Yesu Asanguka

Yesu mwatsile, munalume wa kufuka wa lizina lya Jozefu walombele Pilato lisesa lya kutundisa mubila wa Yesu uje wakele ha citi. Jozefu wabungilile mubila wendi mu nanga ya lineni yaibwa na kuukwita byuma bya lwengo lwalubwa na kuwaka mu mbumbo yaiha. Wasilikile libwe lyakama ku cikolo ca mbumbo. Tupilistu bakama balekele Pilato ngwabo: ‘Tuli na kutewa ngwetu bandongesi bendi bamo bakambata mubila wendi na kwendeka ngwabo nasanguka.’ Ngeci Pilato wabalekele ngwendi: ‘Yeni mukasilikeko manene libwe na kwakako baka-kunyunga.’

Munima ya matangwa atatu, banakazi bamo baile ku mbumbo, co bakawanene ngwabo banatundisako libwe. Mubakobelele mukati, bawanenemo kangelo uje wabalekele ngwendi: ‘Keti muzibe lyoba. Yesu nasanguka. Yeni mukaleke bandongesi bendi bakaliwane nendi ku Galileya.’

Maliya Magadalena washatukilile kuli Pita na Iwano. Co wakabalekele ngwendi: ‘Kuli umo nambata mubila wa Yesu!’ Pita na Iwano bashatukilile ku mbumbo. Oloni na bimo byahi bibakawanenemo, ngeci belukile ku binjibo byabo.

Maliya mwelukilile ku mbumbo, wakawaneneko tungelo babali banemana mukati, co wabalekele ngwendi: ‘Kunjizibuka kubanatwala Mwata wange.’ Mwamwene munalume umo mu lihya, wasinganyekele ngwendi wapwile muka-kulima, co wamulekele ngwendi: ‘Mwata, njilomba unjileke kuunamutwala.’ Oloni uje munalume mwamusanene ngwendi, “Maliya!” haje bene wazibukile ngwendi wapwile Yesu. Maliya watambekele ngwendi: “Mulongesi!” co wamubumbateyeye. Yesu wamulekele ngwendi: ‘Ya ukaleke bandolome bange ngwobe unanjimono.’ Haje bene Maliya washatukilile kuli bandongesi ba Yesu na kukabaleka ngwendi namono Yesu.

Ha litangwa lije bene, bandongesi babali bakele mu bungezi bwa kutunda ku Jelusalema kuya ku Emausi. Munalume umo wabawanene mu ngila, co washangumukile kwenda hamo nabo na kubehula bibakele na kusimutwiya. Bamwihwile ngwabo: ‘Kuma yobe kuwazibile byuma binalingiwa? Matangwa atatu kunima, tupilistu bakama banatsiile Yesu, oloni banakazi bamo ngwabo nasanguka!’ Uje munalume wabehwile ngwendi: ‘Kuma kumukulahela tupolofweto ndi? Bendekele ngwabo Kristu akatsa, oloni akasanguka.’ Watwaleleleleho kubalumbunwina Bisoneka. Mubetele ku Emausi, bandongesi balombele uje munalume ngwabo aye nabo. Mubakele na kulya mangwezi, walombelelele likende. Co mwamanesele kulombela, banangukile ngwabo wapwile Yesu. Oloni bakakasumuke, noku kwanakobelela bene kwahi.

Baje bandongesi babali bashatukilile ku Jelusalema kuje kwalikungulwilile tupositolo, co bakabalekele byalingiwile. Mubakele kuje, Yesu washolokele kuli boshe. Hakulibanga, tupositolo kubakulahelele ngwabo wapwile Yesu. Oloni wabalekele ngwendi: ‘Taleni mu maboko ange, njikwateni. Basonekele ngwabo Kristu akasanguka ku batsi.’