Biñanda Bya Kupangesa mu Mukanda wa Biwano wa Buyoye Bwetu Baka-Kilisitu na Cipangi Cetu
FEBRUARY 4-10
BISIMPI BYA SEO BYA MU LIJWI LYA NJAMBI | LOMA 1-3
“Twalelelenio Kulongesa Citakutaku Ceni”
(Loma 2:14, 15) Omwo baje keti Bayunda kubesi na Lishiko, oloni hoshe haje balinga na mana mwaya Lishiko, bakebo babenya banapu lishiko lyabo, nameme kubesi na Lishiko. 15 Cifwa cabo cimwesa ngeci bije Lishiko libashika banacisoneka mu bimbunge byabo. Co lalo citakutaku cabo cibamwesa ngeci cuma eci cinapu ca busunga, omwo bisimbu bimo biyongola byabo bibahisa, co bisimbu bikwabo bibaamena.
Mwasa Kunyunga Bati Citakutaku Cacibwa?
6 Kuma obu bwana bwa citakutaku babwana lika bangamba ba Yehova ndi? Acisinganyekeni ha majwi awa a kapositolo Paulu. Wendekele ngwendi: “Omwo baje keti Bayunda kubesi na Lishiko, oloni hoshe haje balinga na mana mwaya Lishiko, bakebo babenya banapu lishiko lyabo, nameme kubesi na Lishiko. Cifwa cabo cimwesa ngeci bije Lishiko libashika banacisoneka mu bimbunge byabo. Co lalo citakutaku cabo cibamwesa ngeci cuma eci cinapu ca busunga, omwo bisimbu bimo biyongola byabo bibahisa, co bisimbu bikwabo bibaamena.” (Lom 2:14, 15) Nambe baje kubazibuka mashiko a Yehova, simbu imo bakalingi byuma bije bilitombola na binangulo bya Njambi.
(Loma 2:15) Cifwa cabo cimwesa ngeci bije Lishiko libashika banacisoneka mu bimbunge byabo. Co lalo citakutaku cabo cibamwesa ngeci cuma eci cinapu ca busunga, omwo bisimbu bimo biyongola byabo bibahisa, co bisimbu bikwabo bibaamena.
Mwasa Kunyunga Bati Citakutaku Cacibwa?
8 Mukangula bati byuma bicimileka citakutaku ceni? Bamo kubesi kwilula byuma bicibaleka citakutaku cabo. Banasa kwendeka ngwabo: “Citakutaku cange kucesi na kunjilwisa.” Mashungu a mu mbunge anasa kukala na nzili na kwasa kungumuna citakutaku ceni. Mbimbiliya ngwayo: “Mbunge ya munu yapwa ya makuli kutubakana byuma byoshe, yapwa yaibi manene, iyajo aizibuka?” (Nje 17:9) Ngeci kutwapandele kukabangeya lika mashungu a mu mbunge yetu. Oloni tunapande kusinganyeka byuma bije bizibisa Yehova Njambi kubwaha.—Kengeni majwi a kwinikila.
9 Nga cuma citulinga cimana ha citakutaku cetu citunalongesa mwamubwa, tumwesa ngwetu tuzibila Njambi lyoba, kutwesi kulinga mwaya mbunge yetu embwe. Tutaleni ha mwanja umo. Ngubulu wa kulongwa Nehemiya wakele na moko ya kutambula fweto na byuma bikwabo ku banu mu Yelusalema. Oloni wabyanene kulinga ngoco. Mwafwa bika? Kashakele azibise Yehova kubihya ku mbunge mwafwa ya kuyandesa banu bendi. Wendekele ngwendi: “Yange njalingile mweka, omwo njasingimikile Njambi.” (Neh 5:15) Kusingimika na kumuzibila lyoba, kwapwa kwakubwa. Eli lyoba lya kusingimika Njambi, litulingisa tukabangeye mashiko endi ha kwangula bya kulinga.
Kutondesesa Bisimpi bya Seo
(Loma 3:4) Mwa busunga bene embwe. Njambi napande kupwa wa busunga, nameme banu boshe bapwa baka-makuli. Ngwe mubyendekela bisoneka ngwabyo, “Unapande kusholoka muka-busunga omwo wendeka, unapande kuhyana mulonga wobe omwo ba kusompa.”
w08 6/15 30 ¶5
Bisimpi bya Kulitila bya mu Mukanda wa Loma
3:4. Nga bisinganyeka byetu kubyalitombwele na Mbimbiliya, co tunapande kwecela ‘Njambi apwe wa busunga’ omwo tukulaela biyendeka Mbimbiliya na kulinga mwaya cizango ca Njambi. Twasa kukwasa bakwetu bamone ngwabo Njambi wapwa wa busunga nga tupanga na ntwima mu cipangi ca kwambulula muzimbu waubwa na kupwisa banu bapwe bandongesi.
(Loma 3:24, 25) Oloni banabapwisa baka-busunga kuli Njambi ha bwana bwa kutetela kwa Njambi hali Yesu Kilisitu, uje nabapatula. 25 Njambi wamupwisile ñombelo, ngeci ha ñombelo ya kutsa kwendi apwe ciingo ca kusambesa bubi bwa banu ha kukulaela kwabo kuli ikeye. Njambi walingile cuma eci mu kumwesa ngeci napu muka-busunga. Kusañulu Njambi wasimpile, co kombileko mbunge ku bubi bwa banu,
w08 6/15 29 ¶6
Bisimpi bya Kulitila bya mu Mukanda wa Loma
3:24, 25—Ñombelo ya Yesu Kilisitu yapatula bati baje bayoyele kusañulu simbu kanda aije hasi kwakututsila? Bupolofweto bwa kulibanga buje bwendeka hali Mesiya buli ku mukanda wa Kushangumuka 3:15, bwalishulisilile mu 33 C.E omwo Yesu bamupameyeye ha citi ca kuyandesela. (Nga 3:13, 16) Yehova mwapolofwetele buje bupolofweto, ikeye wamwene lika ngwe bunalishulisilila laja mwafwa byai byasa kumwonowesa kushulisilila biyongola byendi. Ngeci Yehova wasambesele bana ba Andama baje bakele na likulaelo mu ñombelo ya Yesu nameme te kanda atse. Co lalo, baje bayoyele simbu kanda Yesu aije hasi kwakututsila basa kukasanguka mwafwa ya ñombelo yendi.—Vil 24:15.
Kutanda Mbimbiliya
(Loma 1:1-17) Yange Paulu, ngamba ya Kilisitu Yesu na muluwa uje yaangwile na kumusana kuli Njambi mukwambulula biñanda byendi Byabibwa. 2 Biñanda Byabibwa babikulaesele kusañulu kuli Njambi muli baka-kwimanena bendi, ngwe mubanasonekela mu Bisoneka bya Kujela. 3 Binapu bya Munendi, Mwene yetu Yesu Kilisitu, ngwe kucisemwa cendi ca bunu, wasemukile ku nanga ya Ndaviti, 4 ngwe ku bunjambi bwendi bwa kujela, bamumwesele na nzili yakama kupwa Muna Njambi omwo bamusangwile ku batsi. 5 Muli ikeye Njambi wanjanene bije byanjipande mu kupwa muluwa omwo hali Kilisitu, mu kutwamenena miyati yoshe ku kukulaela na ku kwononoka. 6 Hakati ka aba,neni hamuli, baje banaasana Njambi kukundama kuli Yesu Kilisitu. 7 Ngeci bene, njili na kusonekela kuli yeni boshe muli mu Loma baje baazema Njambi na kumisana ngeci mupwe banu bendi. Njambi Tatetu na Mwene Yesu Kilisitu bamyane kutetela na kwoloka. 8 Ha kulibanga, njikandelela kuli Njambi yange hali Yesu Kilisitu hali yeni boshe, omwo kukulaela kweni kunatsimana mu kaye mwoshe. 9 Omwo Njambi ikeye mukaleo wange ngeci byoshe bije njendeka binapu bya busunga, Njambi uje injili na kupangela na mbunge yange yoshe ha kwambulula Biñanda Byabibwa bya Munendi. Njambi nazibuka ngeci njikamyanuka 10 simbu yoshe mu malombelo ange njikalombo ngwange Njambi mu cizango cendi nga ataba njije kuli yeni ololo. 11 Omwo njishaka manene kumimona, njakumyane bwana bwa bibezikiso bya munzinzime mu kumitakamesa. 12 Njendeka ngeci neni nange twakulitakamese ha simbu imo lika, yeni ha kukulaela kwange nange ha kukulaela kweni. 13 Bakwetu, munapande kwanuka ngweni bisimbu byabingi njakele na butumbe bwa kwija oko na kumisikamesa, oloni kuli cuma cimo cinanjibindika. Njishaka kukoka banu hakati keni, ngwe munjinalingi hakati ka baje keti Bayunda. 14 Omwo njili na likongo lya bipangi hakati ka banu boshe, kuli baka-kunanguka na kubilema, kuli baka-kulilongesa na kuli baje bali ku nzimba. 15 Ngeci bene, njishaka manene kwambulula Biñanda Byabibwa kuli yeni lalo muli mu Loma. 16 Omwo kunjesi na shwamwa mu kwambulula muzimbu waubwa, unapu nzili ya Njambi ya kwobola boshe baje bakulaela, ha kulibanga kuli Bayunda, co lalo na kuli baje keti Bayunda. 17 Omwo muzimbu waubwa usholola bati Njambi nalingisa banu ngeci bapwe baka-busunga ku mesho endi, cinapu mu kukulaela kutunda kushongo na kweta kumamaneselelo. Ngwe mubyendeka bisoneka ngwabyo, “Munu uje ibanapwisa muka-busunga ku mesho a Njambi ha kukulaela akayoya.”
FEBRUARY 11-17
BISIMPI BYA SEO BYA MU LIJWI LYA NJAMBI | LOMA 4-6
“Njambi Nasholola Cizemo Cendi Cakama Kuli Yetu”
(Loma 5:8) Oloni Njambi nasholola cizemo cendi cakama kuli yetu, omwo ha simbu ije twapwile tu baka-bubi Kilisitu watutsililile.
(Loma 5:12) Ngeci bene, bubi bwezile hano ha kaye hali munu umo lika, co bubi bwendi bunanene kutsa. Co kutsa kunete ku miyati yoshe ya banu omwo boshe banalingi bubi—.
Njambi Nasholola Cizemo Cendi Kuli Yetu
5 Paulu washangumukile kwendeka ngwendi: “Bubi bwezile hano ha kaye hali munu umo lika, co bubi bwendi bunanene kutsa. Co kutsa kunete ku miyati yoshe ya banu omwo boshe banalingi bubi.” (Lom 5:12) Twasa kuzibisisa mubwashangumukilile bubi mwafwa Njambi natusholwela mubwashangumukilile buyoye bwetu. Yehova watangele Andama na Eva, co bapwile bakulumbunuka. Njambi wabanene lishiko na kubaleka ngwendi keti balipokole, co wabalekele ngwendi nga balipokola co batsa. (Kus 2:17) Oloni balyangwililile kupokola lije lishiko, ngeci bamwesele ngwabo Njambi kapandele kubayula.—Kwi 32:4, 5.
(Loma 5:13, 14) Bubi bwakele mu kaye simbu kanda bane Lishiko, oloni kuje kukwesi lishiko, bubi kubabulaba nalumo lwai. 14 Oloni kutunda ku simbu ya Andama na kweta ku simbu ya Mosesa, kutsa kwashwanene ha banu boshe, nameme hali baje kubalingile bubi ngwe mwalingile Andama omwo kononokele lishiko lya Njambi. Andama wapwile cimweso ca uje akaija.
Njambi Nasholola Cizemo Cendi Kuli Yetu
6 Andama wakitile bana munima ya kulinga bubi, co watambwisileko na bana bendi. Bana ba Andama keti bakebo bapokwele lishiko lya Njambi, ngeci kubabanene kashitiko kakulifwa na kaje kabanene Andama. Ha simbu ije, kukwakele mashiko abasonekele. (Kus 2:17) Nameme ngoco, bana ba Andama batambwile bubi. Ngeci, bubi na kutsa byayulile banu boshe kweta na ha simbu yanene Njambi mashiko kuli Baisalele. Aje mashiko amwesele ngwawo bapwile baka-bubi. (Tandeni Loma 5:13, 14) Bubi butunatambula twasa kubwesekesa ku mishongo ibakatambula bana ku bisemi babo. Nameme bana bamo kubesi kubinja ije mishongo, oloni basa kushambwisila bana babo lalo. Oloni bubi kubwafwile ngoco, bukebo buli ku banu boshe. Co lalo boshe bakatsi. Obu bubi tangwa bukahwa ndi?
(Loma 5:18) Ngeci bene, ngwe ha bubi bumo banu boshe banabahisa, mu ngila eyi bene cipangi cimo lika ca busunga cinapatula banu boshe na kubana mwonyo.
(Loma 5:21) Ngeci bene, ngwe omwo bubi bwaswanene ha kutsa, ngeci lalo kutetela kwa Njambi kuli na kuswana ha busunga, na kututwamenena ku mwonyo wa myaka yoshe hali Yesu Kilisitu Mwene yetu.
Njambi Nasholola Cizemo Cendi Kuli Yetu
9 Majwi a Cingiliki abananungulula ngwabo “banapu baka-busunga” alumbununa bika? Muka-kunungulula Mbimbiliya umo wendekele ngwendi: “Awa majwi anapu a cifwisa, co akamwesa ngwawo Njambi wapwa lyako uje akatetela munu nabulumuna mulonga.”
10 Bika byalingisile “muka-kusompa wa hano hasi hoshe” atetele yetu banu baka-bubi? (Kus 18:25) Mwafwa watumine Munendi umo lika. Yesu walingile cizango ca Ishe mu kulongwa nameme bamushawile, kumweseka na kumupakesa. Watwaleleleo kupwa wa kulongwa kweta na ha kutsa kwendi ha citi ca kuyandesela. (Hev 2:10) Yesu wanene mwonyo wendi kupwa ñombelo mangana atupatule ku bubi na ku kutsa.—Mat 20:28; Lom 5:6-8.
Kutondesesa Bisimpi bya Seo
(Loma 6:3-5) Omwo mwa busunga munazibuka ngeci omwo batumbwitikile muli Kilisitu Yesu, batumbwitikile ngeci tukale hamo mu kutsa kwendi. 4 Ngeci bene, ha kutumbwitika, batutsindile hamo nendi na kutsa hamo nendi, ngeci, ngwe omwo Kilisitu bamusangwile ku batsi na bumpau bwa Ishe, ngeci netu tunapande kuyoyela mu mwonyo wauha. 5 Omwo nga tunapu umo nendi mu kutsa kwendi, mu ngila eyi bene tukapwa mumo nendi ha kusanguka kwendi.
w08 6/15 29 ¶7
Bisimpi bya Kulitila bya mu Mukanda wa Loma
6:3-5—Kumbwitika muli Kilisitu Yesu na kumbwitika mu kutsa kwendi kulumbununa bika? Yehova akabwabesa baka-kukabangeya Kilisitu na sipilitu yendi ya kujela. Co aba bakubabwabesa bakalikwasana hamo na Yesu na kupwa ba mu cikungulukilo ca katwamenena. (1 Ko 12:12, 13, 27; Kol 1:18) Oku kukekwo kumbwitika muli Kilisitu Yesu. Baka-Kilisitu ba kubwabesa ‘bakabambwitika mu kutsa kwa [Kilisitu]’ omwo kubesi kutewa kutsa, co kubesi na lilabelelo lya kukayoya myaka yoshe hano hasi. Ngeci kutsa kwabo kunapu kwakulyana ngwe kuje kwatsile Yesu nameme kutsa kwabo kukupatula banu. Kubambwitika mu kutsa kwa Kilisitu kukahu mubakatsi na kusanguka kuya mwilu.
(Loma 6:7, NWT) Omwo munu atsa, napatuka ku bubi bwendi.
w14 6/1 11 ¶1
Lilabelelo Muka Njili Nalyo ha Batsi?
Batsi bakabasompa ha bubi bubalingile simbu kanda batse ndi? Embwe. Mukanda wa Loma 6:7, NWT ngwawo: “Omwo munu atsa, napatuka ku bubi bwendi.” Munu akafwete bubu bwendi nga atsa. Ngeci bakabasompa kwesekesa na byuma bibakalinga munima ya kusanguka keti bibalingile te kanda batse.
Kutanda Mbimbiliya
(Loma 4:1-15) Ngeci bene, batijo twendeka hali kukulwila yetu Abilahama? Bikajo byalingiwile kuli ikeye? 2 Omwo nga ikeye bamupwisile muka-busunga ku mesho a Njambi ha byuma bije byalingile, nga wapandele kulishasha, oloni kalishashele ku mesho a Njambi. 3 Bisoneka byendeka ngwabyo, “Abilahama wakulaelele Njambi, co omwo ha kukulaela kwendi Njambi wamulabeleleco kupwa muka-busunga.” 4 Munu uje apanga atambula fweto, oloni fweto yendi kubasa kuyitumbula ngwabo bwana, inapu cuma cije napangela. 5 Oloni munu uje nemana lika ha kukulaela kwendi, keti ha bilinga byendi, co uje akulaela kuli Njambi muka-kusambesa muka-kapayo kupwa wa kujeneka mulonga, kunapu kukulaela kwendi kuje Njambi ayongola ngeci amupwise muka-busunga ku mesho endi. 6 Eci cikeco catumbwile Ndaviti omwo wendekele ha kubezika kwa munu uje Njambi namupwisa muka-busunga, kujeneka cuma cimo cije calinga uje munu, 7 “Banabezika banu baje Njambi nabasambesa ku kupenga-penga kwabo, banu baje bibi byabo banabifwiki. 8 Nabezika munu uje Shukulu Kalunga kamulabela bibi byendi.” 9 Kuma kubezika kuje kwendekele Ndaviti kwakundama lika kuli baka-kutuuka ndi? Mwa busunga bene embwe. Kunakundama lalo na kuli baje baka-kujeneka kutuuka. Omwo tunamono laja mu bisoneka ngwabyo, “Abilahama wakulaelele kuli Njambi, co omwo ha kukulaela kwendi Njambi wamulabeleleco kupwa muka-busunga.” 10 Simbu ikajo eci calingiwile? Eci calingiwile simbu kanda Abilahama atuuke indi te natuuka laja? Eci calingiwile simbu kanda atuuke, keti te natuuka laja. 11 Bamutuwile, co kutuuka kwendi kwapwile cimweso kumwesa ngeci omwo ha kukulaela kwendi Njambi wamulabeleleco kupwa muka-busunga simbu kanda bacimutuule. Ngeci bene, Abilahama napu ishe ya boshe baka-kukulaela kuli Njambi, co Njambi nabatambula kupwa baka-busunga, nambe kubatuukile. 12 Co ikeye lalo napu ishe ya boshe baje banatuuka, eci cikeco, kuli baje, kubwezelelako kutuuka, bayoya yoyesi ya kukulaela ije yayoyele tatetu Abilahama simbu kanda bamutuule. Cikulaeso ca Njambi bacitambula ha kukulaela. 13 Omwo Njambi wakulaesele Abilahama na batekulwila bendi ngeci bakaswana kaye, walingile eci, keti ngwe omwo Abilahama wononokele Lishiko embwe, oloni omwo wakulaelele, co Njambi wamulabeleleco kupwa muka-busunga. 14 Omwo nga bije byakulaesa Njambi babyana kuli baje bononoka Lishiko, co kukulaela kwa munu kupwa kwangoco, co cikulaeso ca Njambi cinapu cakujeneka seo. 15 Omwo lishiko linena bukalu bwa Njambi, oloni nga kukwesi lishiko, co kukwesi kujeneka kwononoka lishiko.
FEBRUARY 18-24
BISIMPI BYA SEO BYA MU LIJWI LYA NJAMBI | LOMA 7-8
“Muli na ‘Cizango ca Kubandamena’ Ndi?”
(Loma 8:19) Omwo bya kutanga byoshe bili na cizango ca kukengelela Njambi ngeci asholole bana bendi.
w12 7/15 11 ¶17
Tabeseni Yehova Amipatule mu Busunga
17 Paulu mwakele na kusimutwiya mwakapatwilamo Yehova bangamba bendi, wasonekele ngwendi: “Omwo bya kutanga byoshe bili na cizango ca kukengelela Njambi ngeci asholole bana bendi. . . Bya kutanga ku litangwa limo bikapatuke ku bundungo bwa kutsa, co bikakale na bumpau bwa kupatuka kwa bana ba Njambi.” (Lom 8:19-21) “Bya kutanga” bilumbununa banu baje bali na lilabelelo lya kukayoya hano hasi, baje bakawana bibezikiso ‘mubakasholola’ bana ba Njambi ba kubwabesa. Eci kusholoka cikashangumuka omwo bana ba Njambi bakasanguka na kuya mwilu na kukalikwatasana hamo na Kilisitu mu kubwaesa kano kaye koshe na kukakwasa “mbunga yakama” ikakobele mu kaye kakaha.—Kuj 7:9, 14.
(Loma 8:20) Omwo bya kutanga babihisile ngeci bipwe byuma byangoco, keti ngwe ku cizango cabyo embwe, oloni capwile cizango ca Njambi ngeci bipwe ngacije. Oloni nameme ngoco kwakele [lilabelelo]
w12 3/15 23 ¶11
Bwaeleleni Omwo ya Kukala na Lilabelelo
11 Banu bali na “lilabelelo,” mwafwa Yehova wakulaesele kukabapatula ku “linyoka wa kusañulu,” Satana Liyabolo kupangesa “mbuto” yakulaesele. (Kuj 12:9; Kus 3:15) Ije “mbuto” yemanenene Yesu Kilisitu. (Nga 3:16) Yesu mwatsile na kusanguka, wapatwile banu ku bundungo bwa bubi na kutsa. Eli lilabelelo linalitombola na kusholoka kwa bana ba Njambi. Bakubwabesa banapu mutamba wa mu cibali wa ije “mbuto.” Njambi akabasholola omwo bakalikwatasana hamo lika na Kilisitu mu kunyongesa kano kaye ka Satana. (Kuj 2:26, 27) Ngeci, bimanga bakoboka mu ñababa yakama.—Kuj 7:9, 10, 14.
(Loma 8:21) ngeci bya kutanga ku litangwa limo bikapatuke ku bundungo bwa kutsa, co bikakale na bumpau bwa kupatuka kwa bana ba Njambi.
w12 3/15 23 ¶12
Bwaeleleni Omwo ya Kukala na Lilabelelo
12 Yesu mwakayula ha Myaka 1,000, “bya kutanga” bikapatuka. Ha simbu oyo, ‘bana ba Njambi’ bakabasholola mubakapangela hamo na Kilisitu ha kupwa tupilisitu. Bakakwasa banu bakalikuwe bibezikiso bya ñombelo ya Yesu. Banu babakayula mu Bumwene bwa Njambi bakapatuka ku bubi na ku kutsa. Baje bakononoka, ‘bakapatuka ku bundungo bwa kutsa.’ Nga bakatwalelelao kupwa ba kulongwa kuli Yehova ha myaka 1,000 na ha ceseko ca mamaneselelo, co mazina abo bakawasoneka mu “libulu lya mwonyo.” Co bakakala na “bumpau bwa kupatuka kwa bana ba Njambi.” (Kuj 20:7, 8, 11, 12) Eli lilabelelo linapu lyalibwa.
Kutondesesa Bisimpi bya Seo
(Loma 8:6) Nga cizango ca busitu cikutwamenena, co fweto yaco kutsa, oloni nga cizango ca Munzinzime cikutwamenena, co fweto yaco inapu mwonyo na kwoloka.
Mwanuka ndi?
Kuliseza muka kuli mukati ka kutabesa “cizango ca busitu” kututwamenena na kutabesa “cizango ca munzinzime” kututwamenena? (Loma 8:6)
Munu uje washaka ngwendi byuma bya busitu bimutwamenene, akabisimutwiya na kubilinga simbu yoshe. Oloni munu uje ashaka ngwendi byuma bya ku sipilitu bimutwamenene, simbu yoshe ashungwiya na kusinganyeka byuma bya bunjambi. Byuma bya busitu bitwala ku kutsa, oloni byuma bya ku sipilitu bitwala ku mwonyo na kwoloka.—w16.12, lipu. 15-17.
(Loma 8:26, 27) Mu ngila eyi bene Munzinzime aija na kutukwasa mu kuzeya kwetu. Omwo kutuzibuka bati tunapande kulombela, oloni Munzinzime akalambelela kuli Njambi na majwi akukemanga aje kutwasa kutumbula. 27 Co Njambi uje amona mu bimbunge byetu, azibuka [biulumbununa] Munzinzime, omwo Munzinzime akalambelela kuli Njambi hali banu bendi ngwe ku cizango cendi.
w09 11/15 7 ¶20
Malombelo Eni Akasholola Ngwawo Mwapwa Banu ba Cifwa Muka?
20 Simbu imo kutwesi kuzibuka bya kulombela. Paulu wendekele ngwendi: ‘Omwo kutuzibuka bati tunapande kulombela, oloni Munzinzime [sipilitu ya kujela] akalambelela kuli Njambi na majwi akukemanga aje kutwasa kutumbula. Oloni Njambi uje amona mu bimbunge byetu, azibuka biulumbununa Munzinzime.’ (Lom 8:26, 27) Yehova watabesele malombelo amangi bawasoneke mu Bisoneka. Co akatambula malombelo etu na kuakumbulula. Njambi azibuka banu mwamubwa, co lalo azibuka na byuma byendekele kuli baka-kusoneka Mbimbiliya kupangesa sipilitu yendi. Yehova akakumbulula malombelo etu omwo sipilitu imulambelela. Nga tuzibuka mwamubwa Lijwi lyendi, co kutupwila kwakwasi kuzibuka byuma bitunapande kulomba.
Kutanda Mbimbiliya
(Loma 7:13-25) Oloni kuma eci calumbunuka ngeci cije cacibwa cikeco canenele kutsa kuli yange ndi? Keti ngoco embwe. Eci calingiwile omwo bubi, ha kupangesa cije cacibwa, bubi bwanenele kutsa kuli yange, ngeci cifwa cabwo cisholoke ngeci mwa busunga bunapu bubi. Co mu ngila ya kushika oku bubi bunasholoka kupwa bwabubi manene. 14 Twazibuka ngwetu Lishiko linapu lya ku munzinzime, oloni yange njinapu munu wa mubila wa situ, wa kulandesa ngwe ndungo ku bubi. 15 Kunjizibuka binjilinga, omwo kunjesi kulinga bije binjishaka kulinga, oloni njikalingi bije njazinda. 16 Omo nga njilinga bije kunjashakele kulinga, eci cimwesa ngeci njataba ngwange Lishiko linapu lya busunga. 17 Ngeci bene, keti yange mwa busunga njili na kulinga cuma eci, oloni bubi buje buli na kuyoya muli yange. 18 Omwo njazibuka ngwange kumwesi bubwa muli yange, mu busitu bwange. Nameme muli yange muli lishungu lya kulinga byabibwa, oloni kunjasa kulingamo. 19 Omwo kunjesi kulinga bubwa buje bunjishaka kulinga, oloni njikalingi bubi buje kunjashakele kulinga. 20 Nga njilinga cije kunjashakele kulinga, eci cinalumbunuka ngeci, keti yange njili na kucilinga, oloni bubi buje buli muli yange bukebwo buli na kucilinga. 21 Ngeci bene, njinawana ngwange lishiko eli lili na kupanga, omwo njishaka kulinga byabibwa, co haje bene bubi busholoka. 22 Omwo njibwaelela mu Lishiko lya Njambi mukati ka mubila wange. 23 Oloni njimona lishiko lyeka lili na kupanga mu mubila wange, lishiko lije lili na kulwisa lishiko lije linjinataba mu mbunge yange. Linanjipwisa cinzinda ca lishiko lya bubi lije lili na kupanga mu mubila wange. 24 Yange munu wa kubindama. Iyajo akanjamena ku mubila ou wa kutsa? 25 Kukandelela kuli Njambi hali Mwene yetu Yesu Kilisitu. Ngeci bene, omu mukemwo munjinafu, ange lika njasa kupangela lishiko lya Njambi na mbunge yange lika, oloni busitu bwange bupangela lishiko lya bubi.
FEBRUARY 25–MARCH 3
BISIMPI BYA SEO BYA MU LIJWI LYA NJAMBI | LOMA 9-11
“Cisimo ca Muti wa Olive”
(Loma 11:16) Nga mbazubwila ya kulibanga ya likende bayana kuli Njambi, ngeci bene, na mukasha woshe wa mutunu unapu wendi lalo, nga mizi ya muti baikombelela kuli Njambi, co na minango lalo inapu yendi.
‘Mana a Njambi Apwa Akuloba Manene’
13 Kapositolo Paulu wesekesele batekulwila ba Abilahama ku minango ya muti wa olive. (Lom 11:21) Ou muti wa olive wimanena kulishulisilila kwa cikumiyo ca Njambi na Abilahama. Mizi yowu muti yapwa ya kujela, co imanena Yehova mwafwa ikeye muka-kwana mwonyo ku Baisalele ba ku sipilitu. (Isa 10:20; Lom 11:16) Nsina ya muti wa Olive imanena Yesu uje wapwa mutekulwila wa seo wa Abilahama. Minango yoshe ya muti imanena ba kubwabesa ba kupwa 144,000.
(Loma 11:17) Oloni nga minango imo ya ku muti wa olive wa kukuna banaijokolako, co munango wa olive wa mu shwata banaunungilako. Yeni keti mu Bayunda munapu ngwe uje muti wa olive wa mu shwata, co ololo munalipangela yoyesi yaibwa ya munzinzime wa Bayunda.
(Loma 11:20, 21) Eci cinapu ca busunga. Babajokweleko omwo kubakulaelele, oloni yeni munatumbama mu mwela weni omwo munakulaela. Oloni keti mulyalese ha biyongola ebi, munapande kuziba lyoba. 21 Omwo nga Njambi katetelele Bayunda, baje banapu ngwe minango ya cisemwa, muyongola ngweni akamitetela ndi?
‘Mana a Njambi Apwa Akuloba Manene’
15 Bika byalingile Yehova mangana ashulisilile biyongola byendi? Paulu wendekele ngwendi Njambi wambatele minango ya muti wa olive wa mushwata nakuinungila ku minango ya muti wa olive wa kukuna mangana bengise ije minango yapamukile. (Tandeni Loma 11:17, 18) Ngeci, baka-Kilisitu ba kubwabesa baje kubapwile Bayunda babanungililile ku muti wa olive wa cifwisa. Ngeci, bapwile batekulwila ba Abilahama nambe ngwetu mbuto yendi. Ha kulibanga bapwile ngwe minango ya muti wa olive wa mushwata, co kubasele kukala mu cikumiyo ca Abilahama. Oloni Yehova wabashokwelele ngila ya kupwa Bayunda ba ku sipilitu.—Lom 2:28, 29.
(Loma 11:25, 26) Kuli busunga bwakushwekesa, bakwetu, buje bunjishaka ngeci mubuzibuke, omwo bukamibindika kuyongola ngweni munapu bakunyanyama. Oku kukaluwa kwa bimbunge bya banu ba Isalele keti ngwe kwa myaka yoshe embwe, oloni kukakalako lika noho baje keti Bayunda banapumo kwija kuli Njambi. 26 Eyi ikeyo ngila banu ba Isalele boshe bakabamena nayo. Ngwe mubyendeka bisoneka ngwabyo,“Muyoyesi akatunda ku Siyone, co akatundisa kupenga-penga kwoshe ku batekulwila ba Yakomba.
‘Mana a Njambi Apwa Akuloba Manene’
19 Biyongola bya Yehova ha Baisalele ba ku sipilitu bili na kulishulisilila mu ngila ya kulitila. (Nga 6:16) Paulu wendekele ngwendi: ‘Banu ba Isalele boshe bakabamena.’ (Lom 11:26) Ha simbu yanangula Yehova, “banu ba Isalele boshe” ba ku sipilitu bakapwa bimyene na tupilisitu mwilu. Byai byasa kwonowesa cizango ca Yehova kulingiwa.
Kutondesesa Bisimpi bya Seo
(Loma 9:21-23) Uje [muka-kumunga] bindeo ali na moko ya kupangesa buje buma mwoshe mwashakela, asa [kumunga] bindeo bibali ha cipama cimo lika ca buma, ndeo imo ya kupangesa byuma bya seo, co ndeo ikwabo ya kupangesa byuma byangoco. 22 Co eci cinapu ca busunga ha bije byanalingi Njambi. Njambi washakele kumwesa bukalu bwendi na kusholola nzili yendi. Oloni wasimpile na kuyanda hali baje wakengele na bukalu, baje wapandele kunyongesa. 23 Co lalo washakele kusholola bumpau bwendi bwakama, buje wetilile hali yetu baje amwesa mema ku mbunge, yetu baje nabwaesa ngeci tutambule bumpau bwendi.
Tabeseni Yehova Amimunge
5 Batico nga munu abyana kumumunga kuli Muka-kumunga Wakama? Njambi akapangesa bati nzili yendi? Nga buma kubwasiwa kubumunga mwashakela babenyabwo, co nasa kumungao cuma ceka nambe kubumbila kuti. Mulonga bakawana muka-kumunga, nga buma kubwesi bwino. Oloni yetu kutwesi kwana mulonga Muka-kutumunga. (Kwi 32:4) Munu nga kataba kumumunga kuli Yehova, mulonga unapu wendi. Ngwe muka-kumunga, Yehova akatumungu mu bingila bya kulisezaseza kwesekesa nomu mutukatambwilamo binangulo byendi. Baje bakataba kubamunga, bakalikuwu bibezikiso byabingi. Cakumwenako, baka-Kilisitu ba kubwabesa bapwa ‘bindeo bya mema ku mbunge,’ co banabamungu kupwa ‘bindeo bya bipangi bya seo.’ Oloni baje babyana kubamunga mwamubwa bakapu ‘bindeo bya bukalu bibakanyongesa.’—Lom 9:19-23.
(Loma 10:2) Omwo nji mukaleo wabo ngeci bakebo banalyana manene kuli Njambi, oloni kulyana kwabo keti kwa mana a busunga.
it-1 1260 ¶2
Lifuwa na Nzanzu
Nzanzu ha Byuma Byabibi. Munu asa kukala na nzanzu ha byuma bije kubizibisa Njambi kubwaha, oku kazibuka ngwendi byalinakulinga byabibi. Mukemwo mubafwile na Bayunda ba mu cita ca myaka ca kulibanga. Bashakele kulipwisa baka-busunga ha kukabangeya Mashiko anene Njambi kuli Mosesa. Oloni Paulu wendekele ngwendi bakele na nzanzu ha byuma byabibi, mwafwa kubazibukile busunga. Ngeci, kubapwile baka-busunga ngwe mwashakele Njambi. Bayunda bapandele kumona ngwabo bilinga byabo byapwile byabibi na kutengulukila kuli Njambi kwitila muli Kilisitu mangana bapwe baka-busunga na kupatuka ku lishiko. (Lom 10:1-10) Saulu wa ku Talisi uje wakupwile Paulu nendi mukemwo mwafwile. Wakele na nzanzu ha futisi ya Bayunda co ‘wayandesele cikungulukilo ca Njambi kujeneka mema ku mbunge, co wesekele na nzili yendi yoshe ngeci acinyongese.’ Wakabangeyeye manene mashiko oshe, co kalimwene kukala na “mulonga.” (Nga 1:13, 14; Fil 3:6) Nzanzu yakele nayo Paulu ha futisi ya Bayunda yapwile yaibi. Oloni wakele na mbunge yaibwa nameme walingile byabibi oku kuzibuka. Ngeci, Yehova wamuzibilile mema ku mbunge kwitila muli Kilisitu na kumunena mu bulombelo bwa busunga.—1Ti 1:12, 13.
Kutanda Mbimbiliya
(Loma 10: 1-15) Bakwetu, njishaka manene na mbunge yange yoshe ngeci banu bange boboke. Njili na kubalombelela manene kuli Njambi. 2 Omwo nji mukaleo wabo ngeci bakebo banalyana manene kuli Njambi, oloni kulyana kwabo keti kwa mana a busunga. 3 Omwo kubazibukile ngila ije yakapwisa Njambi banu ngeci bapwe baka-busunga ku mesho endi, oloni bakebo baneseka kupangesa ngila yabo babenya, ngeci bene, kubasele kulyana bakebo babenya ku ngila ya Njambi ije yakapwisa banu ngeci bapwe baka-busunga. 4 Omwo Kilistu namanesa Lishiko, ngeci munu woshe uje akulaela bamupwise muka-busunga ku mesho a Njambi. 5 Mosesa wasonekele ebi ha kupwisa munu muka-busunga ku mesho a Njambi ha kwononoka Lishiko ngwendi, “Woshe uje ononoka Lishiko akayoya.” 6 Oloni bisoneka byendeka ha kupwa muka-busunga ku mesho a Njambi ha kukulaela ngwabyo, “Keti ulihule yobe babenya ngwobe, iyajo akalonda mwilu?” (Eci cinapu ngeci, uli na kushulula Kilisitu hasi). 7 “Nambe keti ulihule ngwobe, iyajo akashelumuka mwisi ya kaye?” (Eci cinapu ngeci, uli na kutundisa Kilisitu ku kutsa). 8 Oloni ebi bili na kwendeka ngeci, “Lijwi lya Njambi lili kuyei nobe, lili ku kanwa kobe na mu mbunge yobe” likelyo lijwi lya kukulaela lije tuli na kwambulula. 9 Nga ulitabela ngwobe Yesu ikeye Mwene na kukulaela ngeci Njambi wamusangwile ku batsi, ukoboka. 10 Omwo ha kukulaela kwetu mukemwo banatupwisa baka-busunga ku mesho a Njambi, ha kulitabela kwetu mukemwo tukoboka. 11 Bisoneka byendeka ngwabyo, “Woshe uje akulaela kuli ikeye kakazibi shwamwa.” 12 Omwo eci cinendeka ha banu boshe, omwo kukwesi kwangula hakati ka Bayunda na baje keti Bayunda, Njambi napu umo Shukulu Kalunga wa boshe, ikeye akabezikisa boshe baje batambeka kuli ikeye. 13 Omwo ngwe bisoneka byendeka ngwabyo, “Woshe atambeka ha lizina lya Mwene akoboka.” 14 Oloni batambeka batijo kuli ikeye ngeci abakwase nga kubakulaelele? Batijo bakakulaela nga kubazibile lijwi? Co batijo baziba lijwi nga kubalyambulwile? 15 Co batijo bambulula lijwi nga tunganda kubabatumine? Ngwe mubyendeka bisoneka ngwabyo, “Kunapu kubwaelela kwa kukomokesa omwo tunganda baija na kunena bin̄anda byabibwa.”