CILONGESA 04

Njambi Ikeye Iya?

Libulu lya Kupulinta

Kushwa kusañulu, banu banalemesa binjambi ba kuliseza-seza. Oloni Mbimbiliya inendeka ngwayo kwakala Njambi “wakama kuhyana binjambi boshe.” (2 Mizimbu 2:5) Ou Njambi iya? Co bika byamulingisa apwe wakama kuhyana binjambi boshe babakalemesa banu? Muno mu cilongesa, tusimutwiya byuma byashaka Njambi ngwendi tuzibuke hali ikeye.

1. Lizina lya Njambi lyapwa lika, co tuzibuka bati ngwetu ashaka ngwendi tuzibuke lizina lyendi?

Mu Mbimbiliya, Njambi natumbula lizina lyendi ngwendi: “Yange Yehova. Likelyo lizina lyange.” (Tandeni Isaya 42:5, 8, NWT.) “Yehova” lyapwa lizina lije lyatunda ha lizina lya Cihebelu. Eli lizina linasa kulumbununa ngwalyo “Akalingisa byuma bikaleko.” Yehova ashaka ngwendi tuzibuke lizina lyendi. (Kutuuka 3:15) Tuzibuka bati ngoco? Mubasonekele Mbimbiliya, lizina lya Yehova balisonekele lwa kutubakana 7,000a. Yehova lyapwa lizina lya “Njambi umolika wa busunga.” Wapwa Njambi wa mwilu na hano hasi.—Yowano 17:3.

2. Mbimbiliya inendeka bika hali Yehova?

Mbimbiliya ngwayo nameme banu bakalemesa binjambi ba kuliseza-seza, oloni Yehova ikeye lika Njambi wa busunga. Bika biinendekela ngoco? Mwafwa Yehova ikeye lika wakala na nzili ya kuyula byuma byoshe, ngeci wapwa “Wahakamwa Manene hasi hoshe.” (Tandeni Myaso 83:18, NWT.) Wapwa “Muka-nzili yoshe,” kulumbununa ngwabo ali na nzili ya kulinga byoshe-byoshe byashaka kulinga. Yehova ikeye “watangele byuma byoshe.” Watangele lilu na kaye na byuma byoshe byakalamo. (Kujombolola 4:8, 11) Yehova ikeye lika wakalako simbu yoshe, co atwalelelaho kukalako simbu yoshe.—Myaso 90:2.

TONDESESENI

Kuliseza muka kuli mukati ka lizina lya Njambi na majwi aje amwesa bukama bwendi? Njambi nasholola bati lizina lyendi ku banu, co bika byatondela ngwendi banu balizibuke?

Munalume natala mwilu butsiki. Lizina lya Yehova limoneka ngwe lili mu bukambwila.

3. Njambi wakala na mazina a bulemu amangi, oloni wakala na lizina lyendi mpundu

Kengeni VIDIO ije imwesa kuliseza kuli mukati ka lizina lya munu lya bulemu na lizina lyendi mpundu. Kutundaho, simutwiyeni ha cihula cinatako.

VIDIO: Wakala na Mazina a Bulemu Amangi, Oloni Wakala na Lizina Lyendi Mpundu (0:41)

Kuliseza muka kuli mukati ka lijwi lya kufwa ngwe “Mwene” na lizina mpundu lya munu?

Mbimbiliya imwesa ngwayo banu bakalemesa binjambi nambe bashukulu babangi. Tandeni Myaso 136:1-3, na kusimutwiya ha cihula cinatako:

Iya “Njambi ya binjambi” na “Shukulu ya bashukulu”?

4. Yehova ashaka ngwendi muzibuke lizina lyendi na kulipangesa

Bika bimwesa ngwabyo Yehova ashaka ngwendi tuzibuke lizina lyendi? Kengeni VIDIO na kusimutwiya ha cihula cinatako.

VIDIO: Kuma Njambi Wakala na Lizina Ndi?—Mutamba wa Vidio (3:11)

Cikupulo ca mu vidio ya ‘Kuma Njambi Wakala na Lizina Ndi?—Mutamba wa Vidio.’ Munalume amona lizina lya Njambi, lya Yehova ku mukanda wa Myaso 83:18 mu Mbimbiliya ya ‘King James Version’ ya mu 1611.

Bika twendekela ngwetu Yehova ashaka ngwendi tuzibuke lizina lyendi?

Yehova ashaka ngwendi banu bapangese lizina lyendi. Tandeni Loma 10:13, na kusimutwiya ha bihula binatako:

Mwafwa bika kupangesa lizina lya Yehova kwapwa kwa seho?
Mukalizibi bati nga munu anuka lizina lyeni na kumisanesalyo?
Musinganyeka ngweni Yehova aliziba bati nga mupangesa lizina lyendi?

5. Yehova ashaka ngwendi mushwenye kuyehi nendi

Munakazi umo wa ku Cambodia wa lizina lya Soten wendekele ngwendi kuzibuka lizina lya Njambi kunamulingisa apwe wa kubwahelela. Kengeni VIDIO na kusimutwiya ha cihula cinatako.

VIDIO: Njashakezekele Njambi wa Busunga (8:18)

Bikupulo: Bikupulo bya mu vidio ya ‘Njashakezekele Njambi wa Busunga.’ 1. Soten natumbama mwisi ya muti, co natala mwilu oku alombela kuli Njambi. 2. Ndolome Herold aleka Soten ngwendi Yehova likelyo lizina lya Njambi.

Kwesekesa na vidio, kuzibuka lizina lya Njambi kwakwasele bati Soten?

Simbu kanda tulikute busamba na munu, kakangi tukazibuka tahi lizina lyendi. Tandeni Yakomba 4:8a, na kusimutwiya ha bihula binatako:

Yehova ashaka ngwendi mulinge bika?
Mwafwa bika kuzibuka lizina lya Njambi na kulipangesa kutukwasa tushwenye kuyehi nendi?

BAMO BAKENDEKA NGWABO: “Njambi wapwa umolika, mwoshe-mwoshe mubamusanena banu mukemwo.”

Bika bimilingisa mukulahele ngweni Yehova likelyo lizina lya Njambi?
Kuma Njambi ashaka ngwendi tupangese lizina lyendi ndi? Muzibuka bati ngoco?

SIMPI YAKAMA

Yehova likelyo lizina lya Njambi umolika wa busunga. Co ashaka ngwendi tuzibuke lizina lyendi mangana twase kushwenya kuyehi nendi.

Kwitulukamo

Yehova naliseze bati na binjambi beka babakalemesa banu bamo?
Mwafwa bika kupangesa lizina lya Njambi kunapu kwa seho?
Bika bimwesa ngwabyo Yehova ashaka ngwendi tushwenye kuyehi nendi?

Litangwa licinahu cilongesa:

Cilengo

Omwo mwendeka bya Njambi, pangeseni lizina lyendi lya Yehova.

Cilengo Cikwabo:

Your other goal

WANENI BIKWABO

Byuma bitanu bitulingisa tukulahele ngwetu Njambi kwakala.

“Kuma Njambi Kwakala Ndi?” (Ñanda ya ha webusaiti)

Tandeni biñanda bitulingisa tukulahele ngwetu Njambi kwakala simbu yoshe.

“Iya Watangele Njambi?” (Kaposhi ka Kukengela ka August 1, 2014)

Tandeni biñanda bimwesa seho ya kupangesa lizina lya Njambi nameme kutuzibuka mubakele na kulitumbwila kusañulu.

“Yehova Ikeye Iya?” (Ñanda ya ha webusaiti)

Kusanesa Njambi lizina lyendi kunapu kwa seho ndi? Tandeni biñanda bimwesa ngwabyo Njambi wakala na lizina lyendi mpundu.

“Njambi Wakala na Mazina Angahi?” (Ñanda ya ha webusaiti)

a Nga mushaka kuzibuka byabingi ha byuma bililumbununa lizina lya Njambi, na byuma binalingisa baka-kunungulula bamo bajeneke kulisoneka mu Bimbimbiliya bibananungulula, taleni Litaba Zeekelizwe A4 mu Mbimbiliya ya Bibele ya Toloko ya Lifasi Lelinca.