CILONGESA 24

Mbimbiliya Yendeka Bika ha Tungelo na Bandemone?

Libulu lya Kupulinta

Yehova ashaka ngwendi tuzibuke naanga yendi ya mwilu. Naanga ya Njambi inambateselela na tungelo baje babatumbula ngwabo “bana ba Njambi.” (Yombi 38:7, NWT) Mbimbiliya yendeka bika ha tungelo? Bika bibakalingi ku banu? Kuma tungelo boshe bapwa naanga ya Njambi ndi?

1. Tungelo bapwa beya?

Yehova watangele tahi tungelo simbu kanda atange lifuti-libu. Ngwe mwa Yehova, tungelo nabo kubakele na mibila ya situ, co bakala mwilu. (Vahevelu 1:14) Kwakala tungelo babangi manene, co lalo bakala na bifwa bya kuliseza-seza. (Kujombolola 5:11) Tungelo ‘bakononoka mashiko a Yehova.’ (Myaso 103:20) Kusañulu, Yehova wakele na kutuma tungelo mangana betese mizimbu yendi ku banu na kubakwasa. Ano matangwa, tungelo bali na kutwamenena baka-Kilistu mangana bawane banu baje bashaka kulilongesa bya Njambi.

2. Satana na bandemone bapwa beya?

Tungelo bamo kubatwaleleleho kupwa ba kulongwa kuli Yehova. Kangelo wa kulibanga kutengulukila Njambi ‘bamutumbula ngwabo Liyabolo nambe Satana, uje ali na kukwisa kaye koshe.’ (Kujombolola 12:9) Satana washakele kuyula, mukemwo wongumwine Adama na Eva na tungelo bamo. Tungelo baje balikwatasanene na Satana bakebo bandemone. Yehova wabashekelele hasi kutunda mwilu, co ololo abanyongesa.—Tandeni Kujombolola 12:9, 12.

3. Satana na bandemone bendi bashaka kutungumuna bati?

Satana na bandemone bendi bakongumuna banu kupangesa bilinga bya bundemone nambe manseno. Ebi byuma binambateselela na kusimutwiya na bakulu. Cakumwenako, bamo bakehula bimbanda, baka-kumikiya nambe baka-kutahesa bingongonosi. Bakwabo bakalisaka mu ngila ya bundemone. Beka bakabakwisi ngwabo basa kusimutwiya na batsi. Oloni Yehova natuleke ngwendi: ‘Keti mukaye kuli banu baje bali na kwendeka ngwabo bakendeka na minzinzime ya batsi.’ (Valevi 19:31) Natuleke ngoco mwafwa ashaka kutunyungilila kuli Satana na bandemone bendi. Satana na bandemone bendi bapwa bitozi ba Njambi, co bashaka kutulinga mwamubi.

TONDESESENI

Byuma muka bikwabo bibakalingi tungelo? Bukalu muka buli mu kulikobelesa mu bilinga bya bundemone? Twasa kulinyungilila bati kuli Satana na bandemone bendi?

Kangelo ali na kutwamenena Bakaleho ba Yehova babali baje bali na kwambulwila ha njibo na njibo.

4. Tungelo bakakwasa banu balilongese bya Yehova

Tungelo keti bakebo bene bakambulwila banu. Oloni bakatwamenena bangamba ba Njambi mangana bawane banu baje bashaka kulilongesa bya Njambi. Tandeni Kujombolola 14:6, 7, na kusimutwiya ha bihula binatako:

Bika bitutondela ngwetu tungelo batukwase omwo twambulula?
Muliziba bati mumunazibuka ngweni tungelo basa kumitwamenena mangana muwane banu baje bashaka kulilongesa Mbimbiliya? Mwafwa bika?

Byuma bya kupangesa mu kutaha na manseno, bya kufwa ngwe libaya lya kupangesa mu kutambula mizimbu ya kutunda ku minzinzime ya kujwala, ngombo ya kalibanjelo, libulu lyendeka bya bindumba ba banu, njuka, tumponya, insense, masaku na mikalo.

5. Keti mulikobelese mu bilinga bya bundemone

Satana na bandemone bendi bapwa bitozi ba Yehova. Co lalo bapwa bitozi betu. Tandeni Luka 9:38-42, na kusimutwiya ha cihula cinatako:

Bandemone bakalingi bika ku banu?

Kutushaka kulikwatasana na bandemone. Tandeni Kwituluka mu Mashiko 18:10-12, na kusimutwiya ha bihula binatako:

Twasa kulikwatasana bati na bandemone nambe kusimutwiya nabo? Bilinga muka bya bundemone binalisala manene muno mu citingitingi?
Kuma Yehova nalingi bwino mwanatubindika kulikobelesa mu bilinga bya bundemone ndi? Mwafwa bika?

Kengeni VIDIO na kusimutwiya ha bihula binatako.

VIDIO: ‘Byaneneni Liyabolo’ (5:02)

Kuma lisaku lyazalele muna Palesa lyasele kumunenela bukalu ndi? Mwafwa bika?
Bika byapandele kulinga Palesa mangana alinyungilile ku bandemone?

Baka-Kilistu ba busunga kubesi kulikwatasana na bandemone. Tandeni Vilinga 19:19 na 1 Kolinte 10:21. Kutundaho, simutwiyeni ha cihula cinatako:

Bika bimunapande kwenyekela byuma byoshe binakundama ku bandemone?

Munakazi ali na kwenyeka byuma bya manseno.

6. Hyaneni Satana na bandemone bendi

Satana ikeye ali na kutwamenena bandemone. Oloni Yesu uje ibatumbula lalo ngwabo Mingeli, mukulunu wa tungelo, ikeye ali na kutwamenena tungelo ba kulongwa. Mingeli wakala na nzili ya kupwa hali? Tandeni Kujombolola 12:7-9, na kusimutwiya ha bihula binatako:

Beya bali na nzili kutubakana bakwabo, Mingeli na tungelo bendi, indi Satana na bandemone bendi?
Mumona bati, kuma baka-Kilistu banapande kutewa Satana na bandemone bendi ndi?

Mwasa kuhyana Satana na bandemone bendi. Tandeni Yakomba 4:7, na kusimutwiya ha cihula cinatako:

Mwasa kulinyungilila bati kuli Satana na bandemone bendi?

BAMO BAKENDEKA NGWABO: “Kukwesi bukalu buli mu kweha bweho nambe kuyongola mavidio aje amwesa bilinga bya bundemone. Kunapu kulizima lika buli.”

Bukalu muka bwasa kutundamo?

SIMPI YAKAMA

Tungelo ba kulongwa bakatukwasa. Oloni Satana na bandemone bendi bapwa bitozi ba Yehova, co bakapangesa byuma bya bundemone mangana bongumune banu.

Kwitulukamo

Tungelo bakakwasa bati banu mangana balilongese bya Yehova?
Satana na bandemone bapwa beya?
Mwafwa bika kutwapandele kulikobelesa mu byuma byoshe-byoshe binakundama ku bundemone?

Litangwa licinahu cilongesa:

Cilengo

Nga kuli bimo bimuli nabyo bije binakundama ku bundemone, co lombeleni kuli Yehova amikwase mangana mubyenyeke.

Cilengo Cikwabo:

Your other goal

WANENI BIKWABO

Bika bimwesa ngwabyo Yesu ikeye Mingeli, kangelo wakama?

“Mingeli, Kangelo Wakama Wapwa Iya?” (Ñanda ya ha webusaiti)

Tandeni bukaleho buje bumwesa ngwabwo Satana kapwile lika cifwa ca mu mbunge.

“Kuma Liyabolo Kwakala Ndi?” (Ñanda ya ha webusaiti)

Bika byakwasele munakazi umo ecele kulikwatasana na bandemone?

“Wazibukile oni Byakele na Kuyoyela” (Kaposhi ka Kukengela ka July 1, 1993)

Satana akapangesa bati bilinga bya bundemone mangana akwise banu?

“Manseno na Bulozi” (Ngila Itwala ku Kuyoya kwa Myaka Yoshe, mutamba 5)