CILONGESA 10

Biwano bya Bakaleho ba Yehova Bimikwasa Bati?

Libulu lya Kupulinta

Kuma mwayaho laja ku biwano bya Bakaleho ba Yehova ndi? Nga kanda mukungulukeho laja nabo, hamo munasa kuziba lyoba kukakunguluka nabo lwa kulibanga. Hamo munasa kulihula ngweni: ‘Bika bikalingiwa okwo ku biwano? Mwafwa bika byapwa bya seho? Bika binjinapande kuilako?’ Muno mu cilongesa, tusimutwiya omwo kukunguluka hamo kukanyamesela busamba bweni na Njambi na kumikwasa mu byuma byeka.

1. Mwafwa bika kukunguluka kwapwa kwa seho?

Muka-kusoneka Mbimbiliya umo wendekele seho ya kukunguluka ngwendi: “Njikashangazala Shukulu Kalunga mu mbunga yakama.” (Myaso 26:12) Mu ngila imolika, Bakaleho ba Yehova nabo bakabwahelela manene mubakakunguluka hamo. Calumingo na calumingo, bakakunguluka mu kulemesa Njambi, kwimba myaso na kulombela. Co ha bisimbu bimo mu mwaka, bakakala na biwano byakama.

2. Bika bimukalilongesa ku biwano byetu?

Ku biwano byetu, ‘bakalumbununa Lijwi lya Njambi mangana banu base kulizibisisa mwamubwa.’ (Tandeni Nehemiya 8:8.) Co lalo, ku biwano bitukakala nabyo mukalilongesa mwamubwa bifwa byabibwa byakala nabyo Yehova. Omwo muzibuka ngweni Njambi wamizema, co busamba bweni nendi bukanyama manene. Mukamona lalo ngweni Yehova asa kumikwasa mangana muyoye mwamubwa.—Isaya 48:17, 18.

3. Kusimutwiya na banu bamukawana ku biwano kumikwasa bati?

Yehova ashaka ngwendi ‘tulyake mbunge umo na mukwabo na kulikwasa umo na umo na kumwesa cizemo na kulinga mwamubwa. Keti tulikele kulikungulula hamolika.’ (Vahevelu 10:24, 25) Ku biwano, mukawana banu baje balizema umo na mukwabo, co lalo bashaka kulilongesa bya Njambi ngwe yeni. Bakalitakamesa umo na mukwabo kupangesa majwi a mu Mbimbiliya. (Tandeni Loma 1:11, 12.) Mukasa kusimutwiya na banu bamo baje banakolesa nameme banaliwana na bukalu. Ngeci, kuli byuma byabingi byatondela Yehova ngwendi tukunguluke.

TONDESESENI

Bika bikalingiwa ku biwano bya Bakaleho ba Yehova? Bika bitunapande kulingila mwoshe mutwasela mangana tukakungulukeko?

4. Byuma bikalingiwa ku biwano bya Bakaleho ba Yehova

Mu simbu ya tupositolo, baka-Kilistu bakele na kukunguluka hamo mangana balemese Yehova. (Loma 16:3-5) Tandeni Kolose 3:16, na kusimutwiya ha cihula cinatako:

Baka-Kilistu ba kulibanga bakele na kulemesa bati Yehova?

Ano matangwa, Bakaleho ba Yehova bakakunguluka mangana balemese Njambi. Kengeni VIDIO ije imwesa mubyafwila biwano bya Bakaleho ba Yehova. Kengeni lalo cikupulo cimwesa banu baje banakunguluka ku biwano bya cikungulukilo na kusimutwiya ha bihula binatako.

VIDIO: Bika Bikalingiwa ku Njibo ya Bumwene? (2:12)

Byuma muka bikalingiwa ku Njibo ya Bumwene bije bili ku mukanda wa Kolose 3:16?
Byuma muka bimunamono mu vidio nambe ha cikupulo bije binamizibisa kubwaha?

Tandeni 2 Kolinte 9:7, na kusimutwiya ha cihula cinatako:

Mwafwa bika Bakaleho ba Yehova kubesi kufwetesa bimbongo ku biwano byabo?

Simutwiyeni na munu imukalilongesa nendi byuma bimulilongesa ku biwano cino calumingo.

Mumona ngweni biñanda muka bimukalikuwa manene ku biwano?

Muzibuka ndi?

Ha webusaiti ya jw.org, muwana myela ibakalingila biwano na simbu ibakabilingi, mu kaye koshe.

Bikupulo: Bikupulo bya ku Njibo ya Bumwene simbu kanda biwano bishangumuke, ha simbu ya biwano na munima ya biwano. Ebi bikupulo banabyaka bisona A kutwala D.

A. Ndolome ali na kwendeka ñanda ya Mbimbiliya ha butenda ha simbu ya biwano.

Ku biwano byetu kukakala biñanda, bimweso na mavidio. Biwano bikashangumuka na mwaso na lilombelo, co lalo bikahu na mwaso na lilombelo
Simbu imo kukakala bihula, co baje bashaka kukumbulula bakakumbulula
Banu boshe basa kukakunguluka, ipwe binaanga, bazike, tukulukazi nambe banike
Ku biwano byetu kutwesi kufwetesa bimbongo. Bakaleho ba Yehova kubesi kufwetesa baje bakaija na kukunguluka nabo nambe kwitisamo lilonga

5. Munapande kulifwita mangana mukunguluke simbu yoshe

Yesu na baka-naanga yendi bakele na kwenda matangwa atatu kuya ku ciwano cije cakeleko mwaka na mwaka. Bakele na kukanduka na kusikumuka minkinda kutunda ku Nazaleta kuya ku Yelusalema. Tandeni Luka 2:39-42, na kusimutwiya ha bihula binatako:

Mumona bati, kuma banu kubapandele kulifwita mangana baye ku Yelusalema ndi?
Bika bimunapande kulingila mwoshe mumwasela mangana muye ku biwano?
Kuma kulinga ngoco kwa seho ndi? Mwafwa bika?

Bikupulo: Yosefa, Maliya, Yesu, na shongo ya Yesu umo bali na kulibwahesela bungenzi bwa kuya ku Yelusalema. 1. Yosefa ali na kwaka bitenga ha cimulu, co Maliya ali na kubwahesa byakulya. 2. Mapu imwesa ngila ya kutunda ku Nazaleta kuya ku Yelusalema.

Mbimbiliya ngwayo kukunguluka hamo mu kulemesa Njambi kwapwa kwa seho. Tandeni Vahevelu 10:24, 25, na kusimutwiya ha cihula cinatako:

Bika bitunapande kukungulukila simbu yoshe?

BAMO BAKENDEKA NGWABO: “Kukwesi seho ya kukunguluka hamo. Munu asa kulitandela Mbimbiliya nambe ali ku njibo yendi.”

Cisoneka muka nambe mwanja muka wa mu Mbimbiliya uje umwesa ngwawo Yehova ashaka ngwendi tukunguluke-kunguluke hamo?

SIMPI YAKAMA

Kuya ku biwano kumikwasa muzibuke mwamubwa Yehova na kukanyamesa busamba bweni nendi na kumulemesa hamo na bangamba bendi bakwabo.

Kwitulukamo

Mwafwa bika Yehova ashaka ngwendi tukunguluke-kunguluke hamo?
Bika bimukalilongesa ku biwano bya Bakaleho ba Yehova?
Ebi biwano byasa kumikwasa bati lalo?

Litangwa licinahu cilongesa:

Cilengo

Yeni ku biwano na kukalizibukako na bamo

Cilengo Cikwabo:

Your other goal

WANENI BIKWABO

Batico nga mukazibi lyoba kuya ku biwano? Kengeni vidio ije imwesa byuma byakwasele munalume umo ashake manene kukunguluka.

Kutukebala Mubatutambwilile (4:16)

Moneni byuma byalingisile mukwenje umo alikuwe biwano na byuma byalingile mangana atwaleleleho kukunguluka.

Njashakele Manene Biwano (4:33)

Tandeni biñanda bimwesa mubakalizibila banu bamo mubakai ku biwano.

“Seho ya Kukunguluka Hamo ku Njibo ya Bumwene” (Ñanda ya ha webusaiti)

Tandeni ñanda ije imwesa mwatengulukilile munalume umo uje wakele mu cibunga ca bikenya omwo washangumukile kukunguluka na Bakaleho ba Yehova.

“Kunjakele na Kuseza Buta Bwange” (Kaposhi ka Kukengela ka July 1, 2014)