba Yehova,” co nyatekeni ha “Waneni Mwela Uli Kuyehi.”